ຂ່າວຫຼ້າສຸດ

ຂະຫຍາຍເວລາພັກເຊົາຢູ່ລາວ ໃຫ້ພົນລະເມືອງ ສ ເກົາຫຼີ

265 31 ສ.ຫ. 2018 ຂ່າວໜ້າ​ໜຶ່ງ

    ນັບ​ວ່າ​ເປັນ​ຂ່າວ​ດີ​ສຳ­ລັບ​ພົນ­ລະ­ເມືອງ ສ ເກົາ­ຫຼີ ທີ່​ເດີນ­ທາງ​ມາ​ຢ້ຽມ­ຢາມ ແລະ ທ່ອງ​ທ່ຽວ​ຢູ່​ລາວ ທີ່​ລັດ­ຖະ­ບານ​ລາວ​ໄດ້​ຂະ­ຫຍາຍ​ເວ­ລາ​ພັກ​ເຊົາ ໃນ​ໄລ­ຍະ​ເຄື່ອນ​ໄຫວ​ຢູ່​ລາວ​ອອກ​ຕື່ມ​ອີກ​ຫຼາຍ​ວັນ ເພື່ອ​ເປັນ​ການ​ສ້າງ​ໂອ­ກາດ​ໃຫ້​ແກ່​ຄົນ ສ ເກົາ­ຫຼີ ໄດ້​ຢ້ຽມ­ຢາມ ແລະ ທ່ອງ​ທ່ຽວ​ສະ­ຖານ­ທີ່​ທ່ອງ​ທ່ຽວ​ຢູ່​ລາວ​ຫຼາຍ​ຂຶ້ນ ນີ້​ກໍ່​ແມ່ນ​ຍຸດ​ທະ​ສາດ​ໜຶ່ງ​ຂອງ​ລັດ­ຖະ­ບານ​ລາວ ທີ່​ດຶງ​ດູດ​ໃຫ້​ນັກ​ທ່ອງ​ທ່ຽວ​ຕ່າງ­ປະ­ເທດ ໂດຍ​ສະ­ເພາະ​ນັກ​ທ່ອງ​ທ່ຽວ ສ ເກົາ­ຫຼີ ມາ​ທ່ອງ​ທ່ຽວ​ລາວ​ເຮົາ​ນັບ​ມື​ຫຼາຍ​ຂຶ້ນ.

    ອີງ​ຕາມ​ແຈ້ງ​ການ​ຂອງ​ກະ­ຊວງ​ການ​ຕ່າງ­ປະ­ເທດ ໄດ້​ຮູ້​ວ່າ: ລັດ­ຖະ­ບານ​ລາວ​ໄດ້​ຂະ­ຫຍາຍ​ເວ­ລາ​ພັກ​ເຊົາ​ໃຫ້​ແກ່​ພົນ­ລະ­ເມືອງ ສ ເກົາ­ຫຼີ ທີ່​ເດີນ­ທາງ​ເຂົ້າ​ມາ ສປປ ລາວ ໂດຍ​ລັດ­ຖະ­ບານ​ລາວ ເຫັນ​ດີ​ອະ­ນຸ­ມັດ​ໃຫ້​ຂະ­ຫຍາຍ​ເວ­ລາ​ພັກ​ເຊົາ​ໃຫ້​ແກ່​ພົນ­ລະ­ເມືອງ ສ ເກົາ­ຫຼີ ທີ່​ຖື​ໜັງ­ສື­ຜ່ານ­ແດນ​ທຳ​ມະ​ດາ ທີ່​ເດີນ­ທາງ​ມາ ສປປ ລາວ ໃນ​ຖາ­ນະ​ຢ້ຽມ­ຢາມ ແລະ ທ່ອງ​ທ່ຽວ​ຈາກ 15 ວັນ​ມາ​ເປັນ 30 ວັນ ຕາມ​ການ​ຕົກ­ລົງ​ຍົກ­ເວັ້ນ​ວີ​ຊາ​ຝ່າຍ​ດຽວ ແລະ ເລີ່ມ​ຈັດ​ຕັ້ງ​ປະ­ຕິ­ບັດ​ແຕ່​ວັນ​ທີ 1 ກັນ­ຍາ 2018 ເປັນ­ຕົ້ນ​ໄປ.

ຂ່າວທີ່ກ່ຽວຂ້ອງ