ຂ່າວຫຼ້າສຸດ

ກະຊວງ​ສາທາລະນະ​ສຸກ​ອິນ​ເດຍ ຮຽກຮ້ອງ​ໃຫ້​ເຊົາ​ຂາຍ ແລະ ​ນຳ​ເຂົ້າ​ຢາສູບ​ເອ​ເລັກ​ໂຕຣ​ນິກ

111 31 ສ.ຫ. 2018 ຂ່າວຕ່າງປະເທດ
ກະຊວງ​ສາທາລະນະ​ສຸກ​ອິນ​ເດຍ ຮຽກຮ້ອງ​ໃຫ້​ເຊົາ​ຂາຍ ແລະ ​ນຳ​ເຂົ້າ​ຢາສູບ​ເອ​ເລັກ​ໂຕຣ​ນິກ

     ເມື່ອ​ບໍ່​ດົນ​ມາ​ນີ້ ກະຊວງ​ສາທາລະນະ​ສຸກ​ຂອງ​ອິນ​ເດຍ ໄດ້​ຮຽກຮ້ອງ​ໃຫ້​ເຊົາ​ຂາຍ ຫຼື​ນຳ​ເຂົ້າ​ຢາສູບ​ເອ​ເລັກ​ໂຕຣ​ນິກ ແລະ ​ອາ​ອຸປະກອນ​ທີ່​ກ່ຽວຂ້ອງ​ບໍລິສັດ​ຕ່າງໆ ເຊັ່ນ Philip Morris ດັ່ງນີ້​ເປັນຕົ້ນ ທີ່​ພວມ​ວາງ​ແຜນ​ຈ່າວ​ຂາຍ​ຢູ່​ໃນ​ອິນ​ເດຍ.

    ອິນ​ເດຍ​ໄດ້​ມີ​ຂໍ້​ກຳນົດ​ທີ່​ເຂັ້ມ​ງວດ​ຫຼາຍ​ຢ່າງ ເພື່ອ​ຈຳກັດ​ການ​ບໍລິໂພກ​ຢາສູບ ຊຶ່ງ​ເປັນ​ສາເຫດ​ເຮັດ​ໃຫ້​ມີ​ຜູ້​ເສຍ​ຊີວິດ 900.000 ກວ່າ​ຄົນ ໃນ​ແຕ່​ລະ​ປີ. ເຖິງ​ຢ່າງໃດ​ກໍ​ຕາມ ອົງການ​ອະນາໄມ​ໂລກ (WHO) ໃຫ້​ຮູ້​ວ່າ ມາ​ຮອດ​ປັດຈຸບັນ​ນີ້ ມີ 106 ລ້ານ​ຄົນ ໃນ​ໄວ​ຜູ້​ໃຫຍ່​ຢູ່​ໃນ​ອິນ​ເດຍ ຍັງ​ສູບຢາ ນັບ​ວ່າ​ຫຼາຍ​ເປັນ​ດັບ​ສອງ​ຮອງ​ຈາກ​ຈາກ​ຈີນ.

    ໃນ​ຄຳ​ແຈ້ງ​ເຕືອນ​ສົ່ງ​ໄປ​ຍັງ​ອຳນາດ​ການ​ປົກຄອງ​ລັດ​ຕ່າງໆ​ນັ້ນ ກະຊວງ​ສາທາລະນະ​ສຸກ​ອິນ​ເດຍ ເນັ້ນ​ໜັກ​ວ່າ ບັນດາ​ອຸປະກອນ​ທີ່​ໃຊ້​ໃຫ້​ແກ່​ການ​ສູບຢາ​ເອ​ເລັກ​ໂຕຣ​ນິກ ເປັນ​ໄພ​ຄຸກ​ຄາມ​ອັນ​ໃຫຍ່​ໂຕ ຕໍ່​ສຸຂະພາບ​ຂອງ​ປະຊາຊົນ ໂດຍ​ສະເພາະ​ກໍ​ແມ່ນ​ເດັກນ້ອຍ ຊາວ​ໜຸ່ມ​ເຍົາວະ​ຊົນ ແມ່ຍິງ​ຖືພາ​ມານ ແລະ​ແມ່ຍິງ​ໃນ​ໄວ​ຈະເລີນ​ພັນ.

  ເມື່ອ​ປີ​ກາຍ ມີ​ຊາວ​ອິນ​ເດຍ​ຜູ້​ໜຶ່ງ ທີ່​ອາ​ໃສ​ຢູ່​ໃນ​ພື້ນ​ທີ່​ນະຄອນຫຼວງ​ນີວ​ແດນ​ລີ ໄດ້​ຍື່ນ​ຄຳ​ຮ້ອງ​ຟ້ອງ​ຕໍ່​ສານ​ແຫ່ງ​ໜຶ່ງ​ໃນ​ນະຄອນຫຼວງ​ນີວ​ແດນ​ລີ ໂດຍ​ໄດ້​ສະເໜີ​ໃຫ້​ມີ​ຂໍ້​ກຳນົດ​ທີ່​ເຂັ້ມ​ງວດ ກ່ຽວ​ກັບ​ຢາສູບ​ເອ​ເລັກ​ໂຕຣ​ນິກ. ເມື່ອ​ອາທິດ​ກ່ອນ ສານ​ດັ່ງກ່າວ​ກໍ​ໄດ້​ສະເໜີ​ໄປ​ຍັງ​ກະຊວງ​ສາທາລະນະ​ສຸກ​ອິນ​ເດຍ ໃຫ້​ຊີ້​ແຈງ​ເຖິງ​ເວລາ​ການ​ນຳ​ໃຊ້​ຂໍ້​ກຳນົດ​ຕໍ່​ຜະລິດ​ຕະ​ພັນ​ດັ່ງກ່າວ.

    ໃນ​ຊຸມ​ປີ​ມໍ່ໆມານີ້ ລັດຖະບານ​ອິນ​ເດຍ ໄດ້​ຊຸກຍູ້​ຄວາມ​ພະຍາຍາມ​ໃນ​ການ​ຄວບ​ຄຸມ​ຢາສູບ​ຢູ່​ໃນ​ປະເທດ​ນີ້ ຢ່າງ​ບໍ່​ຢຸດ​ຢັ້ງ ດ້ວຍ​ວິທີ​ຂຶ້ນ​ພາສີ​ຢາສູບ ສະເໜີ​ໃຫ້​ບໍລິສັດ​ຕ່າງໆ​ພິມ​ຮູບ​ຄຳ​ແຈ້ງ​ເຕືອນ​ກ່ຽວ​ກັບ​ຜົນ​ຮ້າຍ​ຂອງ​ຢາສູບ​ໃສ່​ຊອງຢາ​ສູບ​ໃຫ້​ໃຫຍ່​ຂຶ້ນ ພ້ອມ​ທັງ​ຜັນ​ຂະຫຍາຍ​ການ​ບໍລິການ​ໃຫ້​ຄຳ​ປຶກສາ​ກ່ຽວ​ກັບ​ການ​ເຊົາ​ສູບຢາ.

 

ຂ່າວທີ່ກ່ຽວຂ້ອງ