ຂ່າວຫຼ້າສຸດ

ຮອງນາຍົກ ລົງຕິດຕາມສະພາບນ້ຳຖ້ວມຢູ່ເມືອງນາຊາຍທອງ

405 29 ສ.ຫ. 2018 ຂ່າວໜ້າ​ໜຶ່ງ
ຮອງນາຍົກ ລົງຕິດຕາມສະພາບນ້ຳຖ້ວມຢູ່ເມືອງນາຊາຍທອງ

    ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ພ້ອມ​ດ້ວຍ ທ່ານ ແກ້ວ​ພິ­ລາ​ວັນ ອາ​ໄພ​ລາດ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ (ນວ) ແລະ ຄະ­ນະ ລົງ​ຕິດ­ຕາມ​ສະ­ພາບ​ນ້ຳ​ງື່ມ​ໄຫຼ​ເຂົ້າ​ຖ້ວມ​ເຮືອນ ແລະ ເນື້ອ­ທີ່​ການ​ຜະ­ລິດ​ຂອງ​ປະ­ຊາ­ຊົນ​ບ້ານ​ແສນ​ດິນ ເມືອງ​ນາ​ຊາຍ​ທອງ ນວ ໂດຍ​ຖືກ​ຕ້ອນ­ຮັບ​ຈາກ​ທ່ານ ຈັນ­ທະ​ລາ ອິນ​ທະ­ລັງ​ສີ ເຈົ້າ­ເມືອງ​ໄຊ​ທາ­ນີ ທ່ານ ວິ­ລະ​ສັກ ນາມ​ມຸນ­ຕີ ເຈົ້າ­ເມືອງ​ນາ​ຊາຍ​ທອງ ແລະ ພາກ­ສ່ວນ​ກ່ຽວ­ຂ້ອງ.

    ການ​ລົງ​ຕິດ­ຕາມ​ສະ­ພາບ​ນ້ຳ​ຖ້ວມ​ຄັ້ງ​ນີ້ ຄະ­ນະ​ໄດ້​ຂີ່​ເຮືອ​ຈາກ​ຂົວ​ທ່າ​ງ່ອນ ເມືອງ​ໄຊ​ທາ­ນີ ຂຶ້ນ​ໄປ​ຕາມ ສາຍ​ນ້ຳ​ງື່ມ ໄປ​ຫາ​ບ້ານ​ແສນ​ດິນ ເຊິ່ງ​ໄລ­ຍະ​ທາງ​ການ​ເດີນ​ເຮືອ​ແມ່ນ​ໄດ້​ເຫັນ​ລະ­ດັບ​ນ້ຳ​ງື່ມ​ໄຫຼ​ຖ້ວມ​ວັດ ເຮືອນ​ປະ­ຊາ­ຊົນ​ທີ່​ອາ­ໄສ​ຢູ່​ແຄມ​ນ້ຳ​ງື່ມ ເນື້ອ­ທີ່​ການ​ປູກ­ຝັງ ແລະ ອື່ນໆ ໄດ້​ຮັບ​ຄວາມ​ເສຍ​ຫາຍ​ໜັກ ເມື່ອ​ຄະ­ນະ​ລ່ອງ​ເຮືອ​ຂຶ້ນ​ຮອດ​ບ້ານ​ແສນ​ດິນ ຄະ­ນະ​ໄດ້​ຮັບ​ລາຍ​ງານ​ຫຍໍ້​ກ່ຽວ​ກັບ​ສະ­ພາບ​ນ້ຳ​ຖ້ວມ ຈາກ​ທ່ານ ດີ ແກ້ວ​ດວງ​ຈິດ ເລ­ຂາ​ພັກ​ບ້ານ ນາຍ­ບ້ານ​ແສນ​ດິນ ວ່າ: ບ້ານ​ແສນ​ດິນ ມີ 282 ຫຼັງ­ຄາ​ເຮືອນ ມີ 309 ຄອບ­ຄົວ ມີ​ພົນ­ລະ­ເມືອງ 1.355 ຄົນ ຍິງ 659 ຄົນ ມີ​ເນື້ອ­ທີ່​ທັງ​ໝົດ 1.400 ເຮັກ­ຕາ ເນື້ອ­ທີ່​ທຳ​ການ​ຜະ­ລິດ 1.300 ເຮັກ­ຕາ ສະ­ພາບ​ຂອງ​ນ້ຳ​ນັບ​ແຕ່​ວັນ​ທີ 17-20 ສິງ­ຫາ 2018 ລະ­ດັບ​ນ້ຳ​ເພີ່ມ​ຂຶ້ນ 10 ແມັດ​ຈາກ​ລະ­ດັບ​ນ້ຳ​ປົກ­ກະ­ຕິ ວັນ​ທີ 20-24 ສິງ­ຫາ 2018 ລະ­ດັບ​ນ້ຳ​ເພີ່ມ​ຂຶ້ນ 10,50 ແມັດ ໄດ້​ແຈ້ງ​ປະ­ຊາ­ຊົນ​ຍົກ­ຍ້າຍ​ໄປ​ທີ່​ປອດ​ໄພ ວັນ​ທີ 24-26 ສິງ­ຫາ 2018 ລະ­ດັບ​ນ້ຳ​ຂຶ້ນ 11,5 ແມັດ ວັນ​ທີ 26-28 ສິງ­ຫາ 2018 ລະ­ດັບ​ນ້ຳ11,34 ແມັດ ນ້ຳ​ໄຫຼ​ເຂົ້າ​ຖ້ວມ​ບ້ານ ແລະ ເນື້ອ­ທີ່​ທຳ​ການ​ຜະ­ລິດ ໃນ​ເບື້ອງ​ຕົ້ນ ອຳ­ນາດ​ການ​ປົກ­ຄອງ​ເມືອງ ແລະ ບ້ານ ໄດ້​ສົມ​ທຸກ​ກຳ­ລັງ​ເຂົ້າ​ໄປ​ຊ່ວຍ­ເຫຼືອ​ປະ­ຊາ­ຊົນ​ທີ່​ໄດ້​ຮັບ​ຜົນ​ກະ­ທົບ ໂດຍ​ໄດ້​ມີ​ການ​ຍົກ­ຍ້າຍ​ປະ­ຊາ­ຊົນ ຈຳ­ນວນ 10 ຄອບ­ຄົວ ວັດ­ຖຸ​ສິ່ງ​ຂອງ ແລະ ສັດ­ລ້ຽງ​ຂອງ​ປະ­ຊາ­ຊົນ ອອກ​ຈາກ​ພື້ນ​ທີ່​ນ້ຳ​ຖ້ວມ​ເຂົ້າ​ມາ​ຢູ່​ທີ່​ພັກ​ບ່ອນ​ທີ່​ປອດ​ໄພ ໄດ້​ສ້າງ​ຄູ​ກັ້ນ​ນ້ຳ ແລະ ຊ່ວຍ­ເຫຼືອ​ດ້ານ​ສາ­ທາ­ລະ­ນະ​ສຸກ ໃຫ້​ຜູ້​ທີ່​ຖືກ​ຜົນ​ກະ­ທົບ ສຳ­ລັບ​ຜົນ​ເສຍ​ຫາຍ​ໃນ​ເບື້ອງ​ຕົ້ນ ຍັງ​ບໍ່​ສາ­ມາດ​ປະ​ເມີນ​ໄດ້ ໃນ​ໂອ­ກາດ​ນີ້​ທ່ານ​ນາຍ­ບ້ານ ໄດ້​ສະ­ເໜີ​ຕໍ່​ການ​ນຳ​ຂັ້ນ​ເທິງ​ຊ່ວຍ​ແກ້​ໄຂ​ດ່ວນ ເສັ້ນ­ທາງ​ຕັດ­ຂາດ ອາ­ຫານ​ກິນ ນ້ຳ​ດື່ມ​ສະ­ອາດ ສຸ­ຂະ­ພາບ​ຂອງ​ຄົນ ແລະ ສັດ ແນວ​ພັນ​ຜະ­ລິດ​ຕ່າງໆ. 

    ໂອ­ກາດ​ການ​ລົງ​ຕິດ­ຕາມ​ສະ­ພາບ​ນ້ຳ​ຖ້ວມ​ຢູ່​ທີ່​ບ້ານ​ແສນ​ດິນ​ຄັ້ງ​ນີ້ ທ່ານ​ຮອງ​ນາ­ຍົກ​ກໍ່​ໄດ້​ຊີ້​ນຳ​ໃຫ້​ອຳ­ນາດ​ການ​ປົກ­ຄອງ​ເມືອງ ບ້ານ ແລະ ພາກ­ສ່ວນ​ທີ່​ກ່ຽວ­ຂ້ອງ​ຕິດ­ຕາມ​ເຝົ້າ​ລະ­ວັງ ກ່ຽວ​ກັບ​ລະ­ດັບ​ນ້ຳ​ຢ່າງ​ໃກ້­ຊິດ ເອົາ­ໃຈ­ໃສ່​ປົກ​ປັກ​ຮັກ­ສາ​ວັດ­ຖຸ​ສິ່ງ​ຂອງ​ມີ­ຄ່າ ແລະ ເກັບ​ມ້ຽນ​ໄວ້​ບ່ອນ​ປອດ​ໄພ ສຸມ​ໃສ່​ເກັບ​ກຳ​ຂໍ້​ມູນ​ເນື້ອ­ທີ່​ທຳ​ການ​ຜະ­ລິດ​ທີ່​ໄດ້​ຮັບ​ຄວາມ​ເສຍ​ຫາຍ​ໃຫ້​ລະ­ອຽດ ຕິດ­ຕາມ-ສົ່ງ​ຂ່າວ​ເຕືອນ​ປະ­ຊາ­ຊົນ​ກ່ຽວ​ກັບ​ພະ­ຍາ­ກອນ​ອາ­ກາດ ລະ­ມັດ­ລະ­ວັງ​ກ່ຽວ​ກັບ​ການ​ຊົມ­ໃຊ້​ໄຟ­ຟ້າ ພ້ອມ​ນີ້ ກໍ່​ຕ້ອງ​ມີ​ການ​ຮັບ​ມື​ກັບ​ບັນ­ດາ​ພະ­ຍາດ​ທີ່​ຈະ​ຕາມ​ມາ​ກັບ​ນ້ຳ ພາຍ­ຫຼັງ​ສະ­ພາບ​ເຂົ້າ​ສູ່​ປົກ­ກະ­ຕິ​ແລ້ວ​ຕ້ອງ​ຮີບ​ຮ້ອນ​ຊຸກ­ຍູ້-ສົ່ງ­ເສີມ​ປະ­ຊາ­ຊົນ​ທຳ​ການ​ຜະ­ລິດ ເພື່ອ​ຊົດ​ເຊີຍ​ຜົນ​ເສຍ​ຫາຍ​ຈາກ​ໄພ​ນ້ຳ​ຖ້ວມ​ໃນ​ຄັ້ງ​ນີ້.

ຂ່າວທີ່ກ່ຽວຂ້ອງ