ຂ່າວຫຼ້າສຸດ

ນະຄອນຫຼວງວຽງຈັນ ຈະສົ່ງນັກກີລາ 500 ກວ່າຄົນ ຮ່ວມ ຊຽງຂວາງ ເກມ

403 30 ສ.ຫ. 2018 ວົງຈອນກີລາ
ນະຄອນຫຼວງວຽງຈັນ ຈະສົ່ງນັກກີລາ 500 ກວ່າຄົນ ຮ່ວມ ຊຽງຂວາງ ເກມ

    ກອງ​ປະ­ຊຸມ​ອະ­ນຸ​ກຳ­ມະ­ການ​ເຕັກ­ນິກ​ຮັບ­ຜິດ­ຊອບ​ກະ­ກຽມ​ທັບ​ນັກ­ກີ­ລາ ນະ­ຄອນ­ຫຼວງ​ວຽງ​ຈັນ (ນວ) ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ 11 (ຊຽງ​ຂວາງ​ ເກມ 2018) ຈັດ​ຂຶ້ນ​ວັນ​ທີ 28 ສິງ­ຫາ 2018 ຢູ່​ສູນ​ກີ­ລາ​ບຶງ​ຂະ​ຫຍອງ ໂດຍ​ມີ​ທ່ານ ສົມ​ພອນ ສອນ​ດາ­ລາ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ຫົວ­ໜ້າ​ອະ­ນຸ​ກຳ­ມະ­ການ​ເຕັກ­ນິກ​ທັບ​ນັກ­ກີ­ລາ ນວ ທ່ານ ຈັນ​ສຸກ ສີ​ສົມ​ພັນ ຮອງ​ຫົວ­ໜ້າ​ຫ້ອງ​ວ່າ­ການ​ປົກ­ຄອງ ນວ ທ່ານ ກອງ​ແກ້ວ ແຫ່ງ​ດາ​ວົງ​ໄຊ ຫົວ­ໜ້າ​ຂະ­ແໜງ​ກີ­ລາ​ລະ­ດັບ​ສູງ ແລະ ຄະ­ນະ​ຮັບ­ຜິດ­ຊອບ​ອະ­ນຸ​ກຳ­ມະ­ການ​ເຕັກ­ນິກ​ກຽມ​ທັບ​ນັກ­ກີ­ລາ 28 ປະ­ເພດ​ເຂົ້າ​ຮ່ວມ.

    ທ່ານ ສົມ​ພອນ ສອນ​ດາ­ລາ ໄດ້​ເນັ້ນ​ໃຫ້​ຄະ­ນະ​ຮັບ­ຜິດ­ຊອບ​ອະ­ນຸ​ກຳ­ມະ­ການ​ເຕັກ­ນິກ ກະ­ກຽມ​ທັບ​ນັກ­ກີ­ລາ ນວ ເພີ່ມ​ທະ­ວີ​ຄວາມ​ເອົາ­ໃຈ­ໃສ່ ແລະ ເສຍ­ສະ­ຫຼະ​ສູງ ເພື່ອ​ຂຸ້ນ­ຂ້ຽວ​ສຸມ​ໃສ່​ບັນ­ດາ​ໜ້າ­ທີ່​ວຽກ​ງານ​ທີ່​ຕົນ​ເອງ​ຮັບ­ຜິດ­ຊອບ​ຢ່າງ​ເປັນ​ຂະ​ບວນ​ການ​ຟົດ­ຟື້ນ ໂດຍ​ສະ­ເພາະ ການ​ຕິດ­ຕາມ ແລະ ປະ­ສານ​ພົວ­ພັນ​ນຳ​ບັນ­ດາ​ສະ­ຫະ­ພັນ​ພະ­ແນກ­ການ ແລະ ເມືອງ ເພື່ອ​ປະ​ເມີນ​ຄວາມ​ຄືບ​ໜ້າ​ໃນ​ການ​ຕິດ­ຕາມ ແລະ ຊຸກ­ຍູ້​ສົ່ງ­ເສີມ​ທັບ​ນັກ­ກີ­ລາ ນວ ໄປ​ເກັບ​ຕົວ​ເຝິກ­ຊ້ອມ​ຢູ່​ແຕ່​ລະ​ຈຸດ​ດ້ວຍ​ຄວາມ​ຮັບ­ຜິດ­ຊອບ​ສູງ ເພື່ອ​ຮັບ­ປະ­ກັນ​ໃນ​ການ​ນຳ­ພາ​ທັບ​ນັກ­ກີ­ລາ ນວ ທີ່​ຈະ​ສົ່ງ​ຄະ­ນະ​ນຳ​ຄູ​ເຝິກ ແລະ ນັກ­ກີ­ລາ 600 ກວ່າ​ຄົນ ໃນ​ນີ້ ນັກ­ກີ­ລາ 567 ຄົນ (ຕົວ​ເລກ​ເບື້ອງ​ຕົ້ນ) ໃນ 28 ປະ­ເພດ​ກີ­ລາ.

    ທ່ານ ກອງ​ແກ້ວ ແຫ່ງ​ດາ​ວົງ​ໄຊ ກ່າວ​ວ່າ: ໃນ​ເດືອນ​ກັນ­ຍາ 2018 ນີ້ ຈະ​ມີ 6-7 ປະ­ເພດ​ກີ­ລາ​ເຂົ້າ​ນອນ​ສູນ​ເກັບ​ຕົວ​ເຝິກ­ຊ້ອມ ແລະ ຕົ້ນ​ເດືອນ​ຕຸ­ລາ​ກໍ່​ຈະ​ໄດ້​ເຕົ້າ­ໂຮມ​ອີກ 21 ປະ­ເພດ​ກີ­ລາ​ເຂົ້າ​ນອນ​ສູນ​ຕາມ​ພາຍ­ຫຼັງ ສ່ວນ​ສະ­ຖານ­ທີ່​ເກັບ​ຕົວ​ເຝິກ­ຊ້ອມ​ແມ່ນ​ເນັ້ນ​ໃຫ້​ນອນ​ສູນ​ບຶງ​ຂະ​ຫຍອງ ບາງ​ປະ­ເພດ​ກໍ່​ຈະ​ໄດ້​ເກັບ​ຕົວ​ເຝິກ­ຊ້ອມ​ຢູ່​ໂຮງ­ຮຽນ ແລະ ສະ­ໂມ­ສອນ​ຕ່າງໆ​ໃນ 9 ຕົວ​ເມືອງ.

    ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ 10 ຢູ່​ແຂວງ​ອຸ­ດົມ​ໄຊ ປີ 2014 ທັບ​ນັກ­ກີ­ລາ​ກະ­ຊວງ​ປ້ອງ​ກັນ​ປະ­ເທດ (ກອງ­ທັບ) ສາ­ມາດ​ຍາດ​ໄດ້​ອັນ​ດັບ 1 ຄື: 61 ຫຼຽນ​ຄຳ 29 ຫຼຽນ​ເງິນ 37 ຫຼຽນ​ທອງ ອັນ​ດັບ 2 ແມ່ນ ນວ 55 ຫຼຽນ​ຄຳ 31 ຫຼຽນ​ເງິນ 49 ຫຼຽນ​ທອງ ອັນ​ດັບ 3 ກະ­ຊວງ​ປ້ອງ​ກັນ​ຄວາມ​ສະ­ຫງົບ 42 ຫຼຽນ​ຄຳ 43 ຫຼຽນ​ເງິນ 51 ຫຼຽນ​ທອງ.

ຂ່າວທີ່ກ່ຽວຂ້ອງ