ຂ່າວຫຼ້າສຸດ

ລາວ-ບຣາຊິນ ເສີມຂະຫຍາຍສາຍພົວພັນ ແລະ ການຮ່ວມມື

234 30 ສ.ຫ. 2018 ຂ່າວໜ້າ​ໜຶ່ງ

    ທ່ານ Henrique Sardinha Pinto ຮອງ​ລັດ­ຖະ­ມົນ­ຕີ ຜູ້​ຊີ້​ນຳ​ວຽກ​ງານ​ຂົງ­ເຂດ​ອາ­ຊີ-ປາ​ຊີ​ຟິກ ກະ­ຊວງ​ການ​ຕ່າງ­ປະ­ເທດ ແຫ່ງ​ສາ­ທາ­ລະ­ນະ​ລັດ ສະ­ຫະ­ພັນ​ບຣາ​ຊິນ ພ້ອມ​ດ້ວຍ​ຄະ­ນະ ເດີນ­ທາງ​ມາ​ຢ້ຽມ­ຢາມ ສປປ ລາວ ເປັນ​ທາງ​ການ ແຕ່​ວັນ​ທີ 29-30 ສິງ­ຫາ 2018 ເພື່ອ​ສືບ­ຕໍ່​ຮັດ​ແໜ້ນ ເສີມ​ຂະ­ຫຍາຍ​ການ​ພົວ­ພັນ ແລະ ການ​ຮ່ວມ​ມື​ອັນ​ດີ­ງາມ ລະ­ຫວ່າງ​ສອງ​ປະ­ເທດ ລາວ-ບຣາ​ຊິນ.

    ກອງ​ປະ­ຊຸມ​ປຶກ­ສາ​ຫາ­ລື​ທາງ​ດ້ານ​ການ­ເມືອງ ລະ­ຫວ່າງ​ລາວ ແລະ ບຣາ​ຊິນ ຄັ້ງ​ປະ­ຖົມ​ມະ­ລຶກ ໄດ້​ຈັດ​ຂຶ້ນ​ວັນ​ທີ 29 ສິງ­ຫາ 2018 ຢູ່​ກະ­ຊວງ​ການ​ຕ່າງ­ປະ­ເທດ ເຊິ່ງ​ຝ່າຍ​ລາວ​ນຳ​ໂດຍ​ທ່ານ ແສງ​ເພັດ ຮຸ່ງ​ບຸນ​ຍວງ ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ແລະ ຝ່າຍ​ບຣາ​ຊິນ ແມ່ນ​ທ່ານ Henrique Sardinha Pinto ໃນ​ນີ້ ສອງ​ຝ່າຍ​ໄດ້​ມີ​ການ​ແລກ­ປ່ຽນ​ຄຳ​ຄິດ​ຄຳ​ເຫັນ​ເຊິ່ງ​ກັນ ແລະ ກັນ ກ່ຽວ​ກັບ​ສະ­ພາບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ບັນ­ຫາ​ພົ້ນ​ເດັ່ນ​ຂອງ​ປະ­ເທດ​ຕົນ​ໃຫ້​ກັນ​ຊາບ ລວມ​ທັງ​ບັນ­ຫາ​ພາກ​ພື້ນ ແລະ ສາ­ກົນ ທີ່​ຕ່າງ​ຝ່າຍ​ມີ​ຄວາມ​ສົນ­ໃຈ ພ້ອມ​ທັງ​ໄດ້​ປຶກ­ສາ​ຫາ­ລື ທິດ​ທາງ​ເສີມ​ຂະ­ຫຍາຍ​ການ​ພົວ­ພັນ​ຮ່ວມ​ມື ລະ­ຫວ່າງ​ສອງ​ປະ­ເທດ​ໃຫ້​ນັບ​ມື້​ເຂັ້ມ­ແຂງ ແລະ ແຕກ​ດອກ​ອອກ​ຜົນ​ຍິ່ງໆ​ຂຶ້ນ.

    ໂອ­ກາດ​ການ​ຢ້ຽມ­ຢາມ ສປປ ລາວ ຄັ້ງ​ນີ້ ຄະ­ນະ​ຜູ້​ແທນ​ກະ­ຊວງ​ການ​ຕ່າງ­ປະ­ເທດ​ບຣາ​ຊິນ ຍັງ​ໄດ້​ເຂົ້າ​ຢ້ຽມ​ຄຳ­ນັບ​ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ພົບ​ປະ​ກັບ​ທ່ານ​ຮອງ​ລັດ­ຖະ­ມົນ­ຕີ​ກະ­ຊວງ​ພະ­ລັງ­ງານ ແລະ ບໍ່​ແຮ່ ທ່ານ​ຮອງ​ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ເພື່ອ​ປຶກ­ສາ​ຫາ­ລື​ລົງ​ເລິກ​ແຜນ­ການ​ຮ່ວມ​ມື​ລະ­ອຽດ ບຣາ​ຊິນ-ລາວ ທີ່​ກ່ຽວ­ຂ້ອງ​ກັບ​ຂະ­ແໜງ­ການ​ດັ່ງ­ກ່າວ ພ້ອມ​ທັງ​ໄດ້​ຢ້ຽມ​ຊົມ​ສະ­ຖານ­ທີ່​ທ່ອງ​ທ່ຽວ​ປະ­ຫວັດ­ສາດ ແລະ ວັດ­ທະ­ນະ­ທຳ​ຈຳ­ນວນ​ໜຶ່ງ​ຢູ່​ນະ­ຄອນ­ຫຼວງ​ວຽງ​ຈັນ.

ຂ່າວທີ່ກ່ຽວຂ້ອງ