58 ບ້ານ 916 ຄອບຄົວ ແຂວງຫຼວງພະບາງ ໄດ້ຮັບຜົນກະທົບຈາກໄພນ້ຳຖ້ວມ

203 03 ກ.ຍ. 2018 ຂ່າວໜ້າ​ໜຶ່ງ

    ກອງ​ປະ­ຊຸມ​ສະ­ຫຼຸບ​ລາຍ​ງານ​ສະ­ພາບ​ໄພ­ພິ­ບັດ​ນ້ຳ​ຖ້ວມ​ເບື້ອງ​ຕົ້ນ ​ແຂວງ​ຫຼວງ​ພະ​ບາງ ຈັດ​ຂຶ້ນ​ວັນ​ທີ 29 ສິງ­ຫາ 2018 ຢູ່​ນະ­ຄອນ­ຫຼວງ​ພະ​ບາງ ໂດຍ​ເປັນ​ປະ­ທານ​ຂອງ​ທ່ານ ຄຳ​ແພງ ໄຊ​ສົມ​ແພງ ລັດ­ຖະ­ມົນ­ຕີ ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ປະ­ທານ​ຄະ­ນະ​ກຳ­ມະ­ການ​ປ້ອງ​ກັນ ແລະ ຄວບ​ຄຸມ​ໄພ­ພິ­ບັດ​ແຫ່ງ​ຊາດ ທ່ານ ຄຳ​ຂັນ ຈັນ­ທະ​ວີ​ສຸກ ເຈົ້າ­ແຂວງ​ຫຼວງ​ພະ​ບາງ ມີ​ບັນ­ດາ​ຮອງ​ລັດ­ຖະ­ມົນ­ຕີ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ຄຳ​ຂັນ ຈັນ­ທະ​ວີ​ສຸກ ກ່າວ​ວ່າ: ແຂວງ​ຫຼວງ​ພະ​ບາງ ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ​ແຕ່​ວັນ​ທີ 18 ກໍ­ລະ­ກົດ 2018 ເປັນ­ຕົ້ນ​ມາ ເຊິ່ງ​ຝົນ​ໄດ້​ຕົກ​ໜັກ​ຕິດ­ຕໍ່​ກັນ​ຫຼາຍ​ວັນ ເຮັດ​ໃຫ້​ນ້ຳ​ຖ້ວມ ດິນ​ເຊາະ​ເຈື່ອນ​ຖົມ​ເຮືອນ​ປະ­ຊາ­ຊົນ​ເສຍ​ຫາຍ 9 ເມືອງ​ຄື: ນະ­ຄອນ­ຫຼວງ​ພະ​ບາງ​ມີ 2 ບ້ານ 35 ຄອບ­ຄົວ ເນື້ອ­ທີ່​ການ​ຜະ­ລິດ​ເສຍ​ຫາຍ 14 ເຮັກ­ຕາ ເສຍ​ຊີ­ວິດ 1 ຄົນ ເມືອງ​ຊຽງ​ເງິນ 13 ບ້ານ ເສຍ​ຊີ­ວິດ 1 ຄົນ ເນື້ອ­ທີ່​ການ​ຜະ­ລິດ​ເສຍ​ຫາຍ 9.000 ກວ່າ​ເຮັກ­ຕາ ເມືອງ​ພູ​ຄູນ 8 ບ້ານ ເນື້ອ­ທີ່​ການ​ຜະ­ລິດ​ເສຍ​ຫາຍ 1 ຕື້​ກວ່າ​ກີບ ເມືອງ​ປາກ​ແຊງ 10 ບ້ານ ເສຍ​ຫາຍ 300 ກວ່າ​ລ້ານ​ກີບ ເມືອງ​ນ້ຳ​ບາກ 3 ບ້ານ ເສຍ​ຊີ­ວິດ 2 ຄົນ ເມືອງ​ຈອມ​ເພັດ 4 ບ້ານ ເສຍ​ຫາຍ 157 ລ້ານ​ກວ່າ​ກີບ ເມືອງ​ງອຍ 18 ຄອບ­ຄົວ ເສຍ​ຊີ­ວິດ 1 ຄົນ ເມືອງ​ນານ ຜົນ​ຜະ­ລິດ ແລະ ວັດ­ຖຸ​ຂອງ​ປະ­ຊາ­ຊົນ​ເສຍ​ຫາຍ 100 ກວ່າ​ລ້ານ​ກີບ ເມືອງ​ໂພນ​ໄຊ 18 ບ້ານ ເສຍ​ຊີ­ວິດ 1 ຄົນ ເນື້ອ­ທີ່​ການ​ຜະ­ລິດ ແລະ ອື່ນໆ ເສຍ​ຫາຍ 6 ຕື້​ກວ່າ​ກີບ ລວມ​ແລ້ວ​ຜູ້​ໄດ້​ຮັບ​ຜົນ​ກະ­ທົບ​ທັງ​ໜົດ 58 ບ້ານ 916 ຄອບ­ຄົວ ເສຍ​ຊີ­ວິດ 6 ຄົນ ປັດ​ຈຸບັນ​ ສາ­ມາດ​ສະ­ຫຼຸບ​ຜົນ​ເສຍ​ເຫຍ 5 ເມືອງ ມູນ​ຄ່າ​ເສຍ​ຫາຍ 8 ຕື້​ກວ່າ​ກີບ.

    ສຳ­ລັບ​ເມືອງ ແລະ ບ້ານ​ທີ່​ໄດ້​ຮັບ​ຜົນ​ກະ­ທົບ ອຳ­ນາດ​ການ​ປົກ­ຄອງ​ແຂວງ​ໄດ້​ໃຫ້­ການ​ຊ່ວຍ­ເຫຼືອ​ເບື້ອງ​ຕົ້ນ​ ແກ່​ຜູ້​ໄດ້​ຮັບ​ຜົນ​ກະ­ທົບ​ຈຳ­ນວນ​ໜຶ່ງ​ແລ້ວ ເປັນ­ຕົ້ນ ເຄື່ອງ­ນຸ່ງ​ຫົ່ມ ອາ­ຫານ ນ້ຳ​ດື່ມ ພ້ອມ​ທັງ​ໄດ້​ລະ­ດົມ​ທະ­ຫານ ຕຳ­ຫຼວດ ລົງ​ຊ່ວຍ­ເຫຼືອ​ປະ­ຊາ­ຊົນ​ໃນ​ການ​ສ້ອມ­ແປງ​ເຮືອນ ທຳ​ຄວາມ​ສະ­ອາດ ແລະ ຊ່ວຍ​ຟື້ນ​ຟູ​ຊີ­ວິດ​ການ​ເປັນ​ຢູ່​ຜູ້​ໄດ້​ຮັບ​ຜົນ​ກະ­ທົບ ນອກ​ນີ້ ແຕ່ງ­ຕັ້ງ​ບັນ­ດາ​ອະ­ນຸ​ກຳ­ມະ­ການ​ລົງ​ຕິດ­ຕາມ ກວດ­ກາ ສະ­ຫຼຸບ​ຜົນ​ເສຍ​ຫາຍ​ແຕ່​ລະ​ເມືອງ​ໃຫ້​ລະ­ອຽດ ເພື່ອ​ໃຫ້­ການ​ຊ່ວຍ­ເຫຼືອ​ຢ່າງ​ທົ່ວ​ເຖິງ.

ຂ່າວທີ່ກ່ຽວຂ້ອງ