ຂ່າວຫຼ້າສຸດ

ນະຄອນຫຼວງວຽງຈັນ ສຸມໃສ່ພັດທະນາການສຶກສາ ໃຫ້ເຊື່ອມໂຍງກັບມາດຕະຖານຂອງພາກພື້ນ ແລະ ສາກົນ

287 03 ກ.ຍ. 2018 ຂ່າວໜ້າ​ໜຶ່ງ
ນະຄອນຫຼວງວຽງຈັນ ສຸມໃສ່ພັດທະນາການສຶກສາ ໃຫ້ເຊື່ອມໂຍງກັບມາດຕະຖານຂອງພາກພື້ນ ແລະ ສາກົນ

    ພິ­ທີ​ໄຂ​ສົກ­ຮຽນ​ໃໝ່ 2018-2019 ທົ່ວ​ນະ­ຄອນ­ຫຼວງ​ວຽງ​ຈັນ ໄຂ​ຂຶ້ນ​ໃນ​ວັນ​ທີ 31 ສິງ­ຫາ 2018 ທີ່​ໂຮງ­ຮຽນ​ມັດ­ທະ­ຍົມ​ສຶກ​ສາ​ຕອນ​ປາຍ​ມິດ­ຕະ­ພາບ ນະ­ຄອນ­ຫຼວງ​ວຽງ​ຈັນ-ນະ­ຄອນ​ໂຮ່​ຈີ​ມີງ ໂດຍ​ເປັນ​ປະ­ທານ ທ່ານ ພູ­ທອນ ແສງ​ດາ​ວົງ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ອາ­ນຸ­ພາບ ຕຸ​ນາ​ລົມ ປະ­ທານ​ສະ­ພາ​ປະ­ຊາ­ຊົນ ນວ ທ່ານ ບົວ​ລານ ສິ­ລິ​ປັນ­ຍາ ຮອງ​ລັດ­ຖະ­ມົນ­ຕີ ກະ­ຊວງ​ສຶກ​ສາ​ທິ​ການ ແລະ ກີ­ລາ ພ້ອມ​ດ້ວຍ​ທ່ານ​ເຈົ້າ­ເມືອງ ຮອງ​ເຈົ້າ­ເມືອງ ບັນ­ດາ​ຄະ­ນະ​ຜູ້​ບໍ­ລິ­ຫານ​ການ​ສຶກ​ສາ​ຈາກ 9 ເມືອງ ຜູ້­ອຳ­ນວຍ­ການ​ໂຮງ­ຮຽນ ພະ­ນັກ­ງານ​ຄູ-ອາ­ຈານ ແຂກ​ຖືກ​ເຊີນ ແລະ ນັກ­ຮຽນ​ເຂົ້າ​ຮ່ວມ.

    ທ່ານ ພູ­ທອນ ແສງ​ດາ​ວົງ ກ່າວ​ວ່າ: ສົກ­ຮຽນ​ຜ່ານ​ມາ​ຂະ­ແໜງ​ສຶກ​ສາ ນວ ຍາດ​ແຍ່ງ​ຜົນ­ງານ​ມາ​ໄດ້​ຫຼາຍ​ດ້ານ​ທາງ​ດ້ານ​ປະ­ລິ­ມານ ແລະ ຄຸ­ນະ­ພາບ ເປັນ­ຕົ້ນ ໂຮງ­ຮຽນ​ລ້ຽງ​ເດັກ ແລະ ອະ­ນຸ­ບານ ມີ​ຈຳ­ນວນ​ເພີ່ມ​ຂຶ້ນ 363 ແຫ່ງ​ເພີ່ມ​ຂຶ້ນ 20 ແຫ່ງ ເທົ່າ​ກັບ 5,83% ໂຮງ­ຮຽນ​ປະ­ຖົມ​ເພີ່ມ​ຂຶ້ນ 2 ແຫ່ງ ມັດ­ທະ­ຍົມ​ຕົ້ນ-ປາຍ ມີ​ຈຳ­ນວນ 170 ແຫ່ງ ເພີ່ມ​ຂຶ້ນ 5 ແຫ່ງ ອັນ​ທີ່​ພົ້ນ​ເດັ່ນ​ທາງ​ດ້ານ​ວຽກ​ງານ​ວິ­ຊາ​ສະ­ເພາະ ຜົນ​ການ​ແຂ່ງ­ຂັນ​ສອບ­ເສັງ​ນັກ­ຮຽນ​ເກ່ງ ຊັ້ນ ມ4 ໄດ້​ລາ­ງວັນ​ຊະ­ນະ​ເລີດ ໄດ້​ຮັບ​ຫຼຽນ​ຄຳ 2 ວິ­ຊາ ຟີ​ຊິກ​ສາດ ແລະ ເຄ​ມີ​ສາດ ຊັ້ນ ມ7 ໄດ້​ລາ­ງວັນ​ຊະ­ນະ​ເລີດ ໄດ້​ຫຼຽນ​ຄຳ ວິ­ຊາ​ເຄ​ມີ​ສາດ ແລະ ອັນ​ດັບ 2 ໄດ້​ຫຼຽນ​ເງິນ ວິ­ຊາ​ພາ­ສາ​ລາວ-ວັນ­ນະ­ຄະ­ດີ ແລະ ອັນ​ດັບ 3 ໄດ້​ຮັບ​ຫຼຽນ​ທອງ­ແດງ ວິ­ຊາ​ຄະ­ນິດ­ສາດ ພິ­ເສດ​ໃນ​ສົກ­ຮຽນ​ຜ່ານ​ມາ ມີ​ນັກ­ຮຽນ​ຊັ້ນ ມ4 ແລະ ມ7 ມີ​ຜົນ​ການ​ຮຽນ​ດີ­ເດັ່ນ ໄດ້​ຮັບ​ໃບ​ປະ​ກາ​ສະ​ນິ​ຍະ​ບັດ​ແດງ ເຖິງ 6 ຄົນ ຍິງ 5 ຄົນ ໃນ​ນັ້ນ ມີ​ນັກ­ຮຽນ​ຊັ້ນ ມ7 ຈຳ­ນວນ 4 ຄົນ ເປັນ​ຍິງ​ທັງ​ໝົດ ພ້ອມ​ທັງ​ສຳ­ເລັດ​ການ​ຮຽນ-ການ​ສອນ​ບຳ­ລຸງ​ຈົບ​ຊັ້ນ​ປະ­ຖົມ ກຸ່ມ​ເປົ້າ​ໝາຍ​ໄດ້ 35 ບ້ານ ຈຳ­ນວນ 527 ຄົນ ຍິງ 145 ຄົນ.

    ສຳ­ລັບ​ທິດ​ທາງ​ຈຸດ​ສຸມ​ໃນ​ສົກ­ຮຽນ 2018-2019 ຈະ​ໄດ້​ສຸມ​ໃສ່​ສືບ­ຕໍ່​ຈັດ​ຕັ້ງ​ຜັນ​ຂະ­ຫຍາຍ​ແນວ­ທາງ​ການ​ປ່ຽນ­ແປງ​ໃໝ່​ຂອງ​ພັກ ນັກ­ຮຽນ​ທຸກ​ຄົນ​ຕ້ອງ​ມີ​ຄວາມ​ຮູ້ ຄວາມ​ສາ­ມາດ​ຂັ້ນ​ພື້ນ­ຖານ ຕອບ​ສະ­ໜອງ​ຕະ­ຫຼາດ​ແຮງ​ງານ ສ້າງ​ກີ­ລາ​ກາ​ຍະ​ກຳ​ລາວ ໃຫ້​ເຊື່ອມ​ໂຍງ​ກັບ​ມາດ­ຕະ­ຖານ​ຂອງ​ພາກ​ພື້ນ ແລະ ສາ­ກົນ.

ຂ່າວທີ່ກ່ຽວຂ້ອງ