ຂ່າວຫຼ້າສຸດ

ເກາະຊ້າງ ອີກແຫຼ່ງທ່ອງທ່ຽວໜຶ່ງໃນທະເລອ່າວໄທ ທີ່ໜ້າໄປສຳຜັດ

452 30 ສ.ຫ. 2018 ຫົວຂໍ້ຂ່າວອື່ນໆ
ເກາະຊ້າງ ອີກແຫຼ່ງທ່ອງທ່ຽວໜຶ່ງໃນທະເລອ່າວໄທ ທີ່ໜ້າໄປສຳຜັດ

    ໃນ​ໄລ­ຍະ​ທີ່​ເປັນ­ຕົ້ນ​ລະ­ດູ­ຝົນ​ປາຍ​ຮ້ອນ​ແບບ​ນີ້ ອາ­ກາດ​ເໝາະ​ສົມ​ສຳ­ລັບ​ການ​ເດີນ­ທາງ​ໄປ​ພັກ­ຜ່ອນ​ຊົມ​ວິວ​ທິວ​ທັດ​ທີ່​ເປັນ​ທຳ​ມະ​ຊາດ ແນມ​ເບິ່ງ​ແບບ​ສຸດ​ສາຍ­ຕາ​ທີ່​ທະ­ເລ ຮັບ​ເອົາ​ບັນ­ຍາ­ກາດ​ດີໆ ຜ່ອນ ຄາຍ​ສະ­ໝອງ ດ້ວຍ​ການ​ແນມ​ເບິ່ງ​ນ້ຳ​ທະ­ເລ​ໃສໆ ເຊິ່ງ​ຜູ້​ຂຽນ​ກໍ່​ໄດ້​ມີ​ໂອ­ກາດ​ເປັນ​ຄັ້ງ​ທຳ​ອິດ ທີ່​ໄດ້​ເດີນ­ທາງ​ໄປ​ກັບ​ສາຍ​ການ­ບິນ ບາງ­ກອກ ແອ​ເວ (Bangkok Airways) ເພື່ອ​ໄປ​ທ່ອງ​ທ່ຽວ ເກາະ​ຊ້າງ ສະ­ຖານ­ທີ່​ທ່ອງ​ທ່ຽວ​ອີກ​ແຫ່ງ​ໜຶ່ງ ທີ່​ຢາກ​ໃຫ້​ທ່ານ​ໄດ້​ໄປ​ສຳ­ຜັດ​ກັບ​ບັນ­ຍາ­ກາດ ທີ່​ຍັງ​ຄົງ​ຄວາມ​ເປັນ​ທຳ​ມະ​ຊາດ​ໄດ້​ຢ່າງ​ໜ້າ​ຫຼົງ­ໄຫຼ ໃນ​ທະ­ເລ​ອ່າວ​ໄທ.

    ອຸ​ທະ­ຍານ​ແຫ່ງ​ຊາດ​ໝູ່​ເກາະ​ຊ້າງ ຫຼື ທີ່​ນິ­ຍົມ​ເອີ້ນ​ກັນ​ວ່າ ເກາະ​ຊ້າງ ຕັ້ງ​ຢູ່​ໃນ​ເຂດ​ແຫຼມ​ງອບ ຈັງ­ຫວັດ​ຕຣາດ ແລະ ເປັນ­ຈັງ​ຫວັດ​ຊາຍ​ແດນ​ພູ­ມິ​ພາກ​ຕາ­ເວັນ​ອອກ​ຂອງ​ປະ­ເທດ​ໄທ ຕິດ​ກັບ​ປະ­ເທດ​ກຳ­ປູ­ເຈຍ ໂດຍ​ເກາະ​ຊ້າງ​ນັບ​ວ່າ​ເປັນ​ເກາະ​ທີ່​ໃຫຍ່​ທີ່​ສຸດ​ເປັນ​ອັນ​ດັບ 1 ໃນ​ທະ­ເລ​ອ່າວ​ໄທ ແລະ ເປັນ​ເກາະ​ທີ່​ໃຫຍ່​ເປັນ​ອັນ​ດັບ 2 ຂອງ​ໄທ ຮອງ​ຈາກ​ເກາະ​ພູ​ເກັດ ມີ​ເນື້ອ­ທີ່​ປະ­ມານ 268.125 ໄລ່ ມີ​ບັນ­ດາ​ໝູ່​ເກາະ​ນ້ອຍ-ໃຫຍ່ ປະ­ມານ 52 ເກາະ ໂດຍ​ລັກ­ສະ­ນະ​ສ່ວນ​ໃຫຍ່​ຂອງ​ເກາະ​ຊ້າງ ຈະ​ເປັນ​ພູ­ເຂົາ​ສູງ ອີກ​ທັງ ເກາະ​ຊ້າງ ຍັງ​ມີ​ສະ­ພາບ​ປ່າ​ອັນ​ອຸ­ດົມ­ສົມ­ບູນ ແລະ ມີ​ນ້ຳ­ຕົກ­ຕາດ​ຫຼາຍ​ສາຍ ເຊິ່ງ​ນັກ​ທ່ອງ​ທ່ຽວ​ສາ­ມາດ​ເດີນ­ທາງ​ມາ​ທີ່​ເກາະ​ຊ້າງ ໄດ້​ຕະ­ຫຼອດ​ທັງ​ປີ.

ນັກ​ທ່ອງ​ທ່ຽວ​ທີ່​ຈະ​ມາ​ທ່ຽວ​ເກາະ​ຊ້າງ ກໍ່​ມີ​ກິດ­ຈະ­ກຳ​ໃຫ້​ເລືອກ​ຫຼາຍ​ຢ່າງ ບໍ່​ວ່າ​ຈະ​ເປັນ​ລອຍ­ນ້ຳ​ຫຼິ້ນ​ທີ່​ຫາດ​ຊາຍ ທ່ຽວ​ນ້ຳ­ຕົກ­ຕາດ ປີນ​ພູ­ເຂົາ ຂີ່​ຊ້າງ ຫຼື ຈະ​ໄປ​ດຳ​ນ້ຳ​ເບິ່ງ​ປະ​ກາ​ລັງ​ທ່າມ­ກາງ​ຝູງ​ປາ​ນ້ອຍ​ໃຫຍ່ ສີ­ສັນ​ສວຍ​ງາມ​ແປກ​ຕາ ຕາມ​ໝູ່​ເກາະ​ຣັງ ຫຼື ເກາະ​ຫວາຍ ທີ່​ມີ​ນ້ຳ​ທະ­ເລ​ໃສ​ເຮັດ​ໃຫ້​ເຫັນ​ປາ ແລະ ປະ​ກາ​ລັງ​ໄດ້​ຢ່າງ​ຊັດ​ເຈນ.

    ສຳ­ລັບ​ການ​ເດີນ­ທາງ​ໄປ​ທ່ຽວ​ເກາະ​ຊ້າງ​ໃນ​ຄັ້ງ​ນີ້ ຂ້າ­ພະ­ເຈົ້າ​ໄດ້​ເດີນ­ທາງ​ໄປ​ກັບ ສາຍ​ການ­ບິນ ບາງ­ກອກ ແອ​ເວ ຈາກ​ນະ­ຄອນ­ຫຼວງ​ວຽງ​ຈັນ​ສູ່​ນະ­ຄອນ­ຫຼວງ​ບາງ­ກອກ ເພື່ອ​ພັກ​ເຊົາ​ຢູ່​ບ່ອນ​ນັ້ນ​ໜຶ່ງ​ຄືນ ທີ່ Josh Hotel ສ່ວນ​ໃຜ​ຢາກ​ເດີນ­ທາງ​ຕໍ່​ເນື່ອງ​ພາຍ​ໃນ​ມື້​ດຽວ ກໍ່​ສາ­ມາດ​ບິນ​ຈາກ​ນະ­ຄອນ­ຫຼວງ​ວຽງ​ຈັນ ຫຼື ນະ­ຄອນ­ຫຼວງ​ພະ​ບາງ ໄປ​ຈົນ​ຮອດ​ເກາະ​ຊ້າງ​ເລີຍ ກໍ່​ສາ­ມາດ​ເຮັດ​ໄດ້ ໂດຍ​ລາ­ຄາ​ເລີ່ມ​ຕົ້ນ​ໄປ-ກັບ ປະ­ມານ 1,95 ລ້ານ​ກີບ (231 ໂດ​ລາ​ສະ­ຫະ­ລັດ) ທ່ານ​ສາ­ມາດ​ເບິ່ງ​ລາຍ​ລະ­ອຽດ ແລະ ຈອງ​ປີ້​ຍົນ​ຜ່ານ​ທາງ​ອອນ​ລາຍ​ໄດ້​ທີ່ http://www.bangkokair.com/ ຫຼື ຜ່ານ​ຕົວ​ແທນ​ຈຳ­ໜ່າຍ ຂອງ​ສາຍ​ການ­ບິນ ບາງ­ກອກ ແອ​ເວ ກໍ່​ໄດ້ ແລະ ມື້­ຕໍ່­ມາ​ຜູ້​ຂຽນ​ກໍ່​ເດີນ­ທາງ​ຈາກ​ສະ­ໜາມ​ບິນ​ສຸ­ວັນ­ນະ​ພູມ (ບາງ­ກອກ) ດ້ວຍ​ສາຍ​ການ­ບິນ​ບາງ­ກອກ ແອ​ເວ ໃຊ້​ເວ­ລາ​ເຖິງ​ຈັງ­ຫວັດ​ຕຣາດ ປະ­ມານ 40 ນາ­ທີ ຫຼັງ​ຈາກ​ນັ້ນ ເຮົາ​ສາ­ມາດ​ໃຊ້​ບໍ­ລິ­ການ​ຂອງ Bangkok Limousine (ບໍ­ລິ­ການ​ລົດ​ຕູ້​ຮັບ​ສົ່ງ​ລະ ຫວ່າງ​ສະ­ໜາມ​ບິນ ໄປ​ຈົນ​ຮອດ​ບ່ອນ​ພັກ​ຢູ່​ເທິງ​ເກາະ​ຊ້າງ) ສຳ­ລັບ​ຂໍ້​ມູນ​ເພີ່ມ​ເຕີມ ຫຼື ຕ້ອງ­ການ ຈອງ​ລົດ ສາ­ມາດ​ເບິ່ງ​ຂໍ້​ມູນ​ໄດ້​ທີ່ Krungthip Limousine ຫຼື ໂທ +66-39-516005 ເຊິ່ງ​ການ​ເດີນ­ທາງ​ໄປ​ເກາະ​ຊ້າງ​ຈະ​ຕ້ອງ​ໄດ້​ເອົາ​ລົດ​ຂຶ້ນ​ເຮືອ​ກ່ຳ​ປັ່ນ​ຂະ­ໜາດ​ໃຫຍ່ (ເຮືອ​ສາ­ມາດ​ບັນ­ຈຸ​ລົດ​ໃຫຍ່​ໄດ້​ປະ­ມານ 30 ກວ່າ​ຄັນ) ໃຊ້​ເວ­ລາ​ໃນ​ການ​ຂ້າມ​ຟາກ ປະ­ມານ 30 ນາ­ທີ ກໍ່​ເຖິງ​ຈຸດ­ໝາຍ ເພື່ອ​ເດີນ­ທາງ​ສູ່​ທີ່​ພັກ ກໍ່​ຄື​ໂຮງ­ແຮມ​ເມີ​ກຽວ ເກາະ​ຊ້າງ ຕັ້ງ​ຢູ່​ທ້າຍ​ເກາະ​ແຄມ​ທະ­ເລ​ອ່າວ​ໃບ​ລານ ທີ່​ມີ​ຫາດ​ຊາຍ​ສວຍ​ງາມ ເຊິ່ງ​ໂຮງ­ແຮມ​ດັ່ງ­ກ່າວ ມີ​ຫ້ອງ​ພັກ​ໃຫ້​ເລືອກ​ຫຼາຍ​ແບບ ຕາມ​ຄວາມ​ຕ້ອງ­ການ​ຂອງ​ລູກ​ຄ້າ ນອກ​ນີ້ ຍັງ​ມີ​ສິ່ງ​ອຳ­ນວຍ​ຄວາມ​ສະ­ດວກ​ຫຼາຍ​ຢ່າງ ບໍ່​ວ່າ​ຈະ​ເປັນ​ຮ້ານ​ອາ­ຫານ ສູນ​ອອກ­ກຳ­ລັງ​ກາຍ (ຟິດ​ເນັດ) ສະ​ລອຍ­ນ້ຳ ແລະ ອື່ນໆ.

    ໃນ​ການ​ເດີນ­ທາງ​ໄປ​ທ່ຽວ​ຊົມ ແລະ ສຳ­ຜັດ​ກັບ​ບັນ­ຍາ­ກາດ​ຂອງ​ເກາະ​ຊ້າງ​ໃນ​ຄັ້ງ​ນີ້ ພວກ​ເຮົາ​ໄດ້​ໄປ​ນັ່ງ​ເຮືອ​ກອນ​ໂດ​ລາ ຊົມ​ຜືນ​ປ່າ​ແຄມ​ແມ່­ນ້ຳ ຢູ່​ບ້ານ​ສະ​ລັກ​ຄອກ ເຊິ່ງ​ເປັນ​ໝູ່​ບ້ານ​ຊາວ​ປະ­ມົງ​ແຄມ​ຝັ່ງ ທີ່​ຍັງ​ຮັກ­ສາ​ສະ­ພາບ​ວິ­ຖີ​ຊີ­ວິດ ປະ­ເພ­ນີ ວັດ­ທະ­ນະ­ທຳ​ແບບ​ດັ້ງ­ເດີມ​ເອົາ​ໄວ້​ໄດ້ ບ້ານ​ສະ​ລັກ​ຄອກ​ຍັງ​ມີ​ຊົມ​ລົມ​ນຳ​ທ່ຽວ​ພື້ນ​ບ້ານ​ສະ​ລັກ​ຄອກ ໂດຍ​ຈະ​ມີ​ກິດ­ຈະ­ກຳ​ໃຫ້​ນັກ​ທ່ອງ​ທ່ຽວ​ໄດ້​ເພີດ­ເພີນ ເຊັ່ນ:ການ​ພາຍ­ເຮືອ​ກາ​ຍັກ​ຊົມ​ທຳ​ມະ​ຊາດ​ອ່າວ​ສະ​ລັກ​ຄອກ ຫຼື ຈະ​ນັ່ງ​ເຮືອ​ຊົມ​ຄວາມ​ສວຍ​ງາມ​ຂອງ​ອ່າວ​ສະ​ລັກ​ຄອກ ແລະ ທີ່​ສຳ­ຄັນ​ຄື​ການ​ນັ່ງ​ເຮືອ​ຊົມ​ບັນ­ຍາ­ກາດ​ຍາມ­ແລງ ຍາມ​ຄ່ຳ​ຄືນ​ຂອງ​ອ່າວ​ສະ​ລັດ​ຄອກ ພ້ອມ​ຮັບ​ປະ­ທານ​ອາ­ຫານ​ຄ່ຳ​ເທິງ​ເຮືອ ບອກ​ໄດ້​ເລີຍ​ວ່າ​ໂຣ​ແມນ​ຕິກ​ສຸດໆ.

    ນອກ​ນີ້ ຍັງ​ໄດ້​ໄປ​ຂີ່​ສະ​ລິງ​ທ້າ​ທາຍ​ຄວາມ​ສູງ ຢູ່ Tree Top Adventure Park ນັ່ງ​ເບິ່ງ​ຕາ­ເວັນ­ຕົກ​ລັບ​ຂອບ​ຟ້າ​ຢູ່​ຈຸດ​ຊົມ​ວິວ​ໄກ່​ແບ້ ຊົມ​ການ­ສະ­ແດງ​ແກວ່ງ​ທວນ­ໄຟ ຢູ່​ຮ້ານ​ອາ­ຫານ​ສະ­ບາຍ​ບາ (Sabai Bar) ພ້ອມ​ທັງ​ທ່ຽວ​ຊົມ​ບັນ­ຍາ­ກາດ​ຍາມ​ຄ່ຳ​ຄືນ​ຂອງ​ເກາະ​ຊ້າງ.

ຂ່າວທີ່ກ່ຽວຂ້ອງ