ຂ່າວຫຼ້າສຸດ

ມາ​ເລ​ເຊຍ ພິຈາລະນາ​ຍົກເລີກ​ໂຄງການ​ອູດ​ໜູນ​ເງິນສົດ​ໃຫ້​ແກ່​ປະຊາຊົນ

176 03 ກ.ຍ. 2018 ຂ່າວຕ່າງປະເທດ
ມາ​ເລ​ເຊຍ ພິຈາລະນາ​ຍົກເລີກ​ໂຄງການ​ອູດ​ໜູນ​ເງິນສົດ​ໃຫ້​ແກ່​ປະຊາຊົນ

    ສຳນັກ​ຂ່າວສານ ເບີ​ນາ​ມາ ຂອງ​ມາ​ເລ​ເຊຍ ອ້າງ​ຕາມ​ຄຳ​ເວົ້າ​ຂອງ​ທ່ານ ມໍ​ຮາ​ເມັດ ອາ​​ສ​ມິນ ອາລີ ລັດຖະມົນຕີ​ເສດຖະກິດ​ມາ​ເລ​ເຊຍ ໃຫ້​ຮູ້ເມື່ອ​ບໍ່​ດົນ​ມາ​ນີ້​ວ່າ ຕ້ອງ​ໄດ້​ຢຸດຕິ ໂຄງການ​ອູດ​ໜູນ​ເງິນສົດ​ໃຫ້​ແກ່​ປະຊາຊົນ (BR1M).

    ທ່ານ  ມໍ​ຮາ​ເມັດ ອາ​​ສ​ມິນ ອາລີ ກ່າວ​ຕໍ່​ຜູ້​ສື່​ຂ່າວ​ວ່າ BR1M ມີ​ປັດ​ໄຈ​ການ​ສໍ້​ລາດ​ບັງ​ຫຼວງ ໃນ​ເມື່ອ​ວ່າ​ໂຄງການ​ນີ້ ໄດ້​ຮັບ​ການ​ນຳ​ໃຊ້​ຢູ່​ໃນ​ລັດຖະບານ​ຊຸດ​ກ່ອນ ເພື່ອ​ແລກ​ເອົາ​ການ​ສະໜັບສະໜູນ​ຂອງ​ປະຊາຊົນ.

   ທ່ານ  ມໍ​ຮາ​ເມັດ ອາ​​ສ​ມິນ ອາລີ ເວົ້າ​ວ່າ ສະຫະພາບ​ແຫ່ງ​ຄວາມ​ຫວັງ (PH) ພວມ​ຮ່າງ ແນວ​ຄວາມ​ຄິດ​ລິ​ເລີ່ມ​ໃໝ່ ໂດຍ​ສຸມ​ໃສ່​ສະຫວັດດີ​ການ​ໃຫ້​ແກ່​ປະຊາຊົນ ແລະ​ອະນຸຍາດ​ໃຫ້​ປະຊາຊົນ ມີ​ກຳລັງ​ແຮງ​ທາງ​ດ້ານ​ເສດຖະກິດ​ຕື່ມ​ອີກ ເພື່ອ​ຫຼຸດຜ່ອນ​ຄ່າ​ໃຊ້​ຈ່າຍ​ໃນ​ການ​ຄອງ​ຊີບ. ແນວ​ຄວາມ ຄິດ​ລິ​ເລີ່ມ​ນີ້ ຈະ​ໄດ້​ນຳ​ສະເໜີ​ຕໍ່​ສະພາ​ແຫ່ງ​ຊາດ​ມາ​ເລ​ເຊຍ ໃນຕໍ່ໜ້າ​ນີ້.

    ນາຍົກລັດຖະມົນຕີ​ມາ​ເລ​ເຊຍ ມາ​ຮາ​ເທຍ ມໍ​ຮາ​ມັດ ກ່າວ​ຢືນຢັນ​ກ່ອນ​ໜ້າ​ນັ້ນ ວ່າ​ລັດຖະບານ​ຈະ​ຄ່ອຍ​ຫຼຸດ​ລະດັບ​ຈ່າຍ​ໃຫ້ BR1M ກ່ອນ​ທີ່​ຈະ​ຢຸດຕິ​ໂຄງການ​ນີ້​ຢ່າງ​ສິ້ນ​ເຊີງ. ນາຍົກລັດຖະມົນຕີ  ມາ​ຮາ​ເທຍ ມໍ​ຮາ​ມັດ  ເວົ້າ​ວ່າ ການ​ດຳເນີນ​ການ​ຄື​ແນວ​ນັ້ນ ຈະ​ເປັນ​ການ ຊ່ວຍ​ໃຫ້​ປະຊາຊົນ ມີ​ຄວາມ​ເປັນ​ເອກະລາດ​ຫຼາຍ​ຂຶ້ນ ແລະ ຂຶ້ນ​ກັບ​ເງິນ​ອູດ​ໜູນ​ຈາກ​ລັດຖະບານ​ໜ້ອຍ​ລົງ.

    ໂຄງການ BR1M ມີ​ອອກ​ມາ​ຕັ້ງແຕ່​ປີ 2012 ຊຶ່ງ​ຕາມ​ນັ້ນແລ້ວ​ກໍ​ແມ່ນ ລັດຖະບານ​ມາ​ເລ​ເຊຍ ຈະ​ອູດ​ໜູນ​ເປັນ​ເງິນສົດ ໃຫ້​ແກ່​ບັນດາ​ຄອບຄົວ ຫຼື​ບຸກຄົນ ແຕ່ 300 ຣິງ​ກິດ (ເທົ່າ​ກັບ 73 ໂດ​ລາ​ສະຫະລັດ) ໄປ​ຈົນ​ຮອດ 1.200 ຣິງ​ກິດ (ເທົ່າ​ກັບ 292 ໂດ​ລາ​ສະຫະລັດ) ເດືອນ ໂດຍ​ຂຶ້ນ​ກັບ​ລະດັບ​ລາຍ​ຮັບ ຍອດ​ຄ່າ​ໃຊ້​ຈ່າຍ​ທີ່​ຈັດ​ສັນ​ໃຫ້​ແກ່ BR1M ໃນ​ປີ 2018 ມີ​ເກືອບ  7 ຕື້​ຣິງ​ກິດ (ເທົ່າ​ກັບ 1,5 ຕື້​ໂດ​ລາ​ສະຫະລັດ) ໂດຍ​ເປັນ​ການ​ອູດ​ໜູນ​ໃຫ້​ແກ່ 7 ລ້ານ​ກວ່າ​ຄົນ.

 

ຂ່າວທີ່ກ່ຽວຂ້ອງ