ຂ່າວຫຼ້າສຸດ

ແຈ້ງເຕືອນຈະມີຝົນຕົກຢູ່ທຸກພາກຂອງປະເທດລາວ

391 31 ສ.ຫ. 2018 ຂ່າວໜ້າ​ໜຶ່ງ

    ເນື່ອງ​ຈາກ​ຄວາມ​ກົດ​ດັນ​ອາ­ກາດ​ຕ່ຳ ໄດ້​ພັດ​ຜ່ານ​ເຂດ​ພາກ​ເໜືອ-ພາກ​ກາງ­ຂອງ​ປະ­ເທດ​ລາວ ດ້ວຍ​ກຳ­ລັງ​ອ່ອນ-ປານ​ກາງ ສົມ­ທົບ​ກັບ​ມໍ​ລະ​ສຸມ​ຕາ­ເວັນ­ຕົກ-ຕາ­ເວັນ­ຕົກ​ສຽງ​ໃຕ້ ຈະ​ພັດ​ປົກ​ຄຸມ​ເປັນ​ສ່ວນ​ໃຫຍ່ ໃນ​ວັນ​ທີ 31 ສິງ­ຫາ-2 ກັນ­ຍາ 2018 ຄວາມ​ກົດ​ດັນ​ອາ­ກາດ​ຕ່ຳ ຍັງ​ຈະ​ສືບ­ຕໍ່​ພັດ​ຜ່ານ​ຢູ່​ທົ່ວ​ທຸກ​ພາກ​ຂອງ​ປະ­ເທດ ເຊິ່ງ​ຈະ​ເຮັດ​ໃຫ້​ມີ​ຝົນ­ຕົກ​ລະ­ດັບ​ຄ່ອຍ​ຢູ່​ທົ່ວ​ໄປ​ຢູ່​ແຕ່​ລະ​ພາກ ແລະ ຕົກ​ປານ​ກາງ​ຢູ່​ບາງ​ທ້ອງ­ຖິ່ນ​ແຂວງ​ພາກ​ເໜືອ​ຄື: ອຸ­ດົມ​ໄຊ ຫຼວງ​ນ້ຳ​ທາ ຫຼວງ​ພະ​ບາງ ແລະ ບັນ­ດາ​ແຂວງ​ພາກ​ກາງ​ຈະ​ມີ​ຝົນ­ຕົກ​ລະ­ດັບ​ຄ່ອຍ​ຢູ່​ທົ່ວ​ໄປ ສ່ວນ​ແຂວງ​ໄຊ​ສົມ­ບູນ ສາ­ລະ​ວັນ ຈຳ­ປາ​ສັກ ອັດ​ຕະ​ປື ແລະ ເຂດ​ພູ​ພຽງ​ບໍ­ລິ­ເວນ ອາ­ກາດ​ຈະ​ຮ້ອນ ແລະ ຈະ​ມີ​ຝົນ­ຕົກ​ລະ­ດັບ​ຄ່ອຍ​ຢູ່​ບາງ​ບໍ­ລິ­ເວນ ສຳ­ລັບ​ລະ­ດັບ​ນ້ຳ­ຂອງ ແລະ ແມ່­ນ້ຳ​ຕາມ​ສາ­ຂາ​ຢູ່​ພາກ​ກາງ ແລະ ພາກ​ໃຕ້ ຈະ​ມີ​ທ່າ​ອ່ຽງ​ສູງ​ຂຶ້ນ ເນື່ອງ​ຈາກ​ຝົນ​ຍັງ​ຈະ​ສືບ­ຕໍ່​ຕົກ​ລະ­ດັບ​ຄ່ອຍ​ຢູ່​ທົ່ວ​ໄປ ແລະ ຕົກ​ປານ​ກາງ​ຢູ່​ບາງ​ທ້ອງ­ຖິ່ນ​ແຂວງ​ພາກ​ກາງ ແລະ ພາກ​ໃຕ້.

    ດັ່ງ­ນັ້ນ ຈຶ່ງ​ແຈ້ງ​ເຕືອນ​ເຖິງ​ປະ­ຊາ­ຊົນ​ບັນ­ດາ­ເຜົ່າ ອຳ­ນາດ​ການ​ປົກ­ຄອງ ແລະ ອົງ​ການ­ຈັດ­ຕັ້ງ​ທຸກ​ພາກ­ສ່ວນ​ທີ່​ອາ­ໄສ​ຢູ່​ບັນ­ດາ​ແຂວງ​ດັ່ງ­ກ່າວ ຈົ່ງ​ມີ​ສະ­ຕິ​ກຽມ­ພ້ອມ​ຮັບ​ມື​ກັບ​ສະ­ພາບ​ນ້ຳ​ຖ້ວມ​ຊຸ ດິນ​ເຈື່ອນ ນ້ຳ​ຖ້ວມ​ອັ່ງ ລົມ​ພັດ​ແຮງ ເຊິ່ງ​ອາດ​ເປັນ​ອັນ­ຕະ­ລາຍ​ຕໍ່​ຊີ­ວິດ ແລະ ຊັບ​ສິນ​ມີ­ຄ່າ​ຂອງ​ປະ­ຊາ­ຊົນ ພ້ອມ​ນີ້ ກໍ່​ໃຫ້​ກະ­ກຽມ​ເຄື່ອນ​ຍ້າຍ​ວັດ­ຖຸ​ສິ່ງ​ຂອງ ແລະ ສັດ­ລ້ຽງ​ໄປ​ໄວ້​ບ່ອນ​ປອດ​ໄພ ຂໍ​ໃຫ້​ຕິດ­ຕາມ​ຂ່າວ​ພະ­ຍາ­ກອນ​ອາ­ກາດ ແລະ ລະ­ດັບ​ນ້ຳ​ຈາກ​ກົມ​ອຸ­ຕຸ­ນິ­ຍົມ ແລະ ອຸ​ທົກ​ກະ​ສາດ​ເປັນ​ປະ­ຈຳ.

ຂ່າວທີ່ກ່ຽວຂ້ອງ