ຂ່າວຫຼ້າສຸດ

8 ບ້ານຂອງເມືອງທຸລະຄົມ ໄດ້ຮັບຜົນກະທົບຈາກໄພນ້ຳຖ້ວມ

379 28 ສ.ຫ. 2018 ຂ່າວໜ້າ​ໜຶ່ງ
8 ບ້ານຂອງເມືອງທຸລະຄົມ ໄດ້ຮັບຜົນກະທົບຈາກໄພນ້ຳຖ້ວມ

    ທ່ານ ຈັນ​ສອນ ແສນ​ບຸດ­ຕະ­ລາດ ຮອງ​ລັດ­ຖະ­ມົນ­ຕີ​ກະ­ຊວງ​ພະ­ລັງ­ງານ ແລະ ບໍ່​ແຮ່ (ພບ) ພ້ອມ​ດ້ວຍ​ຄະ­ນະ​ລົງ​ຕິດ­ຕາມ​ສະ­ພາບ​ນ້ຳ​ງື່ມ ເພີ່ມ​ຂຶ້ນ​ໄຫຼ​ເຂົ້າ​ຖ້ວມ​ເຮືອນ​ປະ­ຊາ­ຊົນ​ເຂດ​ເມືອງ​ທຸ­ລະ­ຄົມ ແຂວງ​ວຽງ​ຈັນ ວັນ​ທີ 26 ສິງ­ຫາ 2018 ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ ວີ​ດົງ ໄຊ​ຍະ​ສອນ ເຈົ້າ­ແຂວງ​ວຽງ​ຈັນ ພ້ອມ​ດ້ວຍ​ຮອງ​ເຈົ້າ­ແຂວງ ຜູ້­ອຳ­ນວຍ­ການ​ເຂື່ອນ​ໄຟ­ຟ້າ​ນ້ຳ​ງື່ມ 1 ບັນ­ດາ​ເຈົ້າ­ເມືອງ ແລະ ພາກ­ສ່ວນ​ກ່ຽວ­ຂ້ອງ.

    ໂອ­ກາດ​ນີ້ ໄດ້​ມີ​ການ​ປຶກ­ສາ​ຫາ­ລື​ຮ່ວມ​ກັນ ກ່ຽວ​ກັບ​ການ​ຊອກ​ຫາ​ຊ່ອງ​ທາງ​ແກ້​ໄຂ​ທີ່​ເໝາະ​ສົມ ໂດຍ​ໄດ້​ປະ­ສານ​ສົມ­ທົບ​ກັບ​ບັນ­ດາ​ເຂື່ອນ​ຢູ່​ເໜືອ​ນ້ຳ​ງື່ມ ແລະ ມີ​ການ​ປ່ອຍ​ນ້ຳ​ລົງ​ສູ່​ນ້ຳ​ງື່ມ ໂດຍ​ສະ­ເພາະ ເຂື່ອນ​ນ້ຳ​ຊອງ​ເຂື່ອນ​ນ້ຳ​ລີກ 1-2 ເຂື່ອນ​ນ້ຳ​ງື່ມ 1 ໃຫ້​ຫຼຸດ​ການ​ປ່ອຍ​ນ້ຳ​ລົງ​ສູ່​ລຳ​ນ້ຳ​ງື່ມ​ໜ້ອຍ​ທີ່​ສຸດ​ເທົ່າ​ທີ່​ຈະ​ເຮັດ​ໄດ້ ເພື່ອ​ຫຼຸດ­ຜ່ອນ​ຜົນ​ກະ­ທົບ​ຈາກ​ນ້ຳ​ງື່ມ​ເພີ່ມ​ຂຶ້ນ​ໄຫຼ​ເຂົ້າ​ຖ້ວມ​ເຮືອນ​ປະ­ຊາ­ຊົນ ເຊິ່ງ​ຜ່ານ​ການ​ປະ­ສານ​ງານ​ແມ່ນ​ໄດ້​ຮັບ​ການ​ຮ່ວມ​ມື​ຈາກ​ບັນ­ດາ​ເຂື່ອນ​ດັ່ງ­ກ່າວ ເຮັດ​ໃຫ້​ລະ­ດັບ​ນ້ຳ​ງື່ມ​ຫຼຸດ​ລົງ​ຫຼາຍ​ສົມ­ຄວນ​ໃນ​ເວ­ລາ​ຕໍ່​ມາ ຈາກ​ນັ້ນ ຄະ­ນະ​ກໍ່​ໄດ້​ລົງ​ຕິດ­ຕາມ​ຢູ່​ເຂດ​ບ້ານ​ຫາດ​ໄຊ ເຊິ່ງ​ເຂດ​ດັ່ງ­ກ່າວ ເປັນ​ເຂດ​ທີ່​ມີ​ນ້ຳ​ງື່ມ​ເພີ່ມ​ຂຶ້ນ​ໄຫຼ​ເຂົ້າ​ແຮງ​ສົມ­ຄວນ ເຮັດ​ໃຫ້​ເນື້ອ­ທີ່​ທຳ​ການ​ຜະ­ລິດ​ເຮືອນ​ປະ­ຊາ­ຊົນ​ຖືກ​ນ້ຳ​ຖ້ວມ​ເປັນ​ຈຳ­ນວນ​ຫຼາຍ ນອກ​ນີ້ ເສັ້ນ­ທາງ​ກໍ່​ສາ­ມາດ​ທຽວ​ໄດ້​ແຕ່​ລົດ​ສູງ.

    ທ່ານ ບົວ​ວັນ ຈັນ​ສະ​ຫວັດ ຜູ້­ອຳ­ນວຍ­ການ​ເຂື່ອນ​ໄຟ­ຟ້າ​ນ້ຳ​ງື່ມ 1 ກ່າວ​ວ່າ: ນັບ​ແຕ່​ໄດ້​ລະ­ບາຍ​ນ້ຳ​ອອກ​ຈາກ​ເຂື່ອນ​ໄຟ­ຟ້າ​ນ້ຳ​ງື່ມ 1 ວັນ​ທີ 12 ສິງ­ຫາ 2018 ເປັນ­ຕົ້ນ​ມາ 0,4 ແມັດ ປະ­ລິ­ມານ​ນ້ຳ​ໄຫຼ​ອອກ 148,5 ແມັດ​ກ້ອນ​ຕໍ່​ວິ­ນາ­ທີ ຕໍ່​ມາ​ໄດ້​ປ່ອຍ 3,3 ແມັດ ປະ­ລິ­ມານ​ນ້ຳ​ໄຫຼ​ອອກ 1.221 ແມັດ​ກ້ອນ​ຕໍ່​ວິ­ນາ­ທີ ພາຍ­ຫຼັງ​ທີ່​ໄດ້​ປຶກ­ສາ​ຫາ­ລື​ກັນ​ພວກ​ເຮົາ​ໄດ້​ປ່ອຍ 3 ແມັດ ປະ­ລິ­ມານ​ນ້ຳ​ໄຫຼ​ອອກ 1.181 ແມັດ​ກ້ອນ​ຕໍ່​ວິ­ນາ­ທີ ບວກ​ໃສ່​ການ​ແລ່ນ​ຈັກ​ປັ່ນ​ໄຟ 570 ແມັດ​ກ້ອນ​ຕໍ່​ວິ­ນາ­ທີ ລວມ​ປະ­ມານ 1.700 ແມັດ​ກ້ອນ​ຕໍ່​ວິ­ນາ­ທີ ໃນ 2-3 ວັນ​ຜ່ານ​ມາ ໄດ້​ມີ​ຝົນ­ຕົກ​ໜັກ ເຮັດ​ໃຫ້​ລະ­ດັບ​ນ້ຳ​ເພີ່ມ​ຂຶ້ນ 35 ຊັງ​ຕີ​ແມັດ ນ້ຳ​ໄຫຼ​ເຂົ້າ​ອ່າງ​ນ້ຳ​ງື່ມ ແຕ່ 8 ໂມງ ວັນ​ທີ 25 ຫາ 8 ໂມງ ວັນ​ທີ 26 ສິງ­ຫາ 2018 ຈຳ­ນວນ 3.890 ແມັດ​ກ້ອນ​ຕໍ່​ວິ­ນາ­ທີ ຫຼື 11,1 ລ້ານ​ແມັດ​ກ້ອນ​ຕໍ່​ຊົ່ວ­ໂມງ ແຕ່​ປ່ອຍ​ອອກ​ພຽງ 6,4 ລ້ານ​ແມັດ​ກ້ອນ​ຕໍ່​ຊົ່ວ­ໂມງ ສຳ­ລັບ​ນ້ຳ​ງື່ມ​ເພີ່ມ​ຂຶ້ນ​ເຂົ້າ​ຖ້ວມ​ເຮືອນ​ປະ­ຊາ­ຊົນ ຢູ່​ເຂດ​ເມືອງ​ທຸ­ລະ­ຄົມ ໂດຍ​ສະ­ເພາະ ຈຸດ​ປາກ​ກະ​ຍຸງ ບໍ່​ແມ່ນ​ເປັນ​ຍ້ອນ​ການ​ປ່ອຍ​ນ້ຳ​ຈາກ​ເຂື່ອນ​ນ້ຳ​ງື່ມ 1 ເທົ່າ​ນັ້ນ ແຕ່​ຍັງ​ມີ​ການ​ປ່ອຍ​ຈາກ​ນ້ຳ​ຊອງ ນ້ຳ​ລີກ​ມາ​ສົບ​ທົບ ເຊິ່ງ​ຈຸດ​ປາກ​ກະ​ຍຸງ​ລະ­ດັບ​ນ້ຳ​ແທກ​ໄດ້ 11,8 ແມັດ ລະ­ດັບ​ນ້ຳ​ໄຫຼ​ຜ່ານ 3.290 ແມັດ​ກ້ອນ​ຕໍ່​ວິ­ນາ­ທີ ມາ​ຮອດ​ຕອນ​ບ່າຍ​ມື້­ນີ້ ລະ­ດັບ​ນ້ຳ​ສາຍ​ຕ່າງໆ​ກໍ່​ມີ​ການ​ຫຼຸດ​ລົງ ແລະ ຄາດ​ວ່າ​ຈະ​ເຮັດ​ໃຫ້​ລະ­ດັບ​ນ້ຳ​ງື່ມ​ຫຼຸດ​ລົງ​ໄປ​ຕາມ​ກັນ ຂ້າ­ພະ­ເຈົ້າ​ຢາກ​ຮຽກ­ຮ້ອງ​ໃຫ້​ປະ­ຊາ­ຊົນ​ເຂົ້າ­ໃຈ​ວ່າ ການ​ປ່ອຍ​ນ້ຳ​ອອກ​ຈາກ​ເຂື່ອນ​ນ້ຳ​ງື່ມ 1 ບໍ່​ແມ່ນ​ຈະ​ຢ້ານ​ເຂື່ອນ​ຈະ​ຫັກ​ພັງ ແຕ່​ພວກ​ເຮົາ​ໄດ້​ປ່ອຍ​ຕາມ​ມາດ­ຕະ­ຖານ​ຂອງ​ຂະ​ບວນ​ການ​ບໍ­ລິ­ຫານ​ຈັດ­ການ ແຕ່​ທັ້ງ​ນີ້ ທັງ​ນັ້ນ​ພວກ​ເຮົາ​ກໍ່​ໄດ້​ມີ​ການ​ປຶກ­ສາ​ຫາ­ລື ເພື່ອ​ເຮັດ​ແນວ­ໃດ​ໃຫ້​ມີ​ຜົນ​ກະ­ທົບ​ໜ້ອຍ​ທີ່​ສຸດ​ຕໍ່​ປະ­ຊາ­ຊົນ​ທີ່​ອາ­ໄສ​ຢູ່​ເທິງ ແລະ ລຸ່ມ​ເຂື່ອນ.

ຂ່າວທີ່ກ່ຽວຂ້ອງ