ຂ່າວຫຼ້າສຸດ

ຢອດວັກຊີນຕ້ານອະຫິວາ ໃຫ້ຜູ້ປະສົບອຸທົກກະໄພເມືອງສະໜາມໄຊ

172 30 ສ.ຫ. 2018 ຂ່າວໜ້າ​ໜຶ່ງ

    ກະ­ຊວງ​ສາ­ທາ­ລະ­ນະ​ສຸກ ຮ່ວມ​ກັບ​ພະ​ແນກ​ສາ­ທາ­ລະ­ນະ​ສຸກ​ແຂວງ ແລະ ຫ້ອງ­ການ​ສາ­ທາ­ລະ­ນະ​ສຸກ​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ໄດ້​ເປີດ​ບັ້ນ​ຕະ­ລຸມ­ບອນ​ຢອດ​ຢາ​ຕ້ານ​ພະ­ຍາດ​ອະ­ຫິ​ວາ​ຮອບ​ທຳ​ອິດ ໃຫ້​ກັບ​ຜູ້​ປະ­ສົບ​ອຸ​ທົກ​ກະ​ໄພ­ພິ­ບັດ​ນ້ຳ​ຖ້ວມ​ຢູ່​ໃນ​ແຕ່​ລະ​ຈຸດ​ພັກ​ເຊົາ​ຂອງ​ປະ­ຊາ­ຊົນ ວັນ​ທີ 23 ສິງ­ຫາ 2018 ໂດຍ​ມີ​ຈຸດ­ປະ­ສົງ​ເພື່ອ​ປ້ອງ​ກັນ​ບໍ່​ໃຫ້​ເກີດ ຫຼື ມີ​ການ​ແຜ່​ລະ­ບາດ​ຂອງ​ພະ­ຍາດ​ດັ່ງ­ກ່າວ.

    ທ່ານ​ນາງ ຈັນ​ຄຳ ເຕັງ​ເບຼຍ​ຈື ຫົວ­ໜ້າ​ໜ່ວຍ​ງານ​ສະ­ຖິ­ຕິ​ຕິດ­ຕາມ ແລະ ປະ​ເມີນ​ຜົນ ສູນ​ສຸ­ຂະ­ພາບ​ແມ່ ແລະ ເດັກ ເປີດ­ເຜີຍ​ໃຫ້​ຮູ້​ວ່າ: ແຂວງ​ອັດ​ຕະ​ປື ເປັນ​ແຂວງ​ທີ່​ມີ​ການ​ລະ­ບາດ​ຂອງ​ພະ­ຍາດ​ອະ­ຫິ​ວາ​ມາ​ແລ້ວ​ໃນ​ປີ 2010 ຢູ່​ທີ່​ເມືອງ​ຊານ​ໄຊ ມີ​ຈຳ­ນວນ​ຜູ້​ເປັນ​ພະ­ຍາດ​ດັ່ງ­ກ່າວ 3 ຮ້ອຍ​ກໍ­ລະ­ນີ ແລະ ເສຍ​ຊີ­ວິດ 4 ກໍ­ລະ­ນີ ເມື່ອ​ເຫັນ​ສະ­ພາບ​ການ​ດັ່ງ­ກ່າວ​ກະ­ຊວງ​ສາ­ທາ­ລະ­ນະ​ສຸກ ແລະ ອົງ​ການ­ຈັດ­ຕັ້ງ​ສາ­ກົນ​ເຫັນ​ໄດ້​ເຖິງ​ຄວາມ​ຈຳ­ເປັນ ແລະ ອີງ­ໃສ່​ສະ­ພາບ​ທີ່­ຢູ່​ປັດ­ຈຸ­ບັນ​ຂອງ​ຜູ້​ປະ­ສົບ​ໄພ­ພິ­ບັດ​ນ້ຳ​ຖ້ວມ​ທີ່​ເມືອງ​ສະ­ໜາມ​ໄຊ ເຫັນ​ວ່າ​ມີ​ສະ­ພາບ​ແອ​ອັດ ການ​ຮັກ­ສາ​ສຸ​ຂະ​ອະ­ນາ­ໄມ​ບໍ່​ທັນ​ໄດ້​ດີ​ເທົ່າ​ທີ່​ຄວນ ເພື່ອ​ປ້ອງ​ກັນ​ບໍ່​ໃຫ້​ມີ​ການ​ເກີດ​ຂຶ້ນ​ຂອງ​ພະ­ຍາດ​ອະ­ຫິ​ວາ ຈຶ່ງ​ໄດ້​ມີ​ການ​ເປີດ​ບັ້ນ​ຕະ­ລຸມ­ບອນ​ຢອດ​ຢາ​ວັກ​ຊີນ​ຕ້ານ​ພະ­ຍາດ​ດັ່ງ­ກ່າວ ໂດຍ​ການ​ຢອດ​ຄັ້ງ​ນີ້​ແມ່ນ​ໄດ້​ຮັບ​ການ​ຊ່ວຍ­ເຫຼືອ​ວັກ​ຊີນ​ຈາກ​ອົງ­ການ​ກອຍ​ກາ ຈຳ­ນວນ 5.000 ໂດ ຕໍ່ 5 ພັນ​ຄົນ ເລັ່ງ​ໃສ່​ເປົ້າ​ໝາຍ 5.400 ກວ່າ​ຄົນ ທີ່​ໄດ້​ຮັບ​ຜົນ​ກະ­ທົບ​ໜັກ ທີ່​ມີ​ອາ­ຍຸ​ແຕ່ 1 ປີ​ຂຶ້ນ​ໄປ​ຫາ​ທຸກ​ກຸ່ມ​ອາ­ຍຸ ລວມ​ທັງ​ແມ່­ຍິງ​ຖື­ພາ ແລະ ແມ່​ເກີດ​ລູກ​ໃໝ່ ຢູ່​ຕາມ​ສູນ​ພັກ​ເຊົາ 7 ຈຸດ ໃນ​ນີ້ ໄດ້​ມີ​ການ​ແບ່ງ​ເປັນ​ໜ່ວຍ ໜ່ວຍ​ລະ 4 ຄົນ​ປະ­ກອບ​ມີ​ທ່ານ­ໝໍ ແລະ ແພດ ຄາດ​ວ່າ​ຈະ​ໃຫ້​ສຳ­ເລັດ​ໃນ​ວັນ​ທີ 27 ສິງ­ຫາ​ນີ້ ຈາກ​ນັ້ນ ອາ­ທິດ​ຕໍ່​ໄປ​ຈະ​ນຳ​ມາ​ຢອດ​ອີກ​ຈຳ­ນວນ 700 ໂດ ທີ່​ໄດ້​ຮັບ​ການ​ຊ່ວຍ­ເຫຼືອ​ຈາກ​ອົງ­ການ​ກາ​ວີ ໂດຍ​ຜ່ານ​ອົງ­ການ​ອະ­ນາ­ໄມ​ໂລກ ເພື່ອ​ໃຫ້​ປົກ​ຫຸ້ມ​ຈຳ­ນວນ​ປະ­ຊາ­ຊົນ​ທີ່​ໄດ້​ຮັບ​ຜົນ​ກະ­ທົບ ປະ­ມານ 10 ພັນ​ກວ່າ​ຄົນ ທັງ​ໝົດ​ນີ້​ແມ່ນ​ບວກ​ເຂົ້າ­ກັນ​ໃຫ້​ເປັນ​ຮອບ​ທີ 1 ແລະ ອີກ​ຮອບ​ທີ 2 ຈະ​ຢອດ​ເພີ່ມ​ອີກ​ຫຼັງ​ຈາກ​ທີ່​ຢອດ​ວັກ​ຊີນ​ອະ­ຫິ​ວາ​ຮອບ​ທີ 1 ສຳ­ເລັດ​ແລ້ວ​ພາຍ​ໃນ 14 ວັນ ໝາຍ​ຄວາມ​ວ່າ​ຄົນ​ຜູ້​ໜຶ່ງ​ຕ້ອງ​ໄດ້​ຮັບ​ວັກ​ຊີນ​ອະ­ຫິ​ວາ​ຄົນ​ລະ 2 ໂດ ເພື່ອ​ໃຫ້​ວັກ​ຊີນ​ໄດ້​ຮັບ​ປະ­ສິດ­ທິ­ພາບ ນອກ​ນີ້ ຄຽງ​ຄູ່​ກັບ​ການ​ໃຫ້​ວັກ​ຊີນ​ຍັງ​ໄດ້​ມີ​ການ​ໂຄ­ສະ­ນາ​ສຸ​ຂະ​ສຶກ​ສາ ແນ­ໃສ່​ໃຫ້​ເຂົາ­ເຈົ້າ​ຮູ້​ຮັກ­ສາ​ສຸ​ຂະ​ອະ­ນາ­ໄມ ເປັນ­ຕົ້ນ ຂັ້ນ​ຕອນ​ການ​ລ້າງ​ວິດ­ຖ່າຍ ການ​ລ້າງ​ມື​ຫຼັງ​ຈາກ​ໃຊ້​ວິດ­ຖ່າຍ ກິນ​ເຂົ້າ ແລະ ອື່ນໆ.

ຂ່າວທີ່ກ່ຽວຂ້ອງ