ຂ່າວຫຼ້າສຸດ

ເດັກນ້ອຍ​ອົບ​ພະ​ຍົບ​ບໍ່​ໄດ້​ເຂົ້າ​ໂຮງຮຽນ​ນັບ​ມື້​ນັບ​ຫຼາຍ​ຂຶ້ນ

130 03 ກ.ຍ. 2018 ຂ່າວຕ່າງປະເທດ
ເດັກນ້ອຍ​ອົບ​ພະ​ຍົບ​ບໍ່​ໄດ້​ເຂົ້າ​ໂຮງຮຽນ​ນັບ​ມື້​ນັບ​ຫຼາຍ​ຂຶ້ນ

     ບົດ​ລາຍ​ງານ​ຂອງ​ອົງການ​ຂ້າ​ຫຼວງ​ໃຫຍ່​ສະຫະ​ປະຊາ​ຊາດ ກ່ຽວ​ກັບ​ຜູ້​ລີ້​ໄພ (UNHCR) ຊຶ່ງ​ມີ​ອອກ​ມາ​ເມື່ອ​ວັນ​ທີ 29 ສິງຫາ​ທີ່​ຜ່ານ​ມາ ໃຫ້​ຮູ້​ວ່າ ມີ​ເດັກນ້ອຍ​ຜູ້​ລີ້​ໄພ​ບໍ່​ເຖິງ 25% ໄດ້​ຮຽນ​ຈົບ​ຊັ້ນ​ກາງ ທຽບໃສ່​ອັດຕາ​ສ່ວນ​ທີ່​ມີ​ເກືອບ 85% ໂດຍ​ລວມ​ຂອງ​ໂລກ.  ໃນ​ຂະນະ​ດຽວ​ກັນ ອັດຕາ​ສ່ວນ ການ​ສຶກ​ສາ​ລະດັບ​ມະຫາວິທະຍາໄລ​ຂອງ​ຜູ້​ລີ້​ໄພ ບັນລຸ​ພຽງ​ທີ່ 1% ຈາກ​ຍອດ​ຈຳນວນ​ຜູ້​ລີ້​ໄພ ທຽບໃສ່ ອັດຕາ​ສ່ວນ​ກວ່າ 30% ໃນ​ໂລກ.

    ບົດ​ລາຍ​ງານ​ດັ່ງກ່າວ​ໃຫ້​ຮູ້​ວ່າ ຈຳນວນ​ເດັກນ້ອຍ​ຜູ້​ລີ້​ໄພ ທີ່​ບໍ່​ໄດ້​ໄປ​ເຂົ້າ​ໂຮງຮຽນ ໄດ້​ເພີ່ມ​ຂຶ້ນ 500.000 ຄົນ ພາຍ​ໃນ​ຮອບ​ໜຶ່ງ​ປີ​ທີ່​ຜ່ານ​ມາ ເຮັດ​ໃຫ້​ຕົວ​ເລກ​ເດັກນ້ອຍ​ຜູ້​ລີ້​ໄພ ທີ່​ບໍ່​ໄດ້​ໄປ​ເຂົ້າ ໂຮງຮຽນ​ໃນ​ທົ່ວ​ໂລກ​ເພີ່ມ​ຂຶ້ນ​ເປັນ 4 ລ້ານ​ຄົນ.

    ໃນ​ຈຳນວນ​ຜູ້​ລີ້​ໄພ 25,4 ລ້ານ​ຄົນ​ນັ້ນ ມີ​ກວ່າ​ເຄິ່ງ​ໜຶ່ງ​ເປັນ​ເດັກນ້ອຍ ແລະ ມີ​ກວ່າ 7 ລ້ານ​ຄົນ ໃນ​ຈຳນວນ​ນັ້ນ ຢູ່​ໃນ​ໄວ​ເຂົ້າ​ໂຮງຮຽນ. ເຖິງ​ຢ່າງໃດ​ກໍ​ຕາມ ໂອກາດ​ທີ່​ເດັກນ້ອຍ​ຜູ້​ລີ້​ໄພ ໄດ້​ໄປ​ເຂົ້າ​ໂຮງຮຽນ ນັບ​ມື້​ນັບ​ໜ້ອຍ​ລົງ ໂດຍ​ສະເພາະ​ແມ່ນ ຢູ່​ໃນ​ລະດັບ​ການ​ສຶກ​ສາ​ຊັ້ນ​ກາງ ມີ​ປະມານ 70% ຂອງ​ຈຳນວນ​ເດັກນ້ອຍ​ໄດ້​ເຂົ້າ​ໂຮງຮຽນ ແຕ່​ບໍ່​ຂຶ້ນ​ໄປ​ຮອດ​ຊັ້ນ​ກາງ​ໄດ້.

    ບົດ​ລາຍ​ງານ​ຂອງ UNHCR ກໍ​ຊີ້​ໃຫ້​ເຫັນ​ວ່າ ຍ້ອນ​ຂາດ​ການ​ລົງທຶນ ຈະ​ເຮັດ​ໃຫ້​ເດັກນ້ອຍ ຜູ້​ລີ້​ໄພ​ຫຼາຍ​ແສນ​ຄົນ ບໍ່​ໄດ້​ເຂົ້າ​ໂຮງຮຽນ​ໃນ​ອະນາຄົດ.

 

ຂ່າວທີ່ກ່ຽວຂ້ອງ