ຂ່າວຫຼ້າສຸດ

ຫຼາຍ​ໝື່ນ​ຄົນ​ຕ້ອງ​ອົບ​ພະຍົບຍ້ອນ​ຄູ​ກັນ​ນ້ຳ​ແຕກ​ຢູ່​ໃນ​ມຽນມາ

272 31 ສ.ຫ. 2018 ຂ່າວຕ່າງປະເທດ
ຫຼາຍ​ໝື່ນ​ຄົນ​ຕ້ອງ​ອົບ​ພະຍົບຍ້ອນ​ຄູ​ກັນ​ນ້ຳ​ແຕກ​ຢູ່​ໃນ​ມຽນມາ

     ປະຊາຊົນ​ກວ່າ 50.000 ຄົນ ຢູ່​ໃນ​ເຂດ​ພາກ​ກາງ​ມຽນມາ ຕ້ອງ​ໄດ້​ອົບ​ພະຍົບ ຫຼັງ​ຈາກ​ເກີດ​ເຫດການ​ຄູ​ກັນ​ນ້ຳ​ແຕກ​ໃນ​ຕອນ​ເຊົ້າ​ຂອງ​ວັນ​ທີ 29 ສິງຫາ​ນີ້ ​ເຮັດ​ໃຫ້​ເກີດ​ສະພາບ​ນ້ຳ​ຖ້ວມ​ຮ້າຍ​ແຮງ ​ແລະ​ກີດຂວາງ​ການ​ຄົມມະນາຄົມຕາມ​ເສັ້ນທາງ​ດ່ວນ.

    ອົງການ​ບັນ​ເທົາ​ໄພພິບັດ​ ​ແລະ ​ບູລະນະ​ສ້າງສາ​ຂອງ​ມຽນມາ ​ໃຫ້​ຮູ້​ວ່າ ມີປະຊາຊົນ​ປະມານ 12.000 ຄອບຄົວ ຢູ່​ໃນ​ປະມານ 100 ບ້ານ ຫຼື​ເທົ່າ​ກັບ​ 54.000 ຄົນ ຕ້ອງ​ໄດ້​ໜີ​ປະ​ເຮືອນ​ຊານ ​​ໄປ​ຢູ່​ບ່ອນ​ທີ່​ປອດ​ໄພ.

    ໃນ​ຂະນະ​ດຽວ​ກັນ ​ແຫຼ່ງຂ່າວ​ຈາກ​ອົງການ​ແກ້​ໄຂ​ໄພ​ທຳ​ມະ​ຊາດ​ແຫ່ງ​ຊາດ​ມຽນມາ ຊີ້​ແຈງ​ວ່າ​ມີ​ຄົນ​ຈຳນວນ​ຫຼາຍ ​ໃນ​ນັ້ນ​ມີ​ຜູ້​ທີ່​ບໍ່​ໄດ້​ຮັບ​ຜົນ​ກະທົບ​ໂດຍ​ກົງ​ຈາກ​ນ້ຳ​ຖ້ວມ ຕ່າງ​ກໍ​ໄດ້​ຕົກລົງ​ອົບ​ພະຍົບ ຍ້ອນ​ກັງວົນ​ວ່າ​ນ້ຳນອງ​ຈະ​ສືບ​ຕໍ່​ຍຶ່ງສູງ​ຂຶ້ນ. ທາງ​ດ້ານ​ກະຊວງ​ສະຫວັດດີ​ການ​ສັງຄົມ​ຂອງ​ມຽນມາ ​ໃຫ້​ຮູ້​ວ່າ ກອງ​ກຳລັງ​ທີ່​ກ່ຽວຂ້ອງ ​ໄດ້​ຈັດ​ສັນ​ຜ້າ​ເຕັ້ນຕັ້ງຜາມ​ຊົ່ວຄາວ ​ໃຫ້​ແກ່​ປະຊາຊົນ​ທີ່​ອົບ​ພະຍົບນັ້ນ.

    ກ່ອນ​ໜ້າ​ນັ້ນ ຄູ​ກັນ​ນ້ຳ ສະ​ວາ ຈາ​ອຸ​ງ (Swar Chaung) ​ໄດ້​ເກີ​ດ​ແຕກ​ຢ່າງ​ບໍ່​ຄາດ​ຝັນ ຍ້ອຍ​ເກີດຝົນຕົກ​ໜັກ​ຕໍ່​ເນື່ອງ​ເປັນ​ເວລາ​ຫຼາຍ​ວັນ ​ເຮັດ​ໃຫ້​ເຂດ​ຊຸມ​ຊົນຈຳນວນ​ໜຶ່ງ​ໃນ​ເມືອງ​ສະ​ວາ ​ທີ່ຢູ່​ໃກ້​ນັ້ນ ​ແລະ 100 ບ້ານ​ທີ່ຢູ່​ໃກ້​ຄຽງ ຈົມ​ຢູ່​ໃນ​ນ້ຳ. ​ໃນ​ຂະນະ​ດຽວ​ກັນ ນ້ຳ​ກໍ​ໄດ້​ລົ້ນ​ອອກ​ໄປ​ສູ່​ທາງ​ດ່ວນ ຢາງ​ກຸງ - ມັນ​ດາ​ເລ ຢູ່​ໃນ​ເຂດ ສະ​ວາ ​ເຮັດ​ໃຫ້​ຂົວ​​ແຫ່ງ​ໜຶ່ງຢູ່​ເທິງ​ທາງ​ດັ່ງກ່າວ​ຫັກ ​ແລະ​ພາກສ່ວນ​ທີ່ກ່ຽວຂ້ອງ​ຕ້ອງ​ໄດ້​ປິດ​ການ​ສັນຈອນ​ຢູ່​ໃນ​ເສັ້ນທາງ​ດັ່ງກ່າວ.

 

ຂ່າວທີ່ກ່ຽວຂ້ອງ