ຂ່າວຫຼ້າສຸດ

ທີມຊາດລາວຊຸດໃຫຍ່ ປະທະ ເອັດສຊີຈີ ເມືອງທອງ 31 ສິງຫານີ້

286 30 ສ.ຫ. 2018 ວົງຈອນກີລາ
ທີມຊາດລາວຊຸດໃຫຍ່ ປະທະ ເອັດສຊີຈີ ເມືອງທອງ 31 ສິງຫານີ້

    ການ​ແຂ່ງ­ຂັນ​ບານ­ເຕະ​ນັດ​ພິ­ເສດ ລະ­ຫວ່າງ ທີມ​ຊາດ​ລາວ ຊຸດ​ໃຫຍ່ ພົບ​ກັບ ສະ­ໂມ­ສອນ​ເອັດ​ສ​ຊີ​ຈີ ເມືອງ​ທອງ ຢູ​ໄນ​ເຕັດ ສະ­ໂມ­ສອນ​ແຖວ​ໜ້າ​ໄທ​ພຣີ​ເມຍ ລີກ ຈະ​ຈັດ​ຂຶ້ນ​ໃນ​ວັນ​ທີ 31 ສິງ­ຫາ 2018 ທີ່​ສະ­ໜາມ​ກີ­ລາ​ແຫ່ງ​ຊາດ ຫຼັກ 16 ນະ­ຄອນ­ຫຼວງ​ວຽງ​ຈັນ ເລີ່ມ​ແຂ່ງ­ຂັນ​ເວ­ລາ 18:30 ໂມງ ເພື່ອ​ເປັນ​ການ​ເອົາ­ໃຈ​ກອງ​ເຊຍ​ລາວ​ທົ່ວ​ປະ­ເທດ ຝ່າຍ​ຈັດ­ການ​ແຂ່ງ­ຂັນ​ໄດ້​ມີ​ການ​ແຈກ​ປີ້​ເຂົ້າ​ຊົມ​ລ້າ ພ້ອມ​ທັງ​ຈະ​ມີ​ການ​ຖ່າຍ​ທອດ​ສົດ​ຜ່ານ​ທາງ​ໂທລະ­ພາບ​ລາວ ຊ່ອງ 3 ໃຫ້​ໄດ້​ຮັບ​ຊົມ​ເກມ​ການ​ແຂ່ງ­ຂັນ​ນັດ​ດັ່ງ­ກ່າວ​ອີກ​ດ້ວຍ.

    ພາຍ­ຫຼັງ​ທີ່​ສະ­ໂມ­ສອນ ເອັດ​ສ​ຊີ​ຈີ ເມືອງ​ທອງ ຢູ​ໄນ​ເຕັດ ເດີນ­ທາງ​ມາ​ເຖິງ​ນະ­ຄອນ­ຫຼວງ​ວຽງ​ຈັນ ໃນ​ວັນ​ທີ 29 ສິງ­ຫາ 2018 ກໍ່​ໄດ້​ມີ​ພິ­ທີ​ຖະ­ແຫຼງ​ຂ່າວ​ການ​ແຂ່ງ­ຂັນ​ນັດ​ພິ­ເສດ​ດັ່ງ­ກ່າວ ທີ່​ໂຮງ­ແຮມ​ລາວ​ພລາ​ຊາ ໂດຍ​ມີ​ທ່ານ ວິ­ໂລດ ລັດ­ຕະ­ນະ​ໄຊ​ສິດ ກຳ­ມະ­ການ​ຜູ້​ຈັດ­ການ-ການ​ຂາຍ ແລະ ຊ່ອງ​ທາງ​ການ​ຈັດ​ຈຳ­ໜ່າຍ ເອັດ​ສ​ຊີ​ຈີ ທ່ານ​ນາງ ກັນ­ຍາ ແກ້ວ​ມະ­ນີ ເລ­ຂາ­ທິ­ການ​ສະ­ຫະ­ພັນ​ບານ­ເຕະ​ແຫ່ງ​ຊາດ ພ້ອມ​ດ້ວຍ​ບັນ­ດາ​ຄູ​ເຝິກ ນັກ­ກີ­ລາ ແລະ ສື່​ມວນ​ຊົນ​ທຸກ​ຂະ­ແໜງ­ການ.

    ໂອ­ກາດ​ນີ້ ທ່ານ ວິ­ໂລດ ລັດ­ຕະ­ນະ​ໄຊ​ສີ ກ່າວ​ວ່າ: ການ​ແຂ່ງ­ຂັນ​ຄັ້ງ​ນີ້​ຖື​ເປັນ​ຄັ້ງ​ທີ​ສອງ ໂດຍ​ຄັ້ງ​ຜ່ານ​ມາ​ໄດ້​ຮັບ​ການ​ຕອບ​ຮັບ​ເປັນ​ຢ່າງ​ດີ​ຈາກ​ກອງ​ເຊຍ ສປປ ລາວ ມີ​ຜູ້​ເຂົ້າ​ຊົມ​ເກມ​ຫຼາຍ​ກວ່າ 9.000 ຄົນ ດັ່ງ­ນັ້ນ ປີ​ນີ້​ຈຶ່ງ​ຍ້າຍ​ມາ​ຈັດ​ຢູ່​ສະ­ໜາມ​ກີ­ລາ​ແຫ່ງ​ຊາດ ນອກ­ຈາກ​ນີ້ ເອັດ​ສ​ຊີ​ຈີ ຍັງ​ໃຫ້​ຄວາມ​ສຳ­ຄັນ​ໃນ​ເຫດ​ອຸ​ທົກ​ກະ​ໄພ​ນ້ຳ​ຖ້ວມ​ຫຼາຍ​ພື້ນ​ທີ່​ຂອງ ສປປ ລາວ ເຊິ່ງ​ທາງ​ເອັດ​ສ​ຊີ​ຈີ ພ້ອມ​ດ້ວຍ​ພະ­ນັກ­ງານ ຈຶ່ງ​ໄດ້​ຮວບ​ຮວມ​ເງິນ​ບໍ­ລິ­ຈາກ ແລະ ເຄື່ອງ​ອຸ­ປະ­ໂພກ​ບໍ­ລິ­ໂພກ ລວມ​ມູນ​ຄ່າ 60 ລ້ານ​ກີບ ແລະ ເອັດ​ສ​ຊີ​ຈີ ຈະ​ຂໍ​ໃຊ້​ໂອ­ກາດ​ນີ້​ມອບ​ຄວາມ​ຊ່ວຍ­ເຫຼືອ​ໃຫ້​ແກ່ ສປປ ລາວ ເພີ່ມ​ຕື່ມ​ເພື່ອ​ຟື້ນ​ຟູ​ພື້ນ​ທີ່​ປະ­ສົບ​ອຸ​ທົກ​ກະ​ໄພ​ເປັນ​ເງິນ 50 ລ້ານ​ກີບ ນອກ­ຈາກ​ນີ້​ຍັງ​ມີ​ການ​ເຊີນ­ຊວນ​ຜູ້​ຊົມ​ໃນ​ສະ­ໜາມ​ຮ່ວມ​ບໍ­ລິ­ຈາກ​ເງິນ​ຊ່ວຍ­ເຫຼືອ​ພາຍ​ໃນ​ວັນ​ແຂ່ງ­ຂັນ​ອີກ​ດ້ວຍ.

ຂ່າວທີ່ກ່ຽວຂ້ອງ