ຂ່າວຫຼ້າສຸດ

ສິງກະໂປ ມອບປຶ້ມຫຼາຍກວ່າ 3.500 ຫົວ ເພື່ອສົ່ງເສີມການອ່ານໃຫ້ໄວໜຸ່ມລາວ

234 30 ສ.ຫ. 2018 ຂ່າວໜ້າ​ໜຶ່ງ
ສິງກະໂປ ມອບປຶ້ມຫຼາຍກວ່າ 3.500 ຫົວ ເພື່ອສົ່ງເສີມການອ່ານໃຫ້ໄວໜຸ່ມລາວ

    ລັດ­ຖະ­ບານ​ສິງ­ກະ­ໂປ ນຳ​ປຶ້ມ 3.500 ຫົວ ຈາກ​ຫໍ­ສະ­ໝຸດ​ແຫ່ງ​ຊາດ ສິງ­ກະ­ໂປ ມາ​ມອບ​ໃຫ້ ສປປ ລາວ ເພື່ອ​ສົ່ງ­ເສີມ​ໄວ​ໜຸ່ມ​ໃຫ້​ຫັນ​ມາ​ຮັກ​ການ​ອ່ານ ໂດຍ​ພິ­ທີ​ມອບ-ຮັບ​ປຶ້ມ​ດັ່ງ­ກ່າວ ໄດ້​ຈັດ​ຂຶ້ນ​ວັນ​ທີ 29 ສິງ­ຫາ 2018 ຢູ່​ໝໍ​ສະ­ໝຸດ​ແຫ່ງ​ຊາດ ເຊິ່ງ​ມອບ​ໂດຍ​ທ່ານ ໂດ​ມິ​ນິກ ໂກ ເອກ​ອັກ​ຄະ​ລັດ​ຖະ​ທູດ​ສິງ­ກະ­ໂປ ປະ­ຈຳ​ລາວ ແລະ ຮັບ​ໂດຍ​ທ່ານ​ນາງ ບົວ​ໄຂ ເພັງ​ພະ­ຈັນ ຫົວ­ໜ້າ​ກົມ​ພິມ​ຈຳ­ໜ່າຍ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ມີ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ລັດ­ຖະ­ບານ​ສິງ­ກະ­ໂປ ກໍ່​ຄື ຫໍ­ສະ­ໝຸດ​ສິງ­ກະ­ໂປ ນຳ​ປຶ້ມ​ຈຳ­ນວນ​ດັ່ງ­ກ່າວ ໂດຍ​ຜ່ານ​ຄະ­ນະ​ອາ­ສາ​ສະ­ໝັກ​ໂກ​ໂບ​ແຊບ​ເປີ​ວຽງ​ຈັນ ເພື່ອ​ນຳ​ປຶ້ມ​ຈຳ­ນວນ​ດັ່ງ­ກ່າວ​ມາ​ມອບ​ໃຫ້​ຫໍ­ສະ­ໝຸດ​ແຫ່ງ​ຊາດ ໂດຍ​ປຶ້ມ​ທີ່​ນຳ​ມາ​ມອບ​ຄັ້ງ​ນີ້​ມີ​ເນື້ອ​ໃນ​ຂຽນ​ເປັນ​ພາ­ສາ​ອັງ­ກິດ ເປັນ­ຕົ້ນ ປຶ້ມ​ນິ­ທານ ວິ­ທະ­ຍາ­ສາດ ປະ­ຫວັດ­ສາດ ພູມ​ສາດ ແລະ ປຶ້ມ​ອື່ນໆ ເພື່ອ​ບໍ­ລິ­ການ​ໃຫ້​ໄວ​ໜຸ່ມ ແລະ ເດັກ​ໃຫ້​ຫັນ​ມາ​ຮັກ​ການ​ອ່ານ​ຫຼາຍ​ຂຶ້ນ ທັງ​ເປັນ​ການ​ສົ່ງ­ເສີມ​ໃຫ້​ໄວ​ໜຸ່ມ​ຫັນ​ມາ​ຮຽນ​ຮູ້​ພາ­ສາ​ອັງ­ກິດ ຜ່ານ​ການ​ອ່ານ​ພັດ­ທະ­ນາ​ຕົນ​ເອງ ໃຫ້​ເປັນ​ຄົນ​ທີ່​ມີ​ຄວາມ​ຮູ້-ຄວາມ​ສາ­ມາດ ປະ­ກອບ­ສ່ວນ​ພັດ­ທະ­ນາ​ສ້າງ­ສາ​ປະ­ເທດ​ຊາດ.

    ການ​ມອບ​ຄັ້ງ​ນີ້ ຖື​ເປັນ​ຄັ້ງ​ທີ 2 ທີ່​ລັດ­ຖະ­ບານ​ສິງ­ກະ­ໂປ ໄດ້​ນຳ​ປຶ້ມ​ມາ​ມອບ​ໃຫ້​ຫໍ­ສະ­ໝຸດ​ແຫ່ງ​ຊາດ ເຊິ່ງ​ໄດ້​ຮັບ​ການ​ສະ­ໜັບ­ສະ­ໜູນ​ໃນ​ການ​ຂົນ­ສົ່ງ​ປຶ້ມ​ຈາກ​ສິງ­ກະ­ໂປ ມາ​ຍັງ ສປປ ລາວ ໂດຍ​ບໍ­ລິ­ສັດ ລີມ​ຊຽງ​ຮວດ ແລະ ກຸ່ມ​ບໍ­ລິ­ສັດ ອິນ​ທະ­ລາ.

ຂ່າວທີ່ກ່ຽວຂ້ອງ