ຂ່າວຫຼ້າສຸດ

ນະຄອນ​ໃຫຍ່ 19 ແຫ່ງ​ທົ່ວ​ໂລກ​ໃຫ້​ສັນຍາ​ບໍ່​ປ່ອຍ​ແກ​​ັສ​ເຮືອນ​ແກ້ວ

253 03 ກ.ຍ. 2018 ຂ່າວຕ່າງປະເທດ
ນະຄອນ​ໃຫຍ່ 19 ແຫ່ງ​ທົ່ວ​ໂລກ​ໃຫ້​ສັນຍາ​ບໍ່​ປ່ອຍ​ແກ​​ັສ​ເຮືອນ​ແກ້ວ

    ເມື່ອ​ບໍ່​ດົນ​ມາ​ນີ້ ເຈົ້າ​ຄອງ​ບັນດາ​ນະຄອນ​ໃຫຍ່​ແຖວ​ໜ້າ​ຂອງ​ໂລກ ໄດ້​ໃຫ້​ສັນຍາ ທີ່​ຈະ​ດຳເນີນ​ການ ເພື່ອ​ໃຫ້​ບັນດາ​ອາຄານ​ຫຼາຍ​ຊັ້ນ ບໍ່​ປ່ອຍ​ແກ​​ັສ​ກາກ​ບອນ ພາຍ​ໃນ​ປີ 2050 ແລະ ​ຮັບປະກັນ​ວ່າ ອາຄານ​ຫຼາຍ​ຊັ້ນ​ເຫຼົ່ານັ້ນ ຈະ​ບໍ່​ປະກອບສ່ວນ ກໍ່ໃຫ້ເກີດ​ສະພາບ​ດິນ​ຟ້າ​ອາກາດ​ປ່ຽນແປງ.

    19 ນະຄອນ ທີ່​ເຂົ້າ​ຮ່ວມ​ລົງ​ນາມ​ຂໍ້​ຕົກລົງ​ນັ້ນ ປະກອບ​ມີ ລອນ​ດອນ (ອັງກິດ) ໂຕ​ກຽວ (ຍີ່ປຸ່ນ) ປາ​ຣີ (ຝຣັ່ງ) ໂກ​ເປນ​ຮາກ (ດານ​ມາກ) ສະ​ຕົກ​ໂຮມ (ຊູ​ແອດ) ຊິດ​ນີ (ອົດ​ສະ​ຕຣາ​ລີ) ໂຈ​ຮັນ​ແນ​​ສ​ເບີກ ແລະ ເປ​ໂຕ​ເຣຍ (ອາ​ຟະ​ຣິກ​ກາ​ໃຕ້) ໂຕ​ຮອນ​ໂຕ ມົນ​ຕຣຽນ ແລະ ແວນ​ກູ​ເວີ (ກາ​ນາ​ດາ) ​ລອສ​ແອນ​ເຈີ​ລິ​​ສ ນີວ​ຢອກ ນີວ​ບູ​ຣີ​ພອດ ພອດ​ແລນ ຊານ​ຟຣານ​ຊິ​​ສ​ໂກ ຊານ​ໂຈ​ເຊ ຊັນ​ຕາ​ໂມ​ຣີ​ກາ ແລະ​ນະຄອນຫຼວງ ວໍ​ຊິງ​ຕັນ (ສ ອາ​ເມ​ຣິ​ກາ).

    ເຈົ້າ​ຄອງ​ນະຄອນ 19 ແຫ່ງ​ດັ່ງກ່າວ ເວົ້າ​ວ່າ ເຂົາເຈົ້າ​ຈະ​ນຳ​ເອົາ​ຂໍ້​ຕົກລົງ​ອອກ​ມາ ວ່າ​ເມື່ອ​ຮອດ​ປີ 2030 ທຸກໆ​ອາຄານ​ທີ່​ມີ​ຫຼາຍ​ຊັ້ນ ຊຶ່ງ​ກໍ່ສ້າງ​ຂຶ້ນ​ມາ​ໃໝ່ ຈະ​ບໍ່​ປ່ອຍ​ແກ​​ັສ​ກາກ​ບອນ ແລະ​ບັນດາ​ອາຄານ​ຫຼາຍ​ຊັ້ນ​ທີ່​ມີ​ຢູ່​ໃນ​ປັດຈຸບັນ ກໍ​ຕ້ອງ​ໄດ້​ບັນລຸ​ຄາດໝາຍ​ທີ່​ຄ້າຍຄື​ກັນ​ນັ້ນ ພາຍ​ໃນ​ປີ 2050.

    ຕາມ​ນັ້ນແລ້ວ ບັນດາ​ອາຄານ​ຫຼາຍ​ຊັ້ນ ຈະ​ກ້າວ​ໄປ​ສູ່​ການ​ໃຊ້​ແຫຼ່ງ​ພະລັງງານ​ໝູນວຽນ ແລະ​ໃຊ້​ພະລັງງານ​ໜ້ອຍ ເຊັ່ນ​ການ​ນຳ​ໃຊ້​ດອກໄຟ LED ກັນ​ອຸ່ນ​ຫະ​ພູມ​ໃນ​ລະດູ​ໜາວ ແລະ​ຕິດ​ຕັ້ງ​ແຜງ​ພະລັງງານ​ແສງ​ຕາເວັນ ຢູ່​ເທິງ​ຫຼັງຄາ​ເຮືອນ.

    ນະຄອນ​ຕ່າງໆ ນຳ​ເອົາ​ຄຳ​ສັນຍາ​ດັ່ງກ່າວ​ອອກ​ມາ ເພື່ອ​ຫັນ​ເອົາ​ສັນຍາ​ປາ​ຣີ ກ່ຽວ​ກັບ​ການ ຕ້ານ​ກັບ​ສະພາບ​ອາກາດ​ປ່ຽນແປງ ໃຫ້​ກາຍ​ເປັນຄວາມ​ຈິງ ຊຶ່ງ 195 ປະເທດ ແລະ​ ເຂດ​ແຄ້ວ​​ນ ລົງ​ນາມ​ເມື່ອ​ປີ 2015.  ສັນຍາ​ປາ​ຣີ ວາງ​ຄາດໝາຍ​ຮັກສາ​ລະດັບ​ເພີ່ມ​ຂຶ້ນ​ຂອງ​ອຸ່ນ​ຫະ​ພູມ​ຂອງ​ໜ່ວຍ​ໂລກ ບໍ່​ໃຫ້​ເກີນ​ແດນ 2 ອົງສາ C ເມື່ອ​ທຽບໃສ່​ຍຸກ​ກ່ອນ​ການ​ປະຕິວັດ​ອຸດສາຫະກຳ.

 

ຂ່າວທີ່ກ່ຽວຂ້ອງ