ຂ່າວຫຼ້າສຸດ

ສະໂມສອນ ສອນທອງຄຳ ພ້ອມສົ່ງເສີມມວຍລາວສູ່ອາຊີບ

148 27 ສ.ຫ. 2018 ວົງຈອນກີລາ
ສະໂມສອນ ສອນທອງຄຳ ພ້ອມສົ່ງເສີມມວຍລາວສູ່ອາຊີບ

    ພິ­ທີ​ເປີດ​ສະ­ໂມ­ສອນ​ມວຍ​ລາວ ສອນ​ທອງ­ຄຳ ຢ່າງ​ເປັນ​ທາງ​ການ ຈັດ​ຂຶ້ນ​ວັນ​ທີ 22 ສິງຫາ 2018 ຜ່ານ​ມາ ທີ່​ສະ­ໂມ­ສອນ​ມວຍ​ລາວ ສອນ​ທອງ­ຄຳ ບ້ານ​ໂພນ​ສະ­ອາດ ເມືອງ​ໄຊ​ເຊດ​ຖາ ນະ­ຄອນ­ຫຼວງ​ວຽງ​ຈັນ ໂດຍ​ມີ​ທ່ານ ສາຍ­ສະ­ໝອນ ໄຊ​ຍະສອນ ປະ­ທານ​ສະ­ຫະ­ພັນ​ມວຍໂລກ ປະ­ທານ​ສະ­ຫະ­ພັນ​ມວຍອາ​ຊຽນ ແລະ ປະ­ທານ​ສະ­ຫະພັນ​ມວຍ​ແຫ່ງ​ຊາດ​ລາວ ທ່ານ ນິ​ລັດ­ດາ ສອນ​ທອງ­ຄຳ ປະ­ທານສະ­ໂມ­ສອນ​ມວຍ​ລາວ ສອນທອງ­ຄຳ ພ້ອມ​ດ້ວຍ​ຄະ­ນະ​ບໍ​ລິຫານ​ງານ​ສະ­ຫະ­ພັນ​ມວຍ​ແຫ່ງ​ຊາດ​ລາວ ຮອງ​ປະ­ທານ​ສະ​ໂມສອນ ຄູ​ເຝິກ ແລະ ນັກ­ກີ­ລາ ຕະຫຼອດ​ຮອດ​ນັກ­ສະ­ແດງ​ມວຍ​ລາວ ແລະ ນັກ­ສະ­ແດງ​ຟ້ອນ​ລາຍ​ດາບ​ຟັນ​ແທງ​ບໍ່​ເຂົ້າ ເຂົ້າ​ຮ່ວມ.

    ທ່ານ ນິ​ລັດ­ດາ ສອນ​ທອງ­ຄຳ ໃຫ້​ສຳ­ພາດ​ວ່າ: ເຫດ­ຜົນ​ທີ່​ສ້າງຕັ້ງ​ສະ­ໂມ­ສອນ​ມວຍ​ລາວ ສອນ​ທອງ­ຄຳ ຂຶ້ນ​ມາ​ໃໝ່​ໃນ​ຄັ້ງ​ນີ້​ ກໍ່​ຍ້ອນ​ຢາກ​ຈະ​ມີ​ສ່ວນ​ຮ່ວມ​ໃນການ​ປະ­ກອບ­ສ່ວນ​ເຂົ້າ​ໃນ​ການ​ພັດ­ທະ­ນາ​ວົງ​ການ​ກີ­ລາ​ມວຍ​ລາວ ເພື່ອ​ໃຫ້​ມີ​ທ່າ​ກ້າວ​ທີ່​ພົ້ນເດັ່ນ​ສາ­ມາດ​ທຽບ​ເທົ່າ​ກັບ​ບັນດາ​ປະ­ເທດ​ເພື່ອນ​ບ້ານ ໂດຍ​ສະເພາະ​ປະ­ເທດ​ໄທ ແລະ ມຽນ​ມາ ຄື​ຮູ້​ກັນ​ແລ້ວ​ວ່າ​ມວຍ​ລາວ​ມີ​ປະຫວັດ​ສາດ​ມາ​ຍາວ​ນານ ປະກອບ​ໃຫ້​ກອງ​ກຳ­ລັງ​ຕຳ­ຫຼວດ ແລະ ທະ­ຫານ ໃນ​ການ​ຕໍ່­ສູ້​ກູ້​ຊາດ ແລະ ສາ­ມາດ​ປົດ​ປ່ອຍ­ປະ​ເທດ​ໃນ​ເມື່ອ​ກ່ອນ​ຢ່າງ​ພິ­ລະ​ອາດຫານ ເຮັດ​ໃຫ້​ບ້ານ​ເມືອງ​ລາວ​ເຮົາ​ມີ​ຄວາມ​ສະ­ຫງົບ ມີ​ຄວາມ​ຈະ­ເລີນ​ຮຸ່ງ­ເຮືອງ ແລະ ມີ​ການ​ພັດ­ທະ­ນາ​ປະ­ເທດ​ຊາດ ​ຢ່າງ​ເຕີບ​ໃຫຍ່​ຂະ­ຫຍາຍ­ຕົວ​ຢ່າງ​ກວ້າງຂວາງ​ ໃນ​ເມື່ອ​ກ່ອນ​ຈົນ​ມາ​ຮອດ​ປັດ­ຈຸ­ບັນ ສະ­ນັ້ນ ໃນ​ນາມ​ເປັນ​ຜູ້ກໍ່­ສ້າງ​ມີ​ຄວາມ​ພາກ­ພູມ​ໃຈ​ເປັນ​ຢ່າງ​ສູງ ​ທີ່​ມີ​ສ່ວນ​ຮ່ວມ​ປະ­ກອບສ່ວນ​ພັດ­ທະ­ນາ​ວົງ​ການ​ກີ­ລາ​ມວຍ​ລາວ ໃຫ້​ເຊື່ອ​ໝັ້ນ​ວ່າ​ຈະສຸມ​ທຸກ​ກຳ­ລັງ​ສຸດ​ຄວາມ​ສາມາດ ​ຈະ​ສ້າງ​ນັກ​ມວຍ​ລາວ​ໃນ​ສາຍ­ເລືອດ​ໃໝ່ ເພື່ອ​ກ້າວ​ເປັນ​ນັກ​ມວຍ​ອາ­ຊີບ​ໃນ​ອະ­ນາ­ຄົດ​ໃຫ້ໄດ້ ພ້ອມ​ທັງ​ຈະ​ສົ່ງ​ເຂົ້າ​ຮ່ວມແຂ່ງ­ຂັນ​ລາຍ­ການ​ຕ່າງໆ ທັງ​ພາຍ​ໃນ ແລະ ຕ່າງ­ປະ­ເທດ​ເພື່ອ ສ້າງ​ກຽດ ແລະ ຊື່​ສຽງ​ໃຫ້​ແກ່ບ້ານ​ເກີດ​ເມືອງ​ນອນ ກໍ່​ຄື ປະເທດ​ຊາດ ເວົ້າ​ລວມ​ ເວົ້າ​ສະເພາະ​ແລ້ວ ໃນ​ທ້າຍ​ປີ​ນີ້​ຈະ​ມີການ​ແຂ່ງ­ຂັນ​ມວຍ​ລາວ ງານມະ​ຫະ​ກຳ​ກີ­ລາ​ແຫ່ງ​ຊາດ ຫຼື ຊຽງ​ຂວາງ ເກມ 2018 ສອງ​ນັກ­ກີ­ລາ​ມວຍ​ຂອງ​ສະ­ໂມ­ສອນ ສອນ​ທອງ­ຄຳ ພວກ​ເຮົາ​ກໍ່​ຈະ​ໄດ້​ໄປ​ຮັບ​ໃຊ້​ໃຫ້​ບັນ­ດາ​ແຂວງ ແລະ ກະ­ຊວງ ຕື່ມ​ອີກ.

    ໃນ​ການ​ສ້າງ​ສະ­ໂມ­ສອນ​ຂຶ້ນ​ມາ​ໃໝ່​ໃນ​ຄັ້ງ​ນີ້ ແມ່ນ​ໄດ້​ໃຊ້​ງົບປະ­ມານ​ເກືອບ 200 ລ້ານ​ກີບ ໄດ້​ມີ​ການ​ຈັດ​ຊື້​ອຸ­ປະ­ກອນ​ທີ່​ໄດ້ມາດ­ຕະ­ຖານ​ລະ­ດັບ​ສາ­ກົນ ເປັນຕົ້ນ​ແມ່ນ​ເຄື່ອງ​ກີ­ລາ​ຟິດ​ເນັດ ອຸປະ­ກອນ​ຊ້ອມ​ມວຍ ກໍ່​ຄື ເວ­ທີມວຍ ກະ­ສອບ​ຊາຍ ນວມ ຜ້າ​ພັນ​ມື ຢາ​ນວດ ແລະ ອື່ນໆ​ອີກ ເຊິ່ງ​ມີ​ນັກ­ກີ­ລາ​ມວຍ​ຮຸ່ນ​ໃໝ່ ເຂົ້າ​ຮ່ວມ​ຊ້ອມ​ມວຍ​ຢູ່​ສະ­ໂມ­ສອນ​ຢ່າງ​ຫຼວງ­ຫຼາຍ ຖ້າ​ຫາ​ກວ່າ​ບັນດາ​ທ່ານ ແລະ ພໍ່-ແມ່​ຜູ້​ປົກ­ຄອງ​ຄົນ​ໃດ​ສົນ­ໃຈ​ຢາກ​ຈະ​ນຳ​ເອົາ​ລູກຫຼານ​ມາ​ເຝິກ­ຊ້ອມ ສາ­ມາດ​ມາພົວ­ພັນ​ນຳ​ສະ­ໂມ­ສອນ​ໄດ້​ຕະຫຼອດ​ເວ­ລາ ຍິນ​ດີ​ຕ້ອນ­ຮັບ​ທຸກ​ທ່ານ.

ຂ່າວທີ່ກ່ຽວຂ້ອງ