ຂ່າວຫຼ້າສຸດ

ພະຍາດ​ອະຫິ​ວາ​ໝູ​ສາຍ​ພັນ​ອາ​ຟະ​ຣິກ​ກາ ລະບາດ​ຢູ່​ຈີນ

152 29 ສ.ຫ. 2018 ຂ່າວຕ່າງປະເທດ
ພະຍາດ​ອະຫິ​ວາ​ໝູ​ສາຍ​ພັນ​ອາ​ຟະ​ຣິກ​ກາ ລະບາດ​ຢູ່​ຈີນ

    ອົງການ​ອາຫານ ແລະ ການ​ກະເສດ (FAO) ຂອງ​ສະຫະ​ປະຊາ​ຊາດ (​ສປຊ) ແຈ້ງ​ເຕືອນ​ວ່າ ພະຍາດ​ອະຫິ​ວາ​ໝູ​ສາຍ​ພັນ​ອາ​ຟະ​ຣິກ​ກາ (ASF) ທີ່​ພວມ​ລະບາດ​ຢູ່​ຈີນ​ນັ້ນ ອາດ​ຈະ​ແພ່​ລາມ ໄປ​ຍັງ​ເຂດ​ອື່ນໆ​ຂອງ​ອາຊີ ທ່າມກາງ​ທີ່​ຜູ້​ປະກອບ​ການ​ຜະລິດ​ຊີ້ນ​ໝູ​ລາຍ​ໃຫຍ່ ສຸດ​ຂອງ​ໂລກ ພວມ​ພະຍາຍາມ​ສະກັດ​ກັ້ນ​ພະຍາດ​ທີ່​ອັນຕະລາຍ​ດັ່ງກ່າວ.

    ແຈ້ງ​ການ​ຂອງ FAO ໃຫ້​ຮູ້​ວ່າ ຈີນ​ໄດ້​ຂ້າ​ທຳລາຍ​ໝູ​ໄປ​ແລ້ວ 24.000 ກວ່າ​ໂຕ​ຢູ່​ໃນ ສີ່​ແຂວງ​ໃນ​ປະເທດ​ນີ້ ເພື່ອ​ສະກັດ​ກັ້ນ​ການ​ແພ່​ລາມ​ຂອງ​ພະຍາດ​ດັ່ງກ່າວ. ພວກ​ໝູ​ທີ່​ຕິດພະຍາດ​ນັ້ນ ຖືກ​ກວດ​ພົບ​ຢູ່​ໃນ​ຫຼາຍ​ເຂດ​ທີ່ຢູ່​ຫ່າງ​ກັນ​ກວ່າ 1.000 ​ກມ ຈຶ່ງ​ມີ​ຄວາມ​ສ່ຽງ​ວ່າ​ພະຍາດ​ຈະ​ແພ່​ລາມ ຂ້າມ​ຊາຍ​ແດນ. ດັ່ງນັ້ນ ໄວ​​ຣັສ ອາດ​ຈະ​ແພ່​ລາມ​ໄປ​ຍັງ​ປະເທດ​ອື່ນໆ​ໃນ​ອາຊີ​ໃນ​ເວລາ​ໃດ​ກໍ​ໄດ້ ຕົ້ນຕໍ​ກໍ​ແມ່ນ​ບັນດາ​ປະເທດ​ໃກ້​ຄຽງ ຢູ່​ໃນ​ເຂດ​ອາຊີ​ຕາເວັນ​ອອກ​ສ່ຽງ​ໃຕ້ ຫຼື​ແຫຼມ​ເກົາຫຼີ ບ່ອນ​ຊຶ່ງ​ມີ​ການເຄື່ອນໄຫວ​ຄ້າຂາຍ ແລະ​ບໍລິໂພກ​ຊີ້ນ​ໝູ​ຢູ່​ໃນ​ລະດັບ​ສູງ.

    ຈີນ​ໄດ້​ແຈ້ງ​ໃຫ້​ຮູ້​ເຖິງ​ກໍລະນີ​ຕິດ ASF ລາຍ​ທຳ​ອິດ ທີ່​ໄດ້​ກວດ​ພົບ​ຢູ່​ໃນ​ແຂວງ​ຫຼຽວ​ນິງ (ທິດຕາເວັນອອກ​ສ່ຽງ​ເໜືອ​ຂອງ​ຈີນ) ເມື່ອ​ຕົ້ນ​ເດືອນ​ສິງຫາ​ນີ້. FAO ໃຫ້​ຮູ້​ວ່າ ສາເຫດ​ທີ່​ເຮັດ​ໃຫ້ ພະຍາດ ASF ແພ່​ລາມ​ຢ່າງ​ໄວວາ​ຢູ່​ໃນ​ຈີນ​ໃນ​ປັດຈຸບັນ ແມ່ນ​ຍ້ອນ​ການ​ເຄື່ອນ​ຍ້າຍ ບັນດາ​ຜະລິດ​ຕະ​ພັນ​ຈາກ​ໝູ ຫາກ​ບໍ່​ແມ່ນ​ເປັນ​ຍ້ອນ​ການ​ເຄື່ອນ​ຍ້າຍ​ໝູ​ທີ່​ຊີວິດ.

    ສະຖິຕິ​ໃຫ້​ຮູ້​ວ່າ ປະມານ​ເຄິ່ງ​ໜຶ່ງ​ຂອງ​ຈຳນວນ​ໝູ​ຢູ່​ໃນ​ໂລກ ແມ່ນ​ໄດ້​ຮັບ​ການ​ລ້ຽງ​ຢູ່​ໃນ ປະເທດ​ຈີນ ແລະ ຈີນ​ກໍ​ເປັນ​ປະເທດ​ຜູ້​ບໍລິໂພກ​ຊີ້ນ​ໝູ​ລາຍ​ໃຫຍ່​ສຸດ ເມື່ອ​ໄລ່​ຕາມ​ຫົວ​ຄົນ.

    ພະ​ຍາກ​ອະຫິ​ວາ​ໝູ​ສາຍ​ພັນ​ອາ​ຟະ​ຣິກ​ກາ ບໍ່ເກີດ​ຜົນ​ຮ້າຍ​ຕໍ່​ຄົນ ແຕ່​ພັດ​ເກີດ​ພະຍາດ​ໄຂ້​ເລືອດ ອອກ​ຢູ່​ໃນ​ໝູ​ລ້ຽງ ແລະ ​ໝູ​ປ່າ ຊຶ່ງ​ເປັນ​ສາເຫດ​ເຮັດ​ໃຫ້​ສັດ​ນັ້ນ​ຕາຍ​ໄດ້​ພາຍ​ໃນ​ບໍ່​ພໍ​ເທົ່າໃດ​ມື້. ປັດຈຸບັນ​ນີ້ ຍັງ​ບໍ່​ທັນ​ມີ​ຢາ​ປິ່ນປົວ ຫຼື​ວັກ​ແຊງ​ປ້ອງ​ກັນ​ພະຍາດ​ດັ່ງກ່າວ ໂດຍ​ໃນ​ເວລາ​ນີ້​ມີ​ພຽງ​ແຕ່​ມາດ​ຕະການ​ດຽວ ເພື່ອ​ສະກັດ​ກັ້ນ​ການ​ແພ່​ລາມ​ຂອງ​ພະຍາດ ນັ້ນ​ກໍ​ຄື​ການ​ຂ້າ​ທຳລາຍ​ສັດ​ທີ່​ຕິດພະຍາດ​ນັ້ນ.

 

ຂ່າວທີ່ກ່ຽວຂ້ອງ