ຂ່າວຫຼ້າສຸດ

ຄ້າຍມວຍຕະຫຼາດຫ້ວຍຫົງ ພ້ອມເປັນສະຖາທີ່ເຝິກຊ້ອມນັກມວຍ

214 04 ກ.ຍ. 2018 ວົງຈອນກີລາ
ຄ້າຍມວຍຕະຫຼາດຫ້ວຍຫົງ ພ້ອມເປັນສະຖາທີ່ເຝິກຊ້ອມນັກມວຍ

    ສະ­ໜາມ​ມວຍ​ຕະ­ຫຼາດ​ຫ້ວຍ​ຫົງ ເມືອງ​ຈັນ­ທະ​ບູ​ລີ ນະ­ຄອນ­ຫຼວງ​ວຽງ​ຈັນ (ນວ) ໄດ້​ເປີດ​ນຳ​ໃຊ້​ວັນ​ທີ 1 ກັນ­ຍາ 2018 ເພື່ອ​ກຽມ​ສ້າງ​ນັກ​ມວຍ​ສາຍ​ອາ­ຊີບ ແລະ ຈັດ​ແຂ່ງ­ຂັນ​ຢ່າງ​ຕໍ່​ເນື່ອງ ພ້ອມ​ກັບ​ຈະ​ເປັນ​ບ່ອນ​ກຽມ​ຄວາມ​ພ້ອມ​ໃຫ້​ນັກ­ກີ­ລາ ນວ ກ່ອນ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ 11 ຫຼື ຊຽງ​ຂວາງ​ເກມ ທີ່​ແຂວງ​ຊຽງ​ຂວາງ ເປັນ​ເຈົ້າ­ພາບ​ໃນ​ທ້າຍ​ປີ​ນີ້.

    ທ່ານ ສົມ​ພອນ ສອນ​ດາ­ລາ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ກ່າວ​ວ່າ: ສະ­ໂມ­ສອນ​ມວຍ​ອາ­ຊີບ ນວ ໄດ້​ຮັບ​ອະ­ນຸ­ຍາດ​ສ້າງ­ຕັ້ງ​ຂຶ້ນ​ປີ 2014 ເປັນ­ຕົ້ນ​ມາ ພາຍ​ໃຕ້​ການ​ຊີ້​ນຳ​ຂອງ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ແລະ ໄດ້​ມີ​ການ­ເຄື່ອນ­ໄຫວ​ໃນ​ຂອບ​ເຂດ ນວ ເຊິ່ງ​ການ​ສ້າງ­ຕັ້ງ​ສະ­ໜາມ​ມວຍ​ຕະ­ຫຼາດ​ຫ້ວຍ​ຫົງ​ນີ້​ຂຶ້ນ ກໍ່​ເພື່ອ​ໃຫ້​ມີ​ສະ­ຖານ­ທີ່​ເຝິກ­ຊ້ອມ ແລະ ແຂ່ງ­ຂັນ​ກີ­ລາ​ມວຍ​ຢ່າງ​ຕໍ່​ເນື່ອງ ທັງ​ເປັນ​ການ​ສົ່ງ­ເສີມ​ກີ­ລາ​ມວຍ​ລາວ​ໃຫ້​ໄປ​ສູ່​ຜົນ­ສຳ­ເລັດ.

    ໃນ​ໂອ­ກາດ​ເປີດ​ສະ­ໜາມ​ມວຍ​ຕະ­ຫຼາດ​ຫ້ວຍ​ຫົງ​ຄັ້ງ​ນີ້ ໄດ້​ຈັດ​ແຂ່ງ­ຂັນ​ຕີ­ມວຍ 6 ຄູ່ ເພື່ອ​ໃຫ້​ຜູ້​ເຂົ້າ​ຮ່ວມ​ໄດ້​ຊົມ ແລະ ເຫັນ​ຜົນ­ງານ​ຂອງ​ນັກ​ມວຍ​ລາວ ນອກ​ນັ້ນ ໃນ​ພິ­ທີ​ຍັງ​ໄດ້​ປະ­ມູນ​ເຄື່ອງ­ນຸ່ງ​ຂອງ​ນັກ­ກີ­ລາ​ມວຍ​ຊື່​ດັງ​ຈາກ​ປະ­ເທດ​ລາວ ແລະ ປະ­ເທດ​ໄທ ເປັນ​ການ​ລະ­ດົມ​ທຶນ​ເພື່ອ​ນຳ​ເງິນ​ຄັ້ງ​ນີ້ ໄປ​ຊ່ວຍ­ເຫຼືອ​ຜູ້​ປະ­ສົບ​ໄພ​ນ້ຳ​ຖ້ວມ​ທີ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື.

ຂ່າວທີ່ກ່ຽວຂ້ອງ