ຂ່າວຫຼ້າສຸດ

ລັດຖະບານ​ຈີນ​ຈະ​ປະກາດ​ມາດ​ຕະການ​ໜູນ​ຊ່ວຍ​ພື້ນຖານ​ເສດຖະກິດ

194 03 ກ.ຍ. 2018 ຂ່າວຕ່າງປະເທດ
ລັດຖະບານ​ຈີນ​ຈະ​ປະກາດ​ມາດ​ຕະການ​ໜູນ​ຊ່ວຍ​ພື້ນຖານ​ເສດຖະກິດ

    ວິ​​ະ​ຍຸ​ກະຈາຍສຽງ​ແຫ່ງ​ລັດ​ຈີນ ລາຍ​ງານ​ເມື່ອ​ວັນ​ທີ 30 ສິງຫາ​ທີ່​ຜ່ານ​ມາ​ວ່າ ຈີນ​ຈະ​ປະກາດ​ມາດ​ຕະການ​ໃໝ່ໆ ເພື່ອ​ໃຫ້ການ​ໜູນ​ຊ່ວຍ​ພື້ນຖານ​ເສດຖະກິດ ຊຶ່ງ​ແຈ້ງ​ການ​ດັ່ງກ່າວ ມີ​ອອກ​ມາ​ຫຼັງ​ການ​ປະຊຸມ​ລາຍການ​ໜຶ່ງ ຂອງ​ຄະນະ​ລັດຖະບານ​ຈີນ.

    ຂ່າວ​ແຈ້ງວ່າ ຢູ່​ໃນ​ການ​ປະຊຸມ ພາຍ​ໃຕ້​ການ​ເປັນ​ປະທານ​ຂອງ​ນາຍົກລັດຖະມົນຕີ​ຈີນ ຫຼີ​ເຄີ້​ສຽງ ນັ້ນ ລັດຖະບານ​ຈີນ​ແຈ້ງ​ໃຫ້​ຮູ້​ວ່າ ບັນດາ​ມາດ​ຕະການ​ໃໝ່ ໃນ​ນັ້ນ​ມີ​ການ​ຕັດ​ຫຼຸດ​ພາສີ ທີ່​ຈະ​ເປັນ​ການ​ຕັດ​ຫຼຸດ​ຄ່າ​ໃຊ້​ຈ່າຍ​ຕື່ມ​ອີກ 45 ຕື້​ຢວນ (ເທົ່າ​ກັບ​ປະມານ 6,59 ຕື້​ໂດ​ລາ​ສະຫະລັດ)
ໃຫ້​ແກ່​ບັນດາ​ບໍລິສັດ​ພາຍ​ໃນ​ປີ​ນີ້. ແຈ້ງ​ການ​ຂອງ​ລັດຖະບານ​ຈີນ ຊີ້​ແຈງ​ວ່າ ການ​ຕັດ​ຫຼຸດ​ຄ່າ​ໃຊ້​ຈ່າຍ ນັບ​ວ່າ​ເປັນ​ແນວ​ຄວາມ​ຄິດ​ລິ​ເລີ່ມ​ຕົ້ນຕໍ ເພື່ອ​ປະຕິບັດ​ນະໂຍບາຍ​ການ​ເງິນ​ທີ່​ຄ່ອງ​ຕົວ ແລະ ຮັບປະກັນ ຄວາມ​ໝັ້ນຄົງ​ຂອງ​ພື້ນຖານ​ເສດຖະກິດ.

    ລັດຖະບານ​ຈີນ ຍັງ​ໄດ້​ຕົກລົງ​ຂຶ້ນ​ອັດຕາ​ສ່ວນ​ການ​ສົ່ງ​ຄືນ​ພາສີ​ສົ່ງ​ອອກ ສຳລັບ​ຜະລິດ​ຕະ​ພັນ ຈຳນວນ​ໜຶ່ງ ພ້ອມ​ທັງ​ເພີ່ມ​ລະດັບ​ສິນ​ເຊື່ອ​ທີ່​ທະນາຄານ​ຕ່າງໆ ປ່ອຍ​ໃຫ້​ແກ່​ບັນດາ​ວິ​ສາ​ຫະ​ກິດ ຂະໜາດ​ນ້ອຍ​ກູ້​ຢືມ ແລະ ບໍ່​ເກັບ​ພາສີ​ກັບ​ດອກ​ເບ້ຍ​ເງິນ​ຝາກ​ໃນ​ທະນາຄານ.

   ນອກຈາກ​ນັ້ນແລ້ວ ບັນດາ​ນັກ​ລົງທຶນ​ຕ່າງປະເທດ ຈະ​ບໍ່​ຕ້ອງ​ເສຍ​ພາສີ​ວິ​ສາ​ຫະ​ກິດ ແລະ​ພາສີ ມູນ​ຄ່າ​ເພີ່ມ (VAT) ສຳລັບ​ຜົນ​ກຳໄລ​ຈາກ​ການ​ລົງທຶນ​ຢູ່​ໃນ​ຕະຫຼາດ​ພັນທະບັດ​ຂອງ​ຈີນ ພາຍ​ໃນ​ເວລາ 3 ປີ.

 

ຂ່າວທີ່ກ່ຽວຂ້ອງ