ຂ່າວຫຼ້າສຸດ

5 ເມືອງຂອງນະຄອນຫຼວງວຽງຈັນ ໄດ້ຮັບຜົນກະທົບຈາກໄພນ້ຳຖ້ວມ

488 30 ສ.ຫ. 2018 ຂ່າວໜ້າ​ໜຶ່ງ
5 ເມືອງຂອງນະຄອນຫຼວງວຽງຈັນ ໄດ້ຮັບຜົນກະທົບຈາກໄພນ້ຳຖ້ວມ

    ກອງ​ປະ­ຊຸມ​ປຶກ­ສາ​ຫາ­ລື​ກ່ຽວ​ກັບ​ການ​ປ້ອງ​ກັນ ແລະ ຄວບ​ຄຸມ​ໄພ­ພິ­ບັດ​ຂັ້ນ​ນະ­ຄອນ­ຫຼວງ​ວຽງ​ຈັນ (ນວ) ຈັດ​ຂຶ້ນ​ວັນ​ທີ 29 ສິງ­ຫາ 2018 ຢູ່​ຫ້ອງ​ວ່າ­ການ​ປົກ­ຄອງ ນວ ໂດຍ​ເປັນ​ປະ­ທານ​ຂອງ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ ນວ ມີ​ບັນ­ດາ​ພະ­ແນກ­ການ ເມືອງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ​ນາງ ລຳ​ພອຍ ສີ​ອັກ​ຄະ​ຈັນ ຫົວ­ໜ້າ​ພະ​ແນກ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ນວ ກ່າວ​ວ່າ: ເມືອງ​ທີ່​ໄດ້​ຮັບ​ຜົນ​ກະ­ທົບ​ຈາກ​ນ້ຳ​ຖ້ວມ​ໃນ ນວ ຕາມ​ການ​ສະ­ຫຼຸບ​ເບື້ອງ​ຕົ້ນ ມີ​ເມືອງ​ໄຊ​ທາ­ນີ ນາ​ຊາຍ​ທອງ ສີ​ໂຄດ​ຕະ­ບອງ ຫາດ​ຊາຍ​ທອງ ແລະ ເມືອງ​ປາກ​ງື່ມ ມີ 58 ບ້ານ 1.629 ຄອບ­ຄົວ ມີ 16.311 ຄົນ ໃນ​ນີ້ ຈຳ­ນວນ​ຄອບ­ຄົວ​ທີ່​ຍົກ­ຍ້າຍ​ໄປ​ຢູ່​ບ່ອນ​ປອດ​ໄພ 806 ຄອບ­ຄົວ 3.758 ຄົນ ຍິງ 1.131 ຄົນ ນ້ຳ​ຖ້ວມ​ເນື້ອ­ທີ່​ທຳ​ການ​ຜະ­ລິດ​ຂອງ​ປະ­ຊາ­ຊົນ 126 ບ້ານ 6 ເມືອງ ເນື້ອ­ທີ່ 5.011,42 ເຮັກ­ຕາ ໃນ​ນີ້ ມີ​ເນື້ອ­ທີ່​ນາ 13.419 ເຮັກ­ຕາ ສາ­ລີ​ແຂງ 119 ເຮັກ­ຕາ ມັນ­ຕົ້ນ 360 ເຮັກ­ຕາ ສວນ​ກ້ວຍ 291 ເຮັກ­ຕາ ແລະ ພືດ​ຜັກ​ອື່ນໆ​ຈຳ­ນວນ​ໜຶ່ງ ເຊິ່ງ​ຜົນ​ເສຍ​ຫາຍ​ຍັງ​ບໍ່​ສາ­ມາດ​ປະ​ເມີນ​ຜົນ​ໄດ້ ປັດ­ຈຸ­ບັນ​ລະ­ດັບ​ນ້ຳ​ຍັງ​ສືບ­ຕໍ່​ເພີ່ມ​ຂຶ້ນ ເຊິ່ງ​ພາກ­ສ່ວນ​ກ່ຽວ­ຂ້ອງ​ໄດ້​ລາຍ​ງານ​ວັນ​ທີ 29 ສິງ­ຫາ 2018 ໃຫ້​ຮູ້​ວ່າ​ລະ­ດັບ​ນ້ຳ​ໄດ້​ເພີ່ມ​ຂຶ້ນ 2 ຊັງ​ຕີ​ແມັດ​ຕໍ່ 3 ຊົ່ວ­ໂມງ ສະ­ເພາະ​ຈຸດ​ເຊື່ອມ​ຕໍ່​ບ້ານ​ແສນ​ດິນ​ກັບ​ເມືອງ​ໄຊ​ທາ­ນີ ແມ່ນ​ລົດ​ທຸກ​ປະ­ເພດ​ບໍ່​ສາ­ມາດ​ເຂົ້າ​ໄດ້​ຄາດ​ວ່າ​ເຮືອນ ແລະ ເນື້ອ­ທີ່​ທຳ​ການ​ຜະ­ລິດ​ຈະ​ຖືກ​ນ້ຳ​ຖ້ວມ​ເພີ່ມ​ອີກ ຈາກ​ນັ້ນ ບັນ­ດາ​ເຈົ້າ­ເມືອງ​ກໍ່​ໄດ້​ຜັດ­ປ່ຽນ​ກັນ​ລາຍ​ງານ​ສະ­ພາບ​ຄວາມ​ເສຍ​ຫາຍ ການ​ແກ້​ໄຂ​ໄລ­ຍະ​ຜ່ານ​ມາ ແລະ ແຜນ­ການ​ໃນ­ຕໍ່­ໜ້າ ເພື່ອ​ປຶກ­ສາ​ຫາ­ລື​ຊອກ​ຫາ​ວິ­ທີ​ການ ແລະ ມາດ​ຕະ­ການ​ຟື້ນ​ຟູ ພາຍ­ຫຼັງ​ທີ່​ນ້ຳ​ແຫ້ງ.

    ໂອ­ກາດ​ນີ້ ທ່ານ​ເຈົ້າ​ຄອງ ນວ ກໍ່​ໄດ້​ຍົກ​ໃຫ້​ເຫັນ​ຈຸດ​ອ່ອນ​ທີ່​ເປັນ​ສາ­ເຫດ​ພາ­ໃຫ້​ນ້ຳ​ຖ້ວມ ໂດຍ​ສະ­ເພາະ ການ​ບໍ­ລິ­ຫານ​ຈັດ­ການ​ນ້ຳ­ຂອງ​ບັນ­ດາ​ເຂື່ອນ ແລະ ການ​ມີ​ສະ­ຕິ​ຕໍ່​ລະ­ດັບ​ນ້ຳ​ທີ່​ເພີ່ມ​ຂຶ້ນ ພ້ອມ​ທັງ​ໄດ້​ເນັ້ນ​ໃຫ້​ທຸກ​ພາກ­ສ່ວນ​ເພີ່ມ​ທະ­ວີ​ມາດ​ຕະ­ການ​ປ້ອງ​ກັນ​ຊີ­ວິດ ແລະ ຊັບ​ສິນ​ຂອງ​ພົນ­ລະ­ເມືອງ ຮັບ­ປະ­ກັນ​ໄດ້​ຄວາມ​ສະ­ຫງົບ ສົ່ງ​ເຄື່ອງ​ຊ່ວຍ­ເຫຼືອ (ເຄື່ອງ​ອຸ­ປະ­ໂພກ-ບໍ­ລິ­ໂພກ) ໃຫ້​ພຽງ­ພໍ​ຕໍ່​ຜູ້​ທີ່​ໄດ້​ຮັບ​ຜົນ​ກະ­ທົບ ແລະ ໃຫ້​ຄົ້ນ­ຄວ້າ​ພາ­ຫະ­ນະ ເປັນ­ຕົ້ນ ເຮືອ​ໄປ​ຊ່ວຍ​ຈຸດ​ທີ່​ໄດ້​ຮັບ​ຜົນ​ກະ­ທົບ​ໝັກ​ກວ່າ​ໝູ່ ນອກ​ນີ້ ຂະ­ແໜງ­ການ​ອື່ນໆ​ກໍ່​ຕ້ອງ​ໄດ້​ເອົາ­ໃຈ­ໃສ່​ໄປ​ຄຽງ​ຄູ່​ກັນ​ເຊັ່ນ: ຂະ­ແໜງ​ສາ​ທາ ແລະ ການ​ສຶກ​ສາ ສຳ­ລັບ​ແຜນ​ໄລ­ຍະ​ຍາວ​ແມ່ນ​ຕ້ອງ​ສຳ​ຫຼວດ​ອອກ​ແບບ ໂດຍ​ໄວ​ຄັນ​ຄູ​ປ້ອງ​ກັນ​ນ້ຳ​ງື່ມ ເຂົ້າ​ໃນ​ແຜນ 5 ປີ ຄັ້ງ​ທີ 9 ພ້ອມ​ຊອກ​ຫາ​ແຫຼ່ງ​ທຶນ​ໃນ​ການ​ກໍ່­ສ້າງ ແຜນ­ຜັງ​ຈະ​ຕ້ອງ​ມີ​ການ​ສຳ​ຫຼວດ​ໃໝ່ ຈັດ​ສັນ​ພື້ນ​ທີ່​ທຳ​ການ​ຜະ­ລິດ​ທັງ​ສອງ​ຝັ່ງ​ນ້ຳ​ງື່ມ ແລະ ນ້ຳ­ຂອງ.

ຂ່າວທີ່ກ່ຽວຂ້ອງ