ລັດ ກຳນົດຈ່າຍເງິນເດືອນພະນັກງານ ລະຫວ່າງ ວັນທີ 25-30

352 29 ສ.ຫ. 2018 ຂ່າວໜ້າ​ໜຶ່ງ

    ກະ­ຊວງ​ການ​ເງິນ ຈັດ​ກອງ​ປະ­ຊຸມ​ປະ­ກອບ​ຄຳ​ເຫັນ​ໃສ່​ຮ່າງ​ແນະ­ນຳ​ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ລາຍ​ຈ່າຍ​ເງິນ­ເດືອນ ເງິນ​ອຸດ​ໜູນ ແລະ ເງິນ​ນະ­ໂຍ­ບາຍ ໃຫ້​ພະ­ນັກ­ງານ-ລັດ­ຖະ­ກອນ​ຜ່ານ​ລະ­ບົບ​ທະ­ນາ­ຄານ ຂຶ້ນ​ໃນ​ທ້າຍ​ອາ­ທິດ​ຜ່ານ​ມາ ຢູ່​ກະ­ຊວງ​ດັ່ງ­ກ່າວ ໂດຍ​ເປັນ​ປະ­ທານ​ຂອງ​ທ່ານ ບຸນ​ເຫຼືອ ສິນ​ໄຊ​ວໍ​ຣະ​ວົງ ຫົວ­ໜ້າ​ກົມ​ນະ­ໂຍ­ບາຍ​ການ​ເງິນ ແລະ ນິ­ຕິ​ກຳ ມີ​ທ່ານ​ນາງ ວັນ​ພອນ ພົມ​ມະ​ສອນ ຫົວ­ໜ້າ​ຄັງ​ເງິນ​ແຫ່ງ​ຊາດ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ບຸນ​ເຫຼືອ ສິນ​ໄຊ​ວໍ​ຣະ​ວົງ ກ່າວ​ວ່າ: ຈຸດ­ປະ­ສົງ​ຂອງ​ກອງ​ປະ­ຊຸມ​ຄັ້ງ​ນີ້ ເພື່ອ​ປະ­ກອບ​ຄຳ​ເຫັນ​ໃສ່​ຮ່າງ​ແນະ­ນຳ​ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ລາຍ​ຈ່າຍ​ເງິນ­ເດືອນ ເງິນ​ອຸດ​ໜູນ ແລະ ເງິນ​ນະ­ໂຍ­ບາຍ ໃຫ້​ພະ­ນັກ­ງານ-ລັດ­ຖະ­ກອນ ຜ່ານ​ລະ­ບົບ​ທະ­ນາ­ຄານ ເພື່ອ​ຄວາມ​ເປັນ​ເອ­ກະ​ພາບ​ໃນ​ການ​ເບີກ​ຈ່າຍ​ເງິນ​ດັ່ງ­ກ່າວ ໃນ​ແຕ່​ລະ​ເດືອນ​ໃນ​ຂອບ​ເຂດ​ທົ່ວ​ປະ­ເທດ ທັງ​ເປັນ​ການ​ຫຼີກ​ລ່ຽງ​ການ​ຄອງ​ຄອຍ​ວ່າ​ເງິນ­ເດືອນ ເງິນ​ອຸດ​ໜູນ ແລະ ເງິນ​ນະ­ໂຍ­ບາຍ​ຈະ​ອອກ​ວັນ​ທີ​ໃດ ການ​ເບີກ​ຈ່າຍ​ເງິນ­ເດືອນ ເງິນ​ອຸດ​ໜູນ ແລະ ເງິນ​ນະ­ໂຍ­ບາຍ​ໃຫ້​ພະ­ນັກ­ງານ-ລັດ­ຖະ­ກອນ ທະ­ຫານ ຕຳ­ຫຼວດ ພັກ-ລັດ­ຖະ­ບານ​ໄດ້​ຖື​ເອົາ​ເປັນ​ບຸ­ລິ­ມະ­ສິດ​ອັນ​ດັບ​ໜຶ່ງ ເຊິ່ງ​ໄລ­ຍະ​ຜ່ານ​ມາ​ການ​ປະ­ຕິ­ບັດ​ວຽກ​ງານ​ດັ່ງ­ກ່າວ​ຍັງ​ບໍ່​ທັນ​ເປັນ​ເອ­ກະ​ພາບ ສະ­ແດງ​ອອກ​ບາງ​ຫົວ­ໜ່ວຍ​ໄດ້​ຮັບ​ເງິນ­ເດືອນ​ໄວ ບາງ​ຫົວ­ໜ່ວຍ​ເງິນ­ເດືອນ​ຊ້າ ບາງ​ຫົວ­ໜ່ວຍ​ຢູ່​ທ້ອງ­ຖິ່ນ​ຍັງ​ປະ­ກອບ​ເອ­ກະ­ສານ​ເບີກ​ຈ່າຍ​ເງິນ ເດືອນ​ເປັນ​ງວດ ສະ­ນັ້ນ ເພື່ອ​ຫັນ​ເອົາ​ວຽກ​ງານ​ການ​ເບີກ​ຈ່າຍ​ມີ​ຄວາມ​ເປັນ​ເອ­ກະ​ພາບ​ໃນ​ທົ່ວ​ປະ­ເທດ ກະ­ຊວງ​ການ​ເງິນ​ຈຶ່ງ​ໄດ້​ຮ່າງ​ຄຳ​ແນະ­ນຳ​ກ່ຽວ​ການ­ຈັດ­ຕັ້ງ​ປະ­ຕິ­ບັດ​ລາຍ​ຈ່າຍ​ເງິນ­ເດືອນ ເງິນ​ອຸດ​ໜູນ ແລະ ເງິນ​ນະ­ໂຍ­ບາຍ ເພື່ອ​ເຮັດ​ໃຫ້​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ດັ່ງ­ກ່າວ ມີ​ປະ​ສິດ­ທິ​ຜົນ ໂປ່ງ​ໃສ ວ່ອງ­ໄວ ຖືກ­ຕ້ອງ ສາ­ມາດ​ກວດ​ສອບ​ໄດ້ ແລະ ທັນ​ຕາມ​ກຳ­ນົດ​ເວ­ລາ.

ຮ່າງ​ແນະ­ນຳ​ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ລາຍ​ຈ່າຍ​ເງິນ­ເດືອນ ເງິນ​ອຸດ​ໜູນ ແລະ ເງິນ​ນະ­ໂຍ­ບາຍ​ໃຫ້​ພະ­ນັກ­ງານ-ລັດ­ຖະ­ກອນ​ຜ່ານ​ລະ­ບົບ​ທະ­ນາ­ຄານ ໄດ້​ແບ່ງ​ຄວາມ​ຮັບ­ຜິດ­ຊອບ​ໃນ​ການ­ຈັດ­ຕັ້ງ​ປະ­ຕິ­ບັດ​ຄື: ບັນ­ດາ​ຫົວ­ໜ່ວຍ​ງົບ­ປະ­ມານ​ຂັ້ນ​ສູນ​ກາງ ແລະ ທ້ອງ­ຖິ່ນ ປະ­ກອບ​ເອ­ກະ­ສານ​ບັນ­ຊີ​ຈຳ­ນວນ​ພົນ ຊັ້ນ-ຂັ້ນ​ເງິນ­ເດືອນ ການ​ອຸດ​ໜູນ​ຂອງ​ພະ­ນັກ­ງານ-ລັດ­ຖະ­ກອນ ສົ່ງ​ຫາ​ກະ­ຊວງ​ພາຍ​ໃນ ຫຼື ຂະ­ແໜງ​ພາຍ​ໃນ​ຂັ້ນ​ທ້ອງ­ຖິ່ນ​ຂອງ​ງວດ​ຕໍ່​ໄປ​ບໍ່​ໃຫ້​ກາຍ​ວັນ​ທີ 15 ຂອງ​ເດືອນ​ສຸດ​ທ້າຍ​ໃນ​ແຕ່​ລະ​ງວດ ເອ­ກະ­ສານ​ລາຍ​ຈ່າຍ​ເງິນ­ເດືອນ ເງິນ​ອຸດ​ໜູນ ເງິນ​ນະ­ໂຍ­ບາຍ ສົ່ງ​ຫາ​ກົມ​ງົບ­ປະ­ມານ​ແຫ່ງ​ລັດ ຫຼື ຂະ­ແໜງ​ງົບ­ປະ­ມານ​ແຫ່ງ​ລັດ​ຂັ້ນ​ທ້ອງ­ຖິ່ນ ເພື່ອ​ຄົ້ນ­ຄວ້າ​ອະ­ນຸ­ມັດ​ລາຍ​ຈ່າຍ​ຂອງ​ງວດ​ຕໍ່​ໄປ​ບໍ່​ໃຫ້​ກາຍ​ວັນ​ທີ 30 ຂອງ​ເດືອນ​ສຸດ​ທ້າຍ​ໃນ​ແຕ່​ລະ​ງວດ ແລະ ໃບ​ຖອນ­ເງິນ​ສົ່ງ​ຫາ​ຄັງ​ເງິນ​ແຫ່ງ​ຊາດ ຫຼື ຄັງ​ເງິນ​ແຫ່ງ​ຊາດ​ປະ­ຈຳ​ທ້ອງ­ຖິ່ນ ເພື່ອ​ກວດ­ກາ​ຄວາມ​ຖືກ­ຕ້ອງ​ບໍ່​ໃຫ້​ກາຍ​ວັນ​ທີ 15 ຂອງ​ແຕ່​ລະ​ເດືອນ.

ສ່ວນ​ກະ­ຊວງ​ພາຍ​ໃນ ຫຼື ຂະ­ແໜງ​ພາຍ​ໃນ​ຂັ້ນ​ທ້ອງ­ຖິ່ນ ກວດ­ກາ ແລະ ຢັ້ງ­ຢືນ​ເອ­ກະ­ສານ​ບັນ­ຊີ​ຈຳ­ນວນ​ພົນ ຊັ້ນ-ຂັ້ນ​ເງິນ­ເດືອນ ການ​ອຸດ​ໜູນ​ຂອງ​ຫົວ­ໜ່ວຍ​ງົບ­ປະ­ມານ​ຂອງ​ງວດ​ຕໍ່​ໄປ​ບໍ່​ໃຫ້​ກາຍ​ວັນ​ທີ 20 ຂອງ​ເດືອນ​ສຸດ​ທ້າຍ​ແຕ່​ລະ​ງວດ ກົມ​ງົບ­ປະ­ມານ​ແຫ່ງ​ລັດ ຫຼື ຂະ­ແໜງ​ງົບ­ປະ­ມານ​ແຫ່ງ​ລັດ​ຂັ້ນ​ທ້ອງ­ຖິ່ນ ກວດ­ກາ ແລະ ອະ­ນຸ­ມັດ​ລາຍ​ຈ່າຍ​ເງິນ­ເດືອນ ເງິນ​ອຸດ​ໜູນ ເງິນ​ນະ­ໂຍ­ບາຍ​ໃຫ້​ບັນ­ດາ​ຫົວ­ໜ່ວຍ​ງົບ­ປະ­ມານ ບໍ່​ໃຫ້​ກາຍ​ວັນ​ທີ 10 ຂອງ​ເດືອນ​ທຳ​ອິດ​ໃນ​ງວດ​ທີ່​ປະ­ຕິ­ບັດ​ລາຍ​ຈ່າຍ ແລະ ຄັງ​ເງິນ​ແຫ່ງ​ຊາດ ຫຼື ຄັງ​ເງິນ​ແຫ່ງ​ຊາດ​ປະ­ຈຳ​ທ້ອງ­ຖິ່ນ ກວດ­ກາ​ເອ­ກະ­ສານ​ລາຍ​ຈ່າຍ​ເງິນ­ເດືອນ ເງິນ​ອຸດ​ໜູນ ເງິນ​ນະ­ໂຍ­ບາຍ​ຂອງ​ຫົວ­ໜ່ວຍ​ງົບ­ປະ­ມານ​ບໍ່​ໃຫ້​ກາຍ​ວັນ​ທີ 20 ຂອງ​ແຕ່​ລະ​ເດືອນ ແລະ ສົ່ງ​ເອ­ກະ­ສານ​ລາຍ​ຈ່າຍ​ເງິນ­ເດືອນ ເງິນ​ອຸດ​ໜູນ ເງິນ​ນະ­ໂຍ­ບາຍ​ໄປ​ຈ່າຍ​ຢູ່​ທະ­ນາ­ຄານ​ເປັນ​ແຕ່​ລະ​ວັນ ເຊິ່ງ​ເລີ່ມ​ແຕ່​ວັນ​ທີ 24-30 ຂອງ​ແຕ່​ລະ​ເດືອນ ແລະ ທະ­ນາ­ຄານ​ຜູ້​ໃຫ້​ບໍ­ລິ­ການ​ຕ້ອງ​ໂອນ​ເງິນ­ເດືອນ​ເຂົ້າ​ບັນ­ຊີ​ເງິນ​ຝາກ​ຂອງ​ພະ­ນັກ­ງານ-ລັດ­ຖະ­ກອນ ໃນ​ລະ­ຫວ່າງ​ວັນ​ທີ 25-30 ຂອງ​ແຕ່​ລະ​ເດືອນ ທັງ​ນີ້ ເພື່ອ​ຄວາມ​ເປັນ​ເອ­ກະ​ພາບ​ໃນ​ການ​ເບີກ​ຈ່າຍ​ເງິນ­ເດືອນ ເງິນ​ອຸດ​ໜູນ ແລະ ເງິນ​ນະ­ໂຍ­ບາຍ​ໃຫ້​ພະ­ນັກ­ງານ-ລັດ­ຖະ­ກອນ​ຜ່ານ​ລະ­ບົບ​ທະ­ນາ­ຄານ​ໃນ​ຂອບ​ເຂດ​ທົ່ວ​ປະ­ເທດ.

ຂ່າວທີ່ກ່ຽວຂ້ອງ