ຂ່າວຫຼ້າສຸດ

ເລີ່ມຈັດຕັ້ງປະຕິບັດໂຄງການຜະລິດກະສິກຳເປັນສິນຄ້າ

172 03 ກ.ຍ. 2018 ຂ່າວໜ້າ​ໜຶ່ງ
ເລີ່ມຈັດຕັ້ງປະຕິບັດໂຄງການຜະລິດກະສິກຳເປັນສິນຄ້າ

    ກອງ​ປະ­ຊຸມ​ລິ​ເລີ່ມ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ຜະ­ລິດ​ກະ­ສິ­ກຳ​ເປັນ​ສິນ­ຄ້າ ສປປ ລາວ ຄັ້ງ​ປະ­ຖົມ​ມະ­ລຶກ ຈັດ​ຂຶ້ນ​ວັນ​ທີ 30 ສິງ­ຫາ 2018 ຢູ່​ໂຮງ­ແຮມ​ເມີ​ກຽວ ໂດຍ​ເປັນ​ປະ­ທານ​ຂອງ​ທ່ານ ພວງ​ປາ​ຣິ​ສັກ ປຣະ​ວົງ​ວຽງ​ຄຳ ຮອງ​ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ມີ​ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ (ນວ) ຫົວ­ໜ້າ​ຫ້ອງ­ການ​ທະ­ນາ­ຄານ​ໂລກ ປະ­ຈຳ​ລາວ ຮອງ​ເຈົ້າ­ແຂວງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ພວງ​ປາ​ຣິ​ສັກ ປຣະ​ວົງ​ວຽງ​ຄຳ ກ່າວ​ວ່າ ເພື່ອ​ເປັນ​ການ​ລິ​ເລີ່ມ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ ທັງ​ເປັນ​ການ​ຮັບ­ຮອງ​ເອົາ​ແຜນ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ 4 ເດືອນ​ທ້າຍ​ປີ 2018 ໂຄງ­ການ​ຜະ­ລິດ​ກະ­ສິ­ກຳ​ເປັນ​ສິນ­ຄ້າ​ຢູ່​ລາວ ເປັນ​ໜຶ່ງ​ໃນ​ບັນ­ດາ​ໂຄງ­ການ​ບຸ­ລິ­ມະ­ສິດ​ທີ່​ນອນ​ຢູ່​ໃນ​ແຜນ­ການ​ຮ່ວມ​ມື​ລະ­ຫວ່າງ ລັດ­ຖະ­ບານ ແລະ ທະ­ນາ­ຄານ​ໂລກ ໃນ​ແຜນ​ງານ​ການ​ຄ້ຳ­ປະ­ກັນ​ສະ­ບຽງ​ອາ­ຫານ ແລະ ຜະ­ລິດ​ເປັນ​ສິນ­ຄ້າ​ລະ­ດັບ​ຊາດ ເພື່ອ​ຕອບ​ສະ­ໜອງ​ຄວາມ​ຕ້ອງ­ການ​ກ່ຽວ​ກັບ​ຫັນ​ການ​ຜະ­ລິດ​ເປັນ​ທັນ​ສະ­ໄໝ ໂດຍ​ນຳ​ໃຊ້​ກົນ​ຈັກ​ເພື່ອ​ປະ­ຢັດ​ຕົ້ນ​ທຶນ ໄດ້​ຮັບ​ຜົນ​ຜະ­ລິດ​ສູງ ແລະ ມີ​ຄຸ­ນະ­ພາບ ເຮັດ​ໃຫ້​ປະ­ຊາ­ຊົນ​ມີ​ກຳ­ໄລ​ຈາກ​ການ​ຜະ­ລິດ ການ​ປັບ­ປຸງ​ແນວ​ພັນ ມາດ­ຕະ­ຖານ​ການ​ຜະ­ລິດ​ທີ່​ດີ​ຂອງ​ໂຮງ­ສີ ຂອດ​ການ​ສົ່ງ­ເສີມ ລະ­ບົບ​ກົນ​ຈັກ ການ​ເກັບ​ກ່ຽວ ໂຮງ​ອົບ ສາງ ຄຽງ​ຄູ່​ກັບ​ການ​ປຸງ​ແຕ່ງ ການ­ຈັດ­ຕັ້ງ​ລະ­ບົບ​ໂຮງ­ສີ ການ­ຈັດ­ຕັ້ງ​ການ​ພົວ­ພັນ ການ​ຜະ­ລິດ ການ​ສຳ­ພັນ​ເສດ­ຖະ­ກິດ​ລະ­ຫວ່າງ​ຂົງ­ເຂດ ການ​ຢັ້ງ­ຢືນ​ມາດ­ຕະ­ຖານ​ຄຸ­ນະ­ພາບ ໂດຍ​ອີງ­ໃສ່​ນະ­ໂຍ­ບາຍ​ຂອງ​ລັດ­ຖະ­ບານ ທີ່​ແນ­ໃສ່​ການ​ຜະ­ລິດ​ກະ­ສິ­ກຳ​ສະ­ອາດ ລະ­ບຽບ​ການ​ຕ່າງໆ ການ​ຫຼຸດ​ຄ່າ​ໄຟ­ຟ້າ ແລະ ປັດ​ໄຈ​ອື່ນໆ ໂຄງ­ການ​ດັ່ງ­ກ່າວ​ກວມ​ເອົາ 5 ແຂວງ​ຄື ຄຳ​ມ່ວນ ບໍ​ລິ​ຄຳ​ໄຊ ນວ ວຽງ​ຈັນ ແລະ ໄຊ​ຍະ​ບູ​ລີ.

    ການ​ປະ­ຕິ­ບັດ​ວຽກ​ງານ​ການ​ຄ້ຳ­ປະ­ກັນ ແລະ ຜະ­ລິດ​ເປັນ​ສິນ­ຄ້າ ໄດ້​ຮຽກ­ຮ້ອງ​ໃຫ້​ພາກ​ລັດ ແລະ ບັນ­ດາ​ສະ​ຖາ​ບັນ​ການ​ເງິນ​ສາ­ກົນ ດຳ­ເນີນ​ມາດ­ຕາ​ການ​ຢ່າງ​ຕັ້ງ­ໜ້າ ທັບ​ມ້າງ​ທຸກ​ອຸ­ປະ­ສັກ​ທາງ​ສັງ­ຄົມ-ການ­ເມືອງ ແລະ ດ້ານ​ເສດ­ຖະ­ກິດ ປັດ­ຈຸ­ບັນ​ປະ­ຊາ­ກອນ​ລາວ​ທີ່​ພົວ­ພັນ​ດ້ານ​ການ​ຜະ­ລິດ​ກະ­ສິ­ກຳ​ຍັງ​ກວມ​ຫຼາຍ​ກວ່າ 70% ເຊິ່ງ​ວຽກ​ງານ​ດັ່ງ­ກ່າວ​ຈະ​ຕ້ອງ​ໄດ້​ມີ​ການ​ລົງ­ທຶນ​ຮ່ວມ​ຂອງ​ພາກ​ລັດ ແລະ ເອ­ກະ​ຊົນ ວຽກ​ງານ​ການ​ຄ້ຳ­ປະ­ກັນ​ສະ­ບຽງ​ອາ­ຫານ ແລະ ຜະ­ລິດ​ເປັນ​ສິນ­ຄ້າ ເປັນ​ໜຶ່ງ​ໃນ​ວຽກ​ງານ​ບຸ­ລິ­ມະ­ສິດ​ລະ­ດັບ​ຊາດ ແລະ ເປັນ​ໜຶ່ງ​ໃນ​ແຜນ­ການ​ຮ່ວມ​ມື​ລະ­ຫວ່າງ ລັດ­ຖະ­ບານ​ລາວ ແລະ ທະ­ນາ­ຄານ​ໂລກ ໃນ​ການ​ຍົກ​ລະ­ດັບ​ລະ­ບົບ​ຕ່ອງ​ໂສ້​ການ​ຜະ­ລິດ​ເປັນ​ສິນ­ຄ້າ​ນັບ​ແຕ່​ຂອດ​ການ​ຜະ­ລິດ ການ​ປຸງ​ແຕ່ງ​ໄປ​ຈົນ​ເຖິງ​ການ­ຈຳ­ໜ່າຍ ເພື່ອ​ສ້າງ​ລາຍ​ໄດ້​ໃຫ້​ແກ່​ຜູ້​ຜະ­ລິດ​ຂະ­ໜາດ​ນ້ອຍ ແລະ ຂະ­ໜາດ​ກາງ ເອ­ກະ​ຊົນ ຜູ້​ປະ­ກອບ​ການ​ດ້ານ​ກະ­ສິ­ກຳ ໃນ​ນີ້ ຈະ​ເນັ້ນ​ໃສ່​ການ​ປັບ­ປຸງ​ປະ​ສິດ­ທິ​ຜົນ ແລະ ຄວາມ​ຍືນ​ຍົງ​ໃນ​ການ​ຜະ­ລິດ​ເຊັ່ນ: ເພີ່ມ​ການ​ນຳ​ໃຊ້​ແນວ​ພັນ​ພືດ​ຄຸ­ນະ­ພາບ​ສູງ​ຫຼາຍ​ຊະ­ນິດ ການ​ເຮັດ​ກະ­ສິ­ກຳ​ສະ­ອາດ GAP ເສີມ​ສ້າງ​ການ​ບໍ­ລິ­ການ​ດ້ານ​ກະ­ສິ­ກຳ ແລະ ໂພ­ຊະ​ນາ​ການ​ໃຫ້​ຊຸມ​ຊົນ ການ​ຍົກ​ລະ­ດັບ​ຄວາມ​ສາ­ມາດ​ທາງ​ການ​ຂາຍ ການ​ສ້າງ​ສິ່ງ​ອຳ­ນວຍ​ໃຫ້​ລະ­ບົບ​ຕ່ອງ​ໂສ້​ມູນ​ຄ່າ​ການ​ຜະ­ລິດ ແລະ ການ​ຊອກ​ຫາ​ຕະ­ຫຼາດ.

ຂ່າວທີ່ກ່ຽວຂ້ອງ