ຫວຽດນາມ -ເອ​ຢິບ ປະກາດ​ຖະແຫຼງການ​ຮ່ວມ

137 29 ສ.ຫ. 2018 ຂ່າວຕ່າງປະເທດ
ຫວຽດນາມ -ເອ​ຢິບ ປະກາດ​ຖະແຫຼງການ​ຮ່ວມ

     ຂ່າວສານ​ຫວຽດນາມ ລາຍ​ງານ​ວ່າ ເນື່ອງ​ໃນ​ໂອກາດ​ປະທານ​ປະເທດ​ຫວຽດນາມ ເຈິ່ນ​ດ້າຍ​ກວາງ ຢ້ຽມຢາມ​ເອ​ຢິບ​ຢ່າງ​ເປັນ​ທາງ​ການ ແຕ່​ວັນ​ທີ 25-28 ສິງຫາ ຕາມ​ຄຳ​ເຊີນ ຂອງ​ປະທານາທິບໍດີ​ເອ​ຢິບ ອັບ​ເດລ ຟັດ​ຕາ ແອ​​ລ-ຊີ​ຊີ ນັ້ນ ສອງ​ຝ່າຍ​ໄດ້​ປະກາດ​ຖະແຫຼງການ​ຮ່ວມ ໂດຍ​ມີ​ບາງ​ຕອນ​ລະບຸ​ວ່າ ຜູ້ນຳ​ທັງ​ສອງ​ເຫັນ​ດີ​ເປັນ​ເອກະສັນ​ກັນ ວ່າ​ຄວນ​ເພີ່ມ​ທະວີ​ການ​ແລກປ່ຽນ ຄະນະ​ຜູ້​ແທນ​ຂັ້ນ​ຕ່າງໆ ໂດຍ​ຜ່ານ​ຊ່ອງ​ທາງ​ຂອງ​ລັດຖະບານ ສະພາ​ແຫ່ງ​ຊາດ ທ້ອງຖິ່ນ ປະຊາຊົນ ແລະ​ວິ​ສາ​ຫະ​ກິດ​ຂອງ​ສອງ​ປະເທດ ພ້ອມ​ກັນ​ນັ້ນ​ກໍ​ຢືນຢັນ​ວ່າ ຄວນ​ສືບຕໍ່​ເສີມ​ຂະຫຍາຍ​ໝາກຜົນ ຂອງ​ບັນດາ​ກົນ​ໄກ​ການ​ຮ່ວມ​ມື​ທີ່​ມີ​ຢູ່​ໃນ​ປັດຈຸບັນ ເຊັ່ນ​ຄະນະ​ກຳມະການ​ລະຫວ່າງ​ລັດຖະບານ  ທາບ​ທາມ​ການເມືອງ ແລະ ກົນ​ໄກ​ອື່ນໆ ພ້ອມ​ທັງ​ປັບປຸງ​ຄວາມ​ເຊື່ອ​ໝັ້ນ​ຍຸດ​ທະ​ສາດ ລະຫວ່າງ ສອງ​ປະເທດ.

    ໃນ​ການ​ເຈລະຈາ​ກັນ​ນັ້ນ ຜູ້ນຳ​ທັງ​ສອງ ໄດ້​ເຫັນ​ດີ​ເປັນ​ເອກະສັນ​ກັນ ເຖິງ​ການ​ສືບຕໍ່ ຊຸກຍູ້​ການ​ຮ່ວມ​ມື​ແບບ​ສອງ​ຝ່າຍ ໃນ​ຂົງເຂດ​ການ​ຄ້າ ການ​ລົງທຶນ ແລະ​ໃຫ້​ສັນຍາ​ໃນ​ການ​ອຳນວຍ ຄວາມ​ສະດວກ ໃຫ້​ແກ່​ວິ​ສາ​ຫະ​ກິດ​ຂອງ​ສອງ​ປະເທດ ໃນ​ການ​ເຂົ້າ​ຫາ​ຕະຫຼາດ​ຂອງ​ກັນ​ແລະ​ກັນ. ເພື່ອ​ໃຫ້​ບັນລຸ​ມູນ​ຄ່າ​ການ​ຄ້າ​ແບບ​ສອງ​ຝ່າຍ​ທີ່ 1 ຕື້ ໂດ​ລາ​ສະຫະລັດ​ໃນຕໍ່ໜ້າ​ນັ້ນ ຜູ້ນຳ​ທັງ​ສອງ​ໃຫ້​ທັດສະນະ​ວ່າ ຕ້ອງ​ໄດ້​ດຳເນີນ​ຫຼາຍ​ມາດ​ຕະການ​ຢ່າງ​ຄົບ​ຊຸດ.

    ນອກຈາກ​ການ​ພົບ​ປະ​ເຈລະຈາ​ກັນ​ແລ້ວ ຜູ້ນຳ​ທັງ​ສອງ​ຍັງ​ໄດ້​ເຂົ້າ​ຮ່ວມ​ເປັນ​ສັກຂີ​ພິຍານ ໃນ​ພິທີ ລົງ​ນາມ​ຂໍ້​ຕົກລົງ​ການ​ຮ່ວ​ມື​ຕ່າງໆ ໃນ​ນັ້ນ​ມີ​ຂໍ້​ຕົກລົງ​ວ່າ​ດ້ວຍ​ມິດຕະພາບ ແລະ ການ​ຮ່ວມ​ມື ລະຫວ່າງ ແຂວງ​ນິງ​ບິ່ງ (ຫວຽດນາມ) ກັບ​ແຂວງ ລູ​ຊໍ (ເອ​ຢິບ) ບົດ​ບັນທຶກ​ຊ່ວຍ​ຈຳ​ກ່ຽວ​ກັບ​ການ​ຮ່ວມ​ມື ລະຫວ່າງ​ກະຊວງ​ກະສິກຳ ແລະ ພັດທະນາ​ຊົນນະບົດ​ຂອງ​ຫວຽດນາມ ກັບ​ກະຊວງ​ກະສິກຳ ແລະ​ປະຕິ​ຮູບ​ທີ່​ດິນ​ຂອງ​ເອ​ຢິບ; ບົດ​ບັນທຶກ​ຊ່ວຍ​ຈຳ​ກ່ຽວ​ກັບ​ການ​ຮ່ວມ​ມື  ລະຫວ່າງ​ກະຊວງ​ການ​ເງິນ ຫວຽດນາມ ກັບ​ກະຊວງ​ການ​ລົງທຶນ ແລະ ຮ່ວມ​ມື​ສາກົນ​ຂອງ​ເອ​ຢິບ; ບົດ​ບັນທຶກ​ການ​ຮ່ວມ​ມື ລະຫວ່າງ​ກະຊວງ​ອຸດສາຫະກຳ ການ​ຄ້າ​ຫວຽດນາມ ກັບ​ກະຊວງ​ນ້ຳມັນ-ແກ​​ັສ ແລະ ແຮ່​ທາດ​ຂອງ​ເອ​ຢິບ; ບົດ​ບັນທຶກ​ຊ່ວຍ​ຈຳ​ກ່ຽວ​ກັບ​ການ​ຮ່ວມ​ມື ລະຫວ່າງ​ກະຊວງ​ອຸດສາຫະກຳ ການ​ຄ້າ​ຫວຽດນາມ ກັບ​ກະຊວງ​ອຸດສາຫະກຳ ການ​ຄ້າ ເອ​ຢິບ ແລະ ອື່ນໆ.

 

ຂ່າວທີ່ກ່ຽວຂ້ອງ