ຂ່າວຫຼ້າສຸດ

ຄຳມ່ວນ ກຽມສົ່ງ 14 ປະເພດກີລາ ຮ່ວມຊຽງຂວາງ ເກມ

264 27 ສ.ຫ. 2018 ວົງຈອນກີລາ
ຄຳມ່ວນ ກຽມສົ່ງ 14 ປະເພດກີລາ ຮ່ວມຊຽງຂວາງ ເກມ

    ແຂວງ​ຄຳ​ມ່ວນ ຈັດ​ກອງ​ປະ­ຊຸມ​ປຶກ­ສາ​ຫາ­ລື​ໃນ​ການ​ກະກຽມ​ເຂົ້າ​ຮ່ວມ​ງານ​ມະ​ຫະ​ກຳ​ກິລາ​ແຫ່ງ​ຊາດ ຄັ້ງ​ທີ 11 ທີ່​ແຂວງ​ຊຽງ​ຂວາງ​ເປັນ​ເຈົ້າ­ພາບ ຂຶ້ນ​ວັນ​ທີ 21 ສິງ­ຫາ 2018 ຜ່ານ​ມາ ທີ່​ພະ​ແນກ​ສຶກ​ສາ​ທິ​ການ ແລະ ກີ­ລາ​ແຂວງ ມີ​ທ່ານ ຄຳ​ສີ ອຸດ​ທິ​ວົງ ຮອງ​ເຈົ້າ­ແຂວງ​ຄຳ​ມ່ວນ ປະ­ທານ​ສະ­ມາ­ຄົມ​ກີ­ລາ-ກາ​ຍະ​ກຳ​ແຂວງ ທ່ານ ຈັນ ບຸດ​ຜາ​ລິ​ວັນ ເຈົ້າ­ເມືອງ​ທ່າ​ແຂກ ແຂວງ​ຄຳ​ມ່ວນ ພ້ອມ​ດ້ວຍ​ຄະນະ ບັນ­ດາ​ຫົວ­ໜ້າ-ຮອງ​ຫົວ­ໜ້າ ພະ­ແນກ­ການ ຕາງ­ໜ້າ​ສະ­ຫະພັນ​ກິ­ລາ​ແຕ່​ລະ​ປະ­ເພດ ແລະ ພາກ­ສ່ວນ​ທີ່​ກ່ຽວ­ຂ້ອງ​ເຂົ້າ​ຮ່ວມ​ຢ່າງ​ພ້ອມ­ພຽງ.

    ໂອ­ກາດ​ນີ້ ທ່ານ ບຸນ​ປອນ ທອງ​ສຸ­ວັນ­ນະ​ລາດ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ​ແຂວງ​ຄຳ​ມ່ວນ ໃນ​ນາມ​ກອງ​ເລ­ຂາ​ສະ­ມາ­ຄົມ​ກີ­ລາ-ກາ​ຍະ​ກຳ​ແຂວງ ໄດ້​ລາຍ​ງານ​ໃຫ້​ຊາບ​ວ່າ: ໃນ​ການ​ກະ­ກຽມ​ເຂົ້າ​ຮ່ວມ​ງານ​ມະ​ຫະ​ກຳ​ກິ­ລາ​ແຫ່ງ​ຊາດ ຄັ້ງ​ທີ 11 ທີ່​ແຂວງ​ຊຽງ​ຂວາງ ລະ­ຫວ່າງ​ວັນ​ທີ 11-21 ພະ­ຈິກ​ນີ້ ທາງ​ຄະ­ນະ​ນຳ ແລະ ບັນ­ດາ​ສະ­ຫະ­ພັນ​ກີ­ລາ​ຕ່າງໆ ແມ່ນ​ໄດ້​ຕົກ­ລົງ​ເຫັນ​ດີ ແລະ ກຳ­ນົດ​ເອົາ 14 ປະ­ເພດ​ກີ­ລາ ຈາກ​ທັງ​ໝົດ 28 ປະ­ເພດ ທີ່​ແຂວງ​ເຈົ້າ­ພາບ​ບັນ­ຈຸ​ເຂົ້າ​ຮ່ວມ​ແຂ່ງ­ຂັນ ປະ­ກອບ​ມີ: ແລ່ນ-ລານ ເຕະ­ບານ​ຊາຍ ບານ­ສົ່ງ ກະ­ຕໍ້ ຍິງ​ປືນ ປິ່ງ​ປ່ອງ ເປ​ຕັງ ດອກ​ປິກ​ໄກ່ ເທ​ຄວັນ​ໂດ ຄາ​ຣາ​ເຕ​ໂດ ມວຍ​ສາ­ກົນ ມວຍ​ລາວ ຊ່ວງ​ເຮືອ ແລະ ກ໊ອຟ ໂດຍ​ມີ​ຈຳ­ນວນ​ພົນ ທັງ​ໝົດ 302 ຄົນ ລວມ​ທັງ​ຄະ­ນະ​ນຳ ຄະ­ນະ​ຄູ​ເຝິກ ແລະ ນັກ­ກີ­ລາ ເຊິ່ງ​ການ­ຈັດ­ຕັ້ງ​ປະ­ຕິ­ບັດ​ຂອງ​ແຕ່​ລະ​ປະ­ເພດ​ກີ­ລາ​ໃນ​ໄລ­ຍະ​ຜ່ານ​ມາ ແມ່ນ​ໄດ້​ມີ​ການ​ຈັດ​ແຂ່ງ­ຂັນ ເພື່ອ​ຄັດ​ເລືອກ​ນັກ­ກີ­ລາ​ພາຍ​ໃນ​ແຂວງ.

    ສຳ­ລັບ​ຜົນ­ງານ​ໃນ​ການ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ 10 ທີ່​ແຂວງ​ອຸ­ດົມ​ໄຊ ເປັນ​ເຈົ້າ­ພາບ​ເມື່ອ​ປີ 2014 ຜ່ານ​ມາ ແຂວງ​ຄຳ​ມ່ວນ ໄດ້​ສົ່ງ​ນັກກີ­ລາ​ເຂົ້າ​ຮ່ວມ​ແຂ່ງ­ຂັນ​ທັງ​ໝົດ 15 ປະ­ເພດ ຍາດ​ມາ​ໄດ້ 6 ຫຼຽນ​ຄຳ ສະ­ນັ້ນ ຊຽງ​ຂວາງ ເກມ​ຄັ້ງນີ້ ​ພວກ​ເຮົາ​ຄາດ​ວ່າ​ຈະ​ໃຫ້​ບັນ­ລຸ 7 ຫຼຽນ​ຄຳ ເຊິ່ງ​ເປັນ​ສິ່ງ​ທ້າ​ທາຍ​ທີ່​ສຸດ​ຂອງ​ກີ­ລາ​ແຂວງ​ຄຳ​ມ່ວນ​ຫຼາຍ ແຕ່​ກໍ່​ເຊື່ອ​ວ່າ​ຈະ​ສູ້​ຊົນ​ໃຫ້​ໄດ້​ຕາມ​ເປົ້າ​ໝາຍ.

ຂ່າວທີ່ກ່ຽວຂ້ອງ