Starbucks ວາງ​ແຜນ “ລຶບ​ບັນຊີ” ກັບ​ທໍ່ດູດ​ເຮັດ​ດ້ວຍ​ຢາງ ຢູ່​ໃນ ສ ເກົາຫຼີ

173 03 ກ.ຍ. 2018 ຂ່າວຕ່າງປະເທດ
Starbucks ວາງ​ແຜນ “ລຶບ​ບັນຊີ” ກັບ​ທໍ່ດູດ​ເຮັດ​ດ້ວຍ​ຢາງ ຢູ່​ໃນ ສ ເກົາຫຼີ

    Starbucks Coffee Korea Co. ແຈ້ງ​ໃຫ້​ຮູ້ເມື່ອ​ວັນ​ທີ 30 ສິງຫາ​ທີ່​ຜ່ານ​ມາ​ວ່າ ບໍລິສັດ​ນີ້​ຈະ​ທົດ​ລອງ​ໃຊ້​ທໍ່ດູດ​ທີ່​ເຮັດ​ດ້ວຍ​ເຈ້ຍ ຢູ່​ໃນ​ຮ້ານ​ຄ້າ​ຂອງ​ຕົນ​ຢູ່​ໃນ ສ ເກົາຫຼີ ພາຍ​ໃນ​ເດືອນ ກັນຍາ​ນີ້ ເພື່ອ​ແທນ​ທີ່​ໃຫ້​ແກ່​ທໍ່ດູດ​ທີ່​ເຮັດ​ດ້ວຍ​ຢາງ ທັງ​ນີ້​ກໍ​ເພື່ອ​ເປັນ​ການ​ອະນຸລັກ​ສິ່ງແວດລ້ອມ.

   ຜະລິດ​ຕະ​ພັນ​ທໍ່ດູດ​ທີ່​ເຮັດ​​້ວຍ​ເຈ້ຍ ໂດຍ​ແມ່ນ Starbucks ພັດທະນາ​ອອກ​ມາ ຈະ​ໄດ້​ສະໜອງ​ໃຫ້​ແກ່​ລູກ​ຄ້າ ປະກອບ​ມີ​ສອງ​ສີ​ຄື ສີຂາວ ແລະ​ສີຂຽວ​ໃບ​ໄມ້ ຊຶ່ງ​ທັງ​ສອງ​ສີ​ນີ້ ຕ່າງ​ກໍ​ໄດ້​ຮັບ​ການ​ຢັ້ງຢືນ​ຄວາມ​ປອດ​ໄພ​ທາງ​ອາຫານ​ຈາກ ສ ເກົາຫຼີ ແລະ ສ ອາ​ເມ​ຣິ​ກາ ແລ້ວ. Starbucks ໃຫ້​ຮູ້​ວ່າ ຈະ​ຄັດ​ເລືອກ​ເອົາ​ສີສັນ​ໜຶ່ງ​ຢ່າງ​ເປັນ​ທາງ​ການ ເພື່ອ​ນຳ​ເຂົ້າ​ສູ່​ການ​ຜະລິດ​ທໍ່ດູດ ຫຼັງ​ຈາກ​ໄລຍະ​ການ​ທົດ​ລອງ ໂດຍ​ອີງໃສ່​ຄວາມ​ມັກ​ຂອງ​ຜູ້​ບໍລິໂພກ.

    Starbucks Coffee Korea ໃຫ້​ຮູ້​ວ່າ​ໄລຍະ​ເວລາ​ການ​ທົດ​ລອງ​ທໍ່ດູດ​ທີ່​ເຮັດ​ດ້ວຍ​ເຈ້ຍ ຈະ​ແກ່ຍາວ​ເປັນ​ເວລາ 2 ເດືອນ ໂດຍ​ເລີ່ມ​ແຕ່​ວັນ​ທີ 10 ກັນຍາ​ນີ້​ເປັນຕົ້ນ​ໄປ ຢູ່​ໃນ​ຮ້ານ​ຄ້າ 100 ແຫ່ງ​ຂອງ​ບໍລິສັດ ຢູ່​ໃນ​ພື້ນ​ທີ່​ນະຄອນຫຼວງ​ເຊ​ອູນ ແລະ​ນະຄອນ​ໃຫຍ່​ອື່ນໆ ກ່ອນ​ທີ່​ຈະ​ຜັນ​ຂະຫຍາຍ ການ​ນຳ​ໃຊ້​ຜະລິດ​ຕະ​ພັນ​ນີ້ ຢູ່​ໃນ​ຮ້ານ​ຄ້າ​ທຸກໆ​ແຫ່ງ​ຂອງ Starbucks ໃນ​ທົ່ວ​ປະເທດ ສ ເກົາຫຼີ ນັບ​ແຕ່​ເດືອນ​ພະຈິກ 2018 ເປັນຕົ້ນ​ໄປ.

    ການ​ຕົກລົງ​ໃໝ່​ຫຼ້າ​ສຸດ​ດັ່ງກ່າວ ເປັນ​ສ່ວນ​ໜຶ່ງ​ຂອງ​ບາດກ້າວ​ທີ່​ໃຫຍ່​ກວ່າ​ຂອງ Starbucks Coffee Co. ເພື່ອ​ລຶບລ້າງ​ການ​ໃຊ້​ທໍ່ດູດ​ໃຊ້​ເທື່ອ​ດຽວ​ທີ່​ເຮັດ​ດ້ວຍ​ຢາງ ອອກ​ໄປ​ຈາກ​ຮ້ານ​ຄ້າ ຂອງ​ບໍລິສັດ​ນີ້ ຈຳນວນ 28.000 ແຫ່ງ​ໃນ​ທົ່ວ​ໂລກ ເມື່ອ​ຮອດ​ປີ 2020. Starbucks ໃຫ້ການ​ຄິດໄລ່​ວ່າ ການ​ດຳເນີນ​ການ​ດັ່ງກ່າວ ຈະ​ເປັນ​ການ “ລຶບ​ບັນຊີ” ສຳລັບ​ທໍ່ດູດ​ທີ່​ເຮັດ​ດ້ວຍ​ຢາງ ໄປ​ກວ່າ 1 ຕື້​ທໍ່/ປີ ອອກ​ໄປ​ຈາກ​ຮ້ານ​ຄ້າ​ທຸກໆ​ແຫ່ງ​ຂອງ Starbucks.

    ອົງການ​ສິ່ງແວດລ້ອມ​ຂອງ​ສະຫະ​ປະຊາ​ຊາດ ມີ​ຄຳ​ແຈ້ງ​ເຕືອນ​ອອກ​ມາ ເມື່ອ​ເດືອນ​ມິຖຸນາ ປີ 2018 ວ່າ​ຂີ້​ເຫຍື້ອ​ປະເພດ​ຢາງ ກໍ​ໃຫ້​ເກີດ​ບໍ່​ຮູ້​ວ່າ​ເທົ່າໃດ​ບັນຫາ ເມື່ອ​ພວກ​ພັນ​ຮົ່ວ​ໄຫຼ​ອອກ​ສູ່ ສະພາບ​ແວດ​ລ້ອມ ຊຶ່ງ​ອາດ​ຕ້ອງ​ໃຊ້​ເວລາ​ເຖິງ 1.000 ປີ ຈຶ່ງ​ຍ່ອຍ​ສະຫຼາຍ​ໄປ​ໄດ້.

    ຕິດຕາມ​ໄປ​ກັບ​ການເຄື່ອນໄຫວ​ດັ່ງກ່າວ Starbucks ຍັງ​ຈະ​ຍົກເລີກ​ທໍ່ດູດ ແລະ​ບ່ວງ​ທີ່​ເຮັດ ດ້ວຍ​ຢາງ ຊຶ່ງ​ລູກ​ຄ້າ​ສາມາດ​ເອົາ​ໄປ​ໄດ້​ຢ່າງ​ເສລີ ຢູ່​ໃນ​ຮ້ານ​ຄ້າ​ຂອງ​ບໍລິສັດ ແລະ​ແທນ​ທີ່​ໃສ່​ນັ້ນ​ກໍ​ແມ່ນ ການ​ສະໜອງ​ທໍ່ດູດ 1 ອັນ ສຳລັບ​ແຕ່​ລະ​ເຄື່ອງ​ດື່ມ​ເຢັນ ແລະ​ກໍ​ອາດ​ຈະ​ສະໜອງ​ບ່ວງ​ທີ່​ເຮັດ​ດ້ວຍ​ໄມ້ ເພື່ອ​ແທນ​ທີ່​ໃຫ້​ແກ່​ບ່ວງ​ຢາງ. Starbucks Korea ຍັງ​ວາງ​ແຜນ​ຜັນ​ຂະຫຍາຍ​ການ​ນຳ​ໃຊ້ ຝາ​ປິດ​ເຄື່ອງ​ດື່ມ​ທີ່​ບໍ່​ໃຊ້​ທໍ່ດູດ ພາຍ​ໃນ​ເດືອນ​ພະຈິກ​ໜ້າ​ນີ້​ດ້ວຍ.

 

ຂ່າວທີ່ກ່ຽວຂ້ອງ