ເອ​ຢິບ ຈະ​ຊື້​ເຂົ້າ 1 ລ້ານ​ໂຕນ ຈາກ​ຫວຽດນາມ

116 03 ກ.ຍ. 2018 ຂ່າວຕ່າງປະເທດ
ເອ​ຢິບ ຈະ​ຊື້​ເຂົ້າ 1 ລ້ານ​ໂຕນ ຈາກ​ຫວຽດນາມ

    ຂ່າວສານ​ຫວຽດນາມ ລາຍ​ງານ​ວ່າ ແຈ້ງ​ການ​ຂອງ​ທ່ານ ຣາ​ຈາບ ເຊ​ຮາ​ຕາ ຫົວໜ້າ​ສະຫະພັນ​ບັນດາ​ຂະແໜງການ​ອາຊີບ​ຂອງ​ເອ​ຢິບ (FEI) ຊຶ່ງ​ມີ​ອອກ​ມາ​ເມື່ອ​ວັນ​ທີ 30 ສິງຫາ ທີ່​ຜ່ານ​ມາ ໃຫ້​ຮູ້​ວ່າ ເອ​ຢິບ​ໄດ້​ເຫັນ​ດີ​ກັບ​ຫວຽດນາມ ກ່ຽວ​ກັບ​ການ​ນຳ​ເຂົ້າ​ເຂົ້າ 1 ລ້ານ​ໂຕນ (ເຂົ້າສານ) ພາຍ​ໃນ​ເວລາ 3 ຫາ 4 ເດືອນ.

    ໜັງສືພິມ​ເອ​ເລັກ​ໂຕຣ​ນິກ Ahram ຂອງ​ເອ​ຢິບ ອ້າງ​ຕາມ​ຄຳ​ເວົ້າ​ຂອງ​ທ່ານ ເຊ​ຮາ​ຕາ ໃຫ້​ຮູ້​ວ່າ ເຂົ້າສານ​ຈຳນວນ​ດັ່ງກ່າວ ຈະ​ໄດ້​ຮັບ​ການ​ສົ່ງ​ມອບ​ເປັນ​ຫຼາຍ​ງວດ ພາຍ​ໃນ​ເວລາ 3 ຫາ 4 ເດືອນ ແລະ ​ຈະ​ເປັນ​ການ​ປະກອບສ່ວນ​ເພີ່ມ​ທະວີ ໃຫ້​ແກ່​ການເຄື່ອນໄຫວ​ສະ​ສົມ​ເຂົ້າ​ຍຸດ​ທະ​ສາດ​ຂອງ​ເອ​ຢິບ ໃນ​ປີໜ້າ.

    ທ່ານ ເຊ​ຮາ​ຕາ ບໍ່​ໄດ້​ເວົ້າ​ເຖິງ​ລາຄາ​ເຂົ້າ​ທີ່​ຈະ​ຊື້​ຈາກ​ຫວຽດນາມ ແຕ່​ໃຫ້​ຮູ້​ວ່າ​ລາຄາ​ເຂົ້າ ຂອງ​ຫວຽດນາມ ຈະ​ຖືກ​ກວ່າ​ເຂົ້າ​ທີ່​ຊື້​ຈາກ​ຈີນ ພ້ອມ​ທັງ​ໃຫ້​ຮູ້​ວ່າ​ປັດຈຸບັນ​ນີ້ ເອ​ຢິບ​ບໍລິໂພກ​ເຂົ້າ ທີ່​ປະມານ 3,3 ລ້ານ​ໂຕນ/ປີ.

 

ຂ່າວທີ່ກ່ຽວຂ້ອງ