ຂ່າວຫຼ້າສຸດ

ມສ ວຽງຈັນ ຕ້ອງການທຶນພັດທະນາພື້ນຖານໂຄງລ່າງ ຮອງຮັບນັກຮຽນ

363 30 ສ.ຫ. 2018 ຂ່າວໜ້າ​ໜຶ່ງ
ມສ ວຽງຈັນ ຕ້ອງການທຶນພັດທະນາພື້ນຖານໂຄງລ່າງ ຮອງຮັບນັກຮຽນ

    ປັດ­ຈຸ­ບັນ ຫຼາຍ​ສະ​ຖາ​ບັນ​ການ​ສຶກ​ສາ​ພາກ​ລັດ ແລະ ເອ­ກະ​ຊົນ ໄດ້​ກະ­ກຽມ​ຄວາມ​ພ້ອມ​ທຸກ​ດ້ານ​ເພື່ອ​ໄຂ​ສົກ­ຮຽນ​ໃໝ່ 2018-2019 ສະ­ເພາະ​ໂຮງ­ຮຽນ​ມັດ­ທະ­ຍົມ​ສົມ­ບູນ​ວຽງ​ຈັນ (ມສ ວຽງ​ຈັນ) ກໍ່​ໄດ້​ມີ​ການ​ຫ້າງ​ຫາ​ກະ­ກຽມ​ຄວາມ​ພ້ອມ ເພື່ອ​ເຮັດ​ໃຫ້­ການ​ໄຂ​ສົກ­ຮຽນ​ໃໝ່​ປີ​ນີ້​ດຳ­ເນີນ​ໄປ​ຢ່າງ​ມີ​ປະ​ສິດ­ທິ​ຜົນ ໃນ​ນີ້ ໂຮງ­ຮຽນ​ດັ່ງ­ກ່າວ ໄດ້​ເລີ່ມ​ໃຫ້​ນັກ­ຮຽນ​ມາ​ລົງ­ທະ­ບຽນ​ແຕ່​ວັນ​ທີ 27-31 ສິງ­ຫາ 2018 ແລະ ຈະ​ເລີ່ມ​ເຂົ້າ​ຮຽນ​ເປັນ​ທາງ​ການ ວັນ​ທີ 3 ກັນ­ຍາ 2018.

    ທ່ານ​ນາງ ວຽງ​ສຸ­ວັນ ພະ​ໄຊ​ສົມ­ບັດ ຜູ້­ອຳ­ນວຍ­ການ​ໂຮງ­ຮຽນ ມສ ວຽງ​ຈັນ ໃຫ້​ສຳ­ພາດ​ວັນ​ທີ 28 ສິງ­ຫາ 2018 ວ່າ: ມສ ວຽງ​ຈັນ ຕັ້ງ​ຢູ່​ຖະ­ໜົນ​ລ້ານ​ຊ້າງ ເມືອງ​ຈັນ­ທະ​ບູ​ລີ ນະ­ຄອນ­ຫຼວງ​ວຽງ​ຈັນ ສ້າງ​ຂຶ້ນ​ປີ 1958 ເມື່ອ​ກ່ອນ​ເອີ້ນ​ວ່າ “ລີ​ເຊ​ວຽງ​ຈັນ” ໄດ້​ປ່ຽນ​ເປັນ “ອຸ­ດົມ​ວຽງ​ຈັນ” ແລະ ປັດ­ຈຸ­ບັນ​ເອີ້ນ​ວ່າ “ມສ ວຽງ​ຈັນ” ມີ​ລະ­ບົບ​ການ​ຮຽນ-ການ​ສອນ​ແຕ່​ຊັ້ນ ມ1-ມ7 ສົກ­ຮຽນ 2017-2018 ມີ​ພະ­ນັກ­ງານ​ຄູ​ສອນ 161 ຄົນ ຍິງ 110 ຄົນ ໃນ​ນີ້ ຄູ​ສອນ​ຕົວ​ຈິງ 152 ຄົນ ຍິງ 101 ຄົນ ນັກ­ຮຽນ 3.112 ຄົນ ຍິງ 1.836 ຄົນ ຫ້ອງ​ຮຽນ 84 ຫ້ອງ ນັກ­ຮຽນ​ເສັງ​ຈົບ​ຊັ້ນ ມ4 ແລະ ມ7 ໄດ້ 100% ເສັງ​ເລື່ອນ​ຊັ້ນ​ໄດ້ 98% ຂຶ້ນ​ໄປ ປັດ­ຈຸ­ບັນ​ການ​ກະ­ກຽມ​ຄວາມ​ພ້ອມ​ດ້ານ​ຕ່າງໆ ເພື່ອ​ໄຂ​ສົກ­ຮຽນ​ໃໝ່ 2018-2019 ສຳ­ເລັດ 100% ໂດຍ​ສະ­ເພາະ ອາ­ຄານ​ສະ­ຖານ­ທີ່​ໂຕະ-ຕັ່ງ​ພຽງ­ພໍ​ກັບ​ນັກ­ຮຽນ​ທີ່​ຈະ​ເຂົ້າ​ຮຽນ ສ່ວນ​ການ​ຮັບ​ນັກ­ຮຽນ​ເຂົ້າ​ໃໝ່​ທຸກ​ປີ ໂຮງ­ຮຽນ​ໄດ້​ສອບ­ເສັງ​ເອົາ​ນັກ­ຮຽນ​ທີ່​ເຂົ້າ​ມາ​ຮຽນ​ຊັ້ນ ມ1 ແລະ ມ5 ສ່ວນ​ຊັ້ນ​ອື່ນ​ແມ່ນ​ເລື່ອນ​ໄປ​ຕາມ​ຊັ້ນ​ຮຽນ​ຄື: ຊັ້ນ ມ1 ມີ​ຜູ້​ມາ​ເສັງ 580 ຄົນ ຄັດ​ເອົາ 240 ຄົນ ຊັ້ນ ມ5 ມີ​ຜູ້​ມາ​ເສັງ 400 ຄົນ ຄັດ​ເອົາ 200 ຄົນ (ແຕ່​ລະ​ປີ​ການ​ເສັງ​ເອົາ​ຈະ​ມີ​ການ​ຫຼຸດ​ລື່ນ​ກັນ​ອີງ​ຕາມ​ຫ້ອງ​ຮຽນ) ແຕ່​ສົກ­ຮຽນ​ນີ້​ຄາດ​ວ່າ​ຈະ​ມີ​ນັກ­ຮຽນ​ປະ­ມານ 3.100 ຄົນ ອີງ​ຕາມ​ຄວາມ​ຕ້ອງ­ການ​ຂອງ​ຜູ້​ປົກ­ຄອງ​ນັກ­ຮຽນ ທີ່​ຢາກ​ໃຫ້​ລູກ​ຫຼານ​ຂອງ​ຕົນ​ມາ​ຮຽນ​ຢູ່​ໂຮງ­ຮຽນ​ແຫ່ງ​ນີ້​ແມ່ນ​ມີ​ຫຼາຍ ແຕ່​ບໍ່​ສາ­ມາດ​ຮັບ​ເອົາ​ໄດ້​ຕາມ​ຄວາມ​ຕ້ອງ­ການ ສາ­ເຫດ​ຍ້ອນ​ອາ­ຄານ​ສະ­ຖານ­ທີ່​ບໍ່​ພຽງ­ພໍ ຍ້ອນ​ບາງ​ອາ­ຄານ​ເກົ່າ​ແກ່​ຊຸດ­ໂຊມ ຖ້າ​ຈະ​ສ້ອມ­ແປງ​ກໍ່​ຕ້ອງ​ໃຊ້​ງົບ­ປະ­ມານ​ຫຼາຍ ດັ່ງ­ນັ້ນ ຂໍ​ຝາກ​ເຖິງ​ພັກ-ລັດ ກໍ່​ຄື ພາກ­ສ່ວນ​ກ່ຽວ­ຂ້ອງ ແລະ ສັງ­ຄົມ ລວມ​ເຖິງ​ບັນ­ດາ​ອະ­ດີດ​ນັກ­ຮຽນ ມສ ວຽງ​ຈັນ ສະ­ມາ­ຄົມ​ຜູ້​ປົກ­ຄອງ​ນັກ­ຮຽນ ແລະ ຜູ້​ໃຈ​ບຸນ​ພາຍ​ໃນ ແລະ ຕ່າງ­ປະ­ເທດ ຖ້າ​ມີ​ເງື່ອນ­ໄຂ​ກໍ່​ໃຫ້​ມາ​ຊຸກ­ຍູ້​ຊ່ວຍ­ເຫຼືອ ໂດຍ​ສະ­ເພາະ ຊ່ວຍ​ສ້າງ​ອາ­ຄານ​ສະ­ຖານ­ທີ່​ຮຽນ ແລະ ຊ່ວຍ​ອຸ­ປະ­ກອນ​ຮັບ​ໃຊ້​ຕ່າງໆ.

    ເພື່ອ​ແກ້​ໄຂ​ການ​ສັນ­ຈອນ​ແອ​ອັດ ມສ ວຽງ​ຈັນ ໄດ້​ປ່ຽນ​ເວ­ລາ​ເຂົ້າ​ຮຽນ​ຄື: ພາກ​ເຊົ້າ 7:30-11:45 ໂມງ ແລະ ພາກ​ບ່າຍ 13-16:00 ໂມງ ເລີ່ມ​ແຕ່​ສົກ­ຮຽນ 2017-2018 ໂອ­ກາດ​ນີ້​ກໍ່​ຂໍ​ຝາກ​ເຖິງ​ຜູ້​ປົກ­ຄອງ​ນັກ­ຮຽນ ໃຫ້​ຊ່ວຍ​ໂຮງ­ຮຽນ​ໃນ​ການ​ສຶກ​ສາ​ອົບ­ຮົມ​ລູກ​ຫຼານ​ຕົນ​ເອງ ຕິດ­ຕາມ​ຜົນ​ການ​ຮຽນ​ຖ້າ​ຮຽນ​ອ່ອນ​ໃຫ້​ຜູ້​ປົກ­ຄອງ​ມາ​ປຶກ­ສາ​ກັບ​ໂຮງ­ຮຽນ ເພື່ອ​ຊອກ​ຫາ​ທາງ​ແກ້​ໄຂ ເອົາ­ໃຈ­ໃສ່​ໃນ​ການ​ສົ່ງ-ຮັບ​ລູກ​ຫຼານ​ໃຫ້​ທັນ​ເວ­ລາ ແລະ ຮ່ວມ​ກັນ​ຕ້ານ​ປາ­ກົດ­ການ​ຫຍໍ້­ທໍ້​ຕ່າງໆ.

ຂ່າວທີ່ກ່ຽວຂ້ອງ