ຂ່າວຫຼ້າສຸດ

ພັກແລ້ງ

665 29 ສ.ຫ. 2018 ນານາສາລະ

    ເລື່ອງ​ຂອງ​ການ​ພັກ​ຮຽນ ເຖິງ​ຈະ​ແມ່ນ​ລະ­ດູ­ຝົນ ແຕ່​ກໍ່​ເອີ້ນ​ວ່າ ພັກ­ແລ້ງ ໃຜ​ສົນ­ໃຈ​ທີ່​ມາ​ກໍ່​ໄປ​ຄົ້ນ​ເອົາ​ເອງ ເພາະ​ມີ​ຄົນ​ອື່ນ​ຂຽນ​ໄວ້​ແລ້ວ ຜູ້​ຂຽນ​ພຽງ​ແຕ່​ຢາກ​ເວົ້າ​ວ່າ ພັກ​ແບບ​ໃດ​ຈຶ່ງ​ຈະ​ໄດ້​ປະ­ໂຫຍດ ແລະ ຕຽມ​ຕົວ​ແນວ­ໃດ​ຈຶ່ງ​ຈະ​ດີ​ຕໍ່​ການ​ສຶກ​ສາ​ປີ​ຕໍ່​ໄປ ເຊິ່ງ​ບັນ­ຫາ​ຂອງ​ການ​ສຶກ​ສາ­ມັນ​ແມ່ນ​ບັນ­ຫາ​ການ​ສ້າງ ແລະ ພັດ­ທະ­ນາ​ຄົນ​ໃຫ້​ສະ­ຫຼາດ ແລະ ມີ​ສຸ­ຂະ­ພາບ​ແຂງ­ແຮງ ມັນ​ຈຶ່ງ​ລວມ​ທັງ​ຮ່າງ­ກາຍ ແລະ ຫົວ​ສະ­ໝອງ ໝາຍ​ຄວາມ​ວ່າ ການ​ສຶກ​ສາ​ທີ່­ແທ້​ຈິງ ກໍ່​ແມ່ນ​ເນັ້ນ​ໃຫ້​ຄົນ​ຮຽນ​ຮູ້​ຄວາມ​ຈິງ​ຂອງ​ໂລກ​ຂອງ​ຊີ­ວິດ​ຢ່າງ​ແຈ່ມ​ແຈ້ງ ຈຶ່ງ​ຫຼີກ­ເວັ້ນ​ການ​ເປັນ​ທາດ​ທາງ​ຮ່າງ­ກາຍ ແລະ ປັນ­ຍາ​ຍ່າງ​ຕາມ​ຫຼັງ​ຄົນ​ອື່ນ​ຕະ­ຫຼອດ.

    ພັກ­ແລ້ງ ບາງ​ຄົນ​ມີ​ກຳ­ລັງ​ຫຼາຍ​ທາງ​ເສດ­ຖະ­ກິດ (ກະ­ເປົາ​ໜັກ) ກໍ່​ເລືອກ​ສົ່ງ­ເສີມ​ລູກ​ຫຼານ​ໄປ​ໂຮງ­ຮຽນ​ນາ­ນາ​ຊາດ ໄປ​ທັດ­ສະ­ນະ​ຮຽນ​ຮູ້​ພາ­ສາ​ຕ່າງ­ປະ­ເທດ ເຊິ່ງ​ບາງ​ຄົນ​ຍອມ​ລົງ­ທຶນ​ຈ່າຍ​ຫຼາຍ​ພັນ​ຫຼຽນ ບາງ​ກໍ­ລະ­ນີ​ຕົກ​ເປັນ​ໝື່ນ​ຫຼຽນ ເພື່ອ​ຢາກ​ໃຫ້​ລູກ​ຫຼານ​ຂອງ​ຕົນ​ກ້າວ­ໜ້າ ສ່ວນ­ວ່າ​ໝາກ­ຜົນ​ຈະ​ໄດ້​ຕາມ​ທີ່​ຄາດ​ຄິດ​ໄວ້​ນັ້ນ ຜູ້​ຂຽນ​ບໍ່​ສາ­ມາດ​ບອກ​ຄ້ຳ­ປະ­ກັນ​ໄດ້​ດອກ ! ໜ້າ​ສົງ­ໄສ​ຢູ່ ...? ພັກ­ແລ້ງ ພໍ່​ແມ່​ຜູ້​ປົກ­ຄອງ​ບາງ​ຄົນ​ເອົາ​ລູກ​ຊາຍ​ໄປ​ບວດ​ຝາກ​ໄວ້​ນຳ​ວັດ​ວາ​ສາ­ສະ­ໜາ ເພິ່ງ​ບຸນ​ປາ­ລະ­ມີ​ຄູ­ບາ​ອາ­ຈານ​ເຄີຍ​ຖື​ປະ­ຕິ­ບັດ ເພື່ອ​ອົບ­ຮົມ​ສັ່ງ­ສອນ​ໃຫ້​ເຂົາ­ເຈົ້າ​ຮູ້­ຈັກ​ກາບ ຈັກ​ໄຫວ້ ຮູ້­ຈັກ​ສິນ​ຈັກ​ທຳ ສຳ­ລັບ​ລູກ​ຜູ້­ຍິງ​ກໍ່​ມີ​ຫຼາຍ​ວັດ​ທີ່​ມີ​ແມ່​ຂາວ ຫຼື ບາງ​ວັດ​ມີ​ທີ່​ພັກ​ໃຫ້­ການ​ອົບ­ຮົມ​ບົ່ມ​ສອນ ເຝິກ​ຫັດ​ຄັດ​ນິ­ໄສ ສິ່ງ​ທີ່​ຜູ້​ຂຽນ​ຍົກ​ສອງ​ປະ­ເດັນ​ໃຫຍ່​ຂຶ້ນ​ມາ​ເປັນ​ຕົວ­ຢ່າງ ກໍ່​ໄດ້​ນຳ​ມາ​ຈາກ​ຜູ້​ປົກ­ຄອງ​ບອກ­ເລົ່າ​ສູ່​ຟັງ ມັນ​ຈຶ່ງ​ເປັນ​ສອງ​ແງ່​ທີ່​ໃຫ້​ຂໍ້​ຄິດ​ໄດ້​ຂົບ​ຄິດ​ວ່າ ເຮົາ​ຈະ​ເລືອກ​ສົ່ງ­ເສີມ​ລູກ​ຫຼານ​ກັນ​ແບບ​ໃດ ເພື່ອ​ໃຫ້​ເຂົາ­ເຈົ້າ​ໄດ້​ປະ­ໂຫຍດ​ທີ່​ຄວນ​ຈະ​ໄດ້ ຫຼື ວິ­ທີ​ໃດ ຈຶ່ງ​ເປັນ​ການ​ບົ່ມ​ຊ້ອນ​ປູກ­ຝັງ​ວັດ­ທະ­ນະ­ທຳ​ຄວາມ​ເປັນ​ລາວ ໃຫ້​ເຂົາ­ເຈົ້າ​ແຕ່​ຍັງ​ນ້ອຍ ເຊິ່ງ​ຢ່າ​ລືມ​ຄິດ​ກັນ​ວ່າ ພວກ​ເຮົາ​ໄດ້​ເວົ້າ​ໄວ້​ແລ້ວ​ວ່າ ການ​ພັດ­ທະ­ນາ​ຊາດ ບໍ່​ອາດ​ປະ​ຖິ້ມ​ວັດ­ທະ­ນະ­ທຳ​ໃຫ້​ໄປ​ຄຽງ​ຄູ່​ກັນ ຫຼື ວ່າ​ເວົ້າ​ອີກ​ຢ່າງ ແຕ່​ປະ­ຕິ­ບັດ​ອີກ​ຢ່າງ ກໍ່​ເຂົ້າ​ທຳ­ນອງ ປາ​ກວ່າ​ຕາ​ຂະ​ຫຍິບ ພຽງ​ແຕ່​ຍົກ​ເຫດ­ຜົນ​ມາ​ສະ­ເໜີ​ແລກ­ປ່ຽນ​ຊ່ວຍ​ກັນ​ຄິດ​ພິ­ຈາ­ລະ­ນາ ເລື່ອງ​ຂອງ​ການ​ພັກ­ແລ້ງ ເຊິ່ງ​ຈະ​ເຖິງ​ເດືອນ 9 ຈະ​ເຂົ້າ​ໂຮງ­ຮຽນ ບັນ­ຫາ​ເລື່ອງ​ຄ່າ​ຮຽນ ບັນ­ຫາ​ເລື່ອງ​ອາ­ຫານ​ໃນ​ໂຮງ­ຮຽນ​ບໍ່​ສະ­ອາດ​ຖືກ​ຫຼັກ​ອະ­ນາ­ໄມ ບັນ­ຫາ​ໂຮງ­ຮຽນ​ໃຫ້​ນັກ­ທຸ­ລະ­ກິດ​ລົງ­ທຶນ​ແພງ ມັນ​ຈຶ່ງ​ຕາມ​ມາ​ດ້ວຍ​ການ​ຜູກ­ຂາດ​ການ​ຊື້-ການ​ຂາຍ ບາງ​ອັນ​ຄິດ​ວ່າ​ໜ່ວຍ​ງານ​ກ່ຽວ­ຂ້ອງ​ຄົງ​ຊິ​ບໍ່​ຖື​ເບົາ ເພື່ອ​ສຸ­ຂະ­ພາບ​ຮ່າງ­ກາຍ ແລະ ຫົວ​ສະ­ໝອງ​ທີ່​ດີ​ຂອງ​ເຍົາ­ວະ​ຊົນ​ຂອງ​ຊາດ.

    ພັກ­ແລ້ງ ຫວັງ​ວ່າ​ພໍ່​ແມ່​ຜູ້​ປົກ­ຄອງ​ຫຼາຍ​ຄົນ​ລົງ­ທຶນ​ໃຫ້​ລູກ​ຫຼານ​ໄດ້​ປະ­ໂຫຍດ ໄດ້​ເຫັນ​ຄຸນ­ຄ່າ​ຊີ­ວິດ ໄດ້​ເຫັນ​ຄຸນ­ຄ່າ​ວັດ­ທະ­ນະ­ທຳ​ຂອງ​ຊາດ ແລະ ທີ່​ສຳ­ຄັນ ໄດ້​ຮູ້​ຮາກ​ເຫງົ້າ​ຂອງ​ຕົນ ຈຶ່ງ​ຊື່­ວ່າ​ບໍ່​ເປັນ​ຄົນ​ລືມ​ຊາດ... ຖ້າ​ການ​ລົງ­ທຶນ​ດັ່ງ­ກ່າວ​ໃນ​ໄລ­ຍະ​ພັກ­ແລ້ງ​ບໍ່­ເກີດ​ປະ­ໂຫຍດ​ເທົ່າ​ທີ່​ຄວນ ມັນ​ກໍ່​ຄົງ​ຊິ​ເປັນ​ການ​ລົງ­ທຶນ​ແບບ​ແຫ້ງ­ແລ້ງ​ຕາມ​ລະ­ດູ​ການ​ພັກ­ແລ້ງ !.

ຂ່າວທີ່ກ່ຽວຂ້ອງ