ອຸບັດເຫດ ແລະ ໄພ​ທຳ​ມະ​ຊາດ​ຢູ່​ໃນ​ອີ​ຣານ

87 28 ສ.ຫ. 2018 ຂ່າວຕ່າງປະເທດ
ອຸບັດເຫດ ແລະ ໄພ​ທຳ​ມະ​ຊາດ​ຢູ່​ໃນ​ອີ​ຣານ

      ຂ່າວສານ AFP ລາຍ​ງານ​ອ້າງ​ຕາມ​ຂໍ້​ມູນ​ຈາກ​ຂ່າວສານ IRNA ແຈ້ງ​ໃຫ້​ຮູ້ເມື່ອ​ວັນ​ທີ 26 ສິງຫາ​ນີ້​ວ່າ ເຮືອບິນ​ສູ້​ຮົບ F-5 ຂອງ​ອີ​ຣານ​ລຳ​ໜຶ່ງ ໄດ້​ປະສົບ​ເຫດ​ຕົກ​ຢູ່​ໃນ​ເຂດ​ພາກ​ໃຕ້​ອີ​ຣານ ເປັນ​ເຫດ​ໃຫ້​ນັກ​ບິນ​ທີ່​ຂັບ​ຂີ່​ເຮືອບິນ​ນັ້ນ ເສຍ​ຊີວິດ 1 ຄົນ ໃນ​ຂະນະ​ທີ່​ນັກ​ບິນ​ສຳຮອງ​ສາມາດ ເອົາ​ຊີວິດ​ລອດ​ມາ​ໄດ້.

    ບົດ​ລາຍ​ງານ​ໃໝ່​ຫຼ້າ​ສຸດ ຂອງ​ບໍລິສັດ​ຄົ້ນຄວ້າ​ການ​ຕະຫຼາດ IHS Markit ໃຫ້​ຮູ້​ວ່າ ອີ​ຣານ ຊີ້​ເຮືອບິນ​ສູ້​ຮົບ F-5 ຈາກ ສ ອາ​ເມ​ຣິ​ກາ ກ່ອນ​ການ​ປະຕິວັດ​ອິ​ສລາມ ປີ 1979 ແລະ ປັດຈຸບັນ​ນີ້ ຍັງ​ມີ 48 ລຳ​ເຄື່ອນ​ໄຫວ​ຢູ່.

    ໃນ​ຂ່າວ​ອີກ​ດ້ານ​ໜຶ່ງ ສຳນັກ​ຂ່າວສານ Tasnim ລາຍ​ງານ​ວ່າ ຂໍ້​ມູນ​ໃໝ່​ຫຼ້າ​ສຸດ ຈາກ​ສະຖານ ທີ່​ເກີດ​ເຫດ​ແຜ່ນດິນ​ໄຫວ​ຢູ່​ໃນ​ພື້ນ​ທີ່​ແຂວງ ເຄີ​ມານ​ຊາ (ພາກ​ຕາເວັນຕົກ​ອີ​ຣານ) ຊຶ່ງ​ແທກ​ຄວາມ​ແຮງ ສັ່ນ​ສະເທືອນ​ໄດ້ 5,9 ອົງສາ​ຣິກ​ເຕີ ເມື່ອ​ວັນ​ທີ 26 ສິງຫາ ນັ້ນ​ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ​ຢ່າງ​ໜ້ອຍ 2 ຄົນ ແລະ ບາດເຈັບ​ອີກ 241 ຄົນ ໃນ​ນີ້​ມີ​ຫຼາຍ​ຄົນ​ບາດເຈັບ​ສາຫັດ.

    ກ່ອນ​ໜ້າ​ນັ້ນ ເມື່ອ​ເດືອນ​ພະຈິກ ປີ 2017 ໄດ້​ເກີດ​ເຫດການ​ແຜ່ນດິນ​ໄຫວ​ແຮງ 7,3 ອົງສາ​ຣິກ​ເຕີ ຢູ່​ໃນ​ພື້ນ​ທີ່​ແຂວງ​ເຄີ​ມານ​ຊາ ເຊັ່ນ​ກັນ ເປັນ​ເຫດ​ໃຫ້​ມີ​ຜູ້​ເສຍ​ຊີວິດ​ຢ່າງ​ໜ້ອຍ 530 ຄົນ ແລະ​ ບາດເຈັບ​ອີກ​ຫຼາຍ​ພັນ​ຄົນ.

 

ຂ່າວທີ່ກ່ຽວຂ້ອງ