ສົ່ງເສີມການພັດທະນາແບບຍືນຍົງ ຢູ່ອາຊີຕາເວັນອອກ

168 31 ສ.ຫ. 2018 ຂ່າວໜ້າ​ໜຶ່ງ

    ກະ­ຊວງ​ການ​ຕ່າງ­ປະ­ເທດ ສປປ ລາວ ແລະ ກະ­ຊວງ​ການ​ຕ່າງ­ປະ­ເທດ ສ ເກົາ­ຫຼີ ໄດ້​ເປັນ​ປະ­ທານ​ຮ່ວມ​ກອງ​ປະ­ຊຸມ​ເວ­ທີ​ປຶກ­ສາ​ຫາ­ລື​ອາ­ຊີ​ຕາ­ເວັນ​ອອກ ຄັ້ງ​ທີ 16 ວັນ​ທີ 29-30 ສິງ­ຫາ 2018 ຢູ່​ແຂວງ​ຫຼວງ​ພະ​ບາງ ພາຍ​ໃຕ້​ຫົວ­ຂໍ້ “ສົ່ງ­ເສີມ​ການ​ພັດ­ທະ­ນາ​ແບບ​ຍືນ​ຍົງ ແລະ ຄວາມ​ສົມ­ບູນ​ພູນ​ສຸກ​ຢູ່​ອາ­ຊີ​ຕາ­ເວັນ​ອອກ” ມີ​ຜູ້​ແທນ​ຂັ້ນ​ສູງ​ຈາກ 10 ປະ­ເທດ​ສະ­ມາ­ຊິກ​ອາ​ຊຽນ ສປ ຈີນ ຍີ່­ປຸ່ນ ສ ເກົາ­ຫຼີ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ໄດ້​ຍົກ​ໃຫ້​ເຫັນ​ບົດ­ບາດ​ຄວາມ​ສຳ­ຄັນ ແລະ ຜົນ­ສຳ­ເລັດ​ອັນ​ພົ້ນ​ເດັ່ນ ພາຍ​ໃຕ້​ກົນ​ໄກ​ການ​ຮ່ວມ​ມື​ອາ​ຊຽນ+3 ນັບ​ແຕ່​ໄດ້​ສ້າງ­ຕັ້ງ​ປີ 1997 ເປັນ­ຕົ້ນ​ມາ ໂດຍ​ສະ­ເພາະ​ດ້ານ​ການ​ເງິນ ການ​ສຶກ​ສາ ສາ­ທາ­ລະ­ນະ​ສຸກ ການ​ເສື່ອມ​ຈອດ​ພະ­ລັງ­ງານ ແລະ ການ​ຄ້ຳ­ປະ­ກັນ​ຄວາມ​ໝັ້ນ­ຄົງ​ທາງ​ສະ­ບຽງ​ອາ­ຫານ ແຕ່​ສິ່ງ​ທ້າ​ທາຍ​ທີ່​ເປັນ​ອຸ­ປະ­ສັກ​ຕໍ່​ການ​ເຊື່ອມ​ໂຍງ ແລະ ການ​ເຕີບ​ໃຫຍ່​ຂະ­ຫຍາຍ­ຕົວ​ຂອງ​ພາກ​ພື້ນ ແມ່ນ​ຄວາມ​ແຕກ​ໂຕນ​ທາງ​ດ້ານ​ການ​ພັດ­ທະ­ນາ ຄວາມ​ບໍ່​ໝັ້ນ​ທ່ຽງ​ຂອງ​ສະ­ພາບ​ເສດ­ຖະ­ກິດ​ໂລກ ທ່າ​ອ່ຽງ​ການ​ປົກ​ປ້ອງ​ຕະ­ຫຼາດ​ພາຍ​ໃນ ແລະ ການ​ຕ້ານ​ຍຸກ​ໂລ­ກາ​ພິ​ວັດ ສິ່ງ​ທ້າ​ທາຍ​ຕ່າງໆ​ທີ່​ເກີດ​ຈາກ​ການ​ປະ­ຕິ­ວັດ​ອຸດ­ສາ­ຫະ­ກຳ ຄັ້ງ​ທີ 4 ໄພ­ພິ­ບັດ​ທຳ​ມະ​ຊາດ ແລະ ການ​ປ່ຽນ­ແປງ​ສະ­ພາບ​ດິນ​ຟ້າ​ອາ­ກາດ ເຊິ່ງ​ທ່ານ​ລັດ­ຖະ­ມົນ­ຕີ​ໄດ້​ຊຸກ­ຍູ້​ໃຫ້​ຜູ້​ແທນ​ທີ່​ເຂົ້າ​ຮ່ວມ​ກອງ​ປະ­ຊຸມ ປຶກ­ສາ​ຫາ­ລື ແລະ ສ້າງ​ຂໍ້​ສະ­ເໜີ​ແນະ​ແນ­ໃສ່​ຮັບ​ມື​ກັບ​ສິ່ງ​ທ້າ​ທາຍ​ເຫຼົ່າ​ນີ້ ເພື່ອ​ຮັບ­ປະ­ກັນ​ໃຫ້​ແກ່​ການ​ເຊື່ອມ​ໂຍງ​ພາກ​ພື້ນ ກໍ່​ຄື​ການ​ພັດ­ທະ­ນາ​ແບບ​ຍືນ​ຍົງ ແລະ ກ້າວ​ໄປ​ສູ່​ການ​ສ້າງ​ປະ­ຊາ​ຄົມ​ອາ­ຊີ​ຕາ­ເວັນ​ອອກ​ໃນ​ໄລ­ຍະ​ຍາວ ໂດຍ​ຜ່ານ​ກົນ​ໄກ​ອາ​ຊຽນ+3 ທີ່​ເປັນ​ກົນ​ໄກ​ຫຼັກ ແລະ ມີ​ອາ​ຊຽນ​ເປັນ​ກຳ­ລັງ​ຊຸກ­ຍູ້​ສົ່ງ­ເສີມ.

    ກອງ​ປະ­ຊຸມ​ຄັ້ງ​ນີ້ ໂດຍ​ເປັນ​ປະ­ທານ​ຂອງ​ທ່ານ ລັດ­ສະ­ໝີ ແກ້ວ​ມະ­ນີ ທູດ​ປະ­ຈຳ​ກະ­ຊວງ​ການ​ຕ່າງ­ປະ­ເທດ ແລະ ທ່ານ Yoon Soon-gu ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ສ ເກົາ­ຫຼີ ເຊິ່ງ​ໄດ້​ສຸມ​ໃສ່​ການ​ປຶກ­ສາ​ຫາ­ລື 3 ຫົວ­ຂໍ້​ຫຼັກ​ຄື: ເພີ່ມ​ທະ­ວີ​ການ​ເຊື່ອມ​ໂຍງ​ພາກ​ພື້ນ ແລະ ຮັດ​ແຄບ​ຄວາມ​ແຕກ​ໂຕນ​ດ້ານ​ການ​ພັດ­ທະ­ນາ ສົ່ງ­ເສີມ​ການ​ເປັນ​ຜູ້​ປະ­ກອບ​ການ ແລະ ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ແລະ ຮັດ​ແໜ້ນ​ການ​ຮ່ວມ​ມື ເພື່ອ​ການ​ພັດ­ທະ­ນາ​ໃນ​ພາກ​ພື້ນ ທີ່​ຊຸກ­ຍູ້-ສົ່ງ­ເສີມ​ໂດຍ​ນະ​ວັດ­ຕະ​ກຳ ພ້ອມ​ນີ້​ກອງ​ປະ­ຊຸມ​ຍັງ​ໄດ້​ນຳ​ສະ­ເໜີ​ຜົນ​ຂອງ​ກອງ​ປະ­ຊຸມ ໂດຍ​ສະ­ເພາະ ບັນ­ດາ​ຂໍ້​ສະ­ເໜີ​ຕ່າງໆ​ຕໍ່​ກອງ​ປະ­ຊຸມ​ເຈົ້າ​ໜ້າ­ທີ່​ອາ­ວຸ­ໂສ​ອາ​ຊຽນ+3 ແລະ ກອງ​ປະ­ຊຸມ​ສຸດ​ຍອດ​ອາ​ຊຽນ+3 ໃນ​ທ້າຍ​ປີ 2018 ຢູ່​ປະ­ເທດ​ສິງ­ກະ­ໂປ.

ຂ່າວທີ່ກ່ຽວຂ້ອງ