ຂ່າວຫຼ້າສຸດ

ຊອກຮູ້ມະຕິ 037

814 31 ສ.ຫ. 2018 ນານາສາລະ

    ສຳ­ລັບ​ພະ­ນັກ­ງານ​ພັກ-ລັດ ລວມ​ໄປ​ເຖິງ​ບຸ​ຄະ­ລາ​ກອນ​ທຸກ​ຂະ­ແໜງ­ການ​ຂອງ​ລັດ ບໍ່​ຄວນ​ຖື​ເບົາ ມະ­ຕິ​ເລກ​ທີ 037/ຄບສພ ຂອງ​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ລົງ​ວັນ​ທີ 18/6/2018 ເຊິ່ງ​ເນັ້ນ​ໃສ່​ການ​ຍົກ​ສູງ​ປະ­ສິດ​ທະ​ພາບ ການ​ຄຸ້ມ​ຄອງ​ລັດ​ຄຸ້ມ​ຄອງ​ສັງ­ຄົມ​ດ້ວຍ​ກົດ­ໝາຍ ເຊິ່ງ​ຢູ່​ໃນ​ມະ­ຕິ​ດັ່ງ­ກ່າວ ໄດ້​ບອກ​ໄວ້​ຢ່າງ​ຊັດ​ເຈນ​ວ່າ ໃຫ້​ກຳ​ແໜ້ນ 6 ທັດ­ສະ­ນະ​ໃນ​ການ​ຄຸ້ມ​ຄອງ​ລັດ ແລະ ສັງ­ຄົມ ໃຫ້​ມີ​ປະ­ສິດ­ທິ­ພາບ ເພາະ​ຖ້າ­ວ່າ​ມະ­ຕິ​ດັ່ງ­ກ່າວ ຫາກ​ພະ­ນັກ­ງານ​ພັກ-ລັດ​ບາງ​ຄົນ​ວາງ​ເສີຍ ຖື​ເບົາ ກໍ່​ຈະ​ບໍ່​ສາ­ມາດ​ນຳ­ພາ​ວຽກ​ງານ​ໃນ​ໜ້າ­ທີ່​ຂອງ​ຕົນ​ໄດ້​ຢ່າງ​ມີ​ປະ­ສິດ­ທິ­ພາບ ເຊິ່ງ​ຜູ້​ຂຽນ​ຈະ​ບໍ່​ເວົ້າ​ເຖິງ​ຂໍ້​ຜິດ­ພາດ ຫຼື ຈຸດ​ບົກ​ຜ່ອງ​ໃນ​ໄລ­ຍະ​ຜ່ານ​ມາ.

    ໃນ​ມະ­ຕິ​ມີ 6 ທັດ­ສະ­ນະ​ທີ່​ຕ້ອງ​ກຳ​ແໜ້ນ ຮຽນ​ຮູ້​ໃຫ້​ຮູ້​ແຈ້ງ ຄິດ​ວ່າ​ສຳ­ຄັນ​ຫຼາຍ​ສຳ­ລັບ​ພະ­ນັກ­ງານ​ທຸກ​ຄົນ​ທີ່​ຕ້ອງ​ເອົາ­ໃຈ­ໃສ່ ມີ​ດັ່ງ­ນີ້: 1. ຮັບ­ປະ­ກັນ​ພັກ​ນຳ­ພາ ແລະ ກຳ​ອຳ­ນາດ​ຕາມ​ກົດ­ໝາຍ ແມ່ນ​ຄວາມ​ຈຳ­ເປັນ​ພາ­ວະ​ວິ­ໄສ... ປັບ­ປຸງ​ກົດ­ໝາຍ ແລະ ນິ­ຕິ​ກຳ​ໃຫ້​ຄົບ​ຖ້ວນ​ສອດ­ຄ່ອງ​ກັບ​ແນວ­ທາງ​ປ່ຽນ­ແປງ​ໃໝ່​ຮອບ­ດ້ານ​ທີ່​ມີ​ຫຼັກ­ການ​ຂອງ​ພັກ ເປັນ​ເຈົ້າ​ການ​ນຳ­ພາ​ຈັດ​ຕັ້ງ​ປະ­ຕິ­ບັດ​ກົດ­ໝາຍ​ໃຫ້​ເຂັ້ມ​ງວດ ແລະ ມີ​ປະ​ສິດ­ທິ​ຜົນ 2. ຮັບ­ປະ­ກັນ​ຄວາມ​ໝັ້ນ­ຄົງ​ໃຫ້​ແກ່​ລັດ​ປະ­ຊາ­ທິ­ປະ­ໄຕ​ປະ­ຊາ­ຊົນ ອົງ­ການ​ອຳ­ນາດ​ລັດ​ຂັ້ນ​ຕ່າງໆ ຕ້ອງ​ມີ​ຄວາມ​ເຂັ້ມ­ແຂງ ສາ­ມາດ​ປະ­ຕິ­ບັດ​ໜ້າ­ທີ່​ຂອງ​ຕົນ​ຢ່າງ​ຖືກ­ຕ້ອງ​ຄົບ​ຖ້ວນ... ມີ​ຄວາມ​ໂປ່ງ​ໃສ​ໃນ​ການ​ບໍ­ລິ­ການ​ຮັບ​ໃຊ້​ປະ­ຊາ­ຊົນ ພົນ­ລະ­ເມືອງ​ລາວ​ທຸກ​ຄົນ​ຕ້ອງ​ມີ​ຄວາມ​ສະ­ເໝີ­ພາບ​ຕໍ່­ໜ້າ​ກົດ­ໝາຍ 3. ເພີ່ມ​ນິ­ຕິ​ກຳ​ໃນ​ການ​ປົກ­ຄອງ 4. ຮັບ­ປະ­ກັນ​ຄວາມ​ຍຸ­ຕິ​ທຳ​ໃນ​ສັງ­ຄົມ... ບໍ່​ອະ­ນຸ­ຍາດ​ໃຫ້​ທຸກ​ຄົນ​ໄດ້​ຢູ່​ນອກ ຫຼື ເໜືອ​ກົດ­ໝາຍ ທຸກ​ຄົນ​ມີ​ຄວາມ​ສະ­ເໝີ­ພາບ ສັງ­ຄົມ​ຍຸ­ຕິ​ທຳ ມີ​ຄວາມ​ສະ­ຫງົບ​ປອດ​ໄພ ແລະ ເປັນ​ລະ­ບຽບ​ຮຽບ​ຮ້ອຍ.

    ມະ­ຕິ​ເລກ​ທີ 037 ໃຫ້​ຍົກ​ສູງ​ປະ­ສິດ­ທິ­ພາບ​ການ​ຄຸ້ມ​ຄອງ​ລັດ ຄຸ້ມ​ຄອງ​ສັງ­ຄົມ​ດ້ວຍ​ກົດ­ໝາຍ ກໍ່​ເພື່ອ​ເພີ່ມ​ປະ​ສິດ­ທິ​ຜົນ​ໃນ​ການ​ບໍ­ລິ­ຫານ​ຂອງ​ລັດ ຮັບ­ປະ­ກັນ​ການ​ເສີມ​ຂະ­ຫຍາຍ ແລະ ປະ­ຕິ­ບັດ​ສິດ​ເປັນ​ເຈົ້າ​ຂອງ​ປະ­ຊາ­ຊົນ​ບັນ­ດາ­ເຜົ່າ ດັ່ງ­ນັ້ນ ຜູ້​ຂຽນ​ຈຶ່ງ​ຂໍ​ນຳ​ເອົາ​ທັດ­ສະ­ນະ​ທີ 5 ແລະ 6 ມາ​ສະ­ເໜີ​ຕື່ມ ເພື່ອ​ໃຫ້​ຜູ້​ອ່ານ​ໄດ້​ຮູ້​ໃຫ້​ຄົບ​ຖ້ວນ​ຂະ​ບວນ​ຄວາມ ດັ່ງ​ທັດ­ສະ­ນະ​ທີ 5 ໄດ້​ຂຽນ​ໄວ້​ວ່າ: ຮັບ­ປະ­ກັນ​ສິດ​ເປັນ​ເຈົ້າ​ຂອງ​ປະ­ຊາ­ຊົນ ກົດ­ໝາຍ​ຂອງ​ລັດ​ປົກ​ປ້ອງ​ສິດ​ຂອງ​ປະ­ຊາ­ຊົນ... ມີ​ສ່ວນ​ຮ່ວມ​ປັບ­ປຸງ ແລະ ກໍ່­ສ້າງ​ອົງ­ການ​ອຳ­ນາດ​ລັດ​ຂັ້ນ​ຕ່າງໆ... ກວດ­ກາ​ການ​ປະ­ຕິ­ບັດ​ໜ້າ­ທີ່​ຂອງ​ອົງ­ການ​ອຳ­ນາດ​ລັດ​ຂັ້ນ​ຕ່າງໆ ຜູ້​ແທນ​ປະ­ຊາ­ຊົນ ລັດ­ຖະ­ກອນ ເຈົ້າ​ໜ້າ­ທີ່​ລັດ​ຮ້ອງ​ຟ້ອງ​ຕໍ່​ຜູ້​ລະ­ເມີດ​ກົດ­ໝາຍ... 6. ຮັບ­ປະ­ກັນ​ການ​ຄຸ້ມ​ຄອງ​ລວມ​ສູນ ເປັນ​ເອ­ກະ​ພາບ​ຂອງ​ບັນ­ດາ​ອົງ­ການ​ອຳ­ນາດ​ລັດ ເຊິ່ງ​ມີ​ການ​ແບ່ງ​ສິດ ໜ້າ­ທີ່​ລະ­ຫວ່າງ​ອົງ­ການ​ອຳ­ນາດ​ລັດ​ຂັ້ນ​ຕ່າງໆ... ປະ­ສານ​ສົມ­ທົບ​ກວດ­ກາ​ເຊິ່ງ​ກັນ ແລະ ກັນ...

    ສັງ​ລວມ​ໄດ້​ວ່າ: 6 ທັດ­ສະ­ນະ​ແມ່ນ​ຫຼັກ­ການ​ເຮັດ​ວຽກ ເພື່ອ​ຍົກ​ສູງ​ປະ­ສິດ­ທິ­ພາບ​ໃນ​ການ​ຄຸ້ມ​ຄອງ​ລັດ ເພື່ອ​ເຮັດ​ໃຫ້​ລັດ​ບັນ­ລຸ​ເປົ້າ​ໝາຍ​ຕາມ​ແຜນ​ພັດ­ທະ­ນາ ດັ່ງ­ນັ້ນ ພະ­ນັກ­ງານ​ລັດ​ທຸກ​ຂັ້ນ ຕ້ອງ​ໄດ້​ເອົາ­ໃຈ­ໃສ່​ສຶກ​ສາ​ໃຫ້​ເຂົ້າ­ໃຈ​ມະ­ຕິ​ດັ່ງ­ກ່າວ ເພື່ອ​ສ້າງ​ລັດ​ໃຫ້​ເຂັ້ມ­ແຂງ ຮັບ­ປະ­ກັນ​ຄວາມ​ຍຸ­ຕິ​ທຳ ແລະ ໂປ່ງ​ໃສ ບໍ່​ເຫັນ­ແກ່​ຜົນ​ປະ­ໂຫຍດ​ສ່ວນ​ຕົວ ແລະ ພັກ​ພວກ...!.

ຂ່າວທີ່ກ່ຽວຂ້ອງ