ຂ່າວຫຼ້າສຸດ

ເຈົ້າຄອງນະຄອນຫຼວງ ລົງຕິດຕາມສະພາບນ້ຳຖ້ວມຢູ່ເມືອງໄຊທານີ ແລະ ນາຊາຍທອງ

429 28 ສ.ຫ. 2018 ຂ່າວໜ້າ​ໜຶ່ງ
ເຈົ້າຄອງນະຄອນຫຼວງ ລົງຕິດຕາມສະພາບນ້ຳຖ້ວມຢູ່ເມືອງໄຊທານີ ແລະ ນາຊາຍທອງ

    ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ (ນວ) ພ້ອມ​ດ້ວຍ​ຄະ­ນະ ລົງ​ຕິດ­ຕາມ​ສະ­ພາບ​ນ້ຳ​ງື່ມ​ໄຫຼ​ເຂົ້າ​ຖ້ວມ​ເຮືອນ ແລະ ພື້ນ​ທີ່​ການ​ຜະ­ລິດ​ຂອງ​ປະ­ຊາ­ຊົນ​ເຂດ​ເມືອງ​ໄຊ​ທາ­ນີ ແລະ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ໃນ​ວັນ​ທີ 27 ສິງ­ຫາ 2018 ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ ຈັນ­ທະ​ລາ ອິນ​ທະ­ລັງ​ສີ ເຈົ້າ­ເມືອງ​ໄຊ​ທາ­ນີ ທ່ານ ວິ­ລະ​ສັກ ນາມ​ມຸນ­ຕີ ເຈົ້າ­ເມືອງ​ນາ​ຊາຍ​ທອງ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ.

    ການ​ລົງ​ຕິດ­ຕາມ​ສະ­ພາບ​ນ້ຳ​ຖ້ວມ​ຄັ້ງ​ນີ້ ທ່ານ​ເຈົ້າ​ຄອງ ນວ ແລະ ຄະ­ນະ ໄດ້​ຕິດ­ຕາມ​ເບິ່ງ​ຈຸດ​ຍົກ­ຍ້າຍ​ຄອບ­ຄົວ​ປະ­ຊາ­ຊົນ ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ​ຢູ່​ໂຮງ­ຮຽນ​ບ້ານ​ທ່າ​ສະ­ຫວ່າງ ກຸ່ມ​ທ່າ​ງ່ອນ ເມືອງ​ໄຊ​ທາ­ນີ ແລະ ໄດ້​ຮັບ​ຟັງ​ການ​ລາຍ​ງານ​ຈາກ​ຄະ­ນະ​ຮັບ­ຜິດ­ຊອບ​ວ່າ: ຈາກ​ສະ­ພາບ​ຝົນ­ຕົກ​ຕິດ­ຕໍ່​ກັນ​ຫຼາຍ​ວັນ​ແຕ່​ວັນ​ທີ 23 ສິງ­ຫາ 2018 ເປັນ­ຕົ້ນ​ມາ ບວກ​ກັບ​ການ​ປ່ອຍ​ນ້ຳ​ອອກ​ຈາກ​ເຂື່ອນ​ຕ່າງໆ ເຮັດ​ໃຫ້​ປະ­ລິ­ມານ​ນ້ຳ​ງື່ມ​ເພີ່ມ​ຂຶ້ນ​ຢ່າງ​ຕໍ່​ເນື່ອງ ມາ​ຮອດ​ວັນ​ທີ 27 ເວ­ລາ 7:00 ໂມງ ນ້ຳ​ງື່ມ​ແທກ​ໄດ້ 11,3 ແມັດ ແລະ ໄຫຼ​ເພີ່ມ​ຂຶ້ນ​ລົ້ນ​ຫວ້ຍ​ນ້ຳ​ເຄັມ ແລ້ວ​ໄຫຼ​ເຂົ້າ​ຖ້ວມ​ເຂດ​ທີ່​ຕ່ຳ ເຮັດ​ໃຫ້​ເຮືອນ​ຂອງ​ປະ­ຊາ­ຊົນ​ໄດ້​ຮັບ​ຜົນ​ກະ­ທົບ ແລະ ເນື້ອ­ທີ່​ທຳ​ການ​ຜະ­ລິດ​ໄດ້​ຮັບ​ຄວາມ​ເສຍ​ຫາຍ ໂດຍ​ສະ­ເພາະ ພືດ​ຜັກ ສວນ​ໄມ້​ໃຫ້​ໝາກ ແລະ ໜອງ​ປາ ໃນ​ນີ້​ມີ​ບ້ານ​ທ່າ​ສະ­ຫວ່າງ ທ່າ​ສົ້ນ​ມໍ ທ່າ​ງ່ອນ ໂນນ​ບໍ່​ແກ້ວ ໂນນ​ສະ­ອາດ ລາດ​ຄວາຍ ແລະ ອຸ­ດົມ​ຜົນ ແລະ ບ້ານ​ທີ່​ໄດ້​ຮັບ​ຜົນ​ກະ­ທົບ​ໜັກ​ມີ​ບ້ານ​ທ່າ​ງ່ອນ ທ່າ​ສະ­ຫວ່າງ ແລະ ບ້ານ​ທ່າ​ສົ້ມ­ມໍ ເນື້ອ­ທີ່​ການ​ຜະ­ລິດ​ເສຍ​ຫາຍ​ປະ­ມານ 300 ເຮັກ­ຕາ ປະ­ຊາ­ຊົນ 43 ຄອບ­ຄົວ ໃນ​ນີ້​ໄດ້​ຍົກ­ຍ້າຍ​ໄປ​ບ່ອນ​ທີ່​ປອດ​ໄພ​ແລ້ວ 20 ຄອບ­ຄົວ ສຳ­ລັບ​ບ້ານ​ທີ່​ຖືກ​ກະ­ທົບ​ຢູ່​ເມືອງ​ນາ​ຊາຍ​ທອງ ມີ​ບ້ານ​ພັດ­ທະ­ນາ ແສນ​ດິນ ດົງ​ບອງ ແລະ ໜອງ​ສະ ໃນ​ນີ້ ຖືກ​ຜົນ​ກະ­ທົບ​ໜັກ​ແມ່ນ​ບ້ານ​ແສນ​ດິນ ເນື້ອ­ທີ່​ການ​ຜະ­ລິດ​ປະ­ມານ 500 ກວ່າ​ເຮັກ­ຕາ ຖືກ​ນ້ຳ​ຖ້ວມ ໄດ້​ຍົກ­ຍ້າຍ​ປະ­ຊາ­ຊົນ​ໄປ​ຢູ່​ທີ່​ປອດ​ໄພ 27 ຄອບ­ຄົວ.

    ຈາກ​ນັ້ນ ທ່ານ​ເຈົ້າ​ຄອງ ພ້ອມ​ຄະ­ນະ ກໍ່​ໄດ້​ລົງ​ຕິດ­ຕາມ ແລະ ສຳ​ຫຼວດ​ພື້ນ​ທີ່​ຕົວ​ຈິງ​ທີ່​ໄດ້​ຮັບ​ຜົນ​ກະ­ທົບ ໂດຍ​ສະ­ເພາະ ເຂດ​ຫ້ວຍ​ອີ່​ໂຍດ ເຊິ່ງ​ເປັນ​ຊາຍ​ແດນ​ລະ­ຫວ່າງ​ເມືອງ​ໄຊ​ທາ­ນີ ແລະ ເມືອງ​ນາ​ຊາຍ​ທອງ ແລະ ເປັນ​ບ່ອນ​ທີ່​ນ້ຳ​ໄຫຼ​ຜ່ານ​ຕັດ​ເສັ້ນ­ທາງ​ຖ້ວມ​ເນື້ອ­ທີ່​ການ​ຜະ­ລິດ​ບ້ານ​ແສນ​ດິນ ໂດຍ​ທ່ານ​ເຈົ້າ​ຄອງ​ໄດ້​ຊີ້​ນຳ​ໃຫ້​ພະ​ແນກ​ກະ­ສິ­ກຳ ແລະ ປ່າ­ໄມ້ ພະ​ແນກ​ໂຍ­ທາ​ທິ​ການ ແລະ ຂົນ­ສົ່ງ ນວ ແລະ ພາກ­ສ່ວນ​ກ່ຽວ­ຂ້ອງ ສົມ­ທົບ​ກັບ​ອຳ­ນາດ​ການ​ປົກ­ຄອງ​ເມືອງ​ເລັ່ງ​ແກ້​ໄຂ​ຈຸດ​ດັ່ງ­ກ່າວ ໂດຍ​ສະ­ເພາະ ການ​ຂຶ້ນ​ແຜນ​ຍົກ​ລະ­ດັບ​ພື້ນ­ຖານ​ໂຄງ​ລ່າງ​ເສັ້ນ­ທາງ​ໃຫ້​ສູງ​ຂຶ້ນ ເພື່ອ​ເປັນ​ຄູ​ກັນ​ນ້ຳ ບໍ່​ໃຫ້​ນ້ຳ​ໄຫຼ​ເຂົ້າ​ຖ້ວມ​ໃນ​ສະ­ເພາະ​ໜ້າ ແລະ ຍາວ​ນານ ພ້ອມ​ນີ້​ຍັງ​ໄດ້​ແນະ­ນຳ​ໃຫ້​ອຳ­ນາດ​ການ​ປົກ­ຄອງ​ເມືອງ ແລະ ບ້ານ ຕິດ­ຕາມ​ເຝົ້າ​ລະ­ວັງ​ການ​ເພີ່ມ​ຂຶ້ນ​ຂອງ​ນ້ຳ​ຢ່າງ​ໃກ້­ຊິດ ໂດຍ​ອີງ­ໃສ່​ມາດ­ຕະ­ຖານ​ໃນ​ປີ 1966 ແລະ ປີ 2008 ເພື່ອ​ກຽມ​ຄວາມ​ພ້ອມ​ຮັບ​ມື ຍົກ­ຍ້າຍ​ປະ­ຊາ­ຊົນ​ໃຫ້​ທັນ​ການ​ໂດຍ​ໄວ ເພື່ອ​ຮັບ­ປະ­ກັນ​ການ​ສູນ​ເສຍ​ທີ່​ອາດ​ເກີດ​ຂຶ້ນ ແລະ ຕິດ­ຕາມ​ການ​ເຝົ້າ​ລະ­ວັງ​ການ​ແຜ່​ລະ­ບາດ​ຂອງ​ພະ­ຍາດ​ທີ່​ມາ​ກັບ​ນ້ຳ ຈັດ​ແບ່ງ​ເຄື່ອງ​ຊ່ວຍ­ເຫຼືອ​ໃຫ້​ທົ່ວ​ເຖິງ ພາຍ­ຫຼັງ​ນ້ຳ​ຫຼຸດ​ລົງ​ໃຫ້​ມີ​ການ​ປະ​ເມີນ​ຢ່າງ​ລະ­ອຽດ ແລະ ລາຍ​ງານ​ຕໍ່​ຂັ້ນ​ເທິງ​ຮັບ​ຊາບ ເພື່ອ​ໃຫ້­ການ​ຊ່ວຍ­ເຫຼືອ​ຢ່າງ​ທັນ​ການ.

ຂ່າວທີ່ກ່ຽວຂ້ອງ