ຂ່າວຫຼ້າສຸດ

ມວຍລາວ ປັນຈັກສີລັດ ວູຊູ ມວຍສາກົນ ນວ ຕັ້ງເປົ້າ 4 ຫຼຽນຄຳ ໃນຊຽງຂວາງເກມ

114 03 ກ.ຍ. 2018 ວົງຈອນກີລາ
ມວຍລາວ ປັນຈັກສີລັດ ວູຊູ ມວຍສາກົນ ນວ ຕັ້ງເປົ້າ 4 ຫຼຽນຄຳ ໃນຊຽງຂວາງເກມ

    ທ່ານ ຄຳ​ເສັງ ສູນ​ດາ­ລາ ປະ­ທານ​ສະ­ຫະ­ພັນ​ມວຍ​ລາວ ປັນ​ຈັກ​ສີ​ລັດ ວູ​ຊູ ແລະ ສາ­ກົນ ນະ­ຄອນ­ຫຼວງ​ວຽງ​ຈັນ (ນວ) ໃຫ້​ສຳ­ພາດ​ວັນ​ທີ 28 ສິງ­ຫາ 2018 ວ່າ: ເພື່ອ​ເປັນ​ການ​ກະ­ກຽມ​ຄວາມ​ພ້ອມ​ສ້າງ​ຄວາມ​ຫວັງ​ໃຫ້​ທັບ​ນັກ­ກີ­ລາ ນວ ເຂົ້າ​ຮ່ວມ​ຍາດ​ເອົາ​ຫຼຽນ​ຄຳ​ໃນ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ 11 (ຊຽງ​ຂວາງ ເກມ) ຢູ່​ແຂວງ​ຊຽງ​ຂວາງ ລະ­ຫວ່າງ​ວັນ​ທີ 11-21 ພະ­ຈິກ 2018 ຕາມ​ຄວາມ​ຄາດ​ຫວັງ​ທີ່​ວາງ​ໄວ້ ສະ­ຫະ­ພັນ​ກີ­ລາ 4 ປະ­ເພດ ພວກ​ເຮົາ​ໄດ້​ມີ​ການ​ຫ້າງ​ຫາ​ກະ­ກຽມ​ນັກ­ກີ­ລາ​ຈຳ­ນວນ 32 ຄົນ.

    ປັດ­ຈຸ­ບັນ​ໄດ້​ນຳ­ພາ​ນັກ­ກີ­ລາ​ເຂົ້າ​ນອນ​ສູນ​ເຝິກ­ຊ້ອມ​ແລ້ວ ຢູ່​ສູນ​ເຝິກ​ກີ­ລາ​ບຶງ​ຂະ​ຫຍອງ ເມືອງ​ສີ​ສັດ­ຕະ​ນາກ ໂດຍ​ໄດ້​ເຊີນ​ເອົາ​ຄູ​ເຝິກ​ຜູ້​ຊ່ຽວ­ຊານ​ກີ­ລາ​ປະ­ເພດ​ຕໍ່­ສູ້​ປ້ອງ​ກັນ​ຕົວ ທີ່​ມີ​ຄຸ­ນະ­ພາບ ໂດຍ​ສະ­ເພາະ ປະ­ເທດ​ໄທ ມາ​ເຝິກ­ຊ້ອມ​ໃຫ້​ນັກ­ກີ­ລາ ພ້ອມ​ທັງ​ໄດ້​ສ້າງ​ສະ­ຖານ­ທີ່​ເຝິກ­ຊ້ອມ​ຂຶ້ນ​ຢູ່​ບຶງ​ຂະ​ຫຍອງ ປັດ­ຈຸ­ບັນ​ສຳ­ເລັດ 100% ນັກ­ກີ­ລາ​ໄດ້​ລົງ​ເຝິກ­ຊ້ອມ​ເປັນ​ປົກ­ກະ­ຕິ ນອກ​ນີ້ ຍັງ​ມີ​ຄູ​ເຝິກ​ຄົນ​ລາວ ແລະ ຊາວ​ໄທ ເປັນ​ຜູ້​ຕິດ­ຕາມ​ວາງ​ແຜນ­ການ​ເຝິກ­ຊ້ອມ ຄະ­ນະ​ບໍ­ລິ­ຫານ​ງານ​ສະ­ຫະ­ພັນ​ກໍ່​ໄດ້​ລົງ​ຊີ້​ນຳ​ຢ່າງ​ໃກ້­ຊິດ ເພື່ອ​ຫວັງ​ສ້າງ​ຜົນ­ງານ​ໃຫ້​ໄດ້ 4 ຫຼຽນ​ຄຳ (ປະ­ເພດ​ລະ 1 ຫຼຽນ​ຄຳ) ໃນ​ຊຽງ​ຂວາງ ເກມ 2018.

    ນວ ໄດ້​ສົ່ງ​ນັກ­ກີ­ລາ​ເຂົ້າ​ຮ່ວມ​ຊຽງ​ຂວາງ ເກມ 2018 ຈຳ­ນວນ 567 ຄົນ ຈາກ 28 ປະ­ເພດ ຄື: ກະ­ຕໍ້-ກະ­ຕໍ້​ຊິນ​ລອນ ໝາກ­ເສິກ ໝາກ​ຂ່າງ ໜ້າ​ເກັກ ເທັນ​ນິດ ເປ​ຕັງ ດອກ​ປີກ​ໄກ່ ມວຍ​ປ້ຳ ບານ­ສົ່ງ​ໃນ​ຮົ່ມ ບານ­ສົ່ງ​ຫາດ​ຊາຍ ບານ­ເຕະ ເທັກ​ຄວັນ​ໂດ ກັອບ ຍິງ​ປືນ ໝາກ​ແລ້ ກາ​ຣາ​ເຕ​ໂດ ຢູ​ໂດ ລອຍ­ນ້ຳ ແລ່ນ-ລານ ຍິງ​ທະ­ນູ ລົດ­ຖີບ ສະ­ນຸກ​ເກີ ບານ­ບ້ວງ ແລະ ເຮືອງ​ຊ່ວງ ທັງ​ປະ­ເພດ​ຍິງ ແລະ ປະ­ເພດ​ຊາຍ ນອກ​ນີ້ ຄະ­ນະ​ນຳ ນວ ຍັງ​ໄດ້​ປະ­ກາດ​ສະ­ໜັບ­ສະ­ໜູນ​ເງິນ​ໂບ​ນັດ ໂດຍ​ນັກ­ກີ­ລາ​ທີ່​ຍາດ​ໄດ້​ຫຼຽນ​ຄຳ 6 ລ້ານ​ກີບ​ຕໍ່​ຫຼຽນ ຫຼຽນ​ເງິນ 4 ລ້ານ​ກີບ​ຕໍ່​ຫຼຽນ ແລະ ຫຼຽນ​ທອງ 2 ລ້ານ​ກີບ​ຕໍ່​ຫຼຽນ.

ຂ່າວທີ່ກ່ຽວຂ້ອງ