ຂ່າວຫຼ້າສຸດ

ລາວ-ນອກແວ ຍົກເວັ້ນວີຊາການທູດນຳກັນ

175 03 ກ.ຍ. 2018 ຂ່າວໜ້າ​ໜຶ່ງ

    ກະ­ຊວງ​ການ​ຕ່າງ­ປະ­ເທດ ອອກ​ແຈ້ງ​ການ​ກ່ຽວ​ກັບ​ສັນ­ຍາ​ວ່າ​ດ້ວຍ​ການ​ຍົກ­ເວັ້ນ​ວີ​ຊາ ສຳ­ລັບ​ຜູ້​ຖື​ໜັງ­ສື­ຜ່ານ­ແດນ​ການ​ທູດ ລະ­ຫວ່າງ ລາວ ແລະ ນອກ​ແວ ໂດຍ​ໄດ້​ລົງ​ນາມ​ກັນ​ວັນ​ທີ 1 ສິງ­ຫາ 2018 ຢູ່​ປະ­ເທດ​ສິງ­ກະ­ໂປ ແລະ ຈະ​ມີ​ຜົນ​ບັງ­ຄັບ​ໃຊ້​ແຕ່​ວັນ​ທີ 1 ກັນ­ຍາ 2018 ເປັນ­ຕົ້ນ​ໄປ ເນື້ອ​ໃນ​ສຳ­ຄັນ​ຂອງ​ສັນ­ຍາ​ດັ່ງ­ກ່າວ ແມ່ນ​ຄົນ​ສັນ­ຊາດ​ຂອງ​ຄູ່​ສັນ­ຍາ​ຝ່າຍ​ໜຶ່ງ​ທີ່​ຖື​ໜັງ­ສື­ຜ່ານ­ແດນ​ການ​ທູດ​ທີ່​ສາ­ມາດ​ນຳ​ໃຊ້​ໄດ້ ເຊິ່ງ​ບໍ່​ແມ່ນ​ຜູ້​ທີ່​ໄດ້​ຮັບ​ການ​ແຕ່ງ­ຕັ້ງ​ໄປ​ປະ­ຈຳ­ການ​ຢູ່​ດິນ­ແດນ​ຂອງ​ຄູ່​ສັນ­ຍາ​ຝ່າຍ​ໜຶ່ງ ສາ­ມາດ​ເດີນ­ທາງ​ເຄື່ອນ​ໄຫວ​ທາງ​ລັດ​ຖະ​ການ​ເຂົ້າ-ອອກ ຜ່ານ ແລະ ພັກ​ເຊົາ​ຢູ່​ໃນ​ດິນ­ແດນ​ຂອງ​ຄູ່​ສັນ­ຍາ​ຝ່າຍ​ໜຶ່ງ​ໄດ້​ແຕ່​ລະ​ຄັ້ງ​ບໍ່​ເກີນ 90 ວັນ ຈາກ​ໄລ­ຍະ​ເວ­ລາ 180 ວັນ ໄລ­ຍະ​ການ​ພັກ​ເຊົາ​ສູງ​ສຸດ​ດັ່ງ­ກ່າວ ແມ່ນ​ນັບ​ລວມ​ທຸກ​ຄັ້ງ​ທີ່​ເດີນ­ທາງ​ເຂົ້າ-ພັກ​ເຊົາ ຫຼື ເຂົ້າ-ພັກ​ເຊົາ​ຄັ້ງ​ດຽວ 90 ວັນ.

    ພາຍ​ໃຕ້​ສັນ­ຍາ​ສະ­ບັບ​ນີ້ ຈະ​ບໍ່​ໄດ້​ຍົກ­ເວັ້ນ​ວີ​ຊາ​ໃຫ້​ແກ່​ຄົນ​ສັນ­ຊາດ​ຂອງ​ຄູ່​ສັນ­ຍາ​ທີ່​ຖື​ໜັງ­ສື­ຜ່ານ­ແດນ​ການ​ທູດ ທີ່​ໄປ​ປະ­ຈຳ­ການ​ຢູ່​ສະ­ຖານ­ທູດ ສະ­ຖານ​ກົງ­ສຸນ ຫຼື ອົງ​ການ­ຈັດ­ຕັ້ງ​ສາ­ກົນ​ທີ່​ຕັ້ງ​ຢູ່​ດິນ­ແດນ​ຂອງ​ຄູ່​ສັນ­ຍາ​ອີກ​ຝ່າຍ​ໜຶ່ງ ໃນ​ນີ້ ລວມ​ທັງ​ສະ­ມາ­ຊິກ​ຄອບ­ຄົວ​ຂອງ​ເຂົາ­ເຈົ້າ.

ຂ່າວທີ່ກ່ຽວຂ້ອງ