ຂ່າວຫຼ້າສຸດ

ຂະແໜງການ​ລ້ຽງສັດ​ໃນ​ເອີ​ຣົບ ພົບ​ກັບ​ຄວາມ​ຫຍຸ້ງຍາກ​ຍ້ອນ​ສະພາບ​ແຫ້ງແລ້ງ

224 31 ສ.ຫ. 2018 ຂ່າວຕ່າງປະເທດ
ຂະແໜງການ​ລ້ຽງສັດ​ໃນ​ເອີ​ຣົບ ພົບ​ກັບ​ຄວາມ​ຫຍຸ້ງຍາກ​ຍ້ອນ​ສະພາບ​ແຫ້ງແລ້ງ

   ໄພ​ແຫ້ງແລ້ງ​ທີ່​ບໍ່​ຄ່ອຍ​ເກີດ​ຂຶ້ນ​ໃນ​ປະຫວັດສາດ ຢູ່​ໃນ​ເຂດ​ພາກ​ເໜືອ​ທະວີບ​ເອີ​ຣົບ ພວມ​ເປັນ ໄພ​ຄຸກ​ຄາມ​ຕໍ່​ຂະແໜງການ​ລ້ຽງສັດ​ຢູ່​ທີ່​ນັ້ນ. ກະສິກອນ​ພວມ​ປະ​ເຊີນ​ກັບ​ຄວາມ​ສ່ຽງ ທີ່​ຈະ​ຕ້ອງ​ໄດ້ ປະລະ​ການ​ຜະລິດ ເມື່ອ​ເກີດ​ມີ​ສະພາບ​ແດດ​ຮ້ອນ​ແກ່ຍາວ ເຮັດ​ໃຫ້​ຫຍ້າ​ແຫ້ງ ທີ່​ເປັນ​ແຫຼ່ງ​ອາຫານ​ຕົ້ນຕໍ ໃຫ້​ແກ່​ສັດລ້ຽງ ເກີດ​ຂາດແຄນ ແລະ​ມີ​ລາຄາ​ແພງ​ຂຶ້ນ.

    ທີ່​ປະເທດ​ຊູ​ແອດ ໄຟ​ໄໝ້​ປ່າ​ແກ່ຍາວ​ຢູ່​ໃນ​ພື້ນ​ທີ່​ກວ້າງ ປະກອບ​ກັບ​ອຸ່ນ​ຫະ​ພູມ​ສູງ ຄາດ​ວ່າ ຈະ​ເຮັດ​ໃຫ້ການ​ເກັບ​ກ່ຽວ​ພືດ​ທາດ​ແປ້ງ ຫຼຸດ​ລົງ​ປະມານ 30% ໃນ​ຂະນະ​ທີ່ ຄະນະ​ກຳມະການ ກະສິກຳ​ຂອງ​ຊູ​ແອດ ໃຫ້​ຮູ້​ວ່າ ກະສິກອນ​ສ່ວນ​ໃຫຍ່​ຢູ່​ໃນ​ປະເທດ​ນີ້ ຕ້ອງ​ໄດ້​ນຳເອົາແຫຼ່ງ​ສະ​ສົມ ອາຫານ​ຂອງ​ສັດລ້ຽງ ທີ່​ຈັດ​ສັນ​ໄວ້​ໃນ​ລະດູ​ໜາວ​ນັ້ນ​ມາ​ໃຊ້ ເພື່ອ​ໃຫ້​ຜ່ານ​ສະພາບ​ແຫ້ງແລ້ງ​ໃນ​ເວລາ​ນີ້.

    ໃນ​ຂະນະ​ດຽວ​ກັນ ແຫຼ່ງ​ຂ່າວ​ຈາກ​ເຈົ້າ​ໜ້າທີ່​ເຢຍ​ລະ​ມັນ ໃຫ​ຮູ້​ວ່າ ມີ​ປະມານ 4% ຂອງ​ຈຳ ນວນ​ຟາມ​ກະສິກຳ​ຢູ່​ໃນ​ປະເທດ​ນີ້ ພວມ​ຢູ່​ໃນ​ປະເພດ​ທີ່​ມີ​ຄວາມ​ສ່ຽງ​ສູງ. ຢູ່​ໃນ​ເຂດ ຊາ​ໂຊ​ນີ​ຕອນ​ໃຕ້ ຊຶ່ງ​ມັກ​ເອີ້ນ​ກັນ​ວ່າ​ເປັນ “ອູ່​ຫຍ້າ​ແຫ້ງ” ຂອງ​ເຢຍ​ລະ​ມັນ​ນັ້ນ ຄາດ​ວ່າການ​ເກັບ​ກ່ຽວ​ຫຍ້າ​ແຫ້ງ ຈະ​ຫຼຸດ​ລົງ​ກວ່າ 40% ເມື່ອ​ທຽບໃສ່​ປີ​ອື່ນໆ.

    ທີ່​ປະເທດ ໂຮນ​ລັງ ສະມາຄົມ​ກະສິກຳ​ຂອງ​ປະເທດ​ນີ້ ໃຫ້ການ​ຄາດ​ຄະເນ​ວ່າ ການ​ຂາດແຄນ ແຫຼ່ງ​ອາຫານ​ໃຫ້​ແກ່​ສັດລ້ຽງ ຈະ​ຢູ​ທີ່​ປະມານ 40-60%.

   ທາງ​ດ້ານ​ຄະນະ​ກຳມະການ​ພັດທະນາ​ກະສິກຳ​ຂອງ​ອັງກິດ (ADHB) ກໍ​ແຈ້ງ​ໃຫ້​ຮູ້​ວ່າ ເຂດ​ຊົນນະບົດ​ໃນ​ອັງກິດ ພວມ​ຜ່ານ​ຜ່າ​ສະພາບ​ແຫ້ງແລ້ງ​ທີ່​ບໍ່​ເຄີຍ​ມີ​ມາ​ກ່ອນ ຕະຫຼອດ 80 ປີ​ທີ່​ຜ່ານ​ມາ ຊຶ່ງ​ສະພາບ​ຂາດແຄນ​ຫຍ້າ​ແຫ້ງ ພວມ​ເກີດ​ຜົນ​ກະທົບ​ຢ່າງ​ຮ້າຍ​ແຮງ ຕໍ່​ປະລິມານ ການ​ຜະລິດ​ນ້ຳ​ນົມ.

   ສ່ວນ​ກະສິກອນ​ຢູ່​ໃນ​ຝຣັ່ງ ກໍ​ປະ​ເຊີນ​ກັບ​ສະພາບ​ແດດ​ຮ້ອນ​ທີ່​ເປັນ​ຈຸດ​ສູງ ໃນ​ເດືອນ​ກໍລະກົດ ແລະ​ໃນ​ເດືອນ​ສິງຫາ  ຊຶ່ງ​ມີ​ຫຼາຍ​ເຂດ​ໄດ້​ແຈ້ງວ່າ​ຈະ​ບໍ່​ມີ​ລະດູ​ການ​ເກັບ​ກ່ຽວ ຫຍ້າ​ແຫ້ງ​ເປັນ​ເທື່ອ​ທີ​ສອງ ໃນ​ປີ​ນີ້​​.

    ສະມາຄົມ​ຜູ້​ປະກອບ​ການ​ຜະລິດ​ນ້ຳ​ນົມ​ໃນ​ເອີ​ຣົບ ຊຶ່ງ​ເຕົ້າໂຮມ​ເອົາ​ເຈົ້າ​ຂອງ​ຟາມ ທີ່​ທຳ​ການ ຜະລິດ​ນ້ຳ​ນົມ-ເນີຍ​ແຂງ​ເຂົ້າ​ຮ່ວມ ຈຳນວນ 100.000 ກວ່າ​ລາຍ ນັ້ນ​ໃຫ້​ຮູ້​ວ່າ ປັດຈຸບັນ​ນີ້ ກະສິກອນ​ສາມາດ​ຂາຍ​ນ້ຳ​ນົມ​ໄດ້​ສູງ​ສຸດ​ພຽງ​ທີ່ 30-33 ເຊັນ/ລິດເທົ່າ​ນັ້ນ ໃນ​ຂະນະ​ທີ່ ຄ່າ​ໃຊ້​ຈ່າຍ​ໃນ​ການ​ຜະລິດ​ຢູ​ທີ່ 40-45 ເຊັນ/ລິດ.

 

ຂ່າວທີ່ກ່ຽວຂ້ອງ