ຂ່າວຫຼ້າສຸດ

ກວດກາໜ້າວຽກໂຄງການ ສ້າງຖານຂໍ້ມູນຄຸ້ມຄອງພົນລະເມືອງ

161 30 ສ.ຫ. 2018 ຂ່າວໜ້າ​ໜຶ່ງ

    ວັນ​ທີ 28 ສິງ­ຫາ 2018 ຢູ່​ກະ­ຊວງ​ພາຍ​ໃນ ໄດ້​ຈັດ​ກອງ​ປະ­ຊຸມ​ກວດ­ກາ​ໜ້າ​ວຽກ ຄັ້ງ​ທີ 2 (70%) ກ່ຽວ​ກັບ​ການ​ພັດ­ທະ­ນາ​ລະ­ບົບ​ຖານ​ຂໍ້​ມູນ​ຄຸ້ມ​ຄອງ​ພົນ­ລະ­ເມືອງ ໂດຍ​ເປັນ​ປະ­ທານ​ຂອງ​ທ່ານ ສີ​ພຸກ ວົງ​ພັກ­ດີ ຮອງ​ລັດ­ຖະ­ມົນ­ຕີ​ກະ­ຊວງ​ພາຍ​ໃນ ມີ​ທ່ານ ກາວ ແອງ​ເຊີນ ອຳ­ນວຍ​ການ​ໃຫຍ່​ບໍ­ລິ­ສັດ ​ສະ​ຕາ​ໂທລະ​ຄົມ ຈຳ­ກັດ ພ້ອມ​ດ້ວຍ​ຜູ້­ຕາງ­ໜ້າ​ຈາກ​ກົມ ກະ­ຊວງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ສີ​ພຸກ ວົງ​ພັກ­ດີ ກ່າວ​ວ່າ: ການ​ດຳ­ເນີນ​ວຽກ​ງານ​ໄລ­ຍະ​ທີ 2 ໄດ້​ສືບ­ຕໍ່​ສ້າງ (ພັດ­ທະ­ນາ) ພ້ອມ​ທັງ​ທົດ​ລອງ​ຢູ່ 9 ເມືອງ ຂອງ​ນະ­ຄອນ­ຫຼວງ​ວຽງ​ຈັນ 12 ເມືອງ ຂອງ​ແຂວງ​ຫຼວງ​ພະ​ບາງ ແລະ 10 ເມືອງ ຂອງ​ແຂວງ​ຈຳ­ປາ​ສັກ ເຊິ່ງ​ກອງ​ປະ­ຊຸມ​ຄັ້ງ​ນີ້ ຈະ​ລົງ​ເລິກ​ກວດ­ກາ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ຕາມ​ແຜນ​ໜ້າ​ວຽກ​ທີ່​ສຳ­ເລັດ 70% ຂອງ​ບໍ​ລິ​ມາດ​ວຽກ​ທັງ​ໝົດ​ໃຫ້​ມີ​ຄວາມ​ສຳ­ເລັດ​ຄົບ​ຖ້ວນ​ສົມ­ບູນ ໃນ​ນີ້ ກວມ​ເອົາ­ໜ້າ​ວຽກ​ສ້າງ​ລະ­ບົບ​ແຜນ­ທີ່​ເຊື່ອມ​ກັບ​ລະ­ບົບ​ຖານ​ຂໍ້​ມູນ ສ້າງ​ລະ­ບົບ​ຄຸ້ມ​ຄອງ​ເອ­ກະ­ສານ​ທີ່​ກ່ຽວ​ພັນ​ກັບ​ໜ້າ​ວຽກ ສະ­ໜອງ ແລະ ຕິດ​ຕັ້ງ​ລະ­ບົບ​ໜ່ວຍ​ແມ່​ຂ່າຍ (ໄອ​ທີ) ຢູ່​ກະ­ຊວງ​ພາຍ​ໃນ ທົດ​ສອບ​ການ​ໃຊ້​ງານ​ລະ­ບົບ​ໂດຍ​ນຳ​ໃຊ້​ຂໍ້​ມູນ​ທົດ​ລອງ ປັບ­ປຸງ​ລະ­ບົບ ແກ້​ໄຂ​ບັນ­ຫາ​ທີ່​ເກີດ​ຂຶ້ນ​ໃນ​ການ​ທົດ​ລອງ ສ້າງ​ເອ­ກະ­ສານ​ຄູ່​ມື​ການ​ນຳ​ໃຊ້ ແລະ ຄູ່​ມື​ການ​ຄຸ້ມ​ຄອງ​ລະ­ບົບ ພ້ອມ​ທັງ​ເອ­ກະ­ສານ​ທີ່​ຈະ​ນຳ​ໃຊ້​ເຂົ້າ​ໃນ​ການ​ເຝິກ­ອົບ­ຮົມ ແລະ ເຝິກ­ອົບ­ຮົມ​ຜູ້​ໃຊ້​ລະ­ບົບ​ທີ 1.

    ທ່ານ ກາວ ແອງ​ເຊີນ ກ່າວ​ວ່າ: ອີງ​ຕາມ​ເນື້ອ​ໃນ​ການ​ເຊັນ​ສັນ­ຍາ ໄລ­ຍະ​ທີ 1 (ເດືອນ 6/2017-ເດືອນ 5/2018) ກະ­ຊວງ​ພາຍ​ໃນ ແລະ ບໍ­ລິ­ສັດ​ ສະ​ຕາ​ໂທລະ​ຄົມ ຈະ​ປະ­ສານ​ສົມ­ທົບ​ກັນ​ສ້າງ​ລະ­ບົບ​ການ​ຈົດ​ທະ­ບຽນ​ຂໍ້​ມູນ ແລະ ລະ­ບົບ​ຄຸ້ມ​ຄອງ​ພົນ­ລະ­ເມືອງ​ຢູ່ 3 ແຂວງ ພາຍ­ຫຼັງ​ທີ່​ຈັດ​ຕັ້ງ​ຜັນ​ຂະ­ຫຍາຍ​ສຳ­ເລັດ​ໄລ­ຍະ​ທີ 1 ໄລ­ຍະ​ທີ 2 ຈະ​ສືບ­ຕໍ່​ຂະ­ຫຍາຍ​ຢູ່ 15 ແຂວງ​ທີ່​ຍັງ​ເຫຼືອ ລະ­ບົບ​ການ​ຄຸ້ມ​ຄອງ​ຂໍ້​ມູນ​ພົນ­ລະ­ເມືອງ​ເປັນ​ລະ­ບົບ​ທີ່​ທັນ​ສະ­ໄໝ ເຊິ່ງ​ຈະ​ຊ່ວຍ​ໃຫ້­ການ​ບັນ­ທຶກ​ເຫດ­ການ​ສຳ­ຄັນ​ໃນ​ຊີ­ວິດ ຄົ້ນ​ຫາ​ບັນ­ດາ​ຂໍ້​ມູນ​ພື້ນ­ຖານ​ໃຫ້​ມີ​ຄວາມ​ສະ­ດວກ ຊັດ​ເຈນ ວ່ອງ­ໄວ ແລະ ຄົ້ນ​ຫາ​ປະ­ຫວັດ​ໄດ້​ງ່າຍ​ເຊັ່ນ: ການ​ຈົດ​ທະ­ບຽນ​ການ​ເກີດ ເສຍ​ຊີ­ວິດ ສາ​ເຫດ­ການ​ເສຍ​ຊີ­ວິດ ການ​ແຕ່ງ­ດອງ ການ​ຢ່າ​ຮ້າງ ການ​ປ່ຽນ​ຊື່ ຫຼື ນາມ­ສະ­ກຸນ ການ​ຍົກ­ຍ້າຍ​ບ່ອນ­ຢູ່​ອາ­ໄສ ແລະ ອື່ນໆ ເພື່ອ​ເກັບ​ກຳ​ສະ­ຖິ­ຕິ​ກ່ຽວ​ກັບ​ເຫດ­ການ​ສຳ­ຄັນ​ໃນ​ຊີ­ວິດ​ຂອງ​ຄົນໆ​ໜຶ່ງ​ ຕະ­ຫຼອດ​ເຖິງ​ລັກ­ສະ­ນະ​ເຫດ­ການ​ຂອງ​ຜູ້­ກ່ຽວ ແລະ ຜູ້​ອື່ນໆ​ທີ່​ກ່ຽວ­ຂ້ອງ ເຊິ່ງ​ສາ­ມາດ​ສັງ​ລວມ​ຂໍ້​ມູນ​ສະ­ຖິ­ຕິ​ໄດ້​ໃນ​ຂັ້ນ​ບ້ານ ເມືອງ ແຂວງ ກ່ຽວ​ກັບ​ຈຳ­ນວນ​ພົນ­ລະ­ເມືອງ ການ­ແຈກ­ຢາຍ​ພົນ­ລະ­ເມືອງ​ໃນ​ລະ­ດັບ​ຕ່າງໆ ຊ່ວຍ​ອຳ­ນວຍ​ຄວາມ​ສະ­ດວກ​ໃຫ້​ມີ​ການ​ວາງ​ແຜນ ການ​ຕິດ­ຕາມ​ແຜນ​ງານ​ໄດ້​ຢ່າງ​ຖືກ­ຕ້ອງ​ລະ­ດັບ​ປະ­ເທດ ພ້ອມ​ທັງ​ສະ­ໜອງ​ການ​ບໍ­ລິ­ການ​ວ່ອງ­ໄວ ແລະ ອຳ­ນວຍ​ຄວາມ​ສະ­ດວກ​ໃຫ້​ປະ­ຊາ­ຊົນ​ໃນ​ການ​ມາ​ນຳ​ໃຊ້​ບໍ­ລິ­ການ​ຂອງ​ພາກ​ລັດ.

ຂ່າວທີ່ກ່ຽວຂ້ອງ