ຂ່າວຫຼ້າສຸດ

ເປ​ຣູ ປະກາດ​ພາວະ​ສຸກ​ເສີນ​ດ້ານ​ສາທາລະນະ​ສຸກ​ຢູ່​ໃນ​ເຂດ​ຊາຍ​ແດນ​ທິດເໜືອ

168 31 ສ.ຫ. 2018 ຂ່າວຕ່າງປະເທດ
ເປ​ຣູ ປະກາດ​ພາວະ​ສຸກ​ເສີນ​ດ້ານ​ສາທາລະນະ​ສຸກ​ຢູ່​ໃນ​ເຂດ​ຊາຍ​ແດນ​ທິດເໜືອ

     ເມື່ອ​ວັນ​ທີ 28 ສິງຫາ​ນີ້ ເຈົ້າ​ໜ້າທີ່​ເປ​ຣູ ໄດ້​ປະກາດ​ພາວະ​ສຸກ​ເສີນ​ໃນ​ດ້ານ​ສາທາລະນະ​ສຸກ ຢູ່​ໃນ​ເຂດ​ທິດເໜືອ​ຂອງ​ປະເທດ​ນີ້ ຊຶ່ງ​ຕິດ​ກັບ​ຊາຍ​ແດນ​ເວ​ເນ​ຊູ​ເອ​ລາ ທ່າມກາງ​ທີ່​ຊາວ​ເວ​ເນ​ຊູ​ເອ​ລາ​ຫຼາຍ​ພັນ​ຄົນ ພວມ​ທະຍອຍ​ກັນ​ເຂົ້າ​ໄປ​ໃນ​ປະເທດ​ເພື່ອນ​ບ້ານ ໂດຍ​ບໍ່​ເອົາ​ຫົວຊາ​ຕໍ່​ຄວາມ​ເຂັ້ມ​ງວດ​ໃນ​ການ​ເຂົ້າ​ເມືອງ.

    ປະທານາທິບໍດີ​ເປ​ຣູ ມາກ​ຕິນ ວິ​​ສ​ກາ​ຣາ ໄດ້​ປະກາດ​ພາວະ​ສຸກ​ເສີນ​ເປັນ​ເວລາ 60 ວັນ ຢູ່​ໃນ​ສອງ​ແຂວງ​ໃນ​ເຂດ​ຊາຍ​ແດນ ຍ້ອນ​ຄວາມ​ສ່ຽງ​ທາງ​ດ້ານ​ສາທາລະນະ​ສຸກ ແລະ ອະນາໄມ ຊຶ່ງ​ພົວພັນ​ເຖິງ​ສະພາບ​ຂອງ​ຜູ້​ເຂົ້າ​ເມືອງ ແຕ່​ວ່າ​ໃນ​ດຳລັດ​ທີ່​ໄດ້​ປະກາດ​ຢູ່​ໃນ​ໜັງສືພິມ​ຂອງ​ທາງ​ການ​ນັ້ນ ບໍ່​ໄດ້​ເວົ້າ​ເຖິງ​ລາຍ​ລະອຽດ​ຂອງ​ຄວາມ​ສ່ຽງ​ດັ່ງກ່າວ​ແຕ່​ຢ່າງໃດ.

    ກ່ອນ​ໜ້າ​ນັ້ນ ເຈົ້າ​ໜ້າທີ່​ເປ​ຣູ ໄດ້​ສະແດງ​ຄວາມ​ກັງວົນ​ກ່ຽວ​ກັບ​ການ​ແພ່​ລາມ​ຂອງ​ພະຍາດ​ຕ່າງ ເຊັ່ນ​ພະຍາດໝາກແດງ ແລະ ​ໄຂ້​ມາລາ​ເຣຍ ຈາກ​ຜູ້​ອົບ​ພະ​ຍົບ​ຊາວ​ເວ​ເນ​ຊູ​ເອ​ລາ ຍ້ອນ​ມີ​ຄວາມ​ຂາດແຄນ​ຢາ​ປົວ​ພະຍາດ​ຢູ່​ໃນ​ເວ​ເນ​ຊູ​ເອ​ລາ.

    ນັບ​ແຕ່​ປີ 2015 ເປັນຕົ້ນ​ມາ ມີ​ຊາວ​ເວ​ເນ​ຊູ​ເອ​ລາ 1,6 ລ້ານ​ກວ່າ​ຄົນ ໄດ້​ໜີ​ອອກ​ຈາກ​ປະເທດ​ຊາດ ເພື່ອ​ຫວັງ​ຫຼຸດ​ພົ້ນ​ຈາກ​ວິ​ກິດ​ການ​ການເມືອງ ເສດຖະກິດ ແລະ​ສັງຄົມ​ທີ່​ຮ້າຍ​ແຮງ​ຢູ່​ໃນ​ເວ​ເນ​ຊູ​ເອ​ລາ ໃນ​ນັ້ນ​ສ່ວນ​ຫຼາຍ​ແມ່ນ​ຊອກ​ຫາ​ວິທີ​ຕັ້ງ​ຖິ່ນ​ຖານ​ຢູ່​ໃນ​ບັນດາ​ປະເທດ​ໃກ້​ຄຽງ. ສະຖິຕິ​ໃຫ້​ຮູ້​ວ່າ ປັດຈຸບັນ​ນີ້ ມີ​ຊາວ​ເວ​ເນ​ຊູ​ເອ​ລາ​ປະມານ 1 ລ້ານ​ຄົນ ດຳລົງ​ຊີວິດ​ຢູ່​ໃນ​ໂກ​ລົມ​ບີ ໃນ​ຂະນະ​ທີ່ຢູ່​ໃນ​ເປ​ຣູ ມີ 400.000 ກວ່າ​ຄົນ.

    ໃນ​ຂະນະ​ດຽວ​ກັນ ປະທານາທິບໍດີ​ບຣາ​ຊີ​​ລ ໄມ​ເຄິນ ເທ​ເມີ ໃຫ້​ສຳພາດ​ຂ່າວ​ຜ່ານ​ທາງ​ວິທະຍຸ​ກະຈາຍສຽງ​ເມື່ອ​ວັນ​ທີ 29 ສິງຫາ​ນີ້​ວ່າ ລັດຖະບານ​ບຣາ​ຊີ​​ລ ພວມ​ຄົ້ນຄວ້າ​ເຖິງ​ຄວາມ​ເປັນ​ໄປ​ໄດ້ ໃນ​ການ​ກຳນົດ​ປະລິມານ​ຜູ້​ເຂົ້າ​ເມືອງ ສຳລັບ​ຜູ້​ອົບ​ພະ​ຍົບ​ຊາວ​ເວ​ເນ​ຊູ​ເອ​ລາ ທີ່​ຜ່ານ​ດ່ານ​ທາງບົກ​ລະຫວ່າງ​ສອງ​ປະເທດ ທັງ​ນີ້​ກໍ​ເພື່ອ​ເປັນ​ການ​ແກ້​ໄຂ​ເງື່ອນໄຂ ໃນ​ການ​ໃຫ້​ຄວາມ​ຊ່ວຍເຫຼືອ​ຜູ້​ອົບ​ພະ​ຍົບ​ເຫຼົ່ານັ້ນ.

   ຄຳ​ຖະແຫຼງ​ດັ່ງກ່າວ ມີ​ອອກ​ມາ​ພຽງ 1 ວັນ ຫຼັງ​ຈາກ​ທີ່​ປະທານາທິບໍດີ ເທ​ເມີ ລົງ​ນາມ​ໃນ​ດຳລັດ ວ່າ​ດ້ວຍ​ການ​ອະນຸຍາດ​ໃຫ້​ກອງທັບ ເຂົ້າ​ຮ່ວມ​ກັບ​ຕຳຫຼວດ​ຢູ່​ໃນ​ລັດ ໂຣ​ຣາຍ​ມາ ເພື່ອ​ສ້າງ​ຄວາມ​ເປັນ​ລະບຽບ​ຮຽບ​ຮ້ອຍ ແລະ ຮັກ​​ສ​ສາ​ຄວາມ​ສະຫງົບ​ຢູ່​ໃນ​ລັດ​ດັ່ງກ່າວ ທ່າມກາງ​ທີ່​ກະແສ​ຜູ້​ອົບ​ພະ​ຍົບ​ຈາກ​ເວ​ເນ​ເຊ​​ູ​ເອ​ລາ ສືບຕໍ່​ເພີ່ມ​ຂຶ້ນ ໃນ​ໄລຍະ​ຫຼັງໆ​ນີ້.

 

ຂ່າວທີ່ກ່ຽວຂ້ອງ