ຂ່າວຫຼ້າສຸດ

ເນື້ອໃນບາງຕອນ ສານຂອງທ່ານນາຍົກລັດຖະມົນຕີ ແຫ່ງ ສປປ ລາວ ເນື່ອງໃນໂອກາດ ເປີດສົກຮຽນໃໝ່ 2018-2019

698 03 ກ.ຍ. 2018 ຂ່າວໜ້າ​ໜຶ່ງ
ເນື້ອໃນບາງຕອນ ສານຂອງທ່ານນາຍົກລັດຖະມົນຕີ ແຫ່ງ ສປປ ລາວ ເນື່ອງໃນໂອກາດ ເປີດສົກຮຽນໃໝ່ 2018-2019

    ເນື່ອງ​ໃນ​ໂອ­ກາດ​ວັນ​ໄຂ​ສົກ­ຮຽນ​ໃໝ່ 2018-2019 ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ຕາງ­ໜ້າ​ໃຫ້​ກົມ​ການ­ເມືອງ​ສູນ​ກາງ​ພັກ ແລະ ລັດ­ຖະ­ບານ ຂໍ​ຝາກ​ຄວາມ​ຢ້ຽມ­ຢາມ​ຖາມ​ຂ່າວ​ອັນ​ອົບ​ອຸ່ນ​ຄວາມ​ຮັກ­ແພງ​ອັນ​ຈິງ​ໃຈ ມາ​ຍັງ​ຜູ້​ບໍ­ລິ­ຫານ​ການ​ສຶກ​ສາ​ທຸກ​ຂັ້ນ ຄູ ອາ­ຈານ ແລະ ນັກ­ຮຽນ-ນັກ​ສຶກ​ສາ​ທຸກ​ຊັ້ນ ທຸກ​ສາຍ ທຸກ​ລະ­ດັບ ທຸກ​ຂົງ­ເຂດ​ໃນ​ຂອບ​ເຂດ​ທົ່ວ​ປະ­ເທດ​ມາ­ນະ​ໂອ­ກາດ​ນີ້.

    ຕາງ­ໜ້າ​ໃຫ້​ສູນ​ກາງ​ພັກ ແລະ ລັດ­ຖະ­ບານ ຂ້າ­ພະ­ເຈົ້າ​ຂໍ​ສະ­ແດງ​ຄວາມ​ຍ້ອງ­ຍໍ​ຊົມ­ເຊີຍ​ມາ​ຍັງ​ຄະ­ນະ​ພັກ-ຄະ­ນະ​ນຳ​ກະ­ຊວງ​ສຶກ​ສາ​ທິ​ການ ແລະ ກີ­ລາ ບັນ­ດາ​ສະ​ຖາ​ບັນ​ການ​ສຶກ​ສາ​ທຸກ​ຂັ້ນ ອົງ​ການ­ຈັດ­ຕັ້ງ​ທັງ​ພາກ​ລັດ ແລະ ເອ­ກະ​ຊົນ​ທີ່​ກ່ຽວ­ຂ້ອງ ພະ­ນັກ­ງານ​ອາ­ວຸ­ໂສ ພໍ່​ແມ່​ປະ­ຊາ­ຊົນ​ບັນ­ດາ­ເຜົ່າ ແລະ ນັກ­ຮຽນ-ນັກ​ສຶກ​ສາ​ທຸກ​ຖ້ວນ​ໜ້າ­ທີ່​ໄດ້​ປະ­ກອບ­ສ່ວນ​ຢ່າງ​ຕັ້ງ­ໜ້າ​ຕໍ່​ຜົນ­ສຳ­ເລັດ​ດັ່ງ​ທີ່​ກ່າວ​ມາ​ນີ້ ພ້ອມ​ນີ້ ກໍ່​ສະ­ແດງ​ຄວາມ​ຂອບ­ໃຈ​ມາ​ຍັງ​ບັນ­ດາ​ຄູ່​ຮ່ວມ​ພັດ­ທະ­ນາ ປະ­ເທດ​ເພື່ອນ​ມິດ ອົງ​ການ­ຈັດ­ຕັ້ງ​ສາ­ກົນ ແລະ ອົງ​ການ­ຈັດ­ຕັ້ງ​ທີ່​ບໍ່​ສັງ­ກັດ​ລັດ­ຖະ­ບານ​ທີ່​ໃຫ້­ການ​ຊ່ວຍ­ເຫຼືອ ແລະ ມີ​ສ່ວນ​ຮ່ວມ​ໃນ​ວຽກ​ງານ​ພັດ­ທະ­ນາ​ການ​ສຶກ​ສາ ເຮັດ​ໃຫ້​ລະ­ບົບ​ການ​ສຶກ​ສາ​ຂອງ ສປປ ລາວ ໄດ້​ຮັບ​ການ​ປັບ­ປຸງ ແລະ ພັດ­ທະ­ນາ​ເປັນ​ກ້າວໆ ແລະ ຫວັງ​ຢ່າງ​ຍິ່ງ​ວ່າ​ຈະ​ໄດ້​ຮັບ​ການ​ສືບ­ຕໍ່​ສະ­ໜັບ­ສະ­ໜູນ​ໃນ­ຕໍ່­ໜ້າ.

    ເຖິງ​ວ່າ​ພວກ​ເຮົາ​ກ້າວ​ເຂົ້າ​ສູ່​ການ​ໄຂ​ສົກ­ຮຽນ​ໃໝ່​ຂອງ​ປີ 2018-2019 ຈະ​ມີ​ອຸ­ປະ­ສັກ​ນາ­ນາ­ປະ­ການ ໂດຍ​ສະ­ເພາະ​ທົ່ວ​ປະ­ເທດ​ຂອງ​ພວກ​ເຮົາ​ກຳ­ລັງ​ປະ­ສົບ​ກັບ​ອຸ​ທົກ​ກະ​ໄພ​ຢ່າງ​ຮ້າຍ​ແຮງ​ກໍ່​ຕາມ ເພື່ອ​ຮັບ­ປະ­ກັນ​ໃຫ້­ການ​ຮຽນ-ການ​ສອນ​ໃນ​ສົກ​ປີ 2018-2019 ດຳ­ເນີນ​ໄປ​ຢ່າງ​ມີ​ປະ​ສິດ­ທິ​ຜົນ ແລະ ເພື່ອ​ສືບ­ຕໍ່​ພັດ­ທະ­ນາ​ລະ­ບົບ​ການ​ສຶກ​ສາ​ຂອງ​ປະ­ເທດ​ເຮົາ​ໃຫ້​ຂະ­ຫຍາຍ­ຕົວ ເປັນ​ພື້ນ­ຖານ​ໃຫ້​ແກ່​ການ​ພັດ­ທະ­ນາ​ເສດ­ຖະ­ກິດ ແລະ ສັງ­ຄົມ​ຂອງ​ປະ­ເທດ​ເຮົາ ຂ້າ­ພະ­ເຈົ້າ​ຂໍ​ຮຽກ­ຮ້ອງ​ມາ​ຍັງ​ທຸກ​ພາກ­ສ່ວນ​ທົ່ວ​ສັງ­ຄົມ ໃຫ້​ພ້ອມ​ກັນ​ເອົາ­ໃຈ­ໃສ່​ປະ­ຕິ­ບັດ​ໜ້າ­ທີ່​ຂອງ​ຕົນ ໃນ​ນີ້ ໃຫ້​ຜູ້​ບໍ­ລິ­ຫານ​ການ​ສຶກ​ສາ​ຈົ່ງ​ເພີ່ມ​ທະ­ວີ​ຄວາມ​ຮັບ­ຜິດ­ຊອບ​ຕໍ່­ໜ້າ​ທີ່​ວຽກ​ງານ​ຂອງ​ຕົນ​ໃຫ້​ສູງ​ຂຶ້ນ ແລະ ປະ­ຕິ­ບັດ​ກົດ­ໝາຍ ແລະ ລະ­ບຽບ​ການ​ດ້ານ​ການ​ສຶກ​ສາ​ຢ່າງ​ເຂັ້ມ​ງວດ ພັດ­ທະ­ນາ​ສະ​ຖາ​ບັນ​ການ​ສຶກ​ສາ​ຂອງ​ຕົນ​ໃຫ້​ມີ​ຄຸ­ນະ­ພາບ ແລະ ໄດ້​ມາດ­ຕະ­ຖານ ເອົາ­ໃຈ­ໃສ່​ຕ້ານ​ທຸກ​ປາ­ກົດ­ການ​ຫຍໍ້­ທໍ້​ໃນ​ສະ​ຖາ​ບັນ​ການ​ສຶກ​ສາ​ຂອງ​ຕົນ ກໍ່​ຄື ປາ­ກົດ­ການ​ຫຍໍ້­ທໍ້​ໃນ​ຂະ­ແໜງ­ການ​ສຶກ​ສາ​ໃຫ້​ຕົກ​ໄປ ແລະ ສ້າງ​ໃຫ້​ມີ​ບາດ­ກ້າວ​ໃໝ່​ທີ່​ນັບ​ມື້​ນັບ​ມີ​ຄຸ­ນະ­ພາບ ປອດ​ໃສ ແລະ ກ້າວ­ໜ້າ​ທັນ​ສະ­ໄໝ ບັນ­ດາ​ຄູ-ອາ­ຈານ​ຈົ່ງ​ເພີ່ມ​ທະ­ວີ​ຄວາມ​ຮັບ­ຜິດ­ຊອບ​ຕໍ່­ໜ້າ​ທີ່​ວຽກ​ງານ​ຂອງ​ຕົນ ປະ­ຕິ­ບັດ​ໜ້າ­ທີ່​ເປັນ​ແມ່­ພິມ​ທີ່​ດີ​ຂອງ​ຊາດ​ດ້ວຍ​ຄວາມ​ສັດ­ຊື່ ບໍ­ລິ­ສຸດ ແລະ ມີ​ຈັນ​ຍາ​ບັນ ເຝິກ­ຝົນ ພັດ­ທະ­ນາ​ຕົນ​ເອງ​ດ້ານ​ວິ­ຊາ​ສະ­ເພາະ ແລະ ເຕັກ­ນິກ​ວິ­ທີ​ການ​ສອນ​ທີ່​ສ້າງ­ສັນ ໃຫ້​ທັນ​ກັບ​ສະ­ພາບ​ການ ແລະ ເຕັກ​ໂນ​ໂລ​ຊີ​ໃໝ່ ເພື່ອ​ສົ່ງ​ຄວາມ​ຮູ້​ໃຫ້​ແກ່​ນັກ­ຮຽນ-ນັກ​ສຶກ​ສາ​ໃຫ້​ມີ​ປະ​ສິດ­ທິ​ຜົນ ຜູ້​ປົກ­ຄອງ​ຂອງ​ນັກ­ຮຽນ-ນັກ​ສຶກ​ສາ ຈົ່ງ​ພ້ອມ​ກັນ​ຊຸກ­ຍູ້​ສົ່ງ­ເສີມ​ໃຫ້​ລູກ​ຫຼານ​ຢູ່​ໃນ​ເກນ​ອາ­ຍຸ​ເຂົ້າ​ຮຽນ​ທັງ​ສາ­ມັນ​ສຶກ​ສາ ແລະ ວິ­ຊາ​ຊີບ ເອົາ­ໃຈ­ໃສ່​ຮ່ຳ­ຮຽນ ພ້ອມ​ທັງ​ຊ່ວຍ​ສຶກ​ສາ​ອົບ­ຮົມ​ຕັກ­ເຕືອນ​ລູກ​ຫຼານ​ຂອງ​ຕົນ ໃຫ້​ເຫັນ​ຄວາມ​ສຳ­ຄັນ​ຂອງ​ການ​ສຶກ​ສາ​ທີ່​ມີ​ຕໍ່​ອະ­ນາ­ຄົດ​ຂອງ​ຕົນ​ເອງ ກໍ່​ຄື ປະ­ເທດ​ຊາດ ນັກ­ຮຽນ-ນັກ​ສຶກ​ສາ​ຈົ່ງ​ມີ​ຄວາມ​ຕັ້ງ­ໃຈ​ຄົ້ນ­ຄວ້າ​ຮ່ຳ­ຮຽນ​ຢູ່​ໃນ​ຫ້ອງ​ຮຽນ ແລະ ຮຽນ​ດ້ວຍ​ຕົນ​ເອງ​ໃຫ້​ຫຼາຍ​ຂຶ້ນ ມີ​ຄວາມ​ດຸ­ໝັ່ນ​ຂະ­ຫຍັນ​ພຽນ ຈົ່ງ​ຕັ້ງ­ໜ້າ​ເຝິກ­ຝົນ​ຫຼໍ່​ຫຼອມ​ໃຫ້​ກາຍ­ເປັນ​ນັກ­ຮຽນ​ທີ່​ດີ ນັກ­ຮຽນ​ເກ່ງ​ຂອງ​ຄູ-ອາ­ຈານ ເປັນ​ລູກ​ຫຼານ​ທີ່​ດີ​ຂອງ​ຜູ້​ປົກ­ຄອງ ເປັນ​ພົນ­ລະ­ເມືອງ​ດີ​ຂອງ​ປະ­ເທດ​ຊາດ ແລະ ເປັນ​ຜູ້​ທີ່​ມີ​ຄວາມ​ຮູ້ ຄວາມ​ສາ­ມາດ ເພື່ອ​ພັດ­ທະ­ນາ ແລະ ສ້າງ­ສາ​ບ້ານ​ເມືອງ ການ­ຈັດ­ຕັ້ງ​ພັກ-ລັດ ອົງ​ການ­ຈັດ­ຕັ້ງ​ມະ­ຫາ­ຊົນ ຊຸມ​ຊົນ ຜູ້​ປະ­ກອບ​ການ ແລະ ສັງ­ຄົມ ໂດຍ​ລວມ​ຈົ່ງ​ພ້ອມ​ກັນ​ປະ­ກອບ­ສ່ວນ​ຕາມ​ພາ­ລະ​ບົດ­ບາດ​ຂອງ​ຕົນ ໃນ​ການ​ສຶກ​ສາ​ອົບ­ຮົມ​ບົ່ມ​ສອນ ແລະ ສ້າງ​ສະ­ພາບ​ແວດ​ລ້ອມ​ທີ່​ດີ ເພື່ອ​ໃຫ້​ນັກ­ຮຽນ-ນັກ​ສຶກ​ສາ​ໄດ້​ຮັບ​ຄວາມ​ຮູ້ ແລະ ເຕີບ​ໃຫຍ່​ຂະ­ຫຍາຍ­ຕົວ ເປັນ​ພົນ­ລະ­ເມືອງ​ທີ່​ດີ​ຂອງ​ປະ­ເທດ​ຊາດ ແລະ ຖື​ເອົາ​ວຽກ​ງານ​ການ​ສຶກ​ສາ​ເປັນ​ໜ້າ­ທີ່ ແລະ ຄວາມ​ຮັບ­ຜິດ­ຊອບ​ຂອງ​ໝົດ​ທຸກ​ຄົນ​ໃນ​ທົ່ວ​ສັງ­ຄົມ.

    ເນື່ອງ​ຈາກ​ໃນ​ປີ​ນີ້ ປະ­ເທດ​ເຮົາ​ໄດ້​ປະ­ສົບ​ກັບ​ໄພ​ທຳ​ມະ​ຊາດ​ຢ່າງ​ຮ້າຍ​ແຮງ​ຢູ່​ນັ້ນ ການ​ເປີດ​ສົກ­ຮຽນ​ໃໝ່ 2018-2019 ຈະ​ພົບ​ກັບ​ຄວາມ​ຫຍຸ້ງ­ຍາກ​ຫຼາຍ​ດ້ານ ໂດຍ​ສະ­ເພາະ ຢູ່​ບາງ​ທ້ອງ­ຖິ່ນ ບາງ​ໂຮງ­ຮຽນ ອາດ​ບໍ່​ສາ­ມາດ​ໄຂ​ສົກ­ຮຽນ​ໃໝ່ ໄດ້​ຕາມ​ກຳ­ນົດ​ເວ­ລາ ລັດ­ຖະ­ບານ​ຈະ​ຮີບ​ຮ້ອນ​ສຸມ​ທຸກ​ຄວາມ​ສາ­ມາດ​ໃນ​ການ​ຟື້ນ​ຟູ ສ້ອມ­ແປງ​ໂຮງ­ຮຽນ ຫ້ອງ​ຮຽນ ແລະ ສະ­ໜອງ​ວັດ­ຖຸ​ອຸ­ປະ­ກອນ​ຮັບ​ໃຊ້​ການ​ສອນ-ການ​ຮຽນ ເພື່ອ​ໃຫ້​ສາ­ມາດ​ເປີດ​ການ​ສອນ-ການ​ຮຽນ ໃຫ້​ໄດ້​ໄວ​ທີ່​ສຸດ​ເທົ່າ​ທີ່​ຈະ​ໄວ​ໄດ້ ແລະ ໃນ​ໂອ­ກາດ​ນີ້ ຂ້າ­ພະ­ເຈົ້າ​ຈຶ່ງ​ຂໍ​ຮຽກ­ຮ້ອງ​ມາ​ຍັງ​ທຸກ​ການ­ຈັດ­ຕັ້ງ​ທັງ​ພາກ​ລັດ ແລະ ພາກ​ເອ­ກະ​ຊົນ​ໃນ​ທົ່ວ​ສັງ­ຄົມ ຈົ່ງ​ໃຫ້­ການ​ຮ່ວມ​ມື ແລະ ເປັນ​ເຈົ້າ​ການ​ຮ່ວມ​ກັບ​ຂະ­ແໜງ­ການ​ສຶກ​ສາ ແລະ ກີ­ລາ ໃນ​ການ​ກະ­ກຽມ​ຄວາມ​ພ້ອມ ອຳ­ນວຍ​ຄວາມ​ສະ­ດວກ ແລະ ຊ່ວຍ­ເຫຼືອ​ຕາມ​ເງື່ອນ­ໄຂ ແລະ ຄວາມ​ສາ­ມາດ​ຕົວ​ຈິງ​ຂອງ​ແຕ່​ລະ​ພາກ­ສ່ວນ ເພື່ອ​ໃຫ້­ການ​ເປີດ​ສົກ­ຮຽນ​ໃໝ່ 2018-2019 ດຳ­ເນີນ​ໄປ​ໄດ້​ດ້ວຍ​ດີ ແລະ ມີ​ປະ​ສິດ­ທິ​ຜົນ.

ຂ່າວທີ່ກ່ຽວຂ້ອງ