ຂ່າວຫຼ້າສຸດ

ລັດຖະບານ ສຸມໃສ່ແກ້ໄຂສະພາບການຕ້ານໄພນ້ຳຖ້ວມ ໃນທົ່ວປະເທດ

395 27 ສ.ຫ. 2018 ຂ່າວໜ້າ​ໜຶ່ງ
ລັດຖະບານ ສຸມໃສ່ແກ້ໄຂສະພາບການຕ້ານໄພນ້ຳຖ້ວມ ໃນທົ່ວປະເທດ

    ກອງ​ປະຊຸມ​ລັດຖະບານ​ສະໄໝ​ສາມັນ ປະຈຳ​ເດືອນ​ສິງຫາ 2018 ຈັດ​ຂຶ້ນ​ວັນ​ທີ 22-23 ສິງຫານີ້ ໂດຍ​ການ​ເປັນ​ປະທານ​ຂອງທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ມີ​ບັນດາ​ຮອງ​ນາຍົກ ຄະນະ​ລັດຖະບານ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

    ທ່ານ ຈະເລີນ ເຢຍ​ປາວ​ເຮີ ລັດຖະມົນຕີ​ປະຈຳ​ສຳນັກງານ​ນາຍົກ ໂຄສົກ​ລັດຖະບານ ໄດ້​ຖະແຫຼງ​ຂ່າວ​ຕໍ່​ສື່​ມວນ​ຊົນ​ໃນ​ວັນ​ທີ 24 ສິງຫາ 2018 ທີ່​ສຳນັກງານ​ນາຍົກລັດຖະມົນຕີ ວ່າ: ກອງ​ປະຊຸມ ໄດ້​ສັງເກດ​ຕີ​ລາຄາ​ກ່ຽວ​ກັບ​ສະພາບ​ການ​ຕ້ານ​ໄພ​ນ້ຳ​ຖ້ວມ​ໃນ​ທົ່ວ​ປະເທດ ເປັນຕົ້ນ​ແມ່ນ​ ການ​ແກ້​ໄຂ​ໄພພິບັດ​ຢູ່​ເມືອງ​ສະໜາມ​ໄຊ ແຂວງ​ອັດ​ຕະ​ປື.

    ໃນ​ກາງ​ເດືອນກໍລະກົດ ເຖິງ​ກາງ​ເດືອນສິງຫາ 2018 ພະຍຸ​ເຊີນ​ຕີນ ແລະ ເບ​ປິນ​ກາ ໄດ້​ພັດ​ຜ່ານ​ເຂົ້າ ​ສປປ ລາວ ໄດ້​ເຮັດ​ໃຫ້​ຫຼາຍ​ແຂວງ​ເກີດ​ໄພ​ນ້ຳ​ຖ້ວມ ແລະ ດິນ​ເຈື່ອນ ສົ່ງ​ຜົນ​ກະທົບ​ໂດຍ​ກົງ​ຕໍ່​ປະຊາຊົນ ຢູ່​ໃນ 14 ແຂວງ ແລະ ນະຄອນຫຼວງ​ວຽງ​ຈັນ 80 ເມືອງ 1.438 ບ້ານ ໄດ້​ສ້າງ​ຄວາມ​ເສຍ​ຫາຍ​ຕໍ່​ພື້ນຖານ​ໂຄງ​ລ່າງ​ເສດຖະກິດ-ສັງຄົມ ເປັນຕົ້ນ ເສັ້ນທາງ ຂົວ ພື້ນ​ທີ່​ການ​ຜະລິດ​ກະສິກຳ ແຫຼ່ງ​ນ້ຳ​ກິນ ນ້ຳ​ໃຊ້ ໂຮງຮຽນ ໂຮງໝໍ ໄຟຟ້າ ແລະ ອື່ນໆ ສຳລັບ​ມູນ​ຄ່າ​ຄວາມ​ເສຍ​ຫາຍ​ທັງ​ໝົດ ແມ່ນ​ຍັງ​ຢູ່​ໃນ​ໄລຍະ​ເກັບ​ກຳ​ຂໍ້​ມູນ ຈິ່ງ​ຍັງ​ບໍ່​ທັນ​ສາມາດ​ປະ​ເມີນ​ຜົນ​ໄດ້​ເທື່ອ ຮ້າຍ​ແຮງ​ກວ່າ​ໝູ່ແມ່ນ​ກໍລະນີ​ໄພພິບັດ​ຄູ​ກັ້ນ​ນ້ຳຂອງ​ສັນ​ເຂື່ອນໄຟຟ້າ​ເຊ​ປຽນ-ເຊ​ນ້ຳ​ນ້ອຍ​ແຕກ ຢູ່​ເມືອງ​ສະໜາມ​ໄຊ ແຂວງ​ອັດ​ຕະ​ປື ເຊິ່ງ​ໄດ້​ກໍ່​ຄວາມ​ເສຍ​ຫາຍ​ຢ່າງ​ໃຫຍ່​ຫຼວງ​ໜັກໜ່ວງ ຕໍ່​ປະຊາຊົນ​ໃນ​ເຂດ​ດັ່ງກ່າວ.

    ຕໍ່​ບັນຫາ​ດັ່ງກ່າວ ກອງ​ປະຊຸມໄດ້​ຊີ້​ນຳ​ໃຫ້ທຸກ​ກະຊວງ ອົງການ ແລະ ອຳນາດ​ການ​ປົກຄອງ​ທ້ອງຖິ່ນ​ທຸກ​ຂັ້ນ ຕ້ອງ​ເພີ່ມ​ທະວີ​ຄວາມ​ຮັບຜິດຊອບ ແລະ ເປັນ​ເຈົ້າ​ການ​ແກ້​ໄຂ​ຄື: ສຳລັບ​ການ​ແກ້​ໄຂ​ບັນຫາ​ໄພພິບັດ​ທີ່​ເມືອງ​ສະໜາມ​ໄຊ ແມ່ນ​ໃຫ້​ຄະນະ​ສະເພາະ​ກິດ​ເພື່ອ​ແກ້​ໄຂ​ໄພພິບັດ​ລະດັບ​ຊາດ ເອົາໃຈໃສ່​ໃນ​ການ​ປັບປຸງ​ວຽກ​ງານ​ບໍລິຫານ​ຈັດການ ໃຫ້​ແຕ່ງຕັ້ງ​ພະນັກງານ​ຈາກ​ຂະແໜງການ​ທີ່​ກ່ຽວຂ້ອງ ລົງ​ໄປ​ປະຈຳ​ຢູ່​ພາກ​ສະໜາມ​ເປັນ​ແຕ່​ລະ​ມື້ ເພື່ອ​ແກ້​ໄຂ​ບັນຫາ​ຕ່າງໆ​ໃຫ້​ທັນ​ການ ໂດຍ​ແບ່ງ​ຄວາມ​ຮັບຜິດຊອບ​ຢ່າງ​ຈະແຈ້ງ ສ່ວນ​ບັນຫາ​ໃດ​ທີ່​ແກ້​ໄຂ​ບໍ່​ໄດ້ແມ່ນ​ໃຫ້​ຄົ້ນຄວ້າ​ປຶກສາ​ຫາລື ແລະ ຕົກລົງ​ກັນ​ຈັດ​ຕັ້ງ​ປະຕິບັດ​ຢ່າງ​ເປັນ​ເອກະ​ພາບ ສຳລັບ​ການ​ນຳ​ໃຊ້​ເງິນ ແລະ ເຄື່ອງ​ຊ່ວຍເຫຼືອ​ຕ່າງໆ​ນັ້ນ ຕ້ອງ​ຮັບປະກັນ​ໃຫ້​ຖືກຕ້ອງ ແລະ ໄປ​ເຖິງ​ເປົ້າໝາຍ ມີ​ຄວາມ​ໂປ່ງ​ໃສ ສາມາດ​ກວດ​ສອບ​ໄດ້ ພ້ອມ​ດຽວ​ກັນ​ນັ້ນ ໃຫ້​ສຸມ​ທຸກ​ກຳລັງ​ເຂົ້າ​ໃສ່​ການ​ສ້າງ​ທີ່ຢູ່​ອາໄສຂອງ​ປະຊາຊົນ ​ທີ່​ໄດ້​ຮັບ​ຜົນ​ກະທົບ​ໃຫ້​ສຳເລັດ​ໂດຍ​ໄວ ເພາະ​ໄລຍະ​ນີ້​ແມ່ນ​ລະດູຝົນ ຕໍ່​ບັນຫາ​ອຸ​ທົກ​ກະ​ໄພ​ຄູ​ກັ້ນ​ນ້ຳ​ເຊ​ປຽນ-ເຊ​ນ້ຳ​ນ້ອຍ​ແຕກ ໃນ​ຄັ້ງ​ນີ້ ດ້ວຍ​ຄວາມ​ເປັນ​ຫ່ວງ​ເປັນ​ໄຍ​ຂອງ​ລັດຖະບານ ຈຶ່ງ​ໄດ້​ແຕ່ງຕັ້ງ​ຄະນະ​ສືບສວນ-ສອບ​ສວນ​ຂຶ້ນ ໂດຍ​ໄດ້​ສົມທົບ​ກັບ​ຄະນະ​ຊ່ຽວຊານ​ຈາກ​ສາກົນ ເພື່ອ​ສຶກ​ສາຄົ້ນຄວ້າ ແລະ ເກັບ​ກຳ​ຂໍ້​ມູນ​ຕ່າງໆ ຫາ​ສາຍເຫດ​ຂອງ​ການ​ແຕກ​ຫັກຢ່າງ​ພາວະ​ວິໄສ ຖືກຕ້ອງ​ກັບ​ຄວາມ​ເປັນ​ຈິງ.

    ສຳລັບ​ການ​ແກ້​ໄຂ​ໄພ​ນ້ຳ​ຖ້ວມ​ທີ່​ເກີດ​ຂຶ້ນ​ໃນ​ທົ່ວ​ປະເທດ ກ່ອນ​ອື່ນ​ໝົດ ຮັບປະກັນ​ຄວາມ​ປອດ​ໄພ​ທາງ​ດ້ານ​ຊີວິດ ແລະ ຊັບ​ສິນ​ຂອງ​ປະຊາຊົນ ຖື​ເອົາ​ເປັນ​ວຽກ​ບຸລິມະສິດ ໃນ​ການ​ເຄື່ອນ​ຍ້າຍ ແລະ ອົບ​ພະ​ຍົບ​ປະຊາຊົນບ່ອນ​ຖືກ​ນ້ຳ​ຖ້ວມ ມາ​ຢູ່​ບ່ອນ​ທີ່​ປອດ​ໄພ ເພື່ອ​ຫຼີກ​ລ້ຽງ​ການ​ເສຍ​ຊີວິດ ແລະ ເສຍ​ຫາຍ​ຊັບ​ສິນ ພາຍຫຼັງ​ນ້ຳ​ລົງ​ແລ້ວ ຕ້ອງ​ມີ​ການ​ວາງ​ແຜນ​ລະອຽດ ຊັດ​ເຈນ ຟື້ນ​ຟູ​ການ​ຜະລິດ ແລະ ຊີວິດ​ການ​ເປັນ​ຢູ່​ຂອງ​ປະຊາຊົນ ໃຫ້​ກັບ​ມາ​ເປັນ​ປົກກະຕິ​ໂດຍ​ໄວ ເອົາໃຈໃສ່ໃນ​ການແຈກຢາຍ​ເຄື່ອງ​ຊ່ວຍເຫຼືອ​ບັນເທົາ​ທຸກ ໃຫ້​ໄປ​ເຖິງ​ປະຊາຊົນ​ຢ່າງ​ແທ້​ຈິງ ແລະ ທັນ​ການ.

ຂ່າວທີ່ກ່ຽວຂ້ອງ