ອີ​ຣານ - ຣັດ​ເຊຍ ເຈລະຈາ​ກ່ຽວ​ກັບ​ການ​ກໍ່ສ້າງ​ໂຮງງານ​ໄຟຟ້າ​ນີວ​ເຄລຍ

176 31 ສ.ຫ. 2018 ຂ່າວຕ່າງປະເທດ
ອີ​ຣານ - ຣັດ​ເຊຍ ເຈລະຈາ​ກ່ຽວ​ກັບ​ການ​ກໍ່ສ້າງ​ໂຮງງານ​ໄຟຟ້າ​ນີວ​ເຄລຍ

   ສຳນັກ​ຂ່າວສານ Tasnim ລາຍ​ງານ​ວ່າ ທ່ານ ເຣ​ຊາ ອັກ​ດາ​ກາ​ນຽນ ລັດຖະມົນຕີ​ພະລັງງານ ຂອງ​ອີ​ຣານ ກ່າວ​ເມື່ອ​ບໍ່​ດົນ​ມາ​ນີ້​ວ່າ ອີ​ຣານ​ໄດ້​ກັບ​ມາ​ເຊື່ອມ​ຕໍ່​ການ​ເຈລະຈາ​ກັບ​ຣັດ​ເຊຍ ກ່ຽວ​ກັບ​ແຜນການ​ກໍ່ສ້າງ​ໂຮງງານ​ໄຟຟ້າ​ນີວ​ເຄລຍ​ໃໝ່​ແຫ່ງ​ໜຶ່ງ ຊຶ່ງ​ມີ​ກຳລັງ​ການ​ຜະລິດ 3.000 ເມ​ກາ​ວັດ (megawatt).

    ຂ່າວສານ Tasnim ກໍ​ໃຫ້​ຮູ້​ວ່າ ປັດຈຸບັນ​ນີ້ ອີ​ຣານ ມີ​ຄວາມ​ສາມາດ​ຜະລິດ​ໄຟຟ້າ​ນີວ​ເຄລຍ ທີ່ 1.000 ເມ​ກາ​ວັດ ແລະ ​ໃນ​ເວລາ​ນີ້ ອີ​ຣານ​ພວມ​ເດີນ​ເຄື່ອງ​ເຕົາ​ປະຕິ​ກອນ​ນີວ​ເຄລຍ​ເຕົາ​ໜຶ່ງ ໂດຍ​ແມ່ນ​ຣັດ​ເຊຍ​ອອກ​ແບບ ແລະ ​ກໍ່ສ້າງ​ຢູ່​ໃນ​ເມືອງ ບູ​ເຊີ (ພາກ​ໃຕ້​ອີ​ຣານ).

    ເມື່ອ​ປີ 2014 ຣັດ​ເຊຍ ແລະ ​ອີ​ຣານ ໄດ້​ລົງ​ນາມ​ຂໍ້​ຕົກລົງ ກ່ຽວ​ກັບ​ການ​ທີ່​ຣັດ​ເຊຍ​ກໍ່ສ້າງ ເຕົາ​ປະຕິ​ກອນ​ນີວ​ເຄລຍ​ຕື່ມ 8 ເຕົາ ຢູ່​ໃນ​ອີ​ຣານ ໃນ​ນັ້ນ​ມີ 2 ເຕົາ​ຢູ່​ໃນ​ເມືອງ ບູ​ເຊີ.

    ມາ​ໃນ​ເດືອນ​ກໍລະກົດ ປີ 2015 ອີ​ຣານ ແລະ​ກຸ່ມ P5+1 (ປະກອບ​ມີ​ອັງກິດ ຝຣັ່ງ ຣັດ​ເຊຍ ສ ອາ​ເມ​ຣິ​ກາ ຈີນ ແລະ ​ເຢຍ​ລະ​ມັນ) ໄດ້​ບັນລຸ​ຂໍ້​ຕົກລົງ​ຄັ້ງ​ປະຫວັດສາດ ທີ່​ເອີ້ນ​ວ່າ​ແຜນການ​ດຳເນີນ ງານ​ຮ່ວມ​ຮອບດ້ານ (JCPOA) ເປັນ​ການ​ຢຸດຕິ​ທາງ​ຕັນ ທີ່​ໄດ້ແກ່​ຍາວ​ມາ​ເປັນ​ເວລາ​ໜຶ່ງ​ທົດ​ສະ​ວັດ ຊຶ່ງ​ພົວພັນ​ເຖິງ​ໂຄງການ​ນີວ​ເຄລຍ​ຂອງ​ອີ​ຣານ ທີ່​ເຮັດ​ໃຫ້​ເກີດ​ການ​ຖົກ​ຖຽງ. ຂໍ້​ຕົກລົງ​ນີ້​ບໍ່​ເປັນ​ການ ຈຳກັດ​ອີ​ຣານ ໃນ​ການ​ພັດທະນາ​ບັນດາ​ໂຮງງານ​ໄຟຟ້າ​ນີວ​ເຄລຍ​ຝ່າຍ​ພົນ​ລະ​ເຮືອນ. ເຖິງ​ຢ່າງ​​​ໃດ ກໍ​ຕາມ ເມື່ອ​ວັນ​ທີ 8 ພຶດສະພາ​ທີ່​ຜ່ານ​ມາ ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ຖະແຫຼງ​ວ່າ ສ ອາ​ເມ​ຣິ​ກາ ຖອນ​ອອກ​ຈາກ​ຂໍ້​ຕົກລົງ JCPOA ແລະ ​ກັບ​ໄປ​ສູ່​ການ​ປະຕິບັດ​ຄຳ​ສັ່ງ​ຂວ້ຳ​ບາດ​ຕໍ່​ອີ​ຣານ ໃນ​ເດືອນ​ນີ້.

 

ຂ່າວທີ່ກ່ຽວຂ້ອງ