ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 28/08/2018

132 28 ສ.ຫ. 2018 ຫົວຂໍ້ຂ່າວອື່ນໆ

    ທີ່​ສັງ​ລວມ​ມາ​ໃນ​ວັນ​ນີ້ ມີ​ເລື່ອງ​ກ່ຽວ​ກັບ​ມາດ​ຕະ­ການ​ປະ­ຢັດ​ຢູ່​ປະ­ເທດ ກາ​ນາ ເລື່ອງ​ທາງ​ການ​ນະ­ຄອນ­ຫຼວງ ສ ເກົາ­ຫຼີ ຕັ້ງ​ງົບ­ປະ­ມານ​ເພື່ອ​ສ້າງ​ວຽກ​ເຮັດ​ງານ​ທຳ ສຸດ​ທ້າຍ​ແມ່ນ​ກົດ​ເຫຼັກ​ຂອງ​ໄທ ກ່ຽວ​ກັບ​ການ​ຫ້າມ​ດື່ມ​ເຄື່ອງ​ມຶນ­ເມົາ ຕາມ​ສວນ​ສາ­ທາ­ລະ­ນະ.

    ທີ່ ກາ​ນາ: ເລີ່ມ​ແຕ່​ຕົ້ນ​ເດືອນ​ເມ­ສາ ປີ 2015 ກາ​ນາ ປະ­ເທດ​ໃນ​ເຂດ​ຕາ­ເວັນ­ຕົກ​ຂອງ ອາ​ຟຣິ​ກາ ໄດ້​ເລີ່ມ​ຕົ້ນ​ໂຄງ­ການ​ກູ້​ຢືມ​ເງິນ​ຈາກ​ອົງ­ການ​ກອງ​ທຶນ​ສາ­ກົນ (IMF) ເປັນ​ໄລ­ຍະ 3 ປີ ເພື່ອ​ແກ້​ໄຂ​ບັນ­ຫາ​ເສດ­ຖະ­ກິດ​ຂອງ​ປະ­ເທດ ທີ່​ໄດ້​ຮັບ​ຜົນ​ກະ­ທົບ​ຢ່າງ​ໜັກ­ໜ່ວງ ຈາກ​ສະ­ພາ­ວະ​ຂາດ­ດູນ​ສູງ ຄວາມ​ບໍ່​ໝັ້ນ­ຄົງ​ຂອງ​ສະ­ກຸນ​ເງິນ​ພາຍ​ໃນ ແລະ ໜີ້​ສາ­ທາ­ລະ­ນະ​ເພີ່ມ​ຂຶ້ນ ຕໍ່­ໜ້າ​ສະ­ພາບ​ການ​ດັ່ງ­ກ່າວ ທ່ານ​ປະ­ທາ­ນາ­ທິ­ບໍ­ດີ ກາ​ນາ ໄດ້​ປະ­ກາດ​ມາດ​ຕະ­ການ​ປະ­ຢັດ​ຮັດ​ສາຍ­ແອວ ໂດຍ​ເລີ່ມ​ຈາກ​ຄະ­ນະ​ລັດ­ຖະ­ມົນ­ຕີ ແລະ ພະ­ນັກ­ງານ​ຂັ້ນ​ສູງ​ຂອງ​ລັດ​ກ່ອນ ຄື: ໃຫ້​ຫຼີກ​ລຽງ​ການ​ເດີນ­ທາງ​ໄປ​ຕ່າງ­ປະ­ເທດ​ທີ່​ບໍ່​ສົມ​ເຫດ​ສົມ​ຜົນ ແລະ ຫ້າມ​ເດີນ­ທາງ​ດ້ວຍ​ປີ້​ບ່ອນ​ນັ່ງ​ຊັ້ນ 1 ນີ້​ຄື​ຄວາມ​ພະ­ຍາ­ຍາມ​ຂອງ​ລັດ­ຖະ­ບານ ເພື່ອ​ຫຼຸດ​ລາຍ​ຈ່າຍ​ສິ້ນ​ເປືອງ​ຕ່າງໆ ຕາມ​ຂໍ້​ຕົກ­ລົງ​ຊ່ວຍ­ເຫຼືອ​ຂອງ​ອົງ­ການ IMF ນອກ­ຈາກ​ນັ້ນ ທາງ​ການ​ຍັງ​ໄດ້​ອອກ​ກົດ­ໝາຍ ວ່າ​ດ້ວຍ​ຄວາມ​ຮັບ­ຜິດ­ຊອບ​ທາງ​ການ​ເງິນ ໂດຍ​ມີ​ການ​ກຳ­ນົດ​ບົດ​ລົງ­ໂທດ​ພະ­ນັກ­ງານ​ລັດ​ຄົນ​ໃດ ທີ່​ລະ­ເມີດ​ກົດ­ໝາຍ​ດັ່ງ­ກ່າວ ດ້ວຍ​ການ​ໄລ່​ອອກ​ຈາກ​ການ ຫຼື ຖືກ​ຕັດ​ອິດ­ສະ­ຫຼະ­ພາບ.

    ທີ່ ສ ເກົາ­ຫຼີ: ແຫຼ່ງ​ຂ່າວ ຂປລ ໃນ​ເດືອນ​ກໍ­ລະ­ກົດ ປີ 2017 ໃຫ້​ຮູ້​ວ່າ: ເຈົ້າ​ຄອງ​ນະ­ຄອນ­ຫຼວງ ເຊ​ອູນ ໄດ້​ປະ­ກາດ​ແຜນ​ສະ­ໜັບ­ສະ­ໜູນ​ເປົ້າ​ໝາຍ​ສ້າງ​ວຽກ​ເຮັດ​ງານ​ທຳ ດ້ວຍ​ກ້ອນ​ເງິນ ຈຳ­ນວນ 2.310 ຕື້​ວອນ (ເທົ່າ​ກັບ 2,01 ຕື້​ໂດ​ລາ​ສະ­ຫະ­ລັດ) ການ​ປະ­ກາດ​ຂອງ​ເຈົ້າ​ຄອງ​ນະ­ຄອນ­ຫຼວງ ມີ​ຂຶ້ນ​ໃນ​ທ່າມ­ກາງ​ຄວາມ​ພະ­ຍາ­ຍາມ​ຂອງ​ທ່ານ​ປະ­ທາ­ນາ­ທິ­ບໍ­ດີ ມູນ​ເຈ​ອິນ ເພື່ອ​ແກ້​ໄຂ​ໄພ​ວ່າງ​ງານ​ໃນ​ໄລ­ຍະ​ຜ່ານ​ມາ ກ້ອນ​ທຶນ​ອັນ​ມະ­ຫາ­ສານ​ດັ່ງ­ກ່າວ ຈະ​ນຳ​ໃຊ້​ເພື່ອ​ສ້າງ​ວຽກ​ເຮັດ​ງານ​ໃຫ້​ຊາວ​ໜຸ່ມ​ຈຳ­ນວນ 13.000 ຕຳ­ແໜ່ງ ດ້ວຍ​ເງິນ​ໃນ​ມູນ​ຄ່າ 135 ຕື້​ວອນ ແລະ ນຳ​ໃຊ້​ເພື່ອ​ຊ່ວຍ­ເຫຼືອ​ເຫຼົ່າ​ພະ­ນັກ­ງານ​ບຳ​ເນັດ​ທີ່​ມີ​ອາ­ຍຸ​ລະ­ຫວ່າງ 50-60 ປີ ກໍ່​ຄື ຜູ້​ອາ­ຍຸ​ສູງ ສ່ວນ​ແບ່ງ​ຂອງ​ງົບ­ປະ­ມານ​ອີກ​ຈຳ­ນວນ​ໜຶ່ງ ຈະ​ນຳ​ໃຊ້​ເພື່ອ​ສະ­ໜັບ­ສະ­ໜູນ​ແມ່­ຍິງ​ທີ່​ຕ້ອງ­ການ​ກັບ­ເຂົ້າ​ເຮັດ​ວຽກ​ຄືນ ພາຍ­ຫຼັງ​ຢຸດ​ເພື່ອ​ເບິ່ງ­ແຍງ​ລູກ.

    ທີ່ ສປ ຈີນ: ມີ​ຂ່າວ​ເມື່ອ 3 ປີ­ຜ່ານ­ມາ​ວ່າ: ທາງ​ການ​ຈີນ ໄດ້​ນຳ​ໃຊ້​ໂດຼນ ຫຼື ຍົນ​ບໍ່​ມີ​ຄົນ​ຂັບ​ຕິດ­ຕາມ​ກວດ­ກາ ເພື່ອ​ປ້ອງ​ກັນ​ບໍ່​ໃຫ້​ມີ​ການ​ໂກງ​ຂໍ້​ສອບ ເວ­ລາ​ມີ​ການ​ສອບ­ເສັງ​ເຂົ້າ​ມະ­ຫາ­ວິ­ທະ­ຍາ­ໄລ ກໍ່​ຄື​ສະ​ຖາ​ບັນ​ການ​ສຶກ​ສາ​ຂັ້ນ​ສູງ​ໃນ​ແຕ່​ລະ​ປີ ການ​ໃຊ້​ໂດຼນ​ເພື່ອ​ຈຸດ­ປະ­ສົງ​ນີ້ ເລີ່ມ​ຂຶ້ນ​ຢູ່​ເມືອງ​ລວຍ​ຢາງ (Luoyang) ແຂວງ​ເຮີ​ນານ ໃນ​ຕົ້ນ​ເດືອນ​ພະ­ຈິກ ປີ 2015 ການ​ໃຊ້​ໂດຼນ ເພື່ອ​ຕິດ­ຕາມ​ການ​ໂກງ​ຂໍ້​ສອບ​ນີ້​ໄດ້­ຜົນ​ດີ​ທີ່​ສຸດ ເພາະ​ໂດຼນ ສາ­ມາດ​ບິນ​ໃນ​ລະ­ດັບ​ສູງ​ເຖິງ 500 ແມັດ ເໜືອ​ສະ­ຖານ­ທີ່​ມີ​ການ​ສອບ­ເສັງ ແລະ ສາ­ມາດ​ຈັບ​ຄື້ນ​ຊີ​ຍານ​ທຸກ​ປະ­ເພດ​ໄດ້​ໃນ​ທົ່ວ​ຕົວ​ເມືອງ ການ​ໂກງ​ຄະ­ແນນ​ຂໍ້​ສອບ​ຢູ່​ຈີນ​ນັ້ນ​ມີ​ຫຼາຍ​ຮູບ ຫຼາຍ​ສີ ແລະ ວິ­ທີ​ການ ເຊັ່ນ: ການ​ຂາຍ​ຄຳ​ຕອບ​ໂຈດ ການ​ວ່າ​ຈ້າງ​ຄົນ​ອື່ນ​ໃຫ້​ໄປ​ສອບ­ເສັງ​ແທນ​ແຕ່​ແຜ່​ຫຼາຍ​ໃນ​ປັດ­ຈຸ­ບັນ​ແມ່ນ ການ​ລັກ​ສົ່ງ​ຄຳ​ຕອບ​ໃຫ້​ກັນ ຜ່ານ​ເຄື່ອງ­ມື​ສື່­ສານ​ເອ​ເລັກ​ໂຕຣ​ນິກ ຜ່ານ​ມື​ຖື ແລະ ອື່ນໆ ໃນ​ເວ­ລາ​ມີ​ການ​ສອບ­ເສັງ ໃນ​ປີ 2015 ນັບ​ແຕ່​ເດືອນ​ພຶດ­ສະ­ພາ ເຖິງ​ມື້​ສອບ­ເສັງ​ໃນ​ຕົ້ນ​ເດືອນ​ພະ­ຈິກ ກະ­ຊວງ​ສຶກ​ສາ​ຈີນ ສາ­ມາດ​ຈັບ​ກຸມ​ຜູ້​ຈັດ​ຕັ້ງ​ວາງ​ແຜນ​ໂກງ​ຄະ­ແນນ​ສອບ­ເສັງ​ໄດ້ 23 ຄົນ ສຳ­ລັບ​ນັກ​ສຶກ​ສາ​ທີ່​ຖືກ​ຈັບ​ໄດ້​ວ່າ ຍ້ອນ​ໃຊ້​ວິ­ທີ​ໂກງ​ຂໍ້​ສອບ​ນັ້ນ​ກໍ່​ຈະ​ຖືກ​ຕັດ​ສິດ​ບໍ່​ໃຫ້​ເຂົ້າ​ສອບ­ເສັງ​ເປັນ​ເວ­ລາ 3 ປີ.

    ທີ່​ປະ­ເທດ ໄທ: ທາງ​ການ​ໄທ ໄດ້​ເອົາ​ມາດ​ຕະ­ການ​ເຄັ່ງ​ຄັດ ແລະ ເດັດ­ຂາດ​ກັບ​ຜູ້​ລະ­ເມີດ​ຂໍ້​ຫ້າມ​ດື່ມ​ສິ່ງ​ມຶນ­ເມົາ ຕາມ​ສວນ​ສາ­ທາ­ລະ­ນະ​ແຫ່ງ​ຊາດ ຄື: ຜູ້​ລະ­ເມີດ​ຈະ​ຖືກ​ໂທດ​ຕິດ​ຄຸກ​ເປັນ​ເວ­ລາ 1 ເດືອນ ແລະ ເສຍ​ຄ່າ​ປັບ​ໃໝ​ຈຳ­ນວນ 1.000 ບາດ ດັ່ງ­ນັ້ນ ທາງ​ກົມ​ອຸ­ທິ­ຍານ​ແຫ່ງ​ຊາດ ແລະ ການ​ອະ­ນຸ​ຮັກ​ສັດ­ປ່າ​ພັນ​ພືດ​ຂອງ​ໄທ ໄດ້​ອອກ​ມາ​ປະ­ກາດ​ໃຫ້​ບັນ­ດາ​ນັກ​ທ່ອງ​ທ່ຽວ ງົດ​ເວັ້ນ​ການ​ດື່ມ​ເຄື່ອງ​ດື່ມ​ມືນ​ເມົາ​ຕາມ​ສວນ​ສາ­ທາ­ລະ­ນະ​ທຸກ​ແຫ່ງ​ໃນ​ທົ່ວ​ປະ­ເທດ.

ຂ່າວທີ່ກ່ຽວຂ້ອງ