ເລີ່ມລົງກວດກາການແຕກພັງ ສັນເຂື່ອນໄຟຟ້າເຊປຽນ-ເຊນ້ຳນ້ອຍ

    ຈາກ​ເຫດ­ການ​ສັນ​ເຂື່ອນ D ຫຼື Saddle dam D ຂອງ​ເຂື່ອນ​ໄຟ­ຟ້າ​ເຊ​ປຽນ-ເຊ​ນ້ຳ​ນ້ອຍ ແຕກ​ພັງ​ໃນ​ຄ່ຳ​ຄືນ​ວັນ​ທີ 23 ກໍ­ລະ­ກົດ 2018 ເຮັດ​ໃຫ້​ນ້ຳ ຈຳ­ນວນ 500 ລ້ານ​ກວ່າ​ແມັດ​ກ້ອນ ໄຫຼ​ລົງ​ສູ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື​ຢ່າງ​ໄວ­ວາ ເຫດ­ການ​ນີ້​ເກີດ​ຂຶ້ນ​ມາ​ຮອດ​ປັດ­ຈຸ­ບັນ​ເປັນ​ເວ­ລາ 1 ເດືອນ​ກວ່າ ແລະ ການ​ຄົ້ນ​ຫາ​ຜູ້​ສູນ­ຫາຍ​ຍັງ​ຄົງ​ສືບ­ຕໍ່​ການ​ຊ່ວຍ­ເຫຼືອ​ຜູ້​ປະ­ສົບ​ໄພ​ຈາກ​ພາກ­ສ່ວນ​ຕ່າງໆ ຍັງ​ຄົງ​ຮີບ​ຮ້ອນ ແລະ ເລັ່ງ​ດ່ວນ ເພື່ອ​ຟຶ້ນ​ຟູ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ທີ່​ໄດ້​ຮັບ​ຜົນ​ກະ­ທົບ ໃຫ້​ກັບ​ຄືນ​ສູ່​ສະ­ພາບ​ປົກ­ກະ­ຕິ​ໄວ​ເທົ່າ​ທີ່​ຈະ​ໄວ​ໄດ້.

    ຈາກ​ເຫດ­ການ​ສັນ​ເຂື່ອນ​ແຕກ​ພັງ​ລົງ​ດັ່ງ­ກ່າວ ໄດ້​ສ້າງ​ຄວາມ​ເສຍ​ຫາຍ​ຕໍ່​ຊີ­ວິດ ແລະ ຊັບ​ສິນ​ຂອງ​ປະ­ຊາ­ຊົນ​ເປັນ​ຈຳ­ນວນ​ມະ­ຫາ­ສານ ໂດຍ​ສະ­ເພາະ​ແມ່ນ​ເມືອງ​ສະ­ໜາມ​ໄຊ​ທີ່​ເປັນ​ເມືອງ​ຕັ້ງ​ຢູ່​ລຸ່ມ​ສັນ​ເຂື່ອນ D ອັນ​ໄດ້​ເຮັດ​ໃຫ້​ປະ­ຊາ­ຊົນ​ຢູ່​ໃນ 13 ບ້ານ​ໄດ້​ຮັບ​ຜົນ​ກະ­ທົບ​ຢ່າງ​ກະ­ທັນ­ຫັນ ໃນ​ນັ້ນ ມີ​ຈຳ­ນວນ 6 ບ້ານ​ທີ່​ເປັນ​ບ້ານ​ລຽບ​ຕາມ​ສາຍ​ນ້ຳ​ເຊ​ປຽນ ໄດ້​ຮັບ​ຜົນ​ກະ­ທົບ 100% ມີ​ປະ­ຊາ­ຊົນ​ທີ່​ຖືກ​ຜົນ​ກະ­ທົບ ແລະ ເສຍ​ຫາຍ​ໜັກ 1.611 ຄອບ­ຄົວ 7.095 ຄົນ ໃນ​ນີ້​ມີ​ຜູ້​ເສຍ​ຊີ­ວິດ 39 ຄົນ ແລະ ສູນ­ຫາຍ​ອີກ 98 ຄົນ (ອີງ­ໃສ່​ຕົວ​ເລກ​ວັນ​ທີ 14 ສິງ­ຫາ 2018) ສັດ­ລ້ຽງ ແລະ ພື້ນ​ທີ່​ກະ­ສິ­ກຳ​ຂອງ​ປະ­ຊາ­ຊົນ​ເສຍ​ຫາຍ​ຢ່າງ​ຫຼວງ­ຫຼາຍ ແລະ ປະ­ຊາ­ຊົນ​ແຂວງ​ຈຳ­ປາ​ສັກ ໄດ້​ຮັບ​ຜົນ​ກະ­ທົບ​ຈາກ​ເຫດ­ການ​ນີ້​ຈຳ­ນວນ​ໜຶ່ງ.

    ຍ້ອນ​ຄວາມ​ເປັນ​ຫ່ວງ​ເປັນ​ໄຍ​ຂອງ​ພັກ-ລັດ ຕໍ່​ເຫດ­ການ​ດັ່ງ­ກ່າວ ແລະ ເພື່ອ​ກວດ­ກາ​ສືບ­ສວນ-ສອບ​ສວນ​ຫາ​ສາ­ເຫດ​ຂອງ​ການ​ພັງ​ລົງ​ມາ​ຂອງ​ສັນ​ເຂື່ອນ D ນັ້ນ ກອງ​ປະ­ຊຸມ​ກົມ​ການ­ເມືອງ ຄັ້ງ​ວັນ​ທີ 30 ກໍ­ລະ­ກົດ 2018 ໄດ້​ເຫັນ​ດີ​ໃຫ້​ລັດ­ຖະ­ບານ​ແຕ່ງ­ຕັ້ງ​ຄະ­ນະ​ສະ­ເພາະ​ກິດ ເພື່ອ​ກວດ­ກາ​ເຫດ­ການ​ດັ່ງ­ກ່າວ ມາ​ຮອດ​ວັນ​ທີ 8 ສິງ­ຫາ 2018 ນາ­ຍົກ­ລັດ­ຖະ­ມົນ­ຕີ ໄດ້​ອອກ​ຂໍ້​ຕົກ­ລົງ​ເລກ​ທີ 54/ນຍ ແຕ່ງ­ຕັ້ງ​ຄະ­ນະ​ຮັບ­ຜິດ­ຊອບ​ສືບ­ສວນ-ສອບ​ສວນ ສາ­ເຫດ​ຄູ​ກັ້ນ​ນ້ຳ​ເຂື່ອນ​ໄຟ­ຟ້າ​ເຊ​ປຽນ-ເຊ​ນ້ຳ​ນ້ອຍ​ພັງ ແລະ ອອກ​ຂໍ້​ຕົກ­ລົງ ເລກ​ທີ 55/ນຍ ແຕ່ງ­ຕັ້ງ​ຄະ­ນະ​ກວດ­ກາ​ຄວາມ​ຮັບ­ຜິດ­ຊອບ​ຂອງ​ບຸກ­ຄົນ ທີ່​ຕິດ​ພັນ​ກັບ​ສາ­ເຫດ​ທີ່​ເຮັດ​ໃຫ້​ຄູ​ກັ້ນ​ນ້ຳ­ຂອງ​ເຂື່ອນ​ໄຟ­ຟ້າ​ເຊ​ປຽນ-ເຊ​ນ້ຳ​ນ້ອຍ​ແຕກ​ພັງ ໂດຍ​ມີ​ທ່ານ ບຸນ​ທອງ ຈິດ​ມະ­ນີ ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ​ອົງ­ການ​ກວດ­ກາ​ລັດ­ຖະ­ບານ ຫົວ­ໜ້າ​ຄະ­ນະ​ຕ້ານ​ການ​ສໍ້​ລາດ​ບັງ​ຫຼວງ​ຂັ້ນ​ສູນ​ກາງ ເປັນ​ຜູ້​ຊີ້​ນຳ​ທັງ​ສອງ​ຄະ­ນະ ຈາກ​ນັ້ນ ຄະ­ນະ​ດັ່ງ­ກ່າວ​ໄດ້​ສ້າງ​ແຜນ­ການ­ເຄື່ອນ­ໄຫວ ແລະ ແຕ່ງ­ຕັ້ງ​ບັນ­ດາ​ໜ່ວຍ​ງານ​ຮັບ­ຜິດ­ຊອບ​ຊ່ວຍ​ວຽກ​ຕ່າງໆ​ຂຶ້ນ​ມາ ພ້ອມ​ທັງ​ເຊີນ​ຜູ້​ຊ່ຽວ­ຊານ​ຈາກ​ຕ່າງ­ປະ­ເທດ​ເພື່ອ​ມາ​ກວດ­ກາ​ຊ່ວຍ.

    ວັນ​ທີ 19-20 ສິງ­ຫາ 2018 ທ່ານ ບຸນ​ທອງ ຈິດ​ມະ­ນີ ແລະ ທ່ານ ສຈ ດຣ Schlies ANTON ຈາກ​ປະ­ເທດ​ສະ​ວິດ ພ້ອມ​ດ້ວຍ​ນັກ­ວິ­ຊາ­ການ​ທີ່​ກ່ຽວ­ຂ້ອງ​ຈຳ­ນວນ​ໜຶ່ງ ໄດ້​ເດີນ­ທາງ​ລົງ​ໄປ​ກວດ​ສະ­ພາບ​ການ​ແຕກ​ພັງ​ຕົວ​ຈິງ​ຂອງ​ສັນ​ເຂື່ອນ D ແລະ ພື້ນ​ທີ່​ເຂື່ອນ​ອື່ນໆ ໂດຍ​ມີ​ເຈົ້າ­ແຂວງ​ຈຳ­ປາ​ສັກ ແລະ ແຂວງ​ອັດ​ຕະ​ປື​ລົງ​ຕິດ­ຕາມ​ນຳ.

    ໂອ­ກາດ​ນີ້ ທ່ານ​ຮອງ​ນາ­ຍົກ ໄດ້​ຮັບ​ຟັງ​ລາຍ​ງານ​ສະ­ພາບ​ໂດຍ​ລວມ​ເຕັກ­ນິກ​ຂອງ​ໂຄງ­ການ ລາຍ​ງານ​ສາ­ເຫດ​ສັນ​ເຂື່ອນ​ແຕກ​ພັງ​ຈາກ​ບໍ­ລິ­ສັດ​ຜູ້​ລົງ­ທຶນ ລາຍ​ງານ​ກ່ຽວ​ກັບ​ຜົນ​ຂອງ​ການ​ກວດ​ສອບ​ສາ​ເຫດ­ການ​ແຕກ​ພັງ​ເບື້ອງ​ຕົ້ນ​ຈາກ​ຜູ້​ຮັບ​ເໝົາ ແລະ ປຶກ­ສາ​ຫາ­ລື​ບັນ­ຫາ​ຕ່າງໆ​ຮ່ວມ​ກັບ​ບໍ­ລິ­ສັດ​ຮັບ​ເໝົາ ແລະ ວິ­ຊາ​ການ​ຝ່າຍ​ຕ່າງໆ ໃນ​ການ​ກວດ­ກາ​ບັນ­ດາ​ເຕັກ­ນິກ​ການ​ກໍ່­ສ້າງ ລວມ​ທັງ​ການ​ຊອກ​ຫາ​ສາ­ເຫດ​ຕົ້ນ­ຕໍ​ທີ່​ສົ່ງ​ຜົນ​ເຮັດ​ໃຫ້​ສັນ​ເຂື່ອນ​ແຕກ​ພັງ ແລະ ຄາດ​ວ່າ​ອີກ​ບໍ່​ດົນ ຈະ​ຮູ້​ລາຍ​ລະ­ອຽດ​ເຫດ­ການ​ເຂື່ອນ​ແຕກ​ໃນ​ຄັ້ງ​ນີ້.