ຂ່າວຫຼ້າສຸດ

ຂ່າວ​ສັ້ນ

338 28 ສ.ຫ. 2018 ຂ່າວຕ່າງປະເທດ
ຂ່າວ​ສັ້ນ

    ຊິມ​ບັບ​ເວ: ຂ່າວສານ​ຣອຍ​ເຕີ ລາຍ​ງານ​ວ່າ ທ່ານ ເອມ​ເມີ​ຊອນ ມະ​ນັນ​ກາກ​ວາ (Emmerson Mnangagwa) ໄດ້​ເຂົ້າ​ພິທີ​ສາບານ​ຕົນ​ຮັບ​ຕຳແໜ່ງ​ປະທານາທິບໍດີ​ຂອງ​ຊິມ​ບັບ​ເວ ເມື່ອ​ວັນ​ທີ 26 ສິງຫາ​ນີ້ ຫຼັງ​ຈາກ​ທີ່​ການ​ຊະນະ​ການ​ເລືອກ​ຕັ້ງ​ຂອງ​ເຂົາ​ຖືກ​ຄັດຄ້ານ​ຈາກ​ຄູ່​ແຂ່ງ ແລະ​ທ່າມກາງ​ທີ່​ນັກ​ສັງເກດ​ການ​ການ​ເລືອກ​ຕັ້ງ​ຂອງ ສ ອາ​ເມ​ຣິ​ກາ ເກີດ​ຄວາມ​ສົງ​ໃສ​ກ່ຽວ​ກັບ ລະດັບ​ຄວາມ​ໜ້າ​ເຊື່ອ​ຖື ຂອງ​ພື້ນຖານ​ປະຊາທິປະໄຕ ຢູ່​ໃນ​ຊິມ​ບັບ​ເວ.

    ຣັດ​ເຊຍ: ຂ່າວສານ AFP ລາຍ​ງານ​ວ່າ ທ່ານ ອາ​ເລັກ​ເຊ ນາ​ວາ​​ລ​ນີ ຫົວໜ້າ​ຝ່າຍ​ຄ້ານ​ໃນ​ຣັດ​ເຊຍ ໄດ້​ຖືກ​ຈັບ​ຕົວ​ຢູ່​ໃນ​ນະຄອນ​ຫຼວງ​​ມົສ​ກູ ເມື່ອ​ວັນ​ທີ 25 ສິງຫາ​ນີ້ ແຕ່​ຍັງ​ບໍ່​ທັນ​ເປັນ​ທີ່​ຈະແຈ້ງ​ກ່ຽວ​ກັບ​ສາເຫດ ທີ່​ນຳໄປ​ສູ່​ການ​ຈັບ​ກຸມ​ດັ່ງກ່າວ. ເຖິງ​ຢ່າງໃດ​ກໍ​ຕາມ ກ່ອນ​ໜ້າ​ນັ້ນ ທ່ານ ນາ​ວາ​​ລ​ນີ ເຄີຍ​ກ່າວ​ຫາ​ບັນດາ​ເຈົ້າ​ໜ້າທີ່​ລະດັບ​ສູງ​ຂອງ​ລັດຖະບານ ວ່າ ກະທຳ​ການ​ສໍ້​ລາດ​ບັງ​ຫຼວງ ແລະ​ທ່ານ​ໄດ້​ນຳ​ເອົາ​ເອກະສານ​ຈຳນວນ​ໜຶ່ງ​ອອກ​ມາ ເພື່ອ​ປົກ​ປ້ອງ​ຂໍ້​ມູນ ຂອງ​ຕົນ.

    ບູນ​ກາ​ຣີ: ເຈົ້າ​ໜ້າທີ່​ກະຊວງ​ພາຍ​ໃນ​ຂອງ​ບູນ​ກາ​ຣີ ແຈ້ງ​ໃຫ້​ຮູ້​ວ່າ ມີ​ຜູ້​ເສຍ​ຊີວິດ​ຢ່າງ​ໜ້ອຍ 16 ຄົນ ແລະ ບາດເຈັບ 26 ຄົນ ເມື່ອ​ລົດ​ບັດ​ບັນ​​ຸກ​ນັກ​ທ່ອງ​ທ່ຽວ​ຄັນ​ໜຶ່ງ​ເກີດ​ເສຍ​ຫຼັກ ຕຳ​ກັບ​ລົດ​ອີກ​ຄັນ​ໜຶ່ງ ແລະ​ແລ່ນ​ອອກ​ຈາກ​ຂອບ​ທາງ ຕົກລົງ​ໃນ​ແມ່ນ້ຳ​ສາຍ​ໜຶ່ງ ຢູ່​ໃກ້​ກັບ​ນະຄອນ ສະ​ໂວ​ເກ ຫ່າງ​ຈາກ ນະຄອນຫຼວງ​ໂຊ​ເຟຍ ຂອງ​ບູນ​ກາ​ຣີ 40​ ກມ ໄປ​ທາງ​ທິດເໜືອ. ອຸບັດເຫດ​ດັ່ງກ່າວ ເກີດ​ຂຶ້ນ​ໃນ​ວັນ​ທີ 26 ສິງຫາ​ນີ້ ທ່າມກາງ​ສະພາບ​ຝົນຕົກ​ໜັກ.

    ເຢຍ​ລະ​ມັນ: ອຳ​ນາກ​ການ​ປົກຄອງ​ນະຄອນ  ລຸ​ດວິກ​ຊາ​ເຟນ ທີ່​ຂຶ້ນ​ກັບ​ລັດ ເຣນ​ແລນ-ພີ​ຟາ​​ລ (ພາກ​ຕາເວັນຕົກ​ສ່ຽງ​ໃຕ້​ເຢຍ​ລະ​ມັນ) ແຈ້ງ​ໃຫ້​ຮູ້ເມື່ອ​ວັນ​ທີ 26 ສິງຫາ​ນີ້​ວ່າ ຊ່ຽວຊານ​ກ່ຽວ​ກັບ ທາດ​ລະເບີດ ໄດ້​ທຳລາຍ​ລະເບີດ​ໜ່ວຍ​ໜຶ່ງ ທີ່​ຕົກ​ຄ້າງ​ມາ​ຕັ້ງແຕ່​ສະໄໝ​ສົງຄາມ​ໂລກ​ຄັ້ງ​ທີ​ສອງ ຢ່າງ​ສຳເລັດ​ຜົນ. ການ​ພົບ​ເຫັນ​ລະເບີດ​ດັ່ງກ່າວ ມີ​ຂຶ້ນ​ເມື່ອ​ວັນ​ທີ 22 ສິງຫາ​ທີ່​ຜ່ານ​ມາ ໃນ​ຂະນະ​ທີ່​ກຳມະກອນ​ພວມ​ດຳເນີນ​ກິດຈະການ​ກໍ່ສ້າງ​ຢູ່​ທີ່​ນັ້ນ ພົບ​ເຫັນ​ລະເບີດ​ໜ່ວຍ​ໜຶ່ງ ມີ​ນ້ຳໜັກ 500​ ກກ ຊຶ່ງ​ຫຼົງ​ເຫຼືອ​ມາ​ຈາກ​ສົງຄາມ​ໂລກ​ຄັ້ງ​ທີ​ສອງ.

 

ຂ່າວທີ່ກ່ຽວຂ້ອງ