ຂ່າວຫຼ້າສຸດ

ນະຄອນຫຼວງວຽງຈັນ ມີຄວາມພ້ອມ 100% ໃນການເປີດສົກຮຽນໃໝ່

176 28 ສ.ຫ. 2018 ຂ່າວໜ້າ​ໜຶ່ງ
ນະຄອນຫຼວງວຽງຈັນ ມີຄວາມພ້ອມ 100% ໃນການເປີດສົກຮຽນໃໝ່

    ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນະ­ຄອນ­ຫຼວງ​ວຽງ​ຈັນ ທ່ານ ຊົມ​ພູ ແກ້ວ​ປັນ­ຍາ ໄດ້​ໃຫ້​ສຳ­ພາດ​ຕໍ່​ສື່​ມວນ​ຊົນ ເມື່ອ​ວັນ​ທີ 23 ສິງ­ຫາ​ນີ້ ວ່າ: ໃນ​ວັນ​ທີ 31 ສິງ­ຫາ ທີ່​ຈະ​ມາ​ເຖິງ​ນີ້ ນະ­ຄອນ­ຫຼວງ​ວຽງ​ຈັນ ຈະ​ໄດ້​ຈັດ​ພິ­ທີ​ເປີດ​ສົກ­ຮຽນ​ໃໝ່ ສົກ­ຮຽນ 2018-2019 ຂຶ້ນ​ຢ່າງ​ເປັນ​ທາງ​ການ ພາຍ­ຫຼັງ​ທີ່​ໄດ້​ສຳ­ເລັດ​ການ​ກະ­ກຽມ​ປັບ­ປຸງ​ປົວ­ແປງ​ອາ­ຄານ​ສະ­ຖານ­ທີ່​ຮຽນ ໂຮງ­ຮຽນ ຫ້ອງ​ຮຽນ ໂຕະ ຕັ່ງ ໄຟ­ຟ້າ ນ້ຳ​ປະ­ປາ ລວມ​ເຖິງ​ການ​ບັນ­ຈຸ​ສັບ​ຊ້ອນ ຄູ-ອາ­ຈານ ປະ­ກອບ​ເຂົ້າ​ໃນ​ການ​ສິດ­ສອນ ແລະ ພິ­ເສດ​ແມ່ນ​ໄດ້​ສຳ­ເລັດ​ການ​ເຝິກ­ອົບ­ຮົມ​ການ​ຮຽນ-ການ​ສອນ ໃຫ້​ແກ່​ຄູ​ທຸກ​ຊັ້ນ ທຸກ​ສາຍ​ຕາມ​ໂຄງ­ການ​ຫຼັກ­ສູດ​ຂອງ​ກະ­ຊວງ​ສຶກ​ສາ​ທິ​ການ ແລະ ກີ­ລາ ວາງ​ອອກ​ຢ່າງ​ມີ​ຄຸ­ນະ­ພາບ​ດີ ສາ­ມາດ​ເວົ້າ​ໄດ້​ວ່າ ມາ​ຮອດ​ປັດ­ຈຸ­ບັນ​ນະ­ຄອນ­ຫຼວງ​ມີ​ຄວາມ​ພ້ອມ​ທີ່​ຈະ​ໄຂ​ສົກ­ຮຽນ​ໃໝ່ 100%.

    ໃນ​ສົກ­ຮຽນ 2017-2018 ຜ່ານ​ມາ ວຽກ​ງານ​ການ​ສຶກ​ສາ​ໄດ້​ມີ​ການ​ຂະ­ຫຍາຍ­ຕົວ​ດ້ານ​ປະ­ລິ­ມານ ແລະ ຄຸ­ນະ­ພາບ ຈຳ­ນວນ​ໂຮງ­ຮຽນ ຫ້ອງ​ຮຽນ ຄູ​ສອນ ແລະ ນັກ­ຮຽນ​ມີ​ຈຳ­ນວນ​ເພີ່ມ​ຂຶ້ນ ການ​ສຶກ​ສາ​ໄດ້​ຮັບ​ການ​ພັດ­ທະ­ນາ​ຄົບ​ຕາມ 3 ລັກ­ສະ­ນະ ແລະ 5 ຫຼັກ​ມູນ​ຂອງ​ການ​ສຶກ​ສາ ໄດ້​ຂະ­ຫຍາຍ​ຕາ​ໜ່າງ​ໄປ​ສູ່​ທ້ອງ­ຖິ່ນ​ເຂດ​ຊົນ­ນະ­ບົດ​ຫ່າງ​ໄກ ແລະ ມີ​ຫຼາຍ​ໂຄງ­ການ​ໄດ້​ນຳ­ໄປ​ຈັດ​ຕັ້ງ​ປະ­ຕິ­ບັດ​ຢູ່​ບັນ­ດາ​ເມືອງ ບ້ານ ແລະ ກຸ່ມ​ບ້ານ​ພັດ­ທະ­ນາ ເປັນ­ຕົ້ນ​ແມ່ນ​ການ​ຂະ­ຫຍາຍ​ໂຮງ­ຮຽນ​ອະ­ນຸ­ບານ ຫຼື ຫ້ອງ​ກຽມ​ປະ­ຖົມ ເຊິ່ງ​ເຮັດ​ໃຫ້​ຈຳ­ນວນ​ໂຮງ­ຮຽນ ສະ­ຖານ­ທີ່​ຮຽນ ຫ້ອງ​ຮຽນ​ໄດ້​ເພີ່ມ​ຂຶ້ນ ແລະ ໄດ້​ເປັນ​ເງື່ອນ­ໄຂ​ໃຫ້​ແກ່​ປະ­ຊາ­ກອນ​ໃນ​ແຕ່​ລະ​ກຸ່ມ​ເປົ້າ​ໝາຍ ມີ​ໂອ­ກາດ​ໄດ້​ຮັບ​ການ​ສຶກ​ສາ​ຫຼາຍ​ຂຶ້ນ ສາ­ມາດ​ເວົ້າ​ໄດ້​ວ່າ​ທົ່ວ​ນະ­ຄອນ­ຫຼວງ​ວຽງ​ຈັນ ໄດ້​ພັດ­ທະ­ນາ​ການ​ສຶກ​ສາ ແລະ ກີ­ລາ​ໃນ​ຫຼາຍ​ດ້ານ ສະ­ແດງ​ອອກ​ຈຳ­ນວນ​ໂຮງ­ຮຽນ ທັງ​ໝົດ 1.058 ແຫ່ງ ໃນ​ນັ້ນ ມີ​ໂຮງ­ຮຽນ​ລ້ຽງ​ເດັກ-ອະ­ນຸ­ບານ 363 ແຫ່ງ (ລັດ 117 ແຫ່ງ ແລະ ເອ­ກະ​ຊົນ 246 ແຫ່ງ) ໂຮງ­ຮຽນ​ປະ­ຖົມ​ສົມ­ບູນ 525 ແຫ່ງ (ລັດ 375 ແຫ່ງ ແລະ ເອ­ກະ​ຊົນ 150 ແຫ່ງ) ໂຮງ­ຮຽນ​ມັດ­ທະ­ຍົມ​ຕອນ​ຕົ້ນ 79 ແຫ່ງ (ລັດ 41 ແຫ່ງ ແລະ ເອ­ກະ​ຊົນ 38 ແຫ່ງ) ໂຮງ­ຮຽນ​ມັດ­ທະ­ຍົມ​ຕອນ​ປາຍ 11 ແຫ່ງ (ລັດ 11 ແຫ່ງ) ໂຮງ­ຮຽນ​ມັດ­ທະ­ຍົມ​ສົມ­ບູນ 75 ແຫ່ງ (ລັດ 48 ແຫ່ງ ແລະ ເອ­ກະ​ຊົນ 27 ແຫ່ງ) ຈຳ­ນວນ​ນັກ­ຮຽນ​ທັງ​ໝົດ 199.725 ຄົນ ໃນ​ນັ້ນ ມີ​ນັກ­ຮຽນ​ລ້ຽງ​ເດັກ-ອະ­ນຸ­ບານ 35.925 ຄົນ (ລັດ 9.495 ຄົນ ແລະ ເອ­ກະ​ຊົນ 26.430 ຄົນ) ນັກ­ຮຽນ​ປະ­ຖົມ​ສົມ­ບູນ 76.535 ຄົນ (ລັດ 46.274 ຄົນ ແລະ ເອ­ກະ​ຊົນ 30.288 ຄົນ) ນັກ­ຮຽນ​ມັດ­ທະ­ຍົມ​ຕອນ​ຕົ້ນ 19.138 ຄົນ (ລັດ 13.804 ຄົນ ແລະ ເອ­ກະ​ຊົນ 5.334 ຄົນ) ນັກ­ຮຽນ​ມັດ­ທະ­ຍົມ​ຕອນ​ປາຍ 8.250 ຄົນ (ລັດ 8.250 ຄົນ) ນັກ­ຮຽນ​ມັດ­ທະ­ຍົມ​ສົມ­ບູນ 56.552 ຄົນ (ລັດ 46.409 ຄົນ ແລະ ເອ­ກະ​ຊົນ 10.143 ຄົນ) ຈຳ­ນວນ​ຄູ​ທັງ​ໝົດ 11.621 ຄົນ ຄູ​ສອນ​ລ້ຽງ​ເດັກ-ອະ­ນຸ­ບານ 3.050 ຄົນ (ລັດ 659 ຄົນ ແລະ ເອ­ກະ​ຊົນ 2.391 ຄົນ) ຄູ​ສອນ​ປະ­ຖົມ​ສົມ­ບູນ 3.625 ຄົນ (ລັດ 2.306 ຄົນ ແລະ ເອ­ກະ​ຊົນ 1.319 ຄົນ) ຄູ​ສອນ​ມັດ­ທະ­ຍົມ​ຕອນ​ຕົ້ນ 1.246 ຄົນ (ລັດ 807 ຄົນ ແລະ ເອ­ກະ​ຊົນ 439 ຄົນ) ຄູ​ສອນ​ມັດ­ທະ­ຍົມ​ຕອນ​ປາຍ 446 ຄົນ (ລັດ 446 ຄົນ) ຄູ​ສອນ​ມັດ­ທະ­ຍົມ​ສົມ­ບູນ 3.063 ຄົນ (ລັດ 2.359 ຄົນ ແລະ ເອ­ກະ​ຊົນ 704 ຄົນ.

ຂ່າວທີ່ກ່ຽວຂ້ອງ