ຂ່າວຫຼ້າສຸດ

ສາລະວັນ ພ້ອມສົ່ງ 10 ປະເພດກີລາ ເຂົ້າຮ່ວມຊຽງຂວາງເກມ

230 28 ສ.ຫ. 2018 ວົງຈອນກີລາ
ສາລະວັນ ພ້ອມສົ່ງ 10 ປະເພດກີລາ ເຂົ້າຮ່ວມຊຽງຂວາງເກມ

    ກອງ​ປະ­ຊຸມ​ປຶກ­ສາ​ຫາ­ລື​ວຽກ​ງານ​ການ​ລະ­ດົມ​ທຶນ ແລະ ການ​ກະ­ກຽມ​ເຝິກ­ຊ້ອມ​ກີ­ລາ​ປະ­ເພດ​ຕ່າງໆ ທີ່​ຈະ​ກະ­ກຽມ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ 11 ທີ່​ແຂວງ​ຊຽງ​ຂວາງ ເປັນ​ເຈົ້າ­ພາບ​ທ້າຍ​ປີ​ນີ້ ຈັດ​ຂຶ້ນ​ວັນ​ທີ 21 ສິງ­ຫາ​ຜ່ານ​ມາ ທີ່​ຫ້ອງ​ປະ­ຊຸມ​ພະ​ແນກ​ສຶກ​ສາ​ທິ​ການ ແລະ ກີ­ລາ​ແຂວງ​ສາ­ລະ​ວັນ ມີ​ທ່ານ ວິ­ຊຽນ ນະ​ວິ​ກຸນ ຮອງ​ເຈົ້າ­ແຂວງ​ສາ­ລະ​ວັນ ຜູ້​ຊີ້​ນຳ​ວຽກ​ງານ​ເສດ­ຖະ­ກິດ ທ່ານ ສີ​ລິ​ສັກ ຖະ­ໜອມ​ຮັກ ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ​ແຂວງ ບັນ­ດາ​ຄະ­ນະ​ຮັບ­ຜິດ­ຊອບ​ລະ­ດົມ​ທຶນ​ຈາກ​ພະ­ແນກ­ການ​ອ້ອມ​ຂ້າງ​ແຂວງ ເຈົ້າ­ເມືອງ 8 ເມືອງ ຕາງ­ໜ້າ​ສະ­ຫະ­ພັນ​ກີ­ລາ​ປະ­ເພດ​ຕ່າງໆ ແລະ ພາກ­ສ່ວນ​ທີ່​ກ່ຽວ­ຂ້ອງ​ເຂົ້າ​ຮ່ວມ.

    ໂອ­ກາດ​ນີ້ ທ່ານ ສີ​ລິ​ສັກ ຖະ­ໜອມ​ຮັກ ໄດ້​ຜ່ານ​ຂໍ້​ຕົກ­ລົງ​ວ່າ​ດ້ວຍ​ການ​ແຕ່ງ­ຕັ້ງ​ຄະ­ນະ​ຮັບ­ຜິດ­ຊອບ​ລະ­ດົມ​ທຶນ ແລະ ເຝິກ­ຊ້ອມ​ກີ­ລາ​ປະ­ເພດ​ຕ່າງໆ ສະ­ບັບ​ເລກ​ທີ 692/ຈຂ.ສວ ລົງ​ວັນ​ທີ 30 ກໍ­ລະ­ກົດ 2018 ເພື່ອ​ຊຸກ­ຍູ້​ການ​ລະ­ດົມ​ທຶນ​ໃນ​ທຸກ​ຂົງ­ເຂດ​ໃຫ້​ມີ​ການ​ປະ­ກອບ­ສ່ວນ ເປັນ­ຕົ້ນ​ແມ່ນ​ບັນ­ດາ​ພະ­ແນກ­ການ ອົງ­ການ​ທຽບ​ເທົ່າ​ເມືອງ ປກຊ-ປກສ ບໍ­ລິ­ສັດ ລັດ​ວິ​ສາ​ຫະ​ກິດ ແລະ ຫ້າງ​ຮ້ານ ຜູ້​ປະ­ກອບ​ການ ໃນ​ທົ່ວ​ສັງ­ຄົມ ພ້ອມ​ກັນ​ນັ້ນ ກໍ່​ປະ­ຕິ­ບັດ​ຍ້ອງ­ຍໍ​ສັນ­ລະ­ເສີນ​ຕໍ່​ພະ­ແນກ­ການ ກົມ​ກອງ ເມືອງ ບໍ­ລິ­ສັດ ຫ້າງ​ຮ້ານ ແລະ ຊັ້ນ​ຄົນ​ຕ່າງໆ ທີ່​ໄດ້​ປະ­ກອບ­ສ່ວນ​ຊຸກ­ຍູ້​ໃນ​ວຽກ​ງານ​ກີ­ລາ.

    ສຳ­ລັບ​ປະ­ເພດ​ກີ­ລາ ທີ່​ແຂວງ​ສາ­ລະ​ວັນ ຈະ​ສົ່ງ​ເຂົ້າ​ຮ່ວມ​ແຂ່ງ­ຂັນ​ໃນ​ຄັ້ງ​ນີ້​ແມ່ນ​ມີ​ທັງ​ໝົດ 10 ປະ­ເພດ ຄື: ມວຍ​ລາວ ຊາຍ-ຍິງ ມວຍ​ສາ­ກົນ ຊາຍ-ຍິງ ວູ​ຊູ ຊາຍ-ຍິງ ປັນ​ຈັກ​ສີ​ລັດ ຊາຍ-ຍິງ ເປ​ຕັງ ຊາຍ-ຍິງ ແລ່ນ-ລານ ຊາຍ-ຍິງ ກ໊ອຟ​ຊາຍ ຊ່ວງ​ເຮືອ​ຊາຍ ໝາກ­ເສິກ​ຊາຍ-ຍິງ ແລະ ໝາກ​ແລ້ ຊາຍ-ຍິງ ໂດຍ​ມີ​ນັກ­ກີ­ລາ​ເຂົ້າ​ຮ່ວມ​ທັງ​ໜົດ 73 ຄົນ ຍິງ 30 ຄົນ ແລະ ຄູ​ເຝິກ 19 ທ່ານ ເຊິ່ງ​ຈະ​ນຳ​ໃຊ້​ງົບ­ປະ­ມານ​ທັງ​ໝົດ 1,5 ຕື້​ກວ່າ​ກີບ.

ຂ່າວທີ່ກ່ຽວຂ້ອງ