ມອບເຄື່ອງຊ່ວຍເຫຼືອຜູ້ປະສົບໄພນ້ຳຖ້ວມ

125 03 ກ.ຍ. 2018 ຂ່າວໜ້າ​ໜຶ່ງ

    ເພື່ອ​ສະ­ແດງ​ຄວາມ​ເປັນ​ຫ່ວງ​ເປັນ​ໄຍ ແລະ ຊ່ວຍ­ເຫຼືອ​ປະ­ຊາ­ຊົນ​ຜູ້​ປະ­ສົບ​ໄພ​ນ້ຳ​ຖ້ວມ ວັນ​ທີ 30 ສິງ­ຫາ 2018 ບັນ­ດາ​ພັນ​ລະ​ຍາ​ການ​ນຳ ນະ­ຄອນ­ຫຼວງ​ວຽງ​ຈັນ ນຳ​ໂດຍ​ທ່ານ​ນາງ ວາດ​ສະ­ໜາ ຄຸດ​ໄພ­ທູນ ພັນ​ລະ​ຍາ​ທ່ານ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ໄດ້​ນຳ​ເອົາ​ເງິນ­ສົດ​ຈຳ­ນວນ 17 ລ້ານ​ກີບ ແລະ 800 ໂດ​ລາ​ສະ­ຫະ­ລັດ ພ້ອມ​ກັບ​ເຄື່ອງ​ອຸ­ປະ­ໂພກ-ບໍ­ລິ­ໂພກ ເປັນ­ຕົ້ນ​ແມ່ນ​ເຂົ້າ­ສານ​ໜຽວ ຈຳ­ນວນ 2 ໂຕນ ນ້ຳ​ດື່ມ 73 ແກັດ ໝີ່ 75 ແກັດ ແລະ ປາ­ກະ­ປ໋ອງ 8 ແກັດ ນຳ­ໄປ​ມອບ​ໃຫ້​ພໍ່​ແມ່​ປະ­ຊາ­ຊົນ​ບ້ານ​ໜອງ​ສອງ​ຫ້ອງ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ເຊິ່ງ​ພິ­ທີ​ມອບ-ຮັບ​ດັ່ງ­ກ່າວ​ຈັດ​ຂຶ້ນ​ທີ່​ໂຮງ­ຮຽນ ມສ ໂພນ​ງາມ.

    ສຳ­ລັບ​ສະ­ພາບ​ນ້ຳ​ຖ້ວມ​ຢູ່​ບ້ານ​ໜອງ​ສອງ​ຫ້ອງ ແມ່ນ​ເລີ່ມ​ມາ​ແຕ່​ວັນ​ທີ 25 ສິງ­ຫາ ເປັນ­ຕົ້ນ​ມາ ເຊິ່ງ​ອຳ­ນາດ​ການ​ປົກ­ຄອງ​ບ້ານ ໄດ້​ປະ­ສານ​ສົມ­ທົບ​ອຳ­ນາດ​ການ​ປົກ­ຄອງ​ເມືອງ ໄດ້​ຍົກ­ຍ້າຍ​ປະ­ຊາ­ຊົນ ຈຳ­ນວນ 35 ຄອບ­ຄົວ​ມາ​ພັກ​ຢູ່​ທີ່​ໂຮງ­ຮຽນ ມສ ໂພນ​ງາມ ເຊິ່ງ​ທ່ານ ບຸນ​ວັນ ຈະ​ສົ້ວ​ເກົາ ຮອງ​ເຈົ້າ­ເມືອງ​ໄຊ​ທາ­ນີ ໄດ້​ກ່າວ​ວ່າ: ອຳ­ນາດ​ການ​ປົກ­ຄອງ​ເມືອງ​ພວກ​ເຮົາ ໄດ້​ເອົາ­ໃຈ­ໃສ່​ຕິດ­ຕາມ​ສະ­ພາບ​ບັນ­ຫາ​ນ້ຳ​ຖ້ວມ​ຢ່າງ​ໃກ້­ຊິດ ເພື່ອ​ປະ​ເມີນ ແລະ ແກ້​ໄຂ​ບັນ­ຫາ​ໃຫ້​ຖືກ​ຈຸດ ພ້ອມ​ກັບ​ການ​ກະ­ກຽມ​ສະ­ຖານ­ທີ່​ພັກ​ເຊົາ​ຊົ່ວ­ຄາວ​ໃຫ້​ແກ່​ພໍ່​ແມ່​ປະ­ຊາ­ຊົນ ໂດຍ​ມາ​ຮອດ​ປັດ­ຈຸ­ບັນ​ເຫັນ​ວ່າ ຜົນ​ກະ­ທົບ​ຈາກ​ນ້ຳ​ຖ້ວມ​ຍັງ​ສືບ­ຕໍ່​ສູງ​ຂຶ້ນ ຄອບ­ຄົວ​ຜູ້​ທີ່​ໄດ້​ຮັບ​ຜົນ​ເສຍ​ຫາຍ​ກໍ່​ມີ​ຄວາມ​ຕ້ອງ­ການ​ຢາກ​ຍົກ­ຍ້າຍ​ມາ​ຢູ່​ສະ­ຖານ­ທີ່​ປອດ​ໄພ​ຫຼາຍ​ຂຶ້ນ​ເຊັ່ນ​ກັນ ເຊິ່ງ​ນັ້ນ​ຖື​ເປັນ​ສິ່ງ​ທ້າ​ທາຍ​ໃນ​ການ​ຈັດ​ສັນ​ສະ­ຖານ­ທີ່​ພັກ​ພາ​ອາ­ໄສ​ໃຫ້​ແກ່​ເຂົາ­ເຈົ້າ ໂດຍ​ສະ­ເພາະ​ເມືອງ​ໄດ້​ປະ­ສານ​ສົມ­ທົບ​ກັບ​ບັນ­ດາ​ພະ­ແນກ­ການ​ກ່ຽວ­ຂ້ອງ ໂດຍ​ສະ​ເພະ​ແມ່ນ​ພະ​ແນກ ຮສສ ນວ ເພື່ອ​ປະ­ກອບ­ສ່ວນ​ຊ່ວຍ­ເຫຼືອ​ດ້ານ​ເຄື່ອງ​ອຸ­ປະ­ໂພກ-ບໍ­ລິ­ໂພກ ພະ​ແນກ​ສາ­ທາ­ລະ­ນະ​ສຸກ ເພື່ອ​ຕິດ­ຕາມ​ກວດ­ກາ ແລະ ເຝົ້າ​ລະ­ວັງ​ພະ­ຍາດ ທີ່​ອາດ​ເກີດ​ຂຶ້ນ​ໃນ​ໄລ­ຍະ​ລະ­ດູ­ຝົນ​ນີ້​ເປັນ​ພິ­ເສດ ລວມ​ທັງ​ພະ​ແນກ​ສຶກ​ສາ​ທິ​ການ ແລະ ກີ­ລາ ເພື່ອ​ກະ­ກຽມ​ຄວາມ​ພ້ອມ​ໃນ​ການ​ເປີດ​ສົກ­ຮຽນ​ໃໝ່​ໃຫ້​ໄດ້​ຮັບ​ຜົນ​ກະ­ທົບ​ໜ້ອຍ​ທີ່​ສຸດ.

ຂ່າວທີ່ກ່ຽວຂ້ອງ