ຂ່າວຫຼ້າສຸດ

ແຫວນຄຳ ແລະ ແທນຄຳສາລະພາບ ໄດ້ຮັບລາງວັນຊີໄຣ

236 29 ສ.ຫ. 2018 ຂ່າວໜ້າ​ໜຶ່ງ

    ສະ­ມາ­ຄົມ​ນັກ​ປະ­ພັນ​ລາວ ຈັດ​ຖະ­ແຫຼງ​ຂ່າວ​ຜົນ​ການ​ຕັດ­ສິນ​ລາ­ງວັນ​ຊີ​ໄຣ ປະ­ຈຳ​ປີ 2017 ແລະ 2018 ຫຼື ລາ­ງວັນ ວັນ­ນະ­ກຳ​ສ້າງ­ສັນ​ສຸດ​ຍອດ​ແຫ່ງ​ອາ​ຊຽນ ຂຶ້ນ​ວັນ​ທີ 24 ສິງ­ຫາ 2018 ຜ່ານ​ມາ ຢູ່​ກົມ​ຮູບ­ເງົາ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ (ຖວ​ທ) ໂດຍ​ມີ​ທ່ານ​ນາງ ບົວ​ໄຂ ເພັງ​ພະ­ຈັນ ຫົວ­ໜ້າ​ກົມ​ພິມ​ຈຳ­ໜ່າຍ ກະ­ຊວງ ຖວ​ທ ແລະ ທ່ານ ຄຳ­ໃບ ໂພ­ທິ​ສານ ຫົວ­ໜ້າ​ກົມ​ມໍ­ລະ­ດົກ ປະ­ທານ​ສະ­ມາ­ຄົມ​ນັກ​ປະ­ພັນ​ລາວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ສຸ­ບັນ ຫຼວງ​ລາດ ຮອງ​ປະ­ທານ​ເລ­ຂາ­ທິ­ການ​ສະ­ມາ­ຄົມ​ນັກ​ປະ­ພັນ​ລາວ ກ່າວ​ວ່າ: ກອງ​ປະ­ຊຸມ​ຄະ­ນະ​ກຳ­ມະ­ການ​ຕັດ­ສິນ​ລາ­ງວັນ​ຊີ​ໄຣ ວັນ​ທີ 3 ສິງ­ຫາ 2018 ໄດ້​ຕີ​ລາ­ຄາ​ຮວບ​ຮວມ​ຄະ­ແນນ​ບົດ​ເລື່ອງ­ສັ້ນ​ແຂ່ງ­ຂັນ​ຮອບ​ສຸດ​ທ້າຍ ປະ­ຈຳ​ປີ 2017 ທັງ​ໝົດ 8 ບົດ ແລະ ບົດ​ເລື່ອງ​ຍາວ (ນະ­ວະ​ນິ­ຍາຍ) 6 ບົດ ໄດ້​ຕົກ­ລົງ​ຮັບ­ຮອງ​ເອົາ​ບົດ​ເລື່ອງ­ສັ້ນ​ທີ່​ມີ​ຊື່­ວ່າ “ແຫວນ​ຄຳ” ຂຽນ​ໂດຍ​ທ່ານ ສົມ​ໃຈ ຈັນ­ທະ​ວົງ ເປັນ​ບົດ​ຊະ­ນະ​ເລີດ​ຂອງ​ລາວ ແລະ ຮັບ­ຮອງ​ເອົາ​ນະ­ວະ​ນິ­ຍາຍ​ທີ່​ມີ​ຊື່­ວ່າ “ແທນ​ຄຳ​ສາ­ລະ­ພາບ” ຂຽນ​ໂດຍ​ທ່ານ​ນາງ ຜິວ​ລາ​ວັນ ຫຼວງ​ວັນ­ນາ ເປັນ​ບົດ​ຊະ­ນະ​ເລີດ​ຂອງ​ລາວ ເພື່ອ​ຮ່ວມ​ຮັບ​ລາ­ງວັນ​ຊີ​ໄຣ ປະ­ຈຳ​ປີ 2018 ເຊິ່ງ​ທັງ​ສອງ​ບົດ​ລ້ວນ​ແຕ່​ມີ​ເນື້ອ​ໃນ​ໂດດ​ເດັ່ນ ເປັນ​ເອ­ກະ­ລັກ ສ້າງ­ສັນ​ສັງ­ຄົມ ສ່ອງ​ແສງ​ໃຫ້​ເຫັນ​ແນວ­ທາງ​ນະ­ໂຍ­ບາຍ​ອັນ​ຖືກ­ຕ້ອງ​ເປັນ​ທຳ​ຂອງ​ພັກ-ລັດ ມີ​ສິ­ລະ​ປະ­ການ​ປະ­ດິດ​ຄິດ​ແຕ່ງ​ສູງ ມີ​ຄຸນ­ຄ່າ​ທາງ​ດ້ານ​ວັນ­ນະ­ກຳ ສຳ­ນວນ​ພາ­ສາ​ເຂົ້າ­ໃຈ​ງ່າຍ ກະ­ທັດ​ຮັດ ພ້ອມ​ນີ້ ຜູ້​ປະ­ດິດ​ແຕ່ງ​ເປັນ​ຄົນ​ມີ​ຜົນ­ງານ​ທາງ​ດ້ານ​ວັນ­ນະ­ກຳ​ຫຼວງ­ຫຼາຍ​ຕໍ່​ເນື່ອງ ແລະ ມີ​ບົດ­ບາດ​ໃນ​ການ­ເຄື່ອນ­ໄຫວ​ໃນ​ການ­ຈັດ­ຕັ້ງ​ສັງ­ຄົມ​ເປັນ​ຢ່າງ​ດີ ສຳ­ລັບ​ພິ­ທີ​ມອບ-ຮັບ​ລາ­ງວັນ​ຊີ​ໄຣ ປະ­ຈຳ​ປີ 2016 2017 ແລະ 2018 ຈະ​ຈັດ​ຂຶ້ນ​ທ້າຍ​ປີ 2018 ຢູ່​ບາງ­ກອກ ປະ­ເທດ​ໄທ ໃນ​ໂອ­ກາດ​ສະ­ເຫຼີມ­ສະ­ຫຼອງ​ລາ­ງວັນ​ດັ່ງ­ກ່າວ ຄົບ­ຮອບ 40 ປີ.

ຂ່າວທີ່ກ່ຽວຂ້ອງ