ແລກປ່ຽນປະສົບການດ້ານການສົ່ງເສີມໂທລະພາບດີຈີຕອນ

140 29 ສ.ຫ. 2018 ຂ່າວໜ້າ​ໜຶ່ງ

    ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ (ຖວ​ທ) ຮ່ວມ​ກັບ​ບໍ​ສິ​ສັດ​ສື່​ມວນ​ຊົນ ວັດ­ທະ­ນະ­ທຳ ແລະ ໂທລະ­ພາບ​ດີ​ຈີ​ຕອນ ແຂວງ​ຢູນ​ນານ ສປ ຈີນ ຈັດ​ສຳ​ມະ​ນາ​ສາ­ກົນ​ເພື່ອ​ການ​ສົ່ງ­ເສີມ​ໂທລະ­ພາບ​ຕີ​ຈີ​ຕອນ ຂຶ້ນ​ວັນ​ທີ 28 ສິງ­ຫາ 2018 ຢູ່​ໂຮງ­ແຮມ​ດອນ​ຈັນ​ພາ​ເລດ ໂດຍ​ເປັນ​ປະ­ທານ​ຂອງ​ທ່ານ ສະ­ຫວັນ​ຄອນ ຣາ​ຊ​ມົນ​ຕຣີ ຮອງ​ລັດ­ຖະ­ມົນ­ຕີ​ກະ­ຊວງ ຖວ​ທ ມີ​ທ່ານ YANG ZHI XING ປະ­ທານ​ຫ້ອງ​ທົດ​ລອງ​ວິ­ສະ­ວະ­ກອນ​ໂທລະ­ພາບ​ດີ​ຈີ​ຕອນ​ແຫ່ງ​ຊາດ ສປ ຈີນ ມີ​ບັນ­ດາ​ຊ່ຽວ­ຊານ 3 ປະ­ເທດ ລາວ ຈີນ ກຳ­ປູ­ເຈຍ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ສະ­ຫວັນ​ຄອນ ຣາ​ຊ​ມົນ​ຕຣີ ກ່າວ​ວ່າ: ໃນ​ຍຸກ​ສະ­ຕະ­ວັດ​ທີ 21 ເຕັກ​ໂນ​ໂລ​ຊີ​ການ​ສື່­ສານ ຂໍ້​ມູນ​ຂ່າວ­ສານ ຫຼື ເຕັກ​ໂນ​ໂລ​ຊີ​ດີ​ຈີ​ຕອນ ໄດ້​ມີ​ບົດ­ບາດ​ສຳ­ຄັນ ແລະ ສອດ​ຫ້ອຍ​ເຂົ້າ​ໃນ​ທຸກ​ຂົງ­ເຂດ​ຂອງ​ຊີ­ວິດ-ສັງ­ຄົມ ເຊິ່ງ​ຍາກ​ທີ່​ຕັດ​ແຍກ​ອອກ​ຈາກ​ກັນ​ໄດ້ ເພາະ­ວ່າ​ພາ­ຫະ­ນະ​ການ​ຜະ­ລິດ​ຍຸກ​ໃໝ່ ລ້ວນ​ແລ້ວ­ແຕ່​ນຳ​ໃຊ້​ເຕັກ​ໂນ​ໂລ​ຊີ​ດີ​ຈີ​ຕອນ​ມາ​ທົດ​ແທນ​ເຕັກ­ນິກ​ເກົ່າ ໂດຍ​ສະ­ເພາະ ເຕັກ­ນິກ​ຂອງ​ວິ­ທະ­ຍຸ​ກະ­ຈາຍ­ສຽງ ແລະ ໂທລະ­ພາບ ເພື່ອ​ໃຫ້​ມີ​ຄວາມ​ທັນ​ສະ­ໄໝ​ຫຼາຍ​ຂຶ້ນ ລັດ­ຖະ­ບານ​ລາວ ໄດ້​ມີ​ແຜນ­ການ​ຫັນ​ໂທລະ­ພາບ​ເປັນ​ລະ­ບົບ​ດີ​ຈີ​ຕອນ​ໃຫ້​ສຳ­ເລັດ​ປີ 2020 ສ່ວນ​ການ​ຮ່ວມ​ມື​ວຽກ​ງານ​ດັ່ງ­ກ່າວ ໄດ້​ເລີ່ມ​ແຕ່​ປີ 2008 ເປັນ­ຕົ້ນ​ມາ ໂທລະ­ພາບ​ແຫ່ງ​ຊາດ​ລາວ ພາຍ​ໃຕ້​ການ​ຊີ້​ນຳ​ຂອງ​ກະ­ຊວງ ຖວ​ທ ໄດ້​ຮ່ວມ​ມື​ແລກ­ປ່ຽນ​ກັບ​ບໍ­ລິ­ສັດ​ໂທລະ­ພາບ​ດີ​ຈີ​ຕອນ ແຂວງ​ຢູນ​ນານ ສປ ຈີນ ສ້າງ­ຕັ້ງ​ໂທລະ­ພາບ​ລາວ​ດີ​ຈີ​ຕອນ ແລະ ດຳ­ເນີນ​ການ​ບໍ­ລິ­ການ​ໂທລະ­ພາບ​ຕາມ​ມາດ­ຕະ­ຖານ DTMB ໃນ 4 ແຂວງ ແລະ ໄດ້​ຮັບ​ຄວາມ​ນິ­ຍົມ​ຈາກ​ຜູ້​ຊົມ­ໃຊ້​ຢ່າງ​ກວ້າງ­ຂວາງ ປັດ­ຈຸ­ບັນ​ກຳ­ລັງ​ປະ­ຕິ­ບັດ​ໂຄງ­ການ​ກໍ່­ສ້າງ​ເຄືອ​ຄ່າຍ​ວິ­ທະ­ຍຸ ແລະ ໂທລະ­ພາບ​ດ້ວຍ​ມາດ­ຕະ­ຖານ​ລະ­ບົບ​ດີ​ຈີ​ຕອນ ເພື່ອ​ໃຫ້​ຄວບ​ຄຸມ​ທຸກ​ພື້ນ​ທີ່​ໃນ​ທົ່ວ​ປະ­ເທດ.

    ການ​ສຳ​ມະ​ນາ​ຄັ້ງ​ນີ້ ເປັນ​ການ​ເປີດ​ໂອ­ກາດ​ໃຫ້​ຊ່ຽວ­ຊານ ຜູ້​ປະ­ກອບ​ການ​ລາວ ແລະ ຈີນ ໄດ້​ພົບ​ປະ​ແລກ­ປ່ຽນ​ຄວາມ​ຮູ້​ດ້ານ​ປະ­ສົບ​ການ ບົດ­ຮຽນ ແລະ ການ​ຊ່ວຍ­ເຫຼືອ​ເຊິ່ງ​ກັນ ແລະ ກັນ ໃນ​ການ​ພັດ­ທະ­ນາ​ວຽກ​ງານ​ດັ່ງ­ກ່າວ​ໃນ­ຕໍ່­ໜ້າ​ໃຫ້​ມີ​ຜົນ­ສຳ­ເລັດ ແລະ ປະ­ກອບ­ສ່ວນ​ສຳ­ຄັນ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ​ກິດ ໂດຍ​ສະ­ເພາະ ກະ­ຈາຍ​ລະ­ບົບ​ຂໍ້​ມູນ​ຂ່າວ­ສານ​ຫັນ​ໄປ​ສູ່​ຄວາມ​ທັນ​ສະ­ໄໝ​ຫຼາຍ​ຂຶ້ນ.

ຂ່າວທີ່ກ່ຽວຂ້ອງ